1. ¿Imaraykun juñunakuykunapi comentanchis?

 ¿IMARAYKUN juñunakuykunaman rinchis? Jehová Diosta alabananchispaqmi rinchis (Sal. 26:12; 111:1). Chaymantapas juñunakuykunapin kay sasa tiempokunapi hermanonchiskunawan kallpachanakunchis (1 Tes. 5:11). Arí, juñunakuykunapi comentaspaqa Jehová Diostan jatunchanchis, hermanonchiskunawan iman kallpachanakunchis.

2. ¿Ima juñunakuykuna aparikushaqtinmi comentayta atisunman?

² Sapa semananmi juñunakuykunapiqa comentanchis. Chaytaqa ruwayta atisunman sapa semana tukuyta Qhawaq revistanchista estudiashaspa. Chaymantapas chaupi semana juñunakuyninchispi “Maskhasun ancha allin yachachikuykunata” nisqapi. Jinaspapas atillasunmantaqmi comentayta Bibliata estudianapaq juñunakuypi, juj kutikunapipas.

3. a) ¿Imaraykun mayninpi sasa kanman juñunakuykunapi tapuykunaman kutichiy? b) ¿Imaynatan Hebreos 10:24, 25 yanapawanchis?

³ Juñunakuykunapiqa llapanchispas comentaytan munanchis, chhaynapi Jehová Diosta jatunchananchispaq iñiqmasinchiskunatapas kallpachananchispaq. Mayninpin ichaqa chay ruwayqa sasa kanman. ¿Imarayku? Comentayta manchakusqanchisrayku. Otaq, askha kutitaña makinchista oqarishaspapas mana llapa munasqanchistachu comentayta atisqanchisrayku. ¿Iman yanapawasunman ama pisikallpayananchispaq? Apóstol Pablo hebreo cristianokunaman carta apachisqanmi yanapawasunman. Paymi juñunakuykunamanta rimaspa nirqan: “Jujkuna-jujkunawan kallpachanakuychis”, nispa (leey Hebreos 10:24, 25). Chhaynaqa, manchakunchisña chaypas pisi simillawan comentaspaqa iñiqmasinchiskunatan  kallpachanchis. Chaymantapas jujkunaq comentasqankuwanmi kusikunanchis manaña noqanchis llapa munasqanchistachu comentasunman chaypas (1 Ped. 3:8).

4. ¿Ima kinsa ruwaykunamantan kay yachachikuypi yachasun?

⁴ Kay yachachikuypin kinsamanta rimasun. Ñaupaqtan yachasunchis imaynatas juch’uy iñiq t’aqapi kashaspa jujkuna-jujkunawan kallpachanakusunman chayta. Juj juch’uy iñiq t’aqapiqa pisillan hermanonchiskunaqa kanku, chaymi chaypiqa askha kutita tapuykunaman kutichiyta atisunman. Iskaypitaq yachasun imaynatas juj jatun iñiq t’aqapi kashaspa jujkuna-jujkunawan kallpachanakusunman chayta. Juj jatun iñiq t’aqapiqa askha iñiqmasikunan comentayta munanku. Kinsapitaq yachasun imaynatas comentananchis jujkunata kallpachananchispaq chaytawan.

5. Juj juñunakuypi pisilla kasunman chaypas, ¿imaynatan kallpachanakusunman?

⁵ Juj juch’uy iñiq t’aqapiqa pisillan hermanonchiskunaqa kanku, chaymi pisilla juñunakuykunapi comentaqkunapas kanku. Chaymi juñunakuyta apariq hermanoqa unaytaraq suyanan kanman pillapas makinta oqarinanpaq. Chaymi juñunakuyqa mana kallpachanapaq jinachu kanman. ¿Imatan chhaynapi tarikuspa ruwasunman? Chaypaqqa tukuy yuyaymi kananchis tapuykunaman kutichinanchispaq. Chayta ruwaspan jujkunatapas kallpachasun astawan comentanankupaq.

6, 7. ¿Imatan ruwananchis manchakuyninchista atipananchispaq?

⁶ Wakinninchisqa manchakunchismi juñunakuykunapi comentayta. Chhayna kaqtin, ¿imatan ruwasunman? Chaypaqqa yanapaykunatan maskhasunman comentaspa ama nishuta manchakunanchispaq, chhaynapi iñiqmasinchiskunata kallpachananchispaq.

