1, 2. a) ¿Imaynan sientekunchis vidanchispi qonqaylla cambiokuna kaqtin? (Kay paginapi fotota qhaway.) b) Salmos 131 textopi nisqanman jina, ¿iman yanapawasun thaj sientekunanchispaq?

LLOYDWAN Alexandrawanmi 25 watakunaña Betelpi servisharanku, chayllamanmi ichaqa lloqsipuranku predicaypi yanapakunankupaq. Qallariypiqa llakisqan kasharanku, Lloydmi nin: “Betelpi tiyaypas chaypi llank’aypas noqapaqqa may sumaqmi karan. Entienderaniña imarayku chay cambiokuna kasqanta chaypas, askha semanakunan mana valeqpaq jina sientekurani. Juj raton allin kasharani, chaymantataq llakisqa sientekurani”, nispa.

² Vidanchispi qonqaylla ima cambiopas kaqtinqa llakisqan sientekunchis (Prov. 12:25). Mayninpiqa mosqokushasunmanpas jinaraqmi sientekunchis. Chhaynapi tarikuqtinchis, ¿iman yanapawasunman sonqonchis tiyaykunanpaq? (Leey Salmos 131:1-3.) Ñaupaq tiempopipas kay tiempopipas  Diosta serviqkunaqa imaymana cambiokunapin tarikuranku. ¿Imatan ruwaranku thaj sientekunankupaq? Chaymanta kunan yachasun.

3. ¿Imaynapin Josepa vidan qonqaylla cambiapuran?

³ Josemanta yachasun. Payqa Jacobpa munakusqan wawanmi karan. Chayta rikuspan hermanonkunaqa payta cheqnikuranku. 17 watanpi jina kashaqtintaq esclavota jina vendepuranku (Gén. 37:2-4, 23-28). 13 watakuna jinan Egipto llaqtapi sufriran, ñaupaqtaqa esclavon karan, chaymantataq carcelpi wisq’asqa karan. Joseqa karupin munakusqan taytanmanta kasharan. Chhaynapi tarikuspa, ¿iman payta yanaparan ama llakisqa phiñasqa sientekunanpaq?

4. a) ¿Iman Joseta yanaparan carcelpi kashaqtin? b) ¿Imaynatan Jehová Dios Josepa mañakusqanman kutichimuran?

⁴ Carcelpi kashaqtinqa piensaranchá imaynatachus Jehová Dios payta yanapasqanpi (Gén. 39:21; Sal. 105:17-19). Chaymantapas piensaranchá llaqtanpi kashaspa imachus mosqokusqanpi, chaypas yanapanmanmi karan Diospi confiananpaq (Gén. 37:5-11). Sapa kutillachá imayna sientekusqanta Diosman willakuran (Sal. 145:18). Diostaq mañakusqanman kutichimuran, chhaynapin Joseqa reparanman karan Dios paywan kashasqanta (Hech. 7:9, 10). *

5. ¿Imaynatan Diospa “thaj kayta” qowasqanchis yanapawanchis?

⁵ Imapiña tarikuqtinchispas Diospa “thaj kayta” qowasqanchismi yanapawasunman ama llakikunanchispaq (leey Filipenses 4:6, 7). Chay jinaqa llakisqa sayk’usqa sientekuqtinchisqa Jehová Diospa “thaj kayta” qowasqanchismi kallpachawasun payta servishallananchispaq ama pisipananchispaqpas. Kaypi yachasun imaynatas wakin hermanonchiskuna ruwaranku chayta.

6, 7. ¿Imaynatan Diosmanta mañakusqanchis yanapawanchis thaj kananchispaq? Juj ejemplota willay.

⁶ Ryan Juliettemantawan yachasun, paykunan sinchita llakikuranku manaña precursor especial jina llank’anankumanta. Ryan nin: “Chay raton Jehová Diosmanta mañakurayku. Jehová Diospi confiasqaykutan rikuchinayku karan. Iñiq t’aqapiqa askhan chayllaraq bautizakuranku, chaymi Diosta mañakurayku paykunapaq allin ejemplo kanaykupaq”, nispa.

⁷ ¿Imaynatan Jehová Dios mañakusqankuman kutichiran? Ryanmi nin: “Mañakusqayku qhepallamanmi thaj sientekurayku, manañan imamantapas llakikuraykuchu, nitaq mana allin piensaykuna umaykuman jamuranchu. Aswanpas Diospa thaj kayninmi yuyayniykuta waqaycharan. Jinan nirayku: ‘Allin kaqkunapi piensasun chayqa, Diosqa utilizawasunmi’”, nispa.

