1. ¿Imaraykun llapallanchis necesitanchis consolasqa kayta?

RUNAKUNAQA imaymana llakipin tarikusunman: desgraciakunapi, onqoykunawan, machuyaywan, familianchis wañupun, otaq runamasinchis mana allinta tratawanchis. Chaymi necesitanchis consolasqa kayta. Jinaspapas runakunaqa aswan millaymanmi tukupushanku. Chaywanmi yachanchis ‘tukukuy p’unchaykunapi’ tiyashasqanchista, mosoq pacha cercaña kasqantapas (2 Tim. 3:1). Wakinninchisqa yaqapaschá askha watakunaña suyashanchis Diospa promesankuna junt’akunanta, imaymana problemakunapitaq tarikushanchis. Chhaynaqa, ¿imaynatan consolasqa kasunman?

2, 3. a) ¿Imatan yachanchis Habacucmanta? b) ¿Imapaqmi Habacuc librota estudiasun?

² Llakikuyninchispi consolasqa kanapaq Habacuc librota  qhawarisun. Habacuc sutiqa yaqapaschá “munakuywan abrazakuq” ninanta nin. Yaqapaschá chayqa significan Jehová Dios abrazawaspanchis consolawasqanchista, otaq serviqninkuna Diosmanta mana kacharikuspa jap’ipakusqankuta. Bibliaqa manan askhatachu Habacucpa vidanmanta willan, chaywanpas Habacuc libroqa allintan kallpachawanchis. Habacucqa Diosmanmi wakin tapuykunata ruwaran paytaq kutichiran, kamachirantaq rimasqankuta Bibliapi qelqananpaq. Diosqa yacharanmi Habacucpa qelqasqan allinninchispaq kananta (Hab. 2:2).

³ Bibliapiqa Habacucwan Jehová Dioswan parlasqankun rijurin, chay kutipin Habacucqa sinchi llakisqa kasharan. Habacuc libroqa qelqasqa karan kallpachawananchispaq, aguantananchispaq, suyakuyniyoq kananchispaqwan (Rom. 15:4). ¿Imaynatan Habacuc libro sapankanchista yanapawasunman? 1) Entiendechiwanchismi imaynatas Jehová Diospi confiasqanchista rikuchisunman chayta. 2) Sut’itan rikuchiwanchis ima llakipiña tarikuspapas sonqonchispi thaj kayta atisqanchista.

4. ¿Imaraykun Habacuc sinchi llakisqa kasharan?

⁴ (Leey Habacuc 1:2, 3). Habacucqa sinchi sasa tiempopin kausaran. Yaqa llapa runakunan millayta kausaranku, chaywanmi payqa sinchita llakikuran. Tukuy ladopin Israel runakunaqa mana khuyapayanakuspa tratanakuranku. Habacucqa tapukuranchá: “¿Jayk’aqtaq kay millay kausayri tukupunqa? ¿Imaraykun Jehová Dios mana imatapas ruwanchu?”, nispa. Mana imata ruwayta atispan, Diosta mañakuran imallatapas ruwananpaq. Yaqapaschá Habacucqa piensaran Jehová Dios llaqtanmanta manaña preocupakunanpaq, otaq nishuta tardashananpaq. Qanri, ¿jayk’aqllapas chhaynata piensarankichu?

5. ¿Imatan yachanchis Habacuc libromanta? (15 paginapi fotota qhaway.)

⁵ Habacucqa confiashallaranmi Jehová Diospi promesankunapipas. Chaymi Diosman willakuran imachus llakichisqanta imamanta iskayasqantapas. Habacucqa manan entienderanchu imarayku Jehová Dios unay tiempo jinallata qhawaran mana allin kausay kananta, imarayku permitiran Habacucpa sufrisqantapas. Jehová Diosmi Habacucta niran imachus llakichisqanta qelqananpaq. ¿Imatan chaymanta yachanchis? Diosqa munanmi mana manchakuspa imachus llakichiwasqanchista imamanta iskayasqanchistapas willakunanchista (Sal. 50:15; 62:8). Proverbios 3:5 texto niwanchis: “Tukuy sonqoykiwan Señor Diosman jap’ipakuy, amataq qan kikiykiq yuyayniykimanqa  k’askakuychu”, nispa. Habacucqa chay textopi nisqanman jinan ruwaran.

