NOQAQA 1934 watapin nacerani, papay Fredwan mamitay Ednawanqa 20 wata jinañan Jehová Diospa testigon karanku. Anchatan paykunata agradecekuni Jehová Dios munakuyta yachachiwasqankumanta. Parsons llaqtapin tiyarayku (Kansas). Iñiq t’aqaypiqa yaqa llapankun janaq pachapaq ajllasqa cristianokuna karanku. Familiaywanqa manan faltakuqchu kayku juñunakuykunaman predicacionmanpas. Sábado tardenkunatan callekunapi predicaq kayku. Mayninpiqa sayk’uraykun, papaymi ichaqa helado mijuq apawaqku.

Predicasqayku territorioqa jatunmi karan, campopi tiyaq runakunaman iman predicarayku. Wakin runakunaqa qelqakunata saqesqaykumantan verdurakunata, runtukunata, wallpakunata ima qowaranku. Papayqa ñan qolqeta churaranña qelqakunapaq, chaymi qowasqanku cosaskunata utilizarayku mijunaykupaq.

Tayta-mamayqa tocadiscota utilizaspan predicaranku. Noqaqa wawallaraqmi karani chaymi mana tocadisco utilizayta atiranichu, chaywanpas hermano Rutherford discursonkunata churaspan kusikurani, chaywanmi revisitakunata ruwaqku estudiokunatapas qoqku.

Papayqa carroykupin parlanteta churaran, chaymi yanapawaranku predicanaykupaq. Ñaupaqtaqa takitan churaq kayku, chaymantataq grabasqa discursokunata, chay qhepamantaq yachay munaqkunaman qelqakunata qoq kayku.

Juj kutinmi papayqa Cherryvale llaqtaq parquenpi churaran grabasqa discursokunata, chay parquepin askha runakuna domingonkunapi samaqku. Polician ichaqa papayta kamachiran parque jawapi churananpaq. Jinan papayqa carrota jawaman apaspa chaymanta grabasqa discursokunata  churamuran. Chaykunata ruwasqaykuwanmi anchata kusikurani.

Chay watakunapin predicayta jark’asqanku territoriokunapi predicayta qallarirayku. Qallariypi willasqay jina, kuska tutatan jatariq kayku chay territoriokunapi mana reparachikuspalla tratadokunata folletokunata sapanka wasipi saqemunaykupaq. Tukuruspa jinataq juj ladoman riq kayku juñunakunaykupaq, chhaynapin yachaq kayku policía pillatapas jap’iranchus manachus chayta.

Chay watakunapin predicayta qallarirayku letrerokunata churakuspa, jinaspa callekunapi filapi puriq kayku. Juj kutinmi llaqtaypi chayta hermanokuna ruwaranku, letreronkupitaq niran: “Religionkunaqa runakunatan engañanku”, nispa. Wasiymanta lloqsispan juj kilómetro masta puriranku jinaspa kutimpuranku. Manan pi runapas phiñakuranchu, aswanpas askha runakunan admirasqa qhawaranku.

Texas llaqtamanmi viajaq kayku asambleakunaman. Papayqa Misuri llaqtamanta Texas llaqtaman viajaq trenpi llank’aran, chaymi chaypi tiyaq familiaykuman asambleakunamanpas gratislla viajaq kayku. Mamitaypa kuraq hermanon Fredmi esposanpiwan Texas llaqtapi tiyaranku. Chay tioyqa 1900 watakunamantapachan Jehová Diospa testigon karan, paymi hermanankunaman mamitaymanpas Diosmanta yachachisqa. Texas llaqtapi hermanokunaqa allintan payta reqsiranku, payqa watukuq umallin karan (Siervo de zona). Tukuy sonqowantaqmi Diosta serviran, sumaq sonqon karanpas, chaymi noqapaqqa allin ejemplo karan.

1941 watapin jatun asambleaman viajarayku San Luis llaqtaman (Misuri). Chaypin erqekunata wayna-sipaskunata juj ladopi tiyachiwaranku hermano Rutherford “Reypa wawankuna” nisqa discursonta uyarinaykupaq. Llapaykupiqa 15.000 masmi karayku. Discursota uyarisqayku qhepamanmi hermano Rutherford yanapaqninkunapiwan Hijos (inglés simipi) nisqa mosoq librota regalawaranku.

1943 watapin abril killapi “Llank’asun” nisqa temayoq asamblea aparikuran Coffeyville llaqtapi (Kansas). Chay asambleapin juj hermanokunawan kuska chiri unupi bautizakurayku. Chay asambleapin willawaranku iñiq t’aqakunapi “Bibliamanta allin yachachiq kanapaq escuela” aparikunanta. Jinaspa mosoq librota qowaranku chay escuelapi yanapawanankupaq. Jinan chay watapi primer discursoyta chay escuelapi qorani.