8-10. a) ¿Imaynatan Diospa espiritun yanapawasunman llakisqa tarikuqtinchis? b) ¿Imaynatan Dios yanapawanchis payta astawan servinanchispaq kallpachakuqtinchis?

⁸ Chaymantapas Jehová Diospa santo  espiritunqa yanapawasunmanmi Bibliamanta textokunata yuyarinanchispaq, chay textokunan entiendechiwasunman imachus vidanchispi aswan importante kasqanta (leey Juan 14:26, 27). Chaymi pasaran Philipwan Marywan, paykunaqa 25 watakuna jinan Betelpi serviranku. Tawa killallapin iskayninkuq mamitankuna juj familianpiwan wañupuranku, jinaspapas Maryq papantan cuidananku karan, payqa umanmantan mal kashan.

⁹ Philip nin: “Chay llakikuykunataqa aguantasharanin ichaqa Qhawaq revistata estudiashaspan Colosenses 1:11 textota leerani. Chaypin yacharani pacienciakuspa kusisqa sonqowan aguantanay kasqanta. Jinaspapas entienderanin imaynapiña tarikuspapas Diospa espiritunta chaskiqtinchisqa kusisqa kausananchista”, nispa.

¹⁰ Philipwan Marywanqa kallpachakurankun Diosta astawan servinankupaq, Diostaq paykunata bendeciran. Ejemplopaq, Betelmanta lloqsisqanku qhepallamanmi Biblia estudiay munaq runakunata tariranku, jinaspa semanapi iskay-kinsa kutita jina estudiaranku, iñiyninkupitaq ñaupariranku. Maryn nin: “Chaywanmi rikurayku Diospa yanapayninta, jinan anchata kusikurayku”, nispa.

11, 12. a) ¿Imatan José ruwaran Jehová Dios bendecinanpaq? b) ¿Imaynatan Jehová Dios Joseta bendeciran aguantasqanmanta?

¹¹ Vidanchispi qonqaylla cambiokuna kaqtinqa mayninpiqa manan imanakuytapas atinchischu. Josetapas chayqa pasanmanmi karan, ichaqa manan chaytachu ruwaran aswanpas tukuy atisqantan ruwaran allin kaqta ruwananpaq, chhaynapi Diospa bendecisqan kananpaq. Chaymi allinta llank’aran Potifarpa wasinpi kashaspa, carcelpi kashaspapas (Gén. 39:21-23).

¹² Juj kutinmi carcelmanta encargakuq runa Joseta kamachiran faraonta serviq iskay runakunata cuidananpaq. Joseqa sumaqtan chay runakunata trataran chaymi paykunaqa imachus mosqokusqankuta willaranku (Gén. 40:5-8). Chay kutipi rimasqankun Josepa vidanta cambiaran. Chaymi iskay wata qhepaman payta carcelmanta orqopuranku, chaymantataq Egipto llaqtapi kamachikunanpaq churaranku,  paymi karan faraonman qatiq kamachikuq (Gén. 41:1, 14-16, 39-41).

13. ¿Imatan ruwananchis ima llakipiña tarikuspapas Jehová Dios bendeciwananchispaq?

¹³ Mayninpiqa José jinan ima llakipipas tarikusunman. Chhayna kaqtinqa pacienciakunanchismi tukuy atisqanchistataq kallpachakunanchis allin kaqta ruwananchispaq chhaynapin Diosqa bendeciwasun (Sal. 37:5). Mayninqa manan entiendesunchu vidanchispi imarayku imapas pasasqanta, chaywanpas Diosqa yanapawasunmi (2 Cor. 4:8). Astawanqa yanapawasun tukuy atisqanchisman jina payta serviqtinchismi.

14-16. ¿Imatan Felipe ruwaran vidanpi cambiokuna kaqtin?

¹⁴ Felipemanta yachasun, paypa vidanpiqa imaymana cambiokunan karan, chaywanpas Diostan servishallaran. Payqa Jerusalén llaqtapi kaq iñiq t’aqapin yanapakusharan (Hech. 6:1-6). Estebanta wañuchisqanku qhepamanmi cristianokunata qatikachayta qallariranku. Chaymi askha cristianokuna Jerusalén llaqtamanta ayqekuranku. Felipepas ayqekuranmi ichaqa Diosta astawan serviyta munaspan Samaria llaqtaman predicaq riran, chay llaqtapi runakunaqa Diosmantan yachayta munaranku (Mat. 10:5; Hech. 8:1, 5).