6. ¿Imaraykun Diosman willakunanchis imayna sientekusqanchista?

⁶ Habacucqa Jehová Diospin confiaran, chaymi mana manchakuspa imachus llakichisqanta willakuran. Payqa manan llakikuynintaqa sonqollanpichu jap’ikuran, aswanmi willakuran. Chay ruwasqanqa allin ejemplon noqanchispaq. Jehová Diosqa uyarinmi mañakusqanchista, chaymi invitawanchis paypi confiananchispaq, chaytaqa ruwanchis imachus llakichiwasqanchista payman willakuspan (Sal. 65:2). Chayta ruwaspaqa rikusunmi imaynatachus mañakusqanchisman kutichimusqanta. Chhaynapin reparasun Jehová Diospa munakuwasqanchista (Sal. 73:23, 24). Diosqa yanapawasunmi problemanchista paypa qhawarisqanta jina qhawarinanchispaq, chhaynapiqa manan nishuta llakikusunchu. Chay jinaqa Diosman imayna sientekusqanchista willakuspan rikuchinchis paypi confiasqanchista.

7. ¿Phiñakuranchu Jehová Dios Habacuc llakikuyninta willasqanmanta?

⁷ (Leey Habacuc 1:5-7). Diosman tukuy ima llakichisqanta willakusqan qhepamanqa Habacucqa tapukuranpaschá: “¿Diosqa phiñakunqapaschá noqawan?”, nispa. Jehová Diosqa munakuq taytan, chaymi entienderan Habacucpa imayna sientekusqanta. Diosqa rikusharanmi Habacucpa sufrisqanta paypa yanapayninta mañakusqantapas. Chaymi mana phiñakuranchu, aswanmi willaran pisi tiempollamanta chay millay Israel runakunata castigananpaq. Yaqachus jina Diosqa Habacucman ñaupaqta chayta willaran.

8. ¿Imaraykun Habacuc admirakuran Diospa willasqanwan?

⁸ Jehová Diosqa Habacucmanmi willaran mana kasukuq Israel runakunata castigananta. Jehová Dios “kay p’unchaykunapi ruwasaq” nisqanwanqa rimasharan Habacucpa kausasqan tiempopi otaq wiñaymasinkunaq tiemponpi juicionta apamunanpaq. Habacucqa admirakuranchá Diospa nisqanwan. ¿Imarayku? Babilonia runakuna sinchi millay kasqanrayku. ¿Imaraykun Jehová Dios chay sinchi millay runakunawan llaqtanta castigayta munaran? Sichus noqanchis chayta uyarisunman karan chayri, ¿imaynan sientekusunman karan?

9. ¿Imakunatan Habacuc Diosta tapuran?

⁹ (Leey Habacuc 1:12-14, 17). Habacuc manaña allintachu entienderan imaraykus Jehová Dios Israel llaqtata Babilonia llaqtawan castigayta munaran chaypas, humilde kaspan Jehová Diospi confiashallaran, chaymi niran: “Qanmi pakakunay Qaqa kanki”, nispa (Deut. 32:4; Is. 26:4). Chaymi mana manchakuspa tapushallaran: “¿Imaraykun jinallata qhawanki aswan millayman Israel llaqta tukunanta, runakunapas astawanraq sufrinanta? ¿Manachu imallatapas ruwawaq? ¿Tukuy atiyniyoqña kanki chaypas imaraykun ch’inlla qhawanki millay  kausay kananta? Qanqa ‘sinchi ch’uyan kanki, chaymi millay kaqtaqa mana jinallatachu qhawanki’”, nispa.

10. ¿Imaraykun mayninpi Habacuc jina sientekusunman?

