1, 2. a) ¿Ima llank’aytan Jesús ancha allinpaq qhawariran, imaraykun chhaynata qhawariran? b) ¿Imatan ruwananchis Diospa allin llank’aqmasin kananchispaq?

JESUCRISTOQA carpintero jinan llank’aran allin yachachiqtaq karanpas (Mar. 6:3; Juan 13:13). Carpintero jina llank’aspaqa allintan herramientakunata utilizaran maderamanta cosaskunata ruwananpaq. Diosmanta yachasqantapas allintan utilizaran runakunaman yachachinanpaq (Mat. 7:28; Luc. 24:32, 45). Jesusqa 30 watanpi kashaspan carpinteriapi llank’ananta saqeran Diosmanta willananpaq, payqa yacharanmi chay ruway aswan importante kasqanta. Chaymi niran: “Juj llaqtakunapipas willamunaymi Diospa gobiernonmanta allin willakuykunataqa, chaypaqmi Diosqa kachamuwaran”, nispa (Mat. 20:28; Luc. 3:23; 4:43). Arí, Jesusqa tukuy tiemponwanmi Diosta serviran, munarantaqmi jujkunapas chayta ruwanankuta (Mat. 9:35-38).

² Noqanchispas allin willakuykunamantan jujkunaman yachachinchis. Diospas chay llank’aypin yanapawanchis, chaymi Biblia nin: ‘Diospa llank’aqmasinkunan kankichis’, nispa (1 Cor. 3:9; 2 Cor. 6:4). Noqanchisqa yachanchismi Diospa siminqa cheqaqpuni kasqanta (Sal. 119: 159, 160). Chaymi tukuy atisqanchista ruwanchis Diospa siminta allinta yachachinanchispaq (leey 2 Timoteo 2:15). Chaypaqmi kallpachakunanchis Bibliata allinta utilizananchispaq, chay herramientawanmi astawanqa runakunata yachachinanchis Jehová Diosmanta, Jesusmanta, Diospa gobiernonmantapas. Runakunaq sonqonman chayananchispaqmi Diospa llaqtanqa imaymana herramientakunata qowanchis. Chaymi yachananchis chaykunata allinta utilizayta. Chay yanapaykunan tarikun “Yachachinapaq herramientakuna” nisqapi.

3. a) ¿Imata ruwananchispaqmi astawan kallpachakunanchis? b) Hechos 13:48 textopi nisqanman jina, ¿pikunatan astawan maskhananchis?

³ ¿Imaraykun ninchis “Yachachinapaq herramientakuna” manataq “Predicanapaq herramientakuna” nispachu? Predicaspaqa Diospa siminta willamunchis. Runakunaman yachachinanchispaqmi ichaqa explicananchis, entiendechinanchis yanapananchistaqmi yachasqankuman jina kausanankupaq. Tukukuy tiempopi kasqanchisraykun kallpachakunanchis estudiota qonanchispaq, allinta yachachinanchispaqpas. Chaypaqqa tukuy atisqanchistan ruwananchis ‘wiñay kausayman apaq ñanninta llapa puriy munaqkunata’ maskhamunanchispaq yanapananchistaqmi Diosta servinankupaq (leey Hechos 13:44-48).

4. ¿Imaynatan tarisunman ‘wiñay kausayman apaq ñanninta puriy munaqkunata’?

⁴ ¿Imaynatan tarisunman ‘wiñay kausayman apaq ñanninta puriy munaqkunata’? Chaypaqqa ñaupa cristianokuna jinan predicananchis. Jesusmi niran: “May llaqtamanpas may ayllumanpas jaykuspaqa maskhaychis pichus chaypi qankunata chaskinasuykichispaq jina kaqta”, nispa (Mat. 10:11). Askha runakunan orgulloso kanku, jujkunataq Diosmanta mana yachayta munankuchu. Chaymi paykunawan mana tiempota pierdenanchischu. Aswanpas allin sonqoyoq, Diosmanta yachay munaqkunatan maskhananchis. Jesusqa allin maderata ajllaspan herramientakunawan yanapachikuspa punkukunata yugokunata ruwaran. Chay jinatan noqanchispas ñaupaqtaqa allin sonqoyoq runata maskhananchis, herramientanchiskunata allinta utilizaspataq Jesuspa discipulon kananpaq yanapananchis (Mat. 28:19, 20).

5. ¿Imatan yachananchis yachachinapaq herramientanchiskunamanta? Juj ejemplowan chayta willay (9 paginapi fotokunata qhaway).

