1. ¿Imaynatan Jehová Dios qhawariwanchis?

¡JEHOVÁ DIOSQA anchatan “llaqtanmanta kusikun”! (Sal. 149:4.) Payqa ancha kusisqan kashan llaqtanpi kasqanchismanta, payta servinanchispaq kallpachakusqanchismantapas. Sichus kallpachakushallasunchis Jehová Diosta servinanchispaq chayqa, payqa manan jayk’aqpas saqerpariwasunchu (Juan 6:44).

2. ¿Imaraykun wakin hermanonchiskuna piensankuman Jehová Dios paykunata mana munakunanpaq?

² Yaqapaschá mayqen hermanonchispas ninman: “Jehová Diosqa munakunmi llaqtantaqa. Noqatan ichaqa mana munakuwanmanchu”, nispa. ¿Imaraykun wakin hermanonchiskuna chhaynata ninkuman? Sufrispa wiñasqankuraykun. Chaymi pasaran Oksana * hermananchiswanpas, paymi nin: “Bautizakuspapas tukuy tiempoywan Jehová Diosta servishaspapas kusisqan kasharani. 15 wataña Jehová Diosta servishaqtiymi ichaqa sufrisqayta yuyarispa llakikuyta qallarirani. Chaymi mayninpiqa niq kani: ‘Manañachá Jehová Diosqa munakuwanñachu’”, nispa. Yovana hermananchispas nillantaqmi: “Noqaqa anchatan Jehová Diosta munakurani, kusichiytataqmi munaranipas, chaymi bautizakapurani. Ichaqa niqmi kani: ‘Jehová Diosqa manan jayk’aqpas munakuwanmanchu’”, nispa.

3. ¿Imakunamantan kay yachachikuypi yachasunchis?

³ Llapanchispas anchatapunin Jehová Diostaqa munakunchis. Ichaqa yaqapaschá piensasunman Jehová Dios noqanchista mana munakuwananchispaq. Kay yachachikuypin yachasunchis imaraykun mana iskayananchischu Jehová Diospa munakuyninmanta chayta, imatan ruwananchis chhayna yuyaykuna jamuwaqtinchis chaytapas.

4. ¿Iman pasawasunman Jehová Diospa munakuwasqanchismanta iskayaqtinchis?

⁴ Sichus nisunman “Jehová Diosqa manan munakuwanchu” nispa chayqa, pisikallpayasunmanmi, manañan kusisqachu payta servisunman (Prov. 24:10). Chaymantapas Satanasmi facilta trampankunaman urmachiwasunman (Efes. 6:16).

5. ¿Iman pasaran wakin hermanonchiskunata Jehová Diospa munakuyninmanta iskayasqankurayku?

⁵ Wakin iñiqmasinchiskunaqa piensankun Jehová Diosqa paykunata mana munakusqanta, chaymi iñiyninkupi chiriyapuranku. James umalliqmi nin: “Noqaqa Betelpin yanapakusharani, chaymantapas juj simita rimaq iñiq t’aqapin yanapakushallaranitaq. Chaywanpas mayninpin niq kani: ‘Jehová Diosqa manapaschá mañakusqaytaqa uyariwanchu’”, nispa. Eva hermananchispas tukuy tiemponwanmi Jehová Diosta servishan. Paypas nillantaqmi: “Manan allinchu Jehová Diospa munakuwasqanchismanta iskayayqa. Chhaynata piensaspaqa manañan kusisqachu Jehová Diosta servisunman”, nispa. Martín hermanonchispas tukuy tiemponwanmi Jehová Diosta servishan. Payqa juj iñiq t’aqapi umalliqmi, paypas khaynatan nin: “Sichus nisunman ‘Jehová Diosqa manan munakuwanmanchu’ nispa chayqa, astawanmi Jehová Diosmanta t’aqakusunman”, nispa.

6. ¿Imatan ruwananchis mana allin piensaykuna umanchisman jamuqtin?

⁶ Chhaynaqa, “Jehová Diosqa manan munakuwanmanchu” nispa piensayqa manan allinchu kanman. ¿Ichaqa imatan ruwananchis chhayna piensaykuna jamuwaqtinchis? Kaq raton umanchismantaqa chhayna piensaykunata wijch’upunanchis. Chaymantapas Jehová Diospa yanapaynintan mañakunanchis thaj kayta qowananchispaq, ‘chhaynapi sonqonchistapas yuyayninchistapas’ waqaychananpaq (Sal. 139:23; Filip. 4:6, 7). Yaqapaschá piensasunman noqallanchis chhaynata yuyaykusqanchista, ichaqa askha hermanonchiskunan mayninpi chhaynata piensanku. Ñaupa tiempopi Jehová Diosta serviqkunapas chhaynatan piensaranku. Chaypaq apóstol Pablomanta rimasun.

7. ¿Imakunamantan apóstol Pablo llakikuran?

⁷ Mayninpiqa imaymana ruwanayoq kaspan sayk’upusunman, pisikallpayapusunman  ima. Chaymi pasaran apóstol Pablowanpas, payqa sinchi llakisqan kasharan llapa iñiq t’aqapi hermanokunamanta (2 Cor. 11:23-28). Chaymantapas yaqapaschá ima onqoywanpas kashasunman, jinaspa manaña kusisqachu Jehová Diosta servishasunman. Yaqapaschá apóstol Pablopas chhaynapi tarikuran. Chaypaschá niran: ‘Sinchi nanaymi noqapi kashan kiska jina’, nispa (2 Cor. 12:7-10). Chaymantapas juchasapa runakunan kanchis, chaymi imallapipas pantaruspa sinchitapuni llakikusunman. Apóstol Pablopas chhaynapin tarikuran, chaymi imaymanapi pantasqanmanta niran: “¡Ay noqa runamanta!”, nispa (Rom. 7:21-24).

8. ¿Iman apóstol Pablota yanaparan Jehová Diosta servishanallanpaq?

⁸ ¿Iman apóstol Pablota yanaparan chhayna sasachakuykunapiña tarikuran chaypas? Payqa Jesuspa wañusqanpin iñiran, chaymi paytaqa yanaparan Jehová Diosta servishanallanpaq. Apóstol Pabloqa allintan yacharan pipas Jesuspi iñiqqa wiñay kausayniyoq kananta (Juan 3:16; Rom. 6:23). Chayraykun payqa mana iskayaranchu Jehová Dios juchankunamanta perdonananta (Sal. 86:5).

9. ¿Imatan yachasunman Gálatas 2:20 textopi apóstol Pabloq nisqanmanta?

⁹ Apóstol Pabloqa yacharanmi Jehová Dios payta munakusqanta. Chaymi niran: “[Jesusqa] noqata munakuwaspa noqarayku wañuran”, nispa (leey Gálatas 2:20). Apóstol Pabloqa manan niranchu: “Jehová Diosqa llapa runakunatan munakun, noqatan ichaqa mana munakuwanmanchu”, nispaqa. Aswanpas Roma llaqtapi cristianokunatan niran: “Criston ichaqa juchasaparaq kashaqtinchis noqanchisrayku wañuran”, nispa (Rom. 5:8). Chhaynaqa, Jehová Diosqa llapallanchistan munakuwanchis.

10. ¿Imatan yachasunman Romanos 8:38, 39 textopi nisqanmanta?

¹⁰ (Leey Romanos 8:38, 39). Apóstol Pabloqa yacharanmi Jehová Diosqa llapanchistapas munakuwasqanchista. Chaymi niran: “Manan ni wañuypas [...] Diospa munakuyninmantaqa t’aqawasunchu”, nispa. Chaymantapas apóstol Pabloqa yacharanmi Jehová Diosqa Israel runakunata munakuspa khuyapayasqanta. Chayraykun payqa yacharan Jehová Diosqa paytapas khuyapayaspa juchankunamanta perdonasqanta (Rom. 8:32).

11. 1 Timoteo 1:12-15 nisqan jina, ¿imatan apóstol Pablo allinta yacharan juchasapaña karan chaypas?

¹¹ (Leey 1 Timoteo 1:12-15). Apóstol Pablon niran: “Noqataqmi chay juchasapakunamanta aswan juchasapaqa kanipas”, nispa. Apóstol Pabloqa manaraq Jesusta qatikushaspan  imaymana mana allinkunata ruwaran. Payqa Jesuspa discipulonkunatan carcelman wisq’achiran, “wañuchinanku kaqtinpas ‘allinmi’ nispan niq” (Hech. 26:10, 11). Chaykuna ruwasqanmantaqa maytachá apóstol Pabloqa llakikuran. Wañuchisqanku cristianokunaq wawanwan tupaspapas astawanraqchá llakikuran, chaywanpas manan pisikallpayaranchu. Pabloqa allintan yacharan Jehová Diosqa payta munakusqanta, juchankunamantapas perdonasqanta. Chaymi niran: “Ichaqa Dios ancha sumaq sonqo kasqanraykun kay llank’anapi kashani”, nispa (1 Cor. 15:3, 10). ¿Imatan chaymanta yachasunman? Noqanchispas yuyarinanchispunin Jesusqa noqanchisrayku wañusqanta, chayraykun Jehová Dioswanpas amigontin kayta atinchis (Hech. 3:19). Jehová Diosqa manan yuyashallanchu ñaupaqpi mana allinkuna ruwasqanchistaqa, aswanpas sapa p’unchay kallpachakusqanchistan payqa qhawamushan (Isa. 1:18).

12. 1 Juan 3:19, 20 nisqan jina, ¿imatan ruwananchis sonqonchis juchachawaqtinchis Jehová Diospa munakuyninmantapas iskayaqtinchis?

¹² Mayninpiqa yaqapaschá sonqonchis juchachawasunman, jinaspa Jehová Diospa munakuyninmanta iskayapusunman (leey 1 Juan 3:19, 20). Chaymantapas yaqapaschá piensallasunmantaq juchanchiskunamanta Jehová Dios mana perdonawananchispaq. Chhayna piensaykuna jamuwaqtinchisqa yuyarinanchismi “Diosqa sonqonchismanta aswan jatun kasqanta”. Jehová Diosqa anchatapunin munakuwanchis, chaymi juchanchiskunatapas perdonawanchis. Chaymantaqa manapunin iskayananchischu. Chhayna piensaykunata atipananchispaqqa kallpachakunanchismi sapa p’unchay Bibliata leenanchispaq, Jehová Diosmanta mañakunanchispaq, hermanonchiskunawanpas kuska  kananchispaq. Chaykuna ruwasqanchismi yanapawasun Jehová Diospa munakuyninmanta ama iskayananchispaq. Chaykunamantan astawan yachasunchis.

13. ¿Imaynatan Biblia estudiasqanchis yanapawasunman? (Qhaway “ Biblia estudiasqanchisqa anchatapunin yanapawanchis” nisqata.)

¹³ Sapa p’unchaymi Bibliata allinta estudiananchis. Chayta ruwasunchis chayqa astawanmi Jehová Diosta reqsisunchis, reparasuntaqmi anchatapuni munakuwasqanchista. Chaymantapas Bibliata leespaqa yuyaymanananchismi, chaymi yanapawasunchis mana allin piensaykunata sonqonchismanta umanchismanta wijch’upunanchispaq (2 Tim. 3:16). Kevin hermanonchismanta yachasun. Payqa juj iñiq t’aqapin umalliq kashan, ichaqa pisipaqsi qhawarikuq. Paymi nin: “Noqataqa Salmos 103 textota leeymi anchatapuni yanapawaran. Chaypi yuyaymanaspan repararani Jehová Diosqa anchatapuni munakuwasqanta”, nispa. Eva hermananchispas nillantaqmi: “Sapa tutamantanmi yuyaymanani Jehová Diosqa anchata munakuwasqanpi. Chaymi yanapawan kusisqa kanaypaq, allin iñiyniyoq kanaypaq ima”, nispa.

14. ¿Imaynatan Jehová Diosmanta mañakusqanchis yanapawanchis?

¹⁴ Tukuy tiempon Jehová Diosmanta mañakushanallanchis (1 Tes. 5:17). Llapanchispas sapa kutinmi amigonchiskunawanqa rimanchis ¿riki? Chhaynatan Jehová Dioswanpas tukuy tiempo rimananchis. Paymanmi willakunanchis imayna kashasqanchista, ima piensasqanchista, imakuna llakichiwasqanchistapas. Chayta ruwaspan papanchis Jehová Diospi confiasqanchista rikuchisunchis (Sal. 94:17-19; 1 Juan 5:14, 15). Yovana hermananchismi nin: “Jehová Diosmanqa manan imakuna ruwasqallaytachu willakuni. Aswanpas waqayusparaqmi imakunachus llakichiwasqanta willakuni. Jehová Diostaqa manan juj jefeta jinachu qhawarini, aswanpas munakuq papayta jinapunin qhawarini”, nispa (qhaway “ ¿Leerankichu Acerquémonos a Jehová nisqa librota?” nisqata).

15. ¿Imaynatan Jehová Dios rikuchiwallanchistaq munakuwasqanchista?

¹⁵ Hermanonchiskunawan kananchispaqmi tiempota t’aqananchis. Hermanonchiskunaqa Jehová Diospa qowasqanchis sumaq regalokunan kanku (Sant. 1:17). Jehová Diosqa munakuwasqanchisraykun pachantinpi sumaq familiata qowanchis. Paykunaqa ‘llaki-phutiy tiempopipas wayqe jinan khuyapayakuq’ kanku (Prov. 17:17). Apóstol Pabloqa cartata apachisqanpin Colosas hermanokunata sutinmantakama napaykuran. Chay hermanokunaqa sasa tiempokunapin apóstol Pablota yanaparanku, chaymi niran: “Paykunan  noqapaqqa ancha jatun consuelo kanku”, nispa (Col. 4:10, 11). Señorninchis Jesucristotapas angelkunan anchatapuni kallpacharanku, amigonkunapas kallpachallarankutaqmi (Luc. 22:28, 43).

16. ¿Imaynatan allin iñiyniyoq hermanonchiskunapas amigonchiskunapas yanapawanchis?

¹⁶ Mana manchakuspan hermanonchiskunaq yanapaynintaqa mañakunanchis, ima niwasqanchistapas uyarikunanchismi. James hermanonchismi nin: “Allin iñiyniyoq amigoykunan anchatapuni yanapawanku. Mayninpiqa mana allin yuyaykunan umayman jamuwan, paykunan ichaqa pacienciawan uyariykuwanku, jinaspa kallpachaykuwanku. Chaywanmi reparani Jehová Diosqa anchatapuni munakuwasqanta, noqamanta llakikusqantapas”, nispa. ¡May allinpunin chhayna amigokunayoq kayqa!

17, 18. ¿Piqpa nisqantan uyarikunanchis?

¹⁷ Satanasmi munan “Jehová Diosqa manan munakuwanchu” nispa piensananchista, chhaynapi amaña Jehová Diosta servinanchispaq. Ichaqa kaypi yachamusqanchis jina, Jehová Diosqa anchatapunin munakuwanchis.

¹⁸ Jehová Diosqa anchatan munakuwanchis, kusikuntaqmi payta servinanchispaq kallpachakusqanchismanta. Chhaynaqa, Jehová Diospa munakuynillanpi kananchispaqqa Jesús jinan Jehová Diospa kamachikuyninkunata kasukunanchis (Juan 15:10). Satanasqa Jehová Diospa munakuyninmantan iskayachiyta munawanchis, sonqonchispas imaymanamantan juchachawanchis, chaymi chaykunataqa mana kasunanchischu. Aswanpas Jehová Diospa nisqantan uyarinanchis. Jehová Diosqa kusikunmi payta servinanchispaq kallpachakusqanchismanta, anchatan munakuwanchispas.