1, 2. ¿Imatan ruwananchis mosoq pacha chayamunankama?

 MAYTAN Jehová Diosta agradecekunchis kay millay pachata juj sumaq paraisoman tukuchinanmanta (2 Ped. 3:13). Manaña yachanchischu jayk’aqchus Jehová Dios chay promesanta junt’ananta chaypas, kay tiempopi imaymana pasasqanmi rikuchiwanchis chay p’unchay chayamunanpaq pisillaña faltashasqanta (Mat. 24:32-34, 36; Hech. 1:7).

² Unayña otaq chayllaraq Diosta servishanchis chaypas, astawanmi Jehová Diospa promesankunapi iñinanchis. ¿Imarayku? Allin iñiyniyoqña kasunman chaypas mayninpiqa pisipasunmanmi iñiyninchispi. Chaymi apóstol Pablopas nirqan mana iñiyniyoq kayqa “mayt’uwaqninchis jucha” kasqanta (Heb. 12:1). Chhaynapi ama tarikunanchispaqqa sapa kutinmi yuyarinanchis imaraykus Jehová Diospa promesankunapi confianchis chayta (Heb. 11:1).

3. ¿Imakunamantan kay yachachikuypi yachasunchis?

³ Kay yachachikuypin kinsamanta yachasunchis, chaykunan yanapawasun Jehová Dios mosoq pachata apamunanpi astawan confiananchispaq. Juj, Jesús noqanchisrayku wañusqanpin piensananchis. Iskay, Jehová Diospa may jatun atiyninpin piensananchis. Kinsa, Jehová Dios serviyninchistan ñaupaqman churananchis. Chaymantapas yachallasuntaq imaynatas Jehová Dios Habacucman nisqan noqanchistapas yanapawasunman allin iñiyniyoq kananchispaq chayta. Ñaupaqtan ichaqa yachasun imaraykus Jehová Dios mosoq pachata apamunanpi iñinanchis chayta.

 ¿IMARAYKUN ALLIN IÑIYNIYOQ KANANCHIS?

4. ¿Ima ruwaykunapin allin iñiyniyoq kasqanchisqa rikuchisunman?

⁴ Sapa p’unchaymi imaymanata ajllakunanchis kanqa, ichaqa chaykunata allinta ajllakunanchispaqqa allin iñiyniyoqmi kananchis. ¿Ima ruwaykunapin allin iñiyniyoq kasqanchista rikuchisunman? Imayna clase amigokunata ajllakusqanchispi, imaynata kusirikuyta qhawarisqanchispi, imaynata kay pachapi estudiayta qhawarisqanchispi, imaynata casarakuyta qhawarisqanchispi, imaynata llank’ayta qhawarisqanchispi, jujkunapipas. Chaymantapas tapukunanchismi: “¿Imatan kausayniywan rikuchishani? ¿Mosoq pacha qayllapiña kasqantachu rikuchishani? Icha, ¿kay pacha runakuna jinachu manapas kay pachaqa jayk’aqpas tukukunman jinatachu kausashani?”, nispa (Mat. 6:19, 20; Luc. 12:16-21). Mosoq pacha qayllallaña kasqanpi iñisunchis chayqa, allin yuyaywanmi imatapas ruwasun.

5, 6. ¿Imaraykun allin iñiyniyoq kananchis sasachakuykunata aguantananchispaq?

⁵ Chaymantapas sasachakuykunata aguantananchispaqqa allin iñiyniyoqmi kananchis. Chay sasachakuykunan kanman: qatikachasqa kay, mana jampiy atiy onqoykuna, otaq juj llakikunapas. Yaqapaschá qallariypiqa allin iñiyniyoq kasqanchisrayku chaykunata aguantasunman, ichaqa unay tiempo chhayna sasachakuykunapi tarikuspaqa pisikallpayasunmanmi. Chaymi allin iñiyniyoq kananchis chay sasachakuyta aguantananchispaq, chhaynapi Jehová Diosta kusisqalla servinanchispaq (Rom. 12:12; 1 Ped. 1:6, 7).

⁶ Ima sasachakuykunapas kaqtinqa yaqapaschá mosoq pacha mana jayk’aq kananpi piensasunman. Chhaynata piensaspa, ¿pisi iñiyniyoq kasqanchistachu rikuchishanchis? Manan. Kaypi yuyaykusun. Chiri tiempopi kashaspa yaqapaschá piensasunman q’oñi tiempo mana jayk’aq chayamunanpaq, ichaqa q’oñi tiempoqa chayamunqapunin. Chhaynatan jatun llakikuypi tarikuspapas mosoq pacha mana jayk’aq chayamunanpaq piensasunman. Ichaqa chhaynataña piensasunman chaypas mosoq pachaqa chayamunqapunin. Allin iñiyniyoq kaymi yanapawasun Jehová Diospa promesankunapi confiananchispaq (Sal. 94:3, 14, 15; Heb. 6:17-19). Jehová Diospa promesankunapichus confiasunchis chayqa, Jehová Dios serviytan ñaupaqman churasunchis.