¹⁵ Askha llaqtakunapin manaraq Diosmanta yacharankuchu, chaymi Jehová Diosqa santo espiritunwan Felipeta dirigiran chay llaqtakunaman rinanpaq. Chay tiempopi judiokunaqa cheqnikurankun Samaria llaqtamanta runakunata. Felipen ichaqa paykunata sumaqta trataran, chaymi Samaria llaqtamanta askha runakuna Felipeq predicasqanta uyariranku (Hech. 8:6-8).

¹⁶ Chaymantapas Asdod, Cesarea llaqtakunapi predicananpaqmi Diospa santo espiritun Felipeta dirigiran. Chaypiqa askhan mana judío runakuna tiyaranku (Hech. 8:39, 40). Chay tiempopin Felipeqa familiayoq karan, chaymi predicasqan  llaqtapi familianwan qhepakuran. Chhayna cambiokunaña vidanpi karan chaypas Dios serviypin ocupasqa kasharan, chaymi Diosqa paytapas familiantapas bendiciran (Hech. 21:8, 9).

17, 18. ¿Imaynatan yanapawasunman vidanchispi cambiokuna kaqtin Diosta serviypi ocupasqa kasqanchis?

¹⁷ Tukuy tiemponkuwan Diosta serviqkunan ninku: “Jehová Dios serviypi ocupasqa kasqaymi yanapawan imaña kaqtinpas ama llakikunaypaq”, nispa. Sudáfrica nacionmanta Osborne Polite Betelmanta lloqsipuranku, paykunaqa nisharanku: “Pisi tiempollapin llank’anata maypi tiyananchistapas tarisunchis”, nispa. Ichaqa manan chhaynachu karan. Polite nin: “Kinsa killan mana llank’anata tariraykuchu, manan qolqeykupas karanñachu, chaymi llakisqa kasharayku”, nispa.

¹⁸ ¿Iman paykunata yanaparan ama nishuta llakikunankupaq? Osborne nin: “Iñiq t’aqawan predicaymi yanapawaranku ama nishuta llakikunaykupaq. Problemaykupi nishuta piensanaykumantaqa predicaqmi astawan lloqsirayku, chay ruwasqaykun yanapawaranku kusisqa kausanaykupaq. Chaymantaqa tariraykun llank’anataqa”, nispa.

19-21. a) ¿Iman yanapawasun thaj sientekunanchispaq? b) Vidanchispi cambiokuna kasqan, ¿imaynatan yanapawasunman?

¹⁹ Kaypi yachasqanchis jina, imaynapiña tarikuspapas tukuy atisqanchistan ruwananchis Jehová Diospitaqmi confiananchis, chhaynapin thaj sientekusunchis (leey Miqueas 7:7). Vidanchispi ima cambiokuna kasqanqa yanapawasunmanmi Jehová Diospi astawan confiananchispaq. Polite nin: “Betelmanta lloqsipusqay qhepamanmi astawanraq necesitarani Jehová Diospa yanapayninta, chaytan  rikurani vidaypi, chaywanmi astawanraq Jehová Diospi confiarani”, nispa.

²⁰ Pusaq parrafopi Marymanta rimasqanchis hermanaqa papantan cuidashan precursorataqmi kanpas, paymi nin: “Sinchita llakikuspaqa, juj raton ruwanaykunata saqespa tranquilizakuni, Jehová Diosmantataq mañakuni. Jinaspapas vidaypi cambiokuna kasqanqa Diospi astawan confianaypaqmi yanapawaran. Jamuq tiempopipas chaytan ruwananchis kanqa”, nispa.

²¹ Lloyd Alexandrawan ninku: “Vidaykupi cambiokuna kasqanqa iñiyniykutan pruebaman churaran. Kunanqa yachaykun iñiyniykupi imayna kashasqaykuta, ima pruebatapas aguantanaykupaq jinachus kashayku manachus chaytapas. Jinaspapas yanapawaranku aswan allin cristiano kanaykupaq”, nispa.

22. ¿Imamantan seguro kasunchis imaynapiña tarikuspapas?

²² Kay tiempopiqa qonqayllan imapipas tarikusunman, yaqapaschá onqosunman, familianchista cuidananchis kanqa otaq ima privilegiotapas saqenanchis kanqa. Jehová Diosmi ichaqa tiempollanpi yanapawasun (Heb. 4:16; 1 Ped. 5:6, 7). Imaynapiña tarikuspapas tukuy atisqanchistan ruwananchis allin kaqta ruwananchispaq. Jehová Diosmantan mañakushanallanchis, paypitaqmi tukuy sonqowan confiananchis. Chayta ruwaspaqa thajmi sientekusun ima cambiokuna kaqtinpas.