⁷ Yaqapaschá Qhawaq qelqanchispi lloqsimuq yuyaychaykunata maskhasunman, b jujninmi nirqan allinta preparakunanchispaq (Prov. 21:5). Allinta preparakuspaqa facil-llatan makinchista comentananchispaq oqarisun. Chaymantapas pisi simikunallawanmi kutichisun (Prov. 15:23; 17:27). Pisi simikunallawan kutichispaqa manan manchakusunchu. Jinaspapas facil-llatan iñiqmasinchiskunaqa entiendewasun. Sichus sonqomanta imachus entiendesqanchista comentasun chayqa hermanonchiskunaqa allinta preparakusqanchistan reparanqaku.

8. ¿Imaynatan Jehová Dios qhawarin kallpachakusqanchista?

⁸ Sichus chay yuyaychaykunaman jina ruwashaspa manchakushanchisraq comentayta chayqa, ¿imatan yuyarinanchis? Iskay kinsa kutillataña comentanki chaypas, Jehová Diosqa llapa kallpachakusqaykitan valoran (Luc. 21:1-4). Jehová Diosqa imachus atisqallanchistan mañawanchis (Filip. 4:5). Chhaynaqa, maykamalla ruway atisqanchistan qhawarikunanchis, kallpachakunanchistaqmi chayman jina ruwananchispaq. Chaymantataq Jehová Diospa thaj kaynintan mañakunanchis. Chhaynaqa, ¿manachu kallpachakuwaq pisi rimaykunallawan comentanaykipaq?

9. ¿Ima sasachakuymi kan juj jatun iñiq t’aqapi?

⁹ Sichus iñiq t’aqaykipi askha hermanokuna kanku chayqa, yaqapaschá comentanaykipaq juj sasachakuykuna kanman. Mayninpi  askhataña comentayta munanki chaypas, askha comentaqkuna kasqanraykun mana comentachisunkikumanchu. Chaymi Daniela hermananchistapas pasarqan, c paymanqa gustallaqpunin juñunakuykunapi comentayqa. Chay ruwayqa ancha importanten paypaqqa. Juñunakuykunapi tapuykunaman kutichiytaqa Jehová Diosta jatunchayta jinan qhawarin. Chayta ruwaspan iñiqmasikunawan kallpachanakun, jinaspapas chay ruwaymi paytaqa yanapan imachus yachasqanta ama qonqananpaq. Ichaqa juj jatun iñiq t’aqaman astakuspas manaña ñaupaqpi jinañachu llapa munasqanta comentayta atiq, mayninpiqa manas ni juj kutillatapas comentaqchu. Paymi nin: “Mana comentaspaqa nishutan llakikuq kani, manañapas Jehová Diosta yupaychashaymanchu jinatan qhawarikuq kani. Jinan piensaq kani: Yuyaypipunichá mana comentachiwankuchu, nispa”.

10. ¿Imatan ruwawaq comentanaykipaq?

¹⁰ ¿Jayk’aqllapas Daniela jina tarikurqankichu? Chhayna kaqtinqa yaqapaschá piensarqanki amaña makiykita oqarinaykipaq, ichaqa ama pisikallpayaychu. ¿Imakunatan ruwawaq juñunakuykunapi comentanaykipaq? Chaypaqqa askha kutita comentanaykipaqmi preparakuwaq. Manaña qallariy parrafokunapi kutichiyta atiwaqchu chaypas, wakin parrafokunapiqa kanqapunin kutichinaykipaq. Qhawaq qelqanchista preparakuspaqa manan juj parrafollapichu piensanayki, aswanpas llapa yachachikuypin piensanayki. Chayta ruwanki chayqa kallanqapunin imamantapas rimanaykipaq. ¿Imatawanmi ruwawaq? Sasa parrafokunapi comentanaykipaqmi preparakuwaq (1 Cor. 2:10). Chay parrafokuna sasa explicaytaq chayqa, pisi hermanokunallan makinkuta oqarinku. Ichaqa sichus chaykunataña ruwaspapas mana ni jujtapas comentankichu chayqa, ¿imatan ruwawaq? Manaraq juñunakuy qallarishaqtinmi chay juñunakuyta apariq hermanowan parlariwaq, jinaspa mayqen tapuytachus kutichiyta munashanki chayta willawaq.

