1-3. a) ¿Imatan lliupas allinta cuidananchis? b) ¿Ima sasachakuymi kan waj simipi yanapakuqkunapaq? Chayrayku, ¿ima tapuykunatan kutichisunchis? (Kay paginapi fotota qhaway.)

BIBLIAN willaran allin willakuykuna “llapa nacionkunaman, ayllukunaman, rimaykunaman, llaqtakunamanwan” chayananmanta (Apo. 14:6). Chay ruwaypin askha iñiqmasinchiskuna yanapakushanku. Wakinqa misionero jinan llank’ashanku, wakintaq may llaqtapichus predicaqkunata astawan necesitakushan chaypi yanapakushanku, wakintaq tiyasqanku llaqtapi waj simi rimaq iñiq t’aqapi yanapakushanku.

² Lliupas allintan cuidananchis Dioswan amigo kayninchista, familianchistapas yanapananchismi payman allin k’askasqa kanankupaq (Mat. 5:3). Chaypaqmi allinta estudiananchis Bibliata juj qelqanchiskunatawan. Mayninpin ichaqa chay ruway sasa kanman tiempo mana  aypawasqanchisrayku. Ichaqa aswan sasaraqmi kanman waj simi rimaq iñiq t’aqapi kaqkunapaqqa.

³ Paykunaqa juj simita yachanankumantapas estudianankun Diospa qowasqanchis yachachikuykunatapas (1 Cor. 2:10). ¿Imaynatan chayta ruwankuman chay simita mana allinta entiendeshaspa? ¿Imaynatan wawankumanpas sonqonkuman chayananpaq jina Diosmanta yachachinkuman?

4. ¿Imaynapin sasa kanman Diospa amigon kay? ¿Iman pasaran Nehemiaspa tiemponpi?

⁴ Leesqanchis Biblia mana entiendesqanchis simipi kashanman chayqa, sasan kanman Diospa amigon kasqanchista cuiday. Chaymi pasaran Nehemiaspa tiemponpi. Chaypin Jerusalén llaqtapi wakin Israel runakunaq wawankuqa mana entienderankuchu hebreo simita (leey Nehemías 13:23, 24). Chaymi manaña atirankuchu Diospa simin qelqakuna estudiayta, chhaynapitaq manaña Dioswan jujllachasqa kaytapas atirankuchu (Neh. 8:2, 8).

5, 6. ¿Iman pasashan wakin iñiqmasinchiskunaq wawankuwan? ¿Imanaqtinmi chay pasashan?

⁵ Wakin iñiqmasinchiskunaq wawankupas pisi kallpayashankus iñiyninkupi, waj simi rimaq iñiq t’aqapi kasqankurayku. Manataq juñunakuypi yachachikusqanta allintachu entiendenku chayqa, manas Diospa yachachikuyninkuna sonqonkuman chayashanchu. Familiantin Sudamérica ladoman ripuq Pedro iñiqmasinchismi nin: “Diosmanta yachachikuykunaqa sonqoykimanpunin chayanan”, nispa ^[1] (14 paginapi willakuyta qhaway) (Luc. 24:32).

⁶ Waj simipi leeqtinchisqa manapaschá sonqonchisman chayanmanchu chay leesqanchis. Chaymantapas sasachakuspataq jujkunawanpas parlashasunman chayqa, sayk’upusunmanmi, chhaynapitaq manaña kallpanchis kanmanchu Jehová Diosta tukuy sonqo servinapaq. Chayrayku waj simi rimaq iñiq t’aqapi servispa mana sayk’unapaqqa cuidananchismi Dioswan amigo kayninchista (Mat. 4:4).

7. ¿Imatan Babilonia runakuna Danielwan ruwayta munaranku? ¿Imatan chaypaq ruwaranku?

⁷ Danielta amigonkunatawan Babilonia llaqtaman apaspaqa Babilonia runakunaqa obligaytan munaranku religionninkuman cambiakunankupaq. Chaypaqmi paykunaqa ‘Caldea runakunaq rimayninta yachachiranku’, chaymantapas sutinkutan cambiapuranku Babilonia sutikunawan (Dan. 1:3-7). Danielman qosqanku sutipiqa Bel diospa sutinmi rijuriran, chay diosmi Babilonia runakunapaqqa aswan atiyniyoq karan. Chhayna sutita churasqanwanmi rey Nabucodonosorqa Danielta creechiyta munanman karan chay dios Jehová Diosmanta aswan atiyniyoq kananpaq (Dan. 4:8).

8. ¿Iman Danielta yanaparan Jehová Diosman jujllachasqalla kashananpaq?

⁸ Chaymantapas Danielmanqa reypa  mijunankunatan munachiranku, paymi ichaqa allinta “yuyaykukuran” Diospa kamachikuyninkunata mana p’akinanpaq (Dan. 1:8). Danielqa Diospa ‘willasqan qelqakunatan’ sapa kutilla estudiaran, chay qelqakunaqa hebreo rimaypin kasharan. Chaykunata estudiasqanmi paytaqa allinta yanaparan Jehová Diosman jujllachasqalla kashananpaq, karu llaqtapiña kasharan chaypas (Dan. 9:2). Chaymi 70 wataña Babiloniapi kashaspapas hebreo sutin Danielwan reqsisqa karan (Dan. 5:13).

9. ¿Imaynatan 119 salmo takita qelqaq Diospa siminta qhawariq?

⁹ 119 salmo takita qelqaqpas Diospa siminta estudiaspan anchata kallpachakuran. Paypa contranpiña reypa wasinpi llank’aqkuna rimaranku chaypas, payqa Diospa simintan estudiashallaran, chaymi mana chay runakuna jinachu karan (Sal. 119:23, 61). Diospa siminpi imachus leesqanqa sonqonmanpunin chayaran (leey Salmo 119:11, 46).

10, 11. a) ¿Imata munaspan Bibliata estudiananchis? b) ¿Imatan chaypaq ruwananchis? Juj ejemplota churay.

¹⁰ Diospa llaqtanpi askhaña ruwananchiskuna chaypas, llank’anamanpas tiempotaña qonanchis chaypas, jap’inanchispunin tiempota sapankanchis Bibliata juj qelqanchiskunatawan estudiananchispaq, familianchiswan estudiananchispaqwan (Efes. 5:15, 16). Ichaqa manan juñunakuypi comentanallapaqchu nitaq askha paginakunata avanzanallapaqchu estudiananchis, aswanpas sonqonchisman chayananpaq jinan estudiananchis, chhaynapin iñiyninchispas astawan wiñanqa.

¹¹ Chaypaqmi ichaqa mana jujkunallapichu piensananchis, piensanallanchistaqmi imatachus necesitasqanchispipas (Filip. 1:9, 10). Allintaña preparakushanchis predicacionman lloqsinapaq, juñunakuykunaman rinapaq, discursokunata qonapaq chaypas, manapaschá allintachu piensashasunman imaynatas noqanchis allinyasunman chaypi. Chaypaq juj ejemplopi piensasunchis. Wayk’uspa llank’aq runakunaqa mallinkuña chay wayk’usqankuta chaypas, manan chay mallisqallankuwanchu kausankuman ¿riki? Paykunaqa kikinkupaqpas wayk’ukunallankutaqmi, chhaynapi qhali kausanankupaq. Sichus noqanchispas Jehová Diosman allin k’askasqa kayta munanchis chayqa, sapa p’unchaymi Bibliata estudiananchis, chhaynata estudiaspallan allinqa kasunchis.

12, 13. ¿Imanaqtinmi aswan allin kanman rimasqanchis simipipuni Bibliata estudiay?

 ¹² Waj simi rimaq t’aqapi yanapakuq iñiqmasinchiskunaq nisqanman jinaqa aswan allinsi kanman rimasqanchis simipipuni Bibliata estudiay (Hech. 2:8). Misionerokunapas allintan chayta yachananku, chaymi servisqanku llaqtapi allin kanankupaqqa mana contetakunankuchu juñunakuypi imatachus yachasqallankuwan.

¹³ Alain iñiqmasinchismanta yachasunchis, payqa pusaq wata jinañan persa simita yachashan, paymi nin: “Persa simipi juñunakuykunapaq preparakusqayqa manan allintachu sonqoyman chayan, aswanpas umallaymanmi chayan. Chayraykun jap’inaypuni tiempota rimasqay simipipuni Bibliata juj qelqakunatawan estudianaypaq”, nispa.

14. ¿Imamantan tayta-mamakuna asegurakunanku? ¿Imanaqtinmi chay ruway ancha importante?

¹⁴ Tayta-mamakunaqa asegurakunankun Diospa yachachikuyninkuna wawankuq sonqonman chayananpaq. Yachasunchis hermano Sergemanta esposan Murielmantawan, paykunaqa kinsa wata masñan waj simipi yanapakusharanku, wawankutaqmi 17 watayoqña kasharan. Chay wawankuqa manañas kusisqachu servicioman lloqsiq. Chaymantan Muriel niran: “Wawaykumanqa manan gustaqchu  waj simipi predicayqa. Rimasqan francés simipi predicaymi ichaqa anchata gustaq”, nispa. Sergepas niranmi: “Manaña iñiyninpi wiñasqanta rikuspaykun decidikurayku francés simillaman kutipunaykupaq”, nispa.

15. a) ¿Imaynapin tayta-mamakuna decidinkuman wawankuq rimasqan simiman kutipuyta? b) ¿Imaynatan Deuteronomio 6:5-7 texto tayta-mamakunata yanapanman?

¹⁵ ¿Imaynapin tayta-mamakuna decidinkuman wawankuq entiendesqan simita rimaq t’aqaman kutipuyta? Chaypaqmi paykunaqa tapukunanku: “¿Atisaqkuchu wawaykuman Jehová Diosmanta yachachisqaykumantapas chay mana yachasqan simitawan yachachiyta?”, nispa. Chaymantapas allintan reparananku wawankuman gustanchu waj simipi predicay, juñunakuykunaman riypas chayta. Sichus wawankuman mana gustanmanchu chay simipi yanapakuy, manataq tiemponkupas kanmanchu wawankuman chay simita yachachinankupaq chayqa, decidinkumanmi wawankuq rimasqan simiman kutipuyta. Wawanku iñiyninkupi allintaña wiñaqtinkutaq wajmanta decidikunkuman waj simipi yanapakuyta (leey Deuteronomio 6:5-7).

16, 17. ¿Imaynatan wakin tayta-mamakuna wawankuman Jehová Diosmanta yachachishanku?

¹⁶ Wakin tayta-mamakunaqa waj simipiña yanapakushanku chaypas, wawankumanqa  paykunaq rimasqanku simipin Jehová Diosmanta yachachinku. Yachasunchis Charlesmanta, paypaqa kinsan ususinkunaqa, sullk’a kaqqa isqon watanpin kashan, kuraq kaqtaq chunka kinsayoq watanpi. Paykunaqa Lingala simita rimaq iñiq t’aqapin yanapakushanku. Paymi nin: “Familiaypiqa rimasqayku simipin estudiayku. Ichaqa wakin estudiasqaykutaqa Lingala simipin ruwayku, chay simipin wakin pujllaykunatapas pujllayku, chhaynapin paykunaqa pujllaq jinalla chay simita yachashanku”, nispa.

¹⁷ Kevin iñiqmasinchismantañataq yachasunchis, paypaqa iskaymi ususinkunaqa, jujninmi pisqa watachanpi kashan jujnintaq pusaq watanpi. Payqa waj simipin familianwan yanapakushan, chaymi tukuy atisqanta ruwanan ususinkunaman Jehová Diosmanta yachachinanpaq. Paymi nin: “Ususiykuqa francés simitan masta rimanku, chaymi iskayninkuta chay simipi yachachiyku. Chaymantapas killapi juj kutitan francés simipi juñunakuyman riyku, vacacionniykupipas francés simipi aparikuq asambleakunamanmi riyku”, nispa.

18. a) ¿Imaynatan Romanos 15:1, 2 texto tayta-mamakunata yanapanman? b) ¿Ima nirankun juj tayta-mamakunapas wawankuta imayna yanapaymanta? (Qhaway willakuyta.)

¹⁸ Tayta-mamakunan decidinanku imaynatachus wawankuta cuidanqaku chayta, chhaynapi wawanku Diosman k’askakunanpaq ^[2] (kay paginapi willakuyta qhaway) (Gál. 6:5). Hermana Murielpa nisqanman jinaqa paypas qosanpas manas munarankuchu chay yanapakusqanku simimanta ripuyta, wawanku iñiyninpi allin kananraykun ichaqa chayta ruwasqaku (leey Romanos 15:1, 2). Chay ruwasqankuqa allinmi karan, chaymi qosan Sergepas nin: “Francés simiman kutimpusqaykumantapachan wawaykuqa allinta iñiyninpi wiñaran, chayaranmi bautismomanpas. Kunanqa precursor regularñan payqa, munashantaqmi juj simipi yanapakuytapas”, nispa.

19, 20. ¿Imaynatan rikuchisunman Diospa siminta munakusqanchista?

¹⁹ Jehová Diosqa lliu runatan munakun, chaymi Bibliata t’ijrachishan askha simikunaman, chhaynapi “llapa runapas” paymanta allinta yachanankupaq (1 Tim. 2:4). Payman astawan k’askakunanchispaqqa aswan allinta entiendesqanchis simipin Bibliataqa estudiananchis.

²⁰ Llapanchispas tukuy atisqanchistan ruwananchis Diosman jujllachasqalla kashananchispaq. Chaypaqmi aswan allinta entiendesqanchis simipi Bibliata sapa p’unchay estudiananchis. Chhaynapin familianchista iñiyninkupi allinta yanapasunchis, allintataqmi rikuchisun Diospa siminta anchata munakusqanchistapas (Sal. 119:11).