¹⁰ Noqanchispas uyarinchismi Jehová Diospa niwasqanchista. Simin qelqatan leenchis estudianchis, Diospi confianchis, chaykunawanmi iñiyninchispi aswan fuerte kanchis. Chaymantapas llaqtanpi Diospa promesankunamanta uyarinchis. Chhaynaña kaqtinpas yaqapaschá Habacuc jina mayninpi sientekusunman, jinaspa tapukusunman: “¿Jayk’aqmi llakikuyninchis tukukapunqa?”, nispa. Qatimuqpi yachasun Habacucpa ruwasqanmanta, imatas chaymanta yachasunman chaytawan.

11. ¿Imatan Habacuc pacienciawan suyakuran?

¹¹ (Leey Habacuc 2:1). Jehová Dioswan parlasqan qhepamanqa thajmi Habacucqa sientekuran. Chaymi tukuy sonqonwan confiaran Jehová Dios tiempollanpi juicionta apamunanpaq. Chayraykun askha kutipi niran: “Noqaqa chay p’unchayta pacienciawan suyakusaq”, nispa (Hab. 3:16). Diosta serviq runakunapas pacienciawanmi suyaranku tiempollanpi juicionta apamunanta. Paykunaq ejemplonkun kallpachawanchis noqanchispas pacienciawan suyakunanchispaq (Miq. 7:7; Sant. 5:7, 8).

12. ¿Imatan Habacucpa ejemplonmanta yachasunman?

¹² ¿Imatan Habacucpa ejemplomanta yachasunman? 1) Ima problemapiña tarikuspapas Jehová Diosmantan mañakushanallanchis. 2) Bibliawan llaqtanwan ima yachachiwasqanchistan kasukunanchis. 3) Pacienciawanmi suyananchis Jehová Dios tiempollanpi llakikuyninchiskunata tukuchinanta. Sichus chayta ruwasun chayqa, Habacuc jinan thaj sientekusun. Jinaspapas suyakuyninchisqa yanapawasunmi imapiña tarikuspapas pacienciayoq kananchispaq kusisqa kananchispaq, Diospi confiananchispaqpas (Rom. 12:12).

13. ¿Imaynatan Jehová Dios Habacucta consolaran?

¹³ (Leey Habacuc 2:3). Habacucqa pacienciawanmi suyaran Diospa juicion tiempollanpi chayamunanta, chayta rikuspaqa kusikuranchá Jehová Diosqa. Diosqa rikusharanmi Habacucpa sufrisqanta, chaymi munakuywan consolaran, willarantaqmi pisi tiempollamanta llakikuyninkuna chinkapunanta. Kaytapas nishanman jinan karan: “Habacuc pacienciawan suyaway, noqapi confiay, tardamunanpaqña qhawarikunman chaypas, tiemponpipunin chayamunqa”, nispa. Diosqa yuyarichiranmi jayk’aqchus  promesanta junt’ananta pacienciawan suyakunantapas, junt’arantaqmi prometesqanta.

14. ¿Imata ruwananchispaqmi decidisqa kashananchis ima llakipiña tarikuspapas?

¹⁴ Sichus pacienciawan Diospa juicion chayamunanta suyakusun, paypa nisqantapas allinta uyarisun chayqa, thajmi sientekusun imapiña tarikuspapas. Jesuspa nisqan jina, manan preocupakunanchischu jayk’aqchus Diospa promesankuna junt’akunanmantaqa (Hech. 1:7). Jehová Diospin confiananchis, payqa yachanmi jayk’aqchus juicionta apamunanta. Chhaynaqa ama pisipasunchu, aswanpas pacienciayoq kasun, humilde kasun, Diospipas iñishallasun. Diospa juicion chayamunankama tiemponchista allinta utilizasun, atisqanchisman jinataq Diosta servisun (Mar. 13:35-37; Gál. 6:9).

15, 16. a) ¿Ima sumaq promesakunan kan Habacuc libropi? b) ¿Imatan chay promesakuna yachachiwanchis?

¹⁵ Jehová Diosmi prometeran: “Chanin runan ichaqa Diospi iñispallapuni kausanqa”, nispa. Nillarantaqmi: “Kay pachaqa Señor Diospa qhapaq atiyninta reqsiq runakunawan junt’a kanqa”, nispa (Hab. 2:4, 14). Chaypi nisqan jina, Jehová Diosmi wiñay kausayta qonqa paypi confiaq pacienciakuq runakunaman.

 ¹⁶ Habacuc 2:4 textopi nisqanqa ancha importanten, chaymi apóstol Pablo kinsa kutita chaypi nisqanta cartankunapi qelqaran (Rom. 1:17; Gál. 3:11; Heb. 10:38). Ima llakipiña tarikuspapas Jehová Diospaq junt’aq sonqo kasun chayqa, rikusunmi Diospa promesankuna junt’akusqanta. Paypa manan munanchu llakikuyninchispi piensananchista, aswanpas jamuq tiempopi sumaq kausay kananpi piensananchistan munan.

17. ¿Imatan Jehová Dios ruwanqa paypi confiaqtinchis?

¹⁷ Jehová Diosqa prometenmi paypi confiaq runakunaman wiñay kausayta qonanpaq, chaytan Habacuc libropi yachanchis. Chhaynaqa Jehová Diospi astawan confiashallasun ima problemapiña tarikuspapas. Jehová Diosqa Habacucta jina prometewanchis yanapawananchispaq salvawananchispaqpas. Diosqa munakuywanmi niwanchis paypi confiananchispaq, pacienciawan paypa gobiernonta suyakunanchispaqpas. Chay tiempopin Diosta serviq runakunaqa kusisqa thajpi tiyanqaku (Mat. 5:5; Heb. 10:36-39).

18. ¿Imaynan Habacuc sientekuran Jehová Diospa nisqanwan?

¹⁸ (Leey Habacuc 3:16-19). Jehová Diospa nisqanqa anchatan Habacucta kallpacharan. Payqa Jehová Dios llaqtanrayku ruwasqankunapin piensaran, chaymi yanaparan Diospi astawan confiananpaq. Yacharanmi aguantananraq kasqanta, ¡chaywanpas seguron kasharan pisi tiempollamanta Diospa juicion chayamunanta! Chayta yachaymi payta consolaran. Habacucqa manañan imamantapas iskayaranñachu, aswanmi tukuy sonqonwan confiaran Jehová Dios salvananpi. Imayna sientekusqantan 18 versiculopi willaran, chaypin nin: “Noqaqa Señor Dioswanmi kusikusaq, Qespichiqniy Dioswanmi q’ochukusaq”, nispa. Chay rimasqan simikunaqa may munaypunin karan. ¡Habacucpa ejemplonqa anchatan kallpachawanchis! Diosqa manan prometewallanchischu jamuq tiempopi sumaq kausay kananta, aswanpas imaymanatan ruwashan prometesqanta junt’ananpaq.

19. ¿Imatan ruwananchis Habacucta jina Jehová Dios consolawananchispaq?

¹⁹ Jehová Diosninchispin confiananchis, chaytan Habacuc libropi yacharanchis (Hab. 2:4). Jehová Diospi confiashanallapaqqa kaykunatan ruwashanallanchis: 1) Diosmantan mañakushanallanchis, tukuy llakikuyninchiskunatan willakunanchis. 2) Bibliapi imatachus Jehová Dios niwasqanchistan entiendenanchis, kasukunanchistaqmi llaqtanpi kamachikuykunata. 3) Pacienciawanmi suyananchis Jehová Dios tiempollanpi promesankunata junt’ananpaq. Chaytan Habacucqa ruwaran. Jehová Dioswan rimayta qallarishaspaqa sinchi llakisqan kasharan, chaymantan ichaqa kusisqa kallpachasqa ima sientekuran. Sichus Habacucpa ejemplonta qatikusun chayqa, Jehová Diosmi noqanchistapas sumaqta consolawasun. ¡Kay millay pachapiqa Jehová Diosllan chay jinataqa consolawasunman!