11. Filipenses 2:4 nisqan jina, ¿imatan yuyarinanchis?

¹¹ (Leey Filipenses 2:4). Diospa yuyaychasqan kaspan apóstol Pabloqa jujkunaq munayninta maskhananchispaq kallpachawarqanchis.  ¿Imaynatan chay yuyaychasqanta juñunakuykunapi kasukusunman? Chaypaqqa jujkunapas comentayta munasqankutan yuyarinanchis.

12. ¿Imatan ruwananchis juñunakuypi jujkunapas kallpachasqa kanankupaq? (Qhaway kay parrafopaq fotota).

¹² Kaypi yuyaykusun, amigonchiskunawan rimaspaqa manan noqallanchischu tukuy tiempo rimanchis. Aswanpas munanchismi paykunapas rimanankuta. Chhaynan juñunakuyninchiskunapipas, manan noqallanchischu rimayta munanchis, aswanpas munanchismi hermanonchiskunapas rimanankuta. Chayta ruwaspan iñiqmasinchiskunaq allinninta maskhashanchis. Paykunapas comentaspaqa kallpachasqan kanqaku (1 Cor. 10:24). Chhaynaqa, ¿imatan ruwasunman jujkunapas comentanankupaq? Chaymantan kunan yachasun.

13. ¿Imatan ruwasunman juj hermanokunapas comentanankupaq?

¹³ Ñaupaqta, pisillatan iskay kinsa simikunallawan kutichinanchis. Chhaynapin askha hermanokuna comentanankupaq tiempo aypanqa. Kay ruwaypiqa umalliqkunan, unay tiempoña Diosta serviq hermanokunan ejemplota qonanku. Iskaypitaq, comentaspaqa manan llapantachu comentananchis. Parrafopi llapa kaqta comentarapusunman chayqa, manañan wakin hermanonchiskunapaq comentanankupaq kapunmanñachu. Kay parrafoq tapuyninpi piensasun, kay parrafopiqa iskay kutichiykunan kashan, jujninmi kashan: Comentaspaqa pisi simikunallawanmi comentananchis. Iskay kaqtaq kashan: Manan llapantachu comentananchis. Chhaynaqa, hermano tapumuqtinqa ñaupaq kaq kutichiyllatan kutichisunman, chhaynapi iskay kaqta juj hermano kutichinanpaq.

14. ¿Imaraykun comentananchispaq mana sapa ratuchu makinchista oqarinanchis? (Qhaway kay parrafopaq fotokunata).

¹⁴ Manan sapa ratuchu comentananchispaqqa makinchista oqarinanchis. Sichus sapa ratu makinchista oqarisunman chayqa,  yaqapaschá juñunakuyta pusariq hermano jujkunaña comentayta munankuman chaypas, mana malta sientechiwananchispaq noqallanchista comentachiwasunman. Chaymantapas sapa ratu makinchista oqariqtinchisqa yaqapaschá jujkunaqa manaña comentayta munankumanchu (Ecl. 3:7).

15. a) ¿Phiñakunanchischu juñunakuypi mana ni juj kutitapas comentachiwaqtinchis? b) ¿Imatan juñunakuyta apariq hermano qhawarinan juñunakuypi llapanku comentanankupaq? (Qhaway “ ¿Imaynatan uyariqkunaq yanapayninwan juñunakuyta aparina?” nisqata).

¹⁵ Mayninpiqa askha hermanokunan makinkuta oqarinku comentanankupaq, chhayna kaqtinqa yaqapaschá mana comentayta atisunchu, manapaschá llapa juñunakuypi ni jujtapas comentasunchu. Chayqa maytan llakichiwasunman. Ichaqa manan chaywanqa phiñakunanchischu (Ecl. 7:9).

16. ¿Imatan ruwasunman juñunakuypi comentaq hermanokunata kallpachananchispaq?

¹⁶ Manaña munasqanchisman jinachu juñunakuypi comentayta atisunman chaypas, jujkunaq comentasqankutan tukuy yuyaywan uyarinanchis. Jinaspapas juñunakuy tukuytan “allintan comentarunki” nispa kallpacharisunman. Chayta ruwaspaqa jujkunatan kallpachashanchis manaña juñunakuypi comentayta atirqanchischu chaypas (Prov. 10:21). Jujkunata felicitasunchis chayqa kallpachasqan paykunaqa kanqaku.

17. