¿Imaraykun Jesús manaraq wañushaspa niran Salmos 22:1 textoq nisqanta?

Mateo 27:46 nisqan jina, Jesusmi manaraq wañushaspa niran: “Diosníy, Diosníy, ¿imaraykun saqerpariwanki?”, nispa. Chay nisqanwanmi junt’akusharan Salmos 22:1 textopi Davidpa nisqan (Mar. 15:34). Chhaynaqa, Jesusqa manan llakisqa kasqanraykuchu, nitaqmi Jehová Diospi manaña confiasqanraykuchu chaytaqa niran. Jesusqa allintan yacharan imarayku wañunanta. Payqa Jehová Diospa munaynintan junt’ayta munaran (Mat. 16:21; 20:28). Chaymantapas Jesusqa allintan yacharan wañuchinankuta Jehová Diosqa jinallata qhawananta (Job 1:10). Chhaynapin Jesusqa rikuchinan karan Jehová Diospaq junt’aq sonqo kasqanta (Mar. 14:35, 36).

Chhaynaqa, ¿imaraykun Jesús niran “Diosníy, Diosníy, ¿imaraykun saqerpariwanki”, nispa? Manan chaytaqa allintachu yachanchis. Ichaqa kunanmi yachasunchis imaraykun Jesús chayta ninman karan chayta. *

Jesusqa yacharanmi enemigonkuna payta wañuchishaqtinku Jehová Diosqa mana yanapananta. Chayraykupaschá Jesusqa ninman karan Salmos 22:1 textopi nisqantaqa. Jesusqa llapa runakunaraykun wañunan karan, chaywanmi rikuchinan karan junt’aq sonqo kasqanta (Heb. 2:9).

 Yaqapaschá munaran qatikuqninkuna llapa Salmos 22 textoq nisqanta yuyarinankuta. Ñaupa tiempopi Judío runakunaqa umankupin takita jina jap’ikuqku llapa Salmos libropi nisqanta. Chaymantapas yaqapaschá Jesusqa munaran Salmos 22 capitulopi profeciakunaq junt’akusqanta reparanankuta, chaypin kashan Jesuspa wañupunanmanta profeciakuna (Sal. 22:7, 8, 15, 16, 18, 24). Chaymantapas Salmos 22 textoq tukuyninpin willashan Jehová Dioslla pachantinpi rey kapunanmanta (Sal. 22:27-31).

Yaqapaschá chayta nillanmantaq karan yanqamanta runakuna tumpasqankurayku. Uma sacerdotekunaqa yanqamanta tumpaspan Jesusta niranku: “¡Diostan k’amishan!”, nispa (Mat. 26:65, 66). Chaymantapas Jesustaqa manan leypa kamachisqanman jinachu juzgaranku (Mat. 26:59; Mar. 14:56-59). Chhaynaqa, chayta nispaqa yaqapaschá Jesusqa yanqamanta tumpaspa wañuchisqankuta reparanankuta munaran.

Davidmi niran: “Diosníy, Diosníy, ¿imaraykun saqerpariwanki?”, nispa. Chaytaqa manan Jehová Diospi manaña iñisqanraykuchu niran, chaymi Jehová Diosqa mana chay nisqanwanqa phiñakuranchu. Aswanpas munakushallaranmi Davidtaqa (Sal. 22:23, 24, 27). Chhaynallataqmi Jesuspa chay nisqanwanpas Jehová Diosqa mana phiñakuranchu, aswanpas confiashallaranmi paypiqa. Chayraykun Bibliaqa Jesusmanta nin: “¡Salvasqa kachun Davidpa Churinqa! ¡Sumaqpaq qhawarisqa kachun Jehová Diospa sutinpi jamuqqa!”, nispa (Mat. 21:9).

Jehová Diosqa jinallatan qhawanan karan Jesús ñak’arispa wañunanta, chaypaschá chaytaqa niran. Jesusqa Adanpa juchallikusqanraykun wañuymanta salvawananchispaq ñak’arispa wañunan karan. Chaymantapas Jesusqa Satanaspa llulla kasqanta rikuchinanpaqmi chhaynata wañunallantaq karan. Chayraykun juchanchiskunamanta perdonasqa kanchis, jamuq tiempopipas wiñay kausayta chaskikusunchis (Mar. 8:31; 1 Ped. 2:21-24).

Chaytaqa yaqapaschá ninman karan qatikuqninkuna Jesuspa imayna wañusqata rikuspa ama iñiyninkupi urmanankupaq. * Jesustaqa mana allin runakunata jinan k’aspipi warkuspa wañuchiranku (1 Cor. 1:23). Jesusqa manan munaranchu chaywan qatikuqninkuna iñiyninkupi urmanankuta. Aswanpas munaranmi salvaqninkuta jina payta qhawarinankuta (Gál. 3:13, 14).

Manaña yachanchischu imaraykus Jesús niran Salmos 22:1 textoq nisqanta chaypas, Jesusqa Diospa munaynintan junt’asharan. Chayraykun chay qhepaman Jesusqa niran: “¡Junt’akunñan!”, nispa (Juan 19:30; Luc. 22:37). Jinataña Jehová Dios qhawaran Jesusta wañuchinankuta chaypas, Bibliaq nisqanmi junt’akusharan. Chayraykun Bibliapi nin: ‘Moisespa chaskisqan kamachikuy simipas, profetakunaq qelqasqanpas, salmo takikunapas junt’akunpunin’, nispa (Luc. 24:44).