1, 2. ¿Imakunawanmi Diosta serviqkuna maqanakunanchis?

ABELPA tiemponmantapachan Diosta serviqkunaqa kallpachakushanku Diospaq junt’aq kanankupaq. Hebreo cristianokunapas Diospa bendicionninta chaskinankupaqqa sinchi ñak’ariypin tarikuranku (Heb. 10:32-34). Chay ruwasqankutan apóstol Pablo compararan carrerapi phawaqkunaq kallpachakusqankuwan jinallataq maqanakuyta atipaq runaq kallpachakusqanwan ima (Heb. 12:1, 4). Llapa cristianokunan wiñay kausayman chayanapaq carrerapi jina phawashanchis, ichaqa kanmi wiñay kausayman jaykunanchista jark’awaqninchis enemigonchiskuna.

² Chay enemigonchiskunaqa Saqran jinallataq munaychakusqan pacha (Efe. 6:12). Chaymi cuidakunanchis kay pachapi runakunaq yachachikuyninkumanta, mana allin ruwayninkumantawan, chaykunan kashan: qhelli ruwaykuna, cigarrota pitay, machay, drogakuy ima. Chaymantapas cuidakunanchismi mana pisi kallpayanapaq, cuerponchispa munasqantapas mana ruwanapaq (2 Cor. 10:3-6; Col. 3:5-9).

3. ¿Imaynatan Jehová Dios yanapawanchis enemigonchiskunawan maqanakunapaq?

³ Jark’awaqninchis enemigonchiskunataqa atipasunmanmi,  ichaqa manan facilchu chay ruwayqa. Chaypaqqa apóstol Pabloq ruwasqanta jinan ruwananchis, paymi niran: “Noqaqa manan yanqapas phawashayman jinachu phawashani, saqmaspapas manan ch’usaqmanchu saqmashani”, nispa (1 Cor. 9:26). Chhaynaqa enemigonchiskunata atipanapaqqa maqanakuq runa jinan anchata kallpachakunanchis. Chaypaqmi Jehová Dios yanapawashanchis Bibliawan, qelqakunawan, juñunakuyninchiskunawan asambleanchiskunawan ima. Sichus mana Jehová Diospa chay qowasqanchis yanapaykunaman jinachu ruwashasunman chayqa, ch’usaqman saqmaq runa jinan kasunman, manataqmi tukuy atisqanchistachu ruwashasunman enemigonchiskunawan maqanakunapaq.

4. ¿Imatan ruwananchis mana allin kaqta atipananchispaq?

⁴ Enemigonchiskunaqa mana reparakushallaqtinchismi imaynapipas jap’iwasunman, astawanqa pisi kallpa kashaqtinchis, chaymi makilla kashananchis. Biblian nin: “Ama mana allin kaqwanqa atipachikuychu, aswanpas allin kaqwan mana allin kaqtaqa atipashallay”, nispa (Rom. 12:21). Chaypi nisqan jina, mana allin kaqwan mana sayk’uspa maqanakushallasun chayqa, atipasunmi. Manan imaraykupas pisi kallpayananchischu, mana jinaqa Saqran imaymanawan atipawasun (1 Ped. 5:9).

5. a) ¿Imatan ruwananchis Jehová Diospa bendicionninta chaskinapaq? b) ¿Pikunamantan kay estudiopi yachasunchis?

⁵ Maqanakuyninchista atipasun chayqa, Diosmi allinpaq qhawariwasun, chhaynapitaq bendicionninta chaskisunchis. Hebreos 11:6 texton nin: “Pipas Diosman achhuykuqqa creenanmi Diosqa cheqaqpuni kasqanta, payta tukuy sonqowan maskhaqninkunamanpas premiota qoq kasqantawan”, nispa. Jehová Diospa bendicionninta chaskinapaqqa tukuy atisqanchistan kallpachakunanchis (Hech. 15:17). Bibliapin willawanchis Diosta serviq askha runakunamanta, paykunamanta wakinmi karanku Jacob, Raquel, José, Pablo ima. Paykunaqa imaymana llakipin tarikuranku, chaywanpas sonqomantan kallpachakuranku. Chhaynapin Jehová Diospa bendicionninta chaskikuranku. Noqanchispas paykuna jina kallpachakusun Diospaq junt’aq kananchispaq chayqa, Jehová Diosqa bendeciwasunmi. ¿Imaynatan chayta ruwasunman?

6. ¿Iman Jacobta yanaparan mana pisipananpaq? ¿Ima bendiciontan chaymanta chaskiran? (9 paginapi dibujota qhaway.)