7. ¿Ima piensaykunamantan cuidakunanchis?

⁷ Allin iñiyniyoqmi kananchis jujkunaman Jehová Diosmanta willamunanchispaq. Mosoq pachata Jehová Dios apamunanmanta jujkunaman willaqtinchisqa runakunaqa cuentopaq jinan chaytaqa qhawarinku (Mat. 24:14; Ezeq. 33:32). Chhayna piensaykunaqa pisi-pisimantan umanchisman jaykunman. Ichaqa noqanchisqa manan jayk’aqpas paykuna jinaqa piensayta munanchischu, chayraykun iñiyninchista astawan wiñachinanchis. Chaypaqqa kinsa ruwaykunan yanapawasun.

JESÚS NOQANCHISRAYKU WAÑUSQANPIN PIENSANANCHIS

8, 9. ¿Imaynatan Jesús noqanchisrayku wañusqanpi piensay yanapawanchis allin iñiyniyoq kananchispaq?

⁸ Iñiyninchista wiñachinanchispaqqa Jesús noqanchisrayku wañusqanpin piensananchis. Jesús wañusqanraykun Jehová Diosqa llapa promesankunata junt’anqa. Chaymanta ama iskayananchispaqqa tiempotan orqonanchis Jehová Dios wawanta noqanchisrayku kachamusqanpi piensananchispaq. Chaymantapas chay ruwasqanwan Jehová Dios mayta munakuwasqanchispin piensanallanchistaq. Chayta ruwasunchis chayqa, manan Jehová Dios juj mosoq pacha apamunanmantaqa iskayasunchu, nitaq chay paraisopi wiñay-wiñaypaq tiyananchismantapas iskayasunchu. ¿Imaraykun chayta ninchis?

⁹ Jehová Diosqa imaymanatan ruwarqan wawanta noqanchisrayku kachamunanpaq. Jesusmi karqan ñaupaq kamasqan wawanqa, chaymi wawanwanqa anchata munanakurqanku. Chhaynaña kaqtinpas kay pachamanmi  kachamurqan ch’uya runa jina nacenanpaq. Kay pachapi kashaspaqa imaymana sasachakuykunapin Jesusqa tarikurqan, khuyayta ñak’arichispan paytaqa wañuchirqanku. Noqanchisraykun Jehová Diosqa wawanta khuyayta ñak’arichisqankuta aguantarqan. Mana munakuwasunmanchu karqan chayqa manan chaytaqa ruwanmanchu karqan (Juan 3:16; 1 Ped. 1:18, 19). Jehová Diosqa manan yanqapaqchu wawantaqa qorqan, payqa qowasunpunin wiñay kausaytaqa juj mosoq pachapi.

JEHOVÁ DIOSPA ATIYNINPIN PIENSANANCHIS

10. Efesios 3:20 nisqan jina, ¿imakunatan Jehová Dios ruwayta atinman?

¹⁰ Jehová Diospa atiyninpi piensaymi yanapawallasuntaq allin iñiyniyoq kananchispaq. Jehová Diosqa tukuy atiyniyoqmi, chaymi payqa llapa promesankunata junt’ayta atin. Yaqapaschá runaq qhawarisqanman jinaqa, kay pachapi wiñay-wiñaypaq kausayqa mana atinapaq jina kanman. Mayninpin ichaqa Jehová Diosqa runaq mana ruway atinankunata prometewanchis. Chaytaqa ruwan tukuy atiyniyoq kasqanraykun (Job 42:2; Mar. 10:27). Tukuy atiyniyoqtaq chayqa, ¿manachu promesankunapas mana creey atiyraq kanman? (Leey Efesios 3:20).

11. Jehová Dios promesankunata junt’asqanmanta jujta willay. (Qhaway “ Jehová Diosqa mana creey atina promesakunatan junt’arqan” nisqata).