1951 watapin colegioyta tukurani, jinaspan allinta piensanay karan imatachus vidaywan ruwanayta. Kuraq hermanoy Jerry Betelpi llank’aran, chaymi noqapas Betelpi llank’ayta munarani. Jinaspa solicitudniyta apachirani. Jinan 1952 watapi 10 marzo killapi invitawaranku. Chay decidisqaymi yanapawaran Diosta tukuy tiempoywan servinaypaq.

Qelqanchiskunata ruwasqanku fabricapin llank’ayta munarani, ichaqa manan jayk’aqpas chaypiqa llank’aranichu. Aswanmi mozo karani, qhepamantaq cocinapi llank’arani. Chaypiqa imaymanatan yacharani, chaymi gustawaran. Cocinapiqa turnopin llank’aq kayku, chaymi tiempoy kaq Betelpa jatun bibliotecanpi estudianaypaq. Chay estudiasqaymi yanapawaran Jehová Diospi astawan confianaypaq Betelpi servishanallaypaqpas. Hermanoy Jerryqa 1949 watapin Betelmanta lloqsipuran, chaymanta Patriciawan casarakuran. Paykunaqa Betelmanta cercallapin tiyaranku, chaymi qallariypiqa paykuna kallpachawaranku Betelpi servishanallaypaq.

Betelmanta wakin hermanokunan ajllasqa karanku iñiq t’aqakunapi semana tukuyta discursota qonankupaq, chaypi kaq hermanokunawan predicanankupaqwan. Mayninqa tawa horasta jinan (320 kilometros) viajananku karan. Noqatapas ajllawarankun chaypi yanapakunaypaq. Qallariypiqa manchasqan kasharani. Chay iñiq  t’aqakunamanqa trenpin astawanqa viajaq kani. Juj kutinmi 1954 watapi chiri tiempopi domingo tardenta kutimpusharani Betelman. Ichaqa sinchita wayramusqanwan rit’imusqanwanmi trenpa motornin malograkuran, jinan lunes tutamantaña terminalman chayamurani. Betelman chayaspataq wayk’uqllaña cocinaman rirani. Tutantinmi mana puñuranichu, chaymi sayk’usqa kasharani. Chaywanpas kusikuranin chay iñiq t’aqakunapi hermanokunata yanapasqaymanta, paykunawan reqsinakusqaymantawan.

Chay tiempopin 124 Columbia Heights callepi WBBR nisqa radionchis funcionaran, chaypin sapa semana Bibliamanta estudiota apariqku, jinan chaypi participanaypaq invitawaranku. Alexander H. Macmillan hermanonchismi astawanqa chay radiopi participaq. Paytan hermano Mac nispa niq kayku. Payqa askha watakunañan Betelpi llank’aran, chaymi allin ejemplo karan chayllaraq Betelpi llank’aqkunapaq.

1958 watapin Galaad escuelaman riq hermanokunata yanapanaypaq asignawaranku. Mosoq misionerokunatan yanaparani documentokunata orqonankupaq viajanankupaqwan may nacionpichus asignasqa karanku chaypaq. Avionpi viajayqa nishu qolqepaqmi karan, chaymi yaqa llapa misionerokuna África ladoman Asia ladomanqa carga apaq barcopi viajaqku. Qhepa tiempokunamanmi ichaqa avionpi pasaje bajaran chaymi misionerokunaqa avionpi viajaranku.

1960 watapin Estados Unidos nacionmanta Europa ladoman viajaq avionkunata contratarani askha nacionkunamanta asambleakunaman viajanankupaq. Chay asamblekunaqa 1961 watapin ruwakunan karan. Noqapas contratasqa avionpin viajarani Nueva York llaqtamanta Hamburgo (Alemania) llaqtaman. Asamblea tukuytan kinsa betelitakunawan juj carrota alquilaspa Italia nacionman viajarayku, jinaspa Roma llaqtapi kaq Betelta visitarayku. Chaymantan Francia nacionman viajarayku, España nacionman chayanaykupaqtaq cordillera de los Pirineos nisqata pasarayku. Chaypiqa jark’asqan kasharan predicayqa. Barcelona llaqtapi tiyaq hermanokunatan reqsirayku, jinaspan regalota jina k’uyuruspayku qelqakunata qorayku. Chay qhepamanmi Ámsterdam llaqtaman rirayku chaymantañan Nueva York llaqtaman kutimpurayku.

583 hermanokunan askha nacionkunamanta asambleakunaman viajananku karan, paykunata yanapanaypaqmi asignawaranku 1962 watapi. Chay asambleakunan aparikunan karan Europa, Asia, Pacífico del Sur ladokunapi, chaymantapas Honolulú (Hawái), Pasadena (California) llaqtakunapi. Chay Asambleaq temanmi karan: “Wiñaypaq allin willakuykuna” nisqa, chayqa aparikuran 1963 watapin. Chay asambleakunaman viajaqkunaqa Líbano Jordania nacionkunapi kaq llaqtakunatawanmi visitaranku, chaypin  tarikun Bibliapi willasqan llaqtakuna. Chaykunaman viajanankupaqmi documentokunata ruwanay karan, maypi alojakunankupaqpas.

