1. ¿Imakunatan ruwananchis piwanpas allin amigontin kananchispaq?

PIWANPAS allin amigontin kananchispaqqa parlarinanchismi ima piensasqanchismanta, imayna sientekusqanchismanta, imayna wiñasqanchismantapas. Ichaqa yaqapaschá Jesuspa amigon kaytaqa sasapaq qhawarisunman. ¿Imarayku? Chaymantan kaypi yachasunchis.

2. ¿Imaraykun sasapaq qhawarisunman Jesuspa amigon kayta?

² Ñaupaqta, yaqapaschá Jesuspa amigon kayta sasapaq qhawarisunman payta mana rikusqanchisrayku. Jesuspa wañupusqan qhepata wakin qatikuqninkunapas manan Jesustaqa jayk’aqpas rikurankuchu. Chaymi apóstol Pedro niran: “Qankunaqa manaña jayk’aqpas Cristota rikurankichischu chaypas, munakunkichismi paytaqa ¿riki? Manaña kunanpas rikunkichischu chaypas, iñishankichismi paypiqa”, nispa (1 Ped. 1:8). Chhaynaqa Jesuspa amigon kananchispaqqa manan rikunanchisraqchu.

3. ¿Imaraykun sasapaq qhawarillasunmantaq Jesuspa amigon kayta?

³ Iskaypi, yaqapaschá Jesuspa amigon kayta sasapaq qhawarisunman paywan mana rimayta atisqanchisrayku. Jesuspa sutinpiña mañakunchis chaypas, manan paywanchu rimashanchis aswanpas Jehová Dioswanmi rimashanchis. Mañakuspaqa Diostan yupaychanchis, chaymi Jesusqa munan Jehová Diosllamanta mañakunanchista, payllata yupaychananchistapas (Mat. 4:10). Chhaynaña kaqtinpas atisunmanmi Jesuspa amigon kaytaqa.

4. a) ¿Imaraykun sasapaq qhawarillasunmantaq Jesuspa amigon kayta? b) ¿Imamantan kaypi yachasunchis?

 ⁴ Kinsapi, yaqapaschá Jesuspa amigon kayta sasapaq qhawarillasunmantaq pay janaq pachapi tiyasqanrayku. Chaywanpas atisunmanmi paymanta astawan yachayta. Chaymi kaypi yachasunchis Jesuswan amigontin kananchispaq tawa yanapaykunamanta, ñaupaqtan ichaqa yachasunchis imarayku Jesuspa amigon kay ancha allinpuni kasqanta.

5. ¿Imaraykun ancha allinpuni Jesuspa amigon kay? (Qhaway “ Jesuswan amigontin kaspaqa Jehová Dioswanpas amigontinmi kallasuntaq” nisqata, jinallataq “ Jesustaqa manan Diosta jinachu qhawarinanchis” nisqatawan.)

⁵ Jehová Dioswan allinpi kananchispaqqa Jesuswanmi amigontin kananchis. ¿Imarayku? Ñaupaqta, Jesusmi qatikuqninkunata niran: “Noqata munakuwasqaykichisraykun, [...] Yayaqa qankunata munakusunkichis”, nispa (Juan 16:27). Nillarantaqmi: “Noqallantapunin pipas Yayamanqa chayanqa”, nispa (Juan 14:6). Juj wasiman jaykunapaqqa punkuntapunin jaykunanchis. Chhaynallataqmi Jehová Dioswan amigontin kananchispaqpas, ñaupaqtaqa Jesuswan amigontin kananchis. Jesuspas chay jinatan nillarantaq: “Noqan ovejakunapaq punkuqa kani”, nispa (Juan 10:7). Iskaypi, Jesusqa ruwayninkunapin sut’ita rikuchiran imaynachus taytan karan chayta. Chaymi qatikuqninkunata niran: “Pipas noqata rikuwaqqa Yayatapas rikullantaqmi”, nispa (Juan 14:9). Chhaynaqa Jehová Diosta reqsinanchispaqqa Jesusmantan astawan yachananchis. Jesusmanta astawan yachasunchis chayqa astawanmi payta  munakusunchis, jinallataq taytan Jehová Diostapas.

6. ¿Imaraykun Jesuspa amigon kanallanchistaq?