¹¹ Jehová Diosmi ñaupa tiempopi serviqninkunaman imaymanata prometerqan, chaykunaqa runaq qhawarinanpaqqa mana junt’ay atinan karqan. Wakinmanta yachasun. Abrahanpas Sarapas kuraqñan kasharqanku, chhaynaña kaqtinpas Jehová Diosqa wawayoq kanankupaqmi prometerqan (Gén. 17:15-17). Chaymantapas Abrahanmanmi prometerqan miraynin Canaán jallp’ata jap’ikapunanpaq. Ichaqa askha watakunan Abrahanpa wawankunaqa Egipto jallp’api esclavo karqanku, chayraykupaschá paykunaqa mana junt’akunanpaq jina chayta qhawarirqanku. Ichaqa chay promesaqa junt’akurqanmi. Chaymantapas Elisabetmanmi kuraqña kashaqtin wawayoq kananpaq prometerqan, jinaspapas María doncella sipasmanmi prometellarqantaq Diospa wawanta onqokunanpaq. Chaywanmi Jehová Diosqa Edén huertapi imachus prometesqanta junt’anan karqan (Gén. 3:15).

12. ¿Imatan Josué 23:14, chaymantapas Isaías 55:10, 11 textokuna niwanchis Jehová Diospa atiyninmanta?

¹² Jehová Dios llapa promesankunata junt’asqanpin reparanchis tukuy atiyniyoq kasqanta. Chayta yachaspan iñiyninchisqa astawanraq yapakun, chaymi mana iskayanchischu Jehová Dios mosoq pachata apamunanmanta (leey Josué 23:14; Isaías 55:10, 11). Allin iñiyniyoq kasun chayqa, allintan jujkunatapas yanapayta atisun mosoq pacha kananpi confianankupaq, mosoq pacha mana mosqoychu kasqanta reparanankupaqpas. Jehová Dios kikinmi nirqan: “Kaykunata qelqay, kay simikunaqa confianapaq jinan cheqaqtaqmi kanpas”, nispa (Apo. 21:1, 5).

JEHOVÁ DIOS SERVIYTAN ÑAUPAQMAN CHURANANCHIS

13. ¿Imaynatan juñunakuykuna yanapawanchis allin iñiyniyoq kananchispaq?

¹³ Jehová Dios serviyninchistachus ñaupaqman churasunchis chayqa, allin iñiyniyoqmi kasunchis. Juñunakuyninchismanta rimasun. Juñunakuykunan yanapawasun aswan allin iñiyniyoq kananchispaq. Anna hermananchismanta yachasun, b payqa askha watakunan imaymana ruwaykunapi tukuy tiemponwan Jehová Diosta servishan. Paymi juñunakuykunamanta rimaspa nin: “Juñunakuykunaqa iñiyniypi ama pisipanaypaqmi yanapawan. Juñunakuypi yachachiq hermano manaña sumaqtachu yachachinman otaq llapa yachasqaytaña ninman chaypas,  kallanpunin imallapas iñiyniypi yanapawananpaq”, nispa. Chaymantapas juñunakuypiqa uyarillanchispunin hermanonchiskunaq rimasqankuta, chayqa astawanmi iñiyninchista wiñachin (Rom. 1:11, 12; 10:17).

14. ¿Imaynatan jujkunaman Diosmanta willay yanapawanchis allin iñiyniyoq kananchispaq?

¹⁴ Jujkunaman Diosmanta willaymi yanapawallanchistaq allin iñiyniyoq kananchispaq (Heb. 10:23). Barbara hermananchismanta yachasun. Payqa 70 wata masñan Jehová Diosta servishan, paymi nin: “Diosmanta willaqtiyqa astawanmi iñiyniyqa yapakun. Sut’itan reparani jujkunaman Jehová Diosmanta sumaq promesankunamantapas rimaqtiyqa astawanraq iñiyniy yapakusqanta”, nispa.

15. ¿Imaynatan Bibliata estudiay yanapawasunman allin iñiyniyoq kananchispaq? (Qhaway kay parrafopaq dibujokunata).

¹⁵ ¿Iman yanapawallasunmantaq aswan iñiyniyoq kananchispaq? Biblia estudiaymi. Susan hermananchistaqa chayta ruwananpaq tiempota t’aqaysi yanapan. Paymi nin: “Domingo p’unchaykunatan preparakuni qatiqnin semana juñunakuypi Qhawaq revistata estudianaykupaq. Lunes, Martes p’unchaykunataq chaupi semana juñunakuypaq preparakuni. Wakin p’unchaykunapitaq imakunamantachus yachayta munani chayta Bibliapi estudiani”, nispa. Chayta ruwaysi Susan hermananchistaqa yanapan allin iñiyniyoq kananpaq. Irene hermananchistapas profeciakunamanta estudiaysi iñiyninpi yanapan. Payqa askha watakunañan Jehová Diospa testigonkunaq central oficinankupi llank’ashan. Paymi nin: “Maytan admirakuni Jehová Diospa willasqan profeciakuna llapallan junt’akusqanta yachaspay”, nispa. c

“JUNT’AKUNQAPUNIN”

16. ¿Imaraykun Jehová Diospa imachus Habacucman nisqan noqanchistapas yanapawasunman? (Hebreos 10:36, 37).