1963 watapin 29 junio killapi Lila Rogers hermanawan casarakurani. Payqa kinsa wata jinañan Betelpi servisharan. Casarakusqaykumanta semana qhepallamanmi juj grupo hermanokunawan viajarayku Grecia, Egipto, Líbano nacionkunata. Chaymantan Jordaniaman viajarayku. Chaypiqa jark’asqan kasharan predicacionqa, manataqmi permitirankuchu Testigokuna chayman jaykunankuta, chaymi llakisqa kasharayku. Chayaqtiykun ichaqa askha hermanokuna terminalpi jatun letrerota jap’ispanku suyawashasqaku. Chaypin niran: “¡Jehová Diospa testigonkuna kusikuykun jamusqaykichismanta!”, nispa. Chay llaqtakunapin tiyaranku Abrahan, Isaac, Jacobpas, Jesuspas apostolninkunapas chaypin predicaranku, chay llaqtamantapachan kay pachaq k’uchunkamaraq allin willakuykuna mast’arikuran. ¡Kusikunapaqmi karan chay llaqtakunata reqsiyqa! (Hech. 13:47.)

Lilawanqa 55 watañan tiyashayku, payqa allintan yanapawan asignacionniykuta cumplinaykupaq. Paywanmi España, Portugal nacionkunata askha kutita viajarayku. Chay nacionkunapiqa jark’asqan kasharan predicacionqa. Chaymi pakallapi qelqakunata imachus necesitasqankutawan hermanonchiskunaman aparayku. Cádiz llaqtapi kaq carcelpi hermanokunamanpas visitaraykun. Anchatan kusikurani paykunata kallpachanaypaq discursota qospa.

África, Asia, América Central, América del Sur, Australia, Europa, Hawái, Nueva Zelanda, Puerto Rico nacionkunapin asambleakuna aparikuran. Chay asambleakunaman hermanonchiskuna viajanankupaqmi 1963 watamantapacha yanapakurani. Esposaywanqa askha asambleakunamanmi rirayku, jujninmi karan 1989 watapi Varsovia llaqtapi (Polonia). Chay asambleamanmi Rusia nacionmanta hermanokuna jamuranku. ¡Paykunaqa manan jayk’aqpas chhayna asambleamanqa risqakuchu! Wakinqa Diosta servisqankuraykun carcelpi askha watakuna wisq’asqa karanku.

Chaymantapas askha sucursalkunata misionerokunatawan visitanaypaqmi asignawaranku. Última visita ruwasqaypi rirayku Corea del Sur nacionman, chaypin reqsirayku 50 hermanokunata, paykunaqa Suwon llaqtapin carcelpi kasharanku. Kusisqan kasharanku, ima jinallañan suyasharanku carcelmanta lloqsispa Diosta astawan servinankupaq. ¡Paykunata reqsisqaykuqa anchatan kallpachawaranku! (Rom. 1:11, 12.)

Rikuranin Jehová Diospa llaqtan yapakusqanta, chayqa karan Diospa yanapayninwanmi. 1943 watapi bautizakushaqtiyqa yaqa 100.000  predicaqkunallan karayku. Kunanqa ocho millón más predicaqkunan kashanchis 240 nacionkunapi. Diospa llaqtan yapakunanpaqqa misionerokunan astawanqa yanapakuranku. Anchatan kusikuni misionerokunata may nacionmanchus rinankupaq yanapasqaymanta.

Maytan kusikuni wayna kasqaymantapacha Jehová Diosta servinaypaq Betelman rinaypaqpas decidikusqaymanta. Chaymantapachan Diosqa askha bendicionkunata qowaranku. Betelpiqa kusisqan Diosta serviyku, chaymantapas Brooklyn llaqtapi kaq iñiq t’aqakunapin 50 más watakuna yanapakurayku, chaypi kaq hermanokunawanqa amigontinmi kapuyku.

84 wataypiña kashani chaypas esposaywan kuskan Betelpi llank’ashaykuraq, sucursalman chayamuq cartakunatan rakini.

¡Ancha kusikunapaqmi Diospa llaqtanpi kayqa! Malaquías 3:18 textoq cumplikusqantan rikurani, chaypin nin: “Wajmanta reparankichis allin runaq millay runaq imaynachus kasqanta, pichus noqata serviq, pitaqchus noqata mana serviq kasqantapas”, nispa. Satanaspa kamachisqan pachaqa aswan millaymanmi tukupushan, runakunapas manañan kausayta munankuchu. Diosta serviqkunan ichaqa sasa tiempopiña kaspapas kusisqa kanchis, sumaq kausaytan suyakusqanchisrayku. ¡Diospa gobiernonmanta jujkunaman willayqa ancha sumaqmi! (Mat. 24:14.) Chay gobiernon millay kausayta tukuchispa paraisota apamunqa. ¡Maytan chay p’unchay chayamunanta suyakushanchis! Chay tiempopiqa manañan onqosunchu, aswanmi wiñaypaq kay allpapi tiyasun.