⁶ Mañakusqanchisman Jehová Dios kutichimunanpaqqa Jesuspa amigonmi kananchis. Jehová Diosmanta mañakuspaqa Jesuspa sutinpin mañakunchis. Ichaqa entiendenanchismi imaynatas Jehová Dios wawan Jesuswan mañakusqanchisman kutichimun chayta. Jesusmi qatikuqninkunata niran: “Imatapas sutiypi mañakuqtiykichisqa noqan ruwapusaykichis”, nispa (Juan 14:13). Jehová Diosmi mañakusqanchistaqa uyarimuwanchis kutichimuwanchispas, ichaqa wawan Jesusmanmi atiyta qoran chay mañakusqanchista junt’achinanpaq (Mat. 28:18). Jehová Dios juchanchista panpachawananchispaqqa ñaupaqtan payqa qhawarin Jesuspa kamachikuyninta kasukushanchischus icha manachus chayta. Jesusmi niran: “Runakunaq mana allin ruwasqasuykichistachus perdonankichis chayqa, janaq pacha Yayaykichispas perdonallasunkichistaqmi; ichaqa runakunaq mana allin ruwasqasuykichista mana perdonankichischu chayqa, Yayaykichispas manallataqmi juchaykichista perdonasunkichischu”, nispa (Mat. 6:14, 15). Jehová Diospas Jesuspas perdonawanchismi juchanchiskunata, chaymi noqanchispas kallpachakunanchis jujkunata perdonananchispaq.

7. ¿Imatan ruwanchis Jesuspa wañusqanrayku saminchaykunata chaskinanchispaq?

⁷ Jesuspa amigonkunallan wañupusqanmanta saminchaykunataqa chaskinqaku. ¿Imarayku? Bibliaq nisqan jina, Jesusqa ‘amigonkunaraykun vidanta qonan’ karan (Juan 15:13). Manaraq kay pachaman Jesús jamushaqtin Dios sonqo runakunapas yachanqakun Jesusmanta chhaynapi paypa amigon kanankupaq. Paykunamanta wakinmi kashan Abrahán, Sara, Moisés, Rahab ima. Paykunan kausarimpunqaku Jesuspa amigon kanankupaq, wiñaypaq kausanankupaq ima (Juan 17:3; Hech. 24:15; Heb. 11:8-12, 24-26, 31).

8, 9. Juan 15:4, 5 nisqan jina, ¿ima llank’aypin yanapakushanku Jesuspa amigonkuna? ¿Imaraykun Jesuswan jujllachasqa kananchis chay llank’aypi yanapakunanchispaq?

⁸ Jesustan yanapakushanchis Diospa gobiernonmanta allin willakuykunata llapa runakunaman willaypi. Jesuspas kay pachapi kashaspaqa cheqaq kaqtan yachachiran Diosmanta. Kunantaq janaq pachamanta iñiq t’aqakunata umallimushan allin willakuykuna pachantinpi willakunanpaq. Jesusqa ancha valorniyoqpaqmi qhawarin jujkunaman Diosmanta willanapaq kallpachakusqanchista, ichaqa chay llank’aytaqa Jehová Diospa Jesuspa yanapaynillanwanmi apariyta atinchis (leey Juan 15:4, 5).

⁹ Bibliaq nisqan jina, Jehová Dioswan allinpi kananchispaqqa Jesusta munakunanchis. Kunanmi yachasun Jesuspa amigon kananchispaq tawa ruwaykunamanta.

10. ¿Imatan ruwananchis Jesuspa amigon kananchispaq?

¹⁰ Ñaupaqtaqa Jesustan allinta reqsinanchis. Chaypaqqa, Mateo, Marcos, Lucas, Juan qelqakunatan leenanchis, chaymantapas yuyaymanananchismi. Chay leesqanchispi yuyaymanasun chayqa, reparasunmi Jesús munakuyniyoq khuyapayakuq kasqanta, chayta reparaspataq payta astawan  munakusunchis respetasunchis ima. Jesusqa manan kamachita jinachu qatikuqninkunataqa qhawariq, aswanpas amigonkunata jinan qhawariq, chaymi paykunaman willaq imachus piensasqanta imayna sientekusqantapas (Juan 15:15). Payqa amigonkunamantan sienteq paykunawantaqmi waqaqpas (Juan 11:32-36). Enemigonkunapas repararankun qatikuqninkunaqa Jesuspa amigon kasqankuta (Mat. 11:19). Chhaynaqa, Jesús jinan jujkunata munakunanchis chhaynapin paykunawan allinpi kasunchis kusisqataq sientekusunchispas. Astawanqa Jesustan munakusun respetasun ima.

11. ¿Imatawanmi ruwananchis Jesuspa amigon kananchispaq? ¿Imaraykun allinpuni chayta ruway?