¹⁶ Iñiqmasinchiskunamanta wakinqa unay watakunañan  suyashanku kay pachaq tukukunanta. Wakinmi ninku: “¿Jayk’aqkamataq kay pachaq tukukunantari suyakusun?”, nispa. Jehová Diosmi ichaqa yachan chhayna llakikusqanchista. Chaymi profeta Habacucta nirqan: “Rijuriypi rikusqaykiqa señalasqa tiempopaqraqmi, ichaqa chayamushanñan, chayqa junt’akunqapunin. Qhepamuq jinaña kanman chaypas, ¡makilla kashay! Imachus rikusqaykiqa junt’akunqapunin, ¡tiempollanpin chayamunqa!”, nispa (Hab. 2:3). Chay simikunaqa manan profeta Habacucllapaqchu karqan, noqanchistapas yanapawasunmanmi. ¿Imaraykun chayta ninchis? Jehová Diosmi apóstol Pablota yuyaycharqan cristianokunaman chay simikunata yuyarichinanpaq (leey Hebreos 10:36, 37). Jehová Diospa promesankuna qhepamuq jinaña kanman chaypas junt’akunqapunin, “tiempollanpin chayamunqa”.

17. ¿Ima ruwaymi juj hermanata yanaparqan Habacucman Jehová Diospa nisqanta kasukunanpaq?

¹⁷ Askha iñiqmasinchiskunan Jehová Diosta kasukuspa watan-watan makilla kashanku. Chaytan Louise hermananchispas ruwarqan, payqa 1939 watamantapachan Jehová Diosta servishan. Paymi nin: “Noqaqa piensarqanin manaraq 18 wataymanpas chayashaqtiy Armagedón chayamunanta. Ichaqa mana jinachu karqan. Llapa chay watakunaqa Noemanta, Abrahanmanta, Josemanta, jujkunamantapas yachaymi yanapawarqan pacienciallawan suyakunaypaq. Paykunaqa pacienciawanmi suyakurqanku Jehová Dios promesankunata junt’ananta. Chhayna makilla kaymi noqatapas jujkunatapas yanapawarqanku mosoq pacha qayllaykamusqanmanta ama iskayanaykupaq”, nispa. Pay jinan askha iñiqmasinchiskuna pacienciawan Jehová Diospa p’unchayninta suyakushanku.

18. ¿Imaynatan Jehová Diospa kamasqankuna yanapawanchis Jehová Diospa promesankunapi astawan iñinanchispaq?

¹⁸ Mosoq pachaqa manaraqmi chayamunraqchu, ichaqa chayamunqapunin. Kaypi piensasun: Qallariypiqa manan ch’askakunapas, sach’akunapas, animalkunapas, noqanchispiwanpas karqanchischu. Kunanmi ichaqa Jehová Dios kamawasqanchisrayku kashanchis (Gén. 1:1, 26, 27). Chhaynallataqmi mosoq pachawanpas. Manaña kunan rikunchischu mosoq pachata chaypas chayamullanqan, Jehová Diosmi chaytaqa apamunqa. Chaypiqa wiñaypaqmi mana ima onqoyniyoq tiyasunchis. Chay p’unchay chayamuqtinqa rikusunpunin mosoq pachataqa, imaynan kunanpas ch’askakunata, sach’akunata, animalkunata ñawinchiswanpuni rikunchis jinata (Isa. 65:17; Apo. 21:3, 4).

19. ¿Imakunatan ruwananchis aswan iñiyniyoq kananchispaq?

¹⁹ Manaraq mosoq pacha chayamushaqtinqa tukuy atisqanchistan ruwananchis iñiyninchista astawan wiñachinanchispaq. Chaypaqqa Jesús noqanchisrayku wañusqanpin piensananchis, Jehová Diospa atiyninpin piensananchis, chaymantapas Jehová Dios serviytan ñaupaqman churananchis. Chaykunata ruwasunchis chayqa, “iñiywan pacienciawan ima promesata chaskiqkuna jinan” kasunchis (Heb. 6:11, 12; Rom. 5:5).