⁶ Jacobmanta yachasun. Payqa Jehová Diosta munakusqanrayku, paywan amigontin kayta munasqanrayku iman tukuy atisqanta kallpachakuran. Chaymi Diosqa prometeran mirayninta bendecinanpaq, chay promesapin payqa confiaran (Gén. 28:3, 4). Juj kutinmi pachaj watanpi jina kashaspa juj angelwan jap’inakuran Jehová Diospa bendicionninta chaskinanpaq (leey Génesis 32:24-28). Payqa manan kallpayoq kasqanraykuchu angelwanqa jap’inakuran, aswanpas Jehová Diospa bendicionninta chaskiytapuni munasqanraykun. Chhaynata kallpachakusqanraykun Jehová Diosqa bendeciran. Chaymi “Israel”  nisqa sutiwan suticharan, chay sutiqa ‘Dioswanmi jap’inakuran’, nispa ninanmi. Noqanchispas munasunmanmi chhayna bendecisqa kayta ¿riki?

7. a) ¿Ima llakikuypin Raquel tarikuran? b) ¿Imatan Raquel ruwaran? ¿Imatan chhayna ruwasqanmanta chaskikuran?

⁷ Jacobpa esposan Raquelpas maytan rikuyta munasharan Diospa promesan junt’akunanta. Ichaqa juj sasachakuymi karan, payqa manan wawayoq kayta atiranchu. Chay tiempopi mana wawayoq kayqa sinchi llakikuymi karan warmikunapaq. ¿Imatan Raquel ruwaran chhaynapi tarikuspa? Diospi confiaspan paymanta mañakuran, chhaynapin mana pisi kallpayaranchu. Jehová Diosqa uyarimuranmi mañakusqanta, chaymi wawakunata qoran. Chaymi Raquelqa allinta kallpachakusqanrayku niran: ‘Atiparanin’, nispa (Gén. 30:8, 20-24).

8. a) ¿Ima sasachakuypin José tarikuran? b) ¿Imapin Josepa ejemplon yanapawanchis?

⁸ Jacobwan Raquelwanqa allin ejemplon karanku Dios serviypi, chaychá wawanku Josepas imaymana sasachakuykunata aguantaran. 17 watanpi kashaqtinmi Josetaqa wayqenkuna paymanta envidiakusqankurayku Egipto llaqtaman kamachi kananpaq venderanku. Jinaspapas chaypin yanqa tumpasqa kaspa askha wata carcelpi wisq’asqa karan (Gén. 37:23-28; 39:7-9, 20, 21). Chhayna sasachakuykunapiña tarikuran chaypas, manan pisi kallpayaranchu nitaq vengakuranchu. ¿Iman yanaparan chhaynata kallpachakunanpaq? Jehová Dioswan amigontin kasqanta ancha valorniyoqpaq qhawarisqanmi (Lev. 19:18; Rom. 12:17-21). Josepa ejemplonmi yachachiwanchis imapiña tarikuspapas kallpachakushanallapaq. Chayta ruwaqtinchisqa Jehová  Diosmi bendeciwasun (leey Génesis 39:21-23).

9. ¿Imaynatan Jacobpa Raquelpa Josepa ruwasqankuta jina ruwasunman?

⁹ Noqanchispas José jinapaschá mana kaqmanta tumpasqa kashanchis, otaq runakuna cheqnipakuwashanchis envidiakuwashanchis ima. Chhaynapi tarikushanchis chayqa, tukuy sonqonchiswanmi Jehová Diosman jap’ipakunanchis. Chaytan Jacob, Raquel, Josepas ruwaranku, chaymi mana pisiparankuchu, aswanpas Diosmanta mañakusqankuman jinan ruwaranku, kusisqataqmi servirankupas. Chayraykun Diosqa paykunata bendeciran. Noqanchisqa tukukuy p’unchaykunapin kausashanchis, chaymi astawanqa mana iskayananchischu jamuq tiempopi bendicionkuna chaskinamanta. ¿Kallpachakusunchu bendicionkuna chaskikunapaq?

10, 11. a) ¿Imaraykun kallpachakunanchis Diospa bendicionninta chaskikunapaq? b) ¿Iman yanapawasun allinta imatapas decidinapaq?

¹⁰ ¿Imaraykun kallpachakunanchis Diospa bendicionninta chaskinapaq? Imaymana sasachakuykunapi tarikusqanchisraykun. Wakin cristianokunaqa mana allin munapayaykunawanmi maqanakunku otaq sasachakunku predicacionpi. Jujkunataq sapanku tarikapunku, otaq onqosqa kashanku. Jinaspapas wakinpaqqa sasan ofendeqnin runata perdonay. Unayña otaq chayllaraq Diosta servishanchis chaypas, llapallanchismi imaymana sasachakuykunawan maqanakunanchis Diosta serviyninchispi. Chaywanpas junt’aq kasun chayqa, Jehová Diosqa bendeciwasunmi.

¹¹ Sichus mana allin yuyaykuykunawan maqanakushanchis chayqa, sasan kanqa imatapas allinta decidiy (Jer. 17:9). Sichus mayqenninchispas chhayna sasachakuypi tarikushanchis chayqa, Jehová Diosmantan mañakunanchis santo espiritunta, chhaynapin kallpata jap’isun allin kaqta ruwananchispaq. Jinaspapas Jehová Diosmi bendeciwasun. Chaymantapas chay sasachakuyta atipanapaq mañakushanchis Diosmanta chayqa, chay mañakusqanchisman jinan ruwananchis. Chaymantapas kallpachakunanchismi Bibliata sapa p’unchay leenapaq, familiantin Diosta adorana ch’isipi Bibliata estudianapaq ima (leey Salmo 119:32).

12, 13. ¿Iman iskay iñiqmasinchiskunata yanaparan mana allin piensayninkuwan maqanakunankupaq?

¹² Askha cristianokunan mana allin piensayninkuta atipashanku Bibliawan, qelqanchiskunawan, Diospa santo espiritunpa yanapayninwan ima. Juj waynan leeran “¿Cómo puede usted resistirse a los malos deseos?” nisqata, 2003 wata 8 diciembre ¡Despertad! revistapi. Jinaspan niran: “Chay revistata leespan repararani mana allin piensaykunawan maqanakuyqa sinchi sasapuni kasqanta. Askha iñiqmasinchiskunan chaywan maqanakushasqaku, chaymi anchata kallpachakurani maqanakushanallaypaq”, nispa. Chay waynaqa leellasqataqmi “¿Aprueba Dios los estilos de vida alternativos?” nisqa tematapas 2003 wata 8 octubre ¡Despertad! revistapi. Chaypi leespan  entiendesqa wakin cristianokunapaqqa “kiska jina” chay sasachakuyqa kasqanta, sapa kutin chaywan maqanakunanku kasqantapas (2 Corintios 12:7). Jinaspapas paykunaqa kallpachakushallankus ch’uyata kausanankupaq, manataqsi iskayankuchu jamuq tiempopi bendicionkunamanta. Chayta yachaspan chay waynaqa niran: “Atiymanmi Diospaq junt’aq kayta, anchatan Jehová Diosta llaqtantapas agradecekuni kay millay pachapi yanapawasqanchismanta”, nispa.

¹³ Estados Unidos nacionmanta hermananchismi niran: “Anchatan agradecekuni qelqakuna tiempollanpi chayamusqanmanta. Sapa chayamuqtinmi noqallapaqpas chayta ruwakunman karan jinata qhawarini. Askha watakunañan Diospa cheqnikusqan mana allin piensaykunawan maqanakusharani, mayninqa yaqa-yaqallan pisi kallpayaqpas kani. Jehová Diosqa khuyapayakuqña perdonakuqña chaypas, mana perdonanapaq jinan noqa kikiyta qhawarikuq kani chay mana allin piensaykunata mana tukuy sonqoywanchu cheqnikusqayrayku. 2013 wata 15 marzo Qhawaq revistapi “¿Diospaq jinachu sonqonchis kashan?” nisqa temata estudiaspaymi ichaqa allinta repararani Jehová Diosqa yanapawananpaq listo kashasqanta”, nispa.

14. a) ¿Imatan apóstol Pablo yacharan? b) ¿Iman yanapawasun sasachakuykunata atipanapaq?

¹⁴ Leey Romanos 7:21-25. Apóstol Pablopas yacharanmi mana allin piensaykunawan maqanakuyqa sinchi sasapuni kasqanta. Ichaqa chaywanpas manan atipachikuranchu, aswanmi tukuy sonqowan Diospa yanapayninta mañakuran, Jesuspa sacrificion qosqanpitaq iñiran. Noqanchispas chayta ruwasunchis chayqa, atipasunmi ima sasachakuyninchistapas.

15. ¿Imaynatan Jehová Dios yanapawanchis sasachakuykunata aguantanapaq?

¹⁵ ¿Imatan ruwasunman familianchismanta pipas sinchita onqoruqtin otaq mana allinta tratasqa kaqtin? ¿Imatan ruwasunman noqanchis chhaynapi tarikuspa? Jehová Diospin confiananchis. Mayninpin payqa mana usqhayllachu imatapas ruwapuwasunman, chhaynapi tukuy sonqonchiswan paymanta mañakunanchispaq. Chayraykun paymanta kallpata mañakunanchis junt’aq kananchispaq, kusikuywan payta servishanallanchispaqwan (Filip. 4:13). Jinan Jehová Diosqa imaynan lliu serviqninkunatapas yanaparan chhaynata noqanchistapas yanapawasun aguantananchispaq.

16, 17. ¿Ima ruwaytan decidikunanchis?

¹⁶ Saqraqa anchatan kusikunman sasachakuykunawan atipachikuqtinchis. Chaymi decidisqa kashananchis ‘allin kaqtapuni ruwananchispaq’ (1 Tes. 5:21). Chaymantapas tukuy sonqonchiswanmi Jehová Diospi confiananchis, chhaynapin atipasunchis Saqrata, munaychakusqan pachata, ima mana allin piensaykunatapas (2 Cor. 4:7-9; Gál. 6:9).

¹⁷ Chhaynaqa kallpachakushallasun atipananchispaq, amataq pisi kallpayasunchu chhaynapin Jehová Diosqa bendicionninkunata ‘llimp’arishaqta jich’aykamuwasun’ (Mal. 3:10).