¹¹ Iskaypi, Jesús jinan piensananchis pay jinataq imatapas ruwananchis. Jesuswan amigo kananchispaqqa paytan allinta reqsinanchis pay jinataq piensananchispas (1 Cor. 2:16). ¿Imaynatan chayta ruwasunman? Chaypaq kaypi piensasun, Jesuspaqqa jujkunata yanapaymi aswan allin karan paypa munayninta ruwaymantaqa (Mat. 20:28; Rom. 15:1-3). Payqa jujkunaq allinnintan ñaupaqtaqa maskhaq, juchankutapas perdonaqmi. Imataña jujkuna paymanta rimaqtinkupas manan payqa phiñakuq pachachu (Juan 1:46, 47). Manan jujkunaq mana allin ruwasqantapas yuyashallaqchu (1 Tim. 1:12-14). Pay jinan noqanchispas kananchis. Paymi niran: “Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:35). Chaymi sapankanchis tapukunanchis: “¿Jesús jinachu kallpachakuni jujkunawan thajpi kausanaypaq?”, nispa.

12. ¿Imatawanmi ruwasunman Jesuspa amigon kananchispaq? ¿Imaynatan chayta ruwasunman?

¹² Kinsapi, Jesuspa wayqenkunatan yanapananchis. Jesuspa nisqan jina, wayqenkunata yanapaspaqa pay kikintan yanapashanchis (Mat. 25:34-40). ¿Imaynatan wayqenkunata yanapasunman? Tukuy yuyaywan Diospa gobiernonmanta willaspa yachachispa iman. (Mat. 28:19, 20; Hech. 10:42). ‘Waj ovejamanta’ kaqkunaqa yanapananchispunin Jesuspa wayqenkunataqa, chhaynapin Diospa siminta pachantinman chayachisunchis (Juan 10:16). Waj ovejamanta kaqkuna chayta ruwasun, Diosmanta willaypi tukuy sonqo yanapakusun chayqa, Jesustapas wayqenkunatapas munakusqanchistan rikuchisun.

13. ¿Imata ruwaspan kasukusunman Lucas 16:9 nisqanta?

¹³ Jehová Dioswan Jesuswan amigo kananchispaqqa, yaqapaschá qolqechanchiswan ima yanapakusunman (leey Lucas 16:9). Chaykunan kanqa Diospa simin lliu runakunaman chayananpaq, juñunakuy wasikuna, asamblea ruwana wasikuna, Betel wasikuna ruwakunanpaq, iñiqmasinchiskuna sasachakuypi tarikuqtin yanapanapaq ima (Prov. 19:17). Chaykunata ruwaspa iman yanapasun Jesuspa wayqenkunata.

14. Efesios 4:15, 16 nisqan jina, ¿imatawanmi ruwallasunmantaq Jesuspa amigon kananchispaq?

¹⁴ Tawapi, iñiq t’aqapi umalliqkunaq imachus nisqankutan kasukunanchis. Jesuswan allinpi kananchispaqqa umalliqninchiskunaq nisqantan kasukunanchis, paykunaqa munakuywanmi cuidawashanchis (leey Efesios 4:15, 16). Diospa llaqtanpiqa imaymana cambiokuna kashan. Mayninpiqa  iskay iñiq t’aqakunan jujllaman juñukapuranku, chhaynapi ama juñunakuna wasikuna jatarichiypi nishuta gastakunanpaq. Chhayna cambiokuna kasqanraykun wakin iñiqmasikunapas juj iñiq t’aqaman yachakunanku karan. Sasaña paykunapaq karan chaypas, kasukurankun umalliqkunaq nisqankuta. Jesusqa anchatachá kusikun qatikuqninkuna kasukuq kasqankumantaqa.

15. ¿Atisunmanchu wiñaypaq Jesuswan amigontin kayta?

¹⁵ Santo espirituwan ajllasqa cristianokunaqa Jesuswanmi janaq pachamanta kamachikamunqaku, chaypin paykunaqa Jesuswan parlayta atinqaku paywan kuskataq tiyanqakupas (Juan 14:2, 3). Kay pachapi tiyaq runakunatapas Jesusqa munakuywanmi cuidawasun. Manaña Jesusta rikusunchu chaypas, pisi-pisimantan Jesuswan Jehová Dioswanpas aswan amigontin kapusun (Is. 9:6, 7).

16. ¿Ima bendicionkunatan chaskisunchis Jesuswan amigontin kasqanchisrayku?

¹⁶ Jesuspa amigon kanapaq kallpachakusun chayqa, imaymana bendicionkunatan chaskisunchis. Kay tiempomantapachan Jesusqa munakuyninta rikuchiwashanchis cuidawashanchis ima. Jamuq tiempopitaq wiñay kausaytan chaskisunchis. Astawanqa Jesuswan amigontin kasqanchisraykun, Jehová Dioswanpas amigontin kallasuntaq. ¡May munaypunin Jesuspa amigon kayqa!