⁵ Carpinterokunaqa imatachus ruwanankupaq jinan herramientakunata utilizanku. Jesuspapas karanchá herramientankuna maderata kuchunanpaq, llaqllananpaq, t’oqonanpaq, maderakunata k’askachinanpaq, medinanpaqpas. * Chay jinallataqmi yachachinapaq herramientanchiskunapas. Qatimuqpin yachasunchis imaynatas chay herramientakunata utilizasunman chayta.

6, 7. a) ¿Imaynatan tarjetakunata utilizaranki? b) ¿Imapin yanapawanchis invitacionkuna?

⁶ Tarjetakuna. Kay herramientaqa juch’uyllan, ichaqa runakunatan yanapan  reqsiwananchispaq, jw.org direccionman jaykunankupaqpas. Chay direccionninchisman jaykuspan Testigokunamanta astawan yachankuman, Bibliamanta estudiotapas mañakunkuman. Kunankamaqa 400.000 más runakunañan estudiota mañakuranku. Sapa p’unchaymi jw.org direccionninchispi askha runakuna estudiota mañakushanku. Chaymi chay tarjetakunata apanallanchispuni, chhaynapi piwanpas rimaspa chay tarjetata qonanchispaq.

⁷ Invitacionkuna. Invitacionninchispin nin: “Invitasqan kashanki Bibliata estudianaykipaq. Juñunakuyniykupi otaq juj yachachiqwan”, nispa. Kay herramientanchisqa manan runakuna reqsiwanallanchispaqchu, aswanpas ‘Dios necesitasqankuta reparakuqkunatan’ kallpachan Bibliata noqanchiswan estudianankupaq (Mat. 5:3). Chaywanpas llapa runakunatan juñunakuyninchispi sumaqta chaskinchis manaña Bibliamanta estudiayta munaqtinkupas. Juñunakuyman jamuspan reparanqaku Bibliamanta imaymanata yachasqankuta.

8. ¿Imaraykun runakunata juj kutillatapas juñunakuyman jamunankupaq invitamunanchis? Juj ejemplota willay.

⁸ Invitamushanallanchismi runakunata juj kutillatapas juñunakuyninchisman jamunankupaq. Chhaynapin reparanqaku pantasqa religionkunamanta jujniray kasqanchista. Jehová Diospa testigonkunaqa Bibliamantan yachachinchis, Diosta reqsinankupaqtaq yanapanchis (Is. 65:13). Chaytan Estados Unidosmanta Raywan Lindawan repararanku. Paykunaqa Diosta astawan reqsinankupaqmi llaqtankupi llapa iglesiakunaman riranku. Paykunaqa nirankun: “Sichus mayqen iglesiapipas imallatapas yachamusun, chaymantapas chaypi kaq runakuna allin yuyaywan p’achakunqaku chayqa, chay iglesiapin qhepakusun”, nispa. Askha watakunan llapa religionkunaman riranku, manan mayqen iglesiapipas imatapas yachamurankuchu, nitaq chaypi kaq runakunapas allintachu p’achakuranku. Raywan Lindawanmi último iglesiata visitasqankumanta llakisqa kutimpusharanku. Lindaqa llank’aqmi ripuran Raytaq wasiman ripusharan. Jinan chay kutipi Jehová Diospa testigonkuna juñunakusqanku wasita rikuran, nirantaq: “Jaykurusaq imayna kasqankuta yachanaypaq”, nispa. Payqa anchatan admirakuran, hermanokunaqa sumaqtan trataranku, allin p’achasqataqmi kasharankupas. Kusikurantaqmi juñunakuypi yachasqanmanta. Rayta pasasqanmi yuyarichiwanchis apóstol Pablo nisqanta, paymi niran: “Diosqa qankuna ukhupimá kashasqa”, nispa (1 Cor. 14:23-25). Chaymantapachan Rayqa sapa domingo juñunakuykunaman riran. Qhepamantaq llapa juñunakuykunaman riran. Lindapas kaqtan ruwallarantaq, jinan 70 más watankupi kashaspa Bibliamanta estudiota chaskikuranku, qhepamantaq bautizakuranku.

9, 10. a) ¿Imaraykun facil-lla tratadokunawan predicay? b) ¿Imaynatan predicayta qallarisunman ¿Iman Diospa Gobiernon? nisqa tratadowan?

⁹ Tratadokuna. Pusaq tratadokunan kan runakunawan facil-llata parlananchispaq. 2013 watamantapachan ruwakuran,  kunankamaqa pisqa millón jinañan ruwakushan. Llapankupas juj formallamantan ruwasqa kashanku, chaymi jujninta utilizayta yachaspaqa llapantaña utilizayta yachasunman. Chhaynaqa, ¿imaynatan tratadokunawan predicayta qallarisunman?

¹⁰ Chayta yachanapaq rimasun imaynatas ¿Iman Diospa gobiernon? nisqa tratadowan predicasunman chayta. Kay jinatan qallarisunman: “Jayk’aqllapas tapukurankichu ¿Iman Diospa Gobiernon? ¿Kay uraymanta mayqen kaqmi kanman?”, nispa. Mana allinta kutichiqtinpas “Biblian nin” nisqatan qhawachisunman jinaspa Daniel 2:44; Isaías 9:6 copiasqa textokunata leepusunman. Astawan rimayta munan chayqa rimapayashanallanchismi. Rimayta tukunaykipaqtaq tapuwaq: “¿Imaynatan kausasun Diospa gobiernon kamachikamuqtin?”, nispa. Chay tapuytan saqesunman jujpi visitaspa kutichinanchispaq. Jujmanta chay runawan parlaspaqa ¡Diosmanta hamuq allin willakuykuna! nisqa folletopi 7 yachachikuyta utilizasunman, chay folletoqa ruwasqa kashan Bibliamanta estudiota qallarinapaqmi.

11. ¿Imayna ruwasqan kashan revistanchiskuna? ¿Imatan yachananchis revistanchiskunamanta?

¹¹ Revistakuna. Qhawaq ¡Despertad! revistanchiskunaqa askha simikunapin ruwakamun mundontinpitaqmi kashanpas. Chay revistanchiskunataqa imaymana clase runakunan leenku, chaymi paykunapaq jina ruwasqa kashan. Jinaspapas allin sonqoyoq runakunatan yanapan imachus vidankupi aswan importante kasqanta reparanankupaq. Chay herramientanchista allinta utilizanapaqqa, ñaupaqtan yachananchis pikunapaqchus ruwasqa kashan chayta.

12. a) ¿Pikunapaqmi ruwasqa kashan ¡Despertad! revista? b) ¡Despertad! revistata imayna utilizasqaykimanta juj experienciata willay.

¹² ¡Despertad! revistanchisqa pikunachus Bibliamanta mana imatapas yachankuchu otaq pisillata yachanku paykunapaqmi ruwasqa kashan. Chay runakunaqa manapaschá religionkunapipas confiankuchu otaq mana reparankuchu Bibliaqa vidankupi yanapay atisqanta. Jinaspapas ¡Despertad! revistanchisqa ruwasqa kashan Dios kasqanmanta runakuna convencekunankupaqmi (Rom. 1:20; Heb. 11:6). Jinaspapas runakunatan yanapan Bibliaq yachachisqanpi iñinankupaq “Diospa siminta jinapuni” rikunankupaqwan (1 Tes. 2:13). 2018 watapin kay kinsa yachachikuykunamanta willashan: “El camino de la felicidad”, “12 claves para una familia feliz”, “Ayuda para quienes están de duelo”.

13. a) ¿Pikunapaqmi ruwasqa kashan Qhawaq revistanchis? b) Qhawaq revistata imayna utilizasqaykimanta juj experienciata willay.

¹³ Predicanapaq Qhawaq revistanchisqa ruwasqa kashan Bibliata Diostapas respetaq runakunapaqmi. Chay runakunaqa yachankun Bibliamanta wakin yachachikuykunata ichaqa manan sut’itachu entiendenku (Rom. 10:2; 1 Tim. 2:3, 4). Chaymi 2018 watapi Qhawaq revistanchisqa kay yachachikuykunamanta willashan: “¿Servinraqchu Biblia kay tiempopaq?” “¿Iman jamuq tiempoman kanqa?” “¿Munakusunkichu Dios?”

14. a) ¿Imapaqmi ruwasqa kashan tawa videonchiskuna? b) Videokunata imayna utilizasqaykimanta experienciakunata willay.

¹⁴ Videokuna. Jesuspa tiemponpi carpinterokunaqa makillawan funcionaq herramientakunawanmi llank’aranku. Kunan tiempopin ichaqa electricidadwan funcionaq herramientakunatawan utilizanku. Ejemplopaq, cierra eléctrica, taladro, jujkunatapas. Chay jinallataqmi runakunaman yachachinapaq herramientakuna ukhupi kashan: ¿Imaraykun Bibliata estudianayki? ¿Imaynatan Bibliamanta yachachiyku? ¿Imaynan huñunakuyniyku aparikun? ¿Pikunan Jehová Diospa testigonkuna kayku? nisqa videokuna. Wakinqa iskay minuto jinallan duran, chaymi allinpuni predicayta qallarinapaq. Aswan tiempota duraq videokunataqa utilizasunmanmi revisita ruwasqanchispi otaq tiempoyoq runakunawan parlananchispaq. Kay videokunaqa runakunatan kallpachan Bibliamanta estudiota chaskinankupaq juñunakuykunaman jamunankupaqwan.

15. Juj experienciata willay imaynatachus videokunaqa runakunaq sonqonman chayasqanmanta.

¹⁵ Juj hermananchismi Micronesia nacionmanta jamuq warmiman yapés simipi ¿Imaraykun Bibliata estudianayki? nisqa videota qhawachiran. Rikuspa jinan warmiqa niran: “¡Rimasqay simipin kashan! Chaypi rimamuqpas llaqtaypi jinan riman”, nispa. Nillarantaqmi: “Jw.org direccionniykichisman jaykusaq chaypi yapés simipi qelqaykichiskunata leenaypaq videokunatapas qhawanaypaq”, nispa (Hechos 2:8, 11 textowan comparay). Estados Unidosmanta juj hermananchispas sobrinonmanmi juj videota apachiran. Sobrinonqa waj nacionpin tiyaran juj simitataqmi rimaranpas. Sobrinonmi qelqamuran: “Chay videota qhawaspan anchata admirakurani kay pacha Satanaspa makinpi kashasqanta yachaspa. Chaymi Bibliamanta estudiota qowanankupaq mañakurani”, nispa. ¡Sobrinonqa predicacionta jark’asqanku nacionpin tiyan!

16. Willay imapaqmi kay folletokuna ruwasqa kashan: a) Diosta uyarispaqa wiñaypaqmi kawsanki. b) ¡Diosmanta hamuq allin willakuykuna! c) ¿Pikunan Jehová Diospa munayninta ruwashanku?

¹⁶ Folletokuna. ¿Imaynatan yachachisunman pisillata leeqkunaman otaq rimasqanku simipi qelqakuna mana kaqtin? Diosta uyarispaqa wiñaypaqmi kawsanki nisqa folletowanmi. * ¡Diosmanta hamuq allin willakuykuna! folletowanpas qosunmanmi estudiota. Chaypaqqa último paginapi 14 yachachikuykunata qhawachispan tapusunman mayqenmantachus yachayta munan chayta. ¿Jayk’aqllapas chay jinata ruwarankichu revisitata ruwaspa? ¿Pikunan Jehová Diospa munayninta ruwashanku? folletonchisqa ruwasqa kashan estudiantekuna Diospa llaqtanta reqsinankupaqmi. Chay folletota imaynatachus utilizanapaqqa qhawawaqmi 2017 wata marzo killamanta Diospaq kausasunchis, juñunakuypi yachanapaq qelqanchista.

17. a) ¿Imapaqmi sapanka libro ruwasqa kashan? b) Estudiantenchis bautizakuranña chaypas, ¿imatan ruwananchis?

 ¹⁷ Librokuna. Sichus estudiota qoshanchis mayqen folletowanpas chayqa, ¿Imatan Biblia yachachin? librowanñataqmi yachachinanchis. Chayqa ruwasqa kashan Bibliamanta importante yachachikuykunata runakuna entiendenankupaqmi. Sichus estudianteyki iñiyninpi ñauparishan chayqa, chay librota tukuspan Diospa munakuynillanpi kashay librowanñataq estudiota qosunman. Chay libroqa ruwasqa kashan Bibliapi kaq yachachikuykunaman jina kausanankupaqmi. Estudiantenchis bautizakuranña chaypas iskaynin librotan tukunanpuni. Chayta ruwaspan yanapasun allin iñiyniyoq kananpaq, tukuy sonqowan Diosta servinanpaqpas (leey Colosenses 2:6, 7).

18. a) 1 Timoteo 4:16 textopi nisqanman jina, ¿imatan ruwananchis? ¿Iman kanqa chayta ruwaqtinchis? b) ¿Imapaqmi utilizananchis yachachinapaq herramientanchiskunata?

¹⁸ Jehová Diospa testigonkunaqa willananchismi allin willakuykunata, chhaynallapin runamasinchisqa wiñaypaq kausayta atinqaku (Col. 1:5; leey 1 Timoteo 4:16). Chayta ruwananchispaqmi yachachinapaq herramientanchiskunaqa yanapawanchis, chaymi allinta utilizana (qhaway “ Yachachinapaq herramientakuna” nisqa recuadrota). Sapankanchismi decidisunman mayqen herramientawan yachachiyta, jayk’aqchus utilizaytapas. Qelqanchiskunataqa manan rakiyllachu rakinanchis, sichus predicasqanchis runa mana uyariwanchischu chayqa, manan qelqanchistaqa saqenanchischu. Noqanchisqa allin sonqoyoq, ‘wiñay kausayman apaq ñanninta puriy munaqkunatan’ yanapananchis (Hech.13:48; Mat. 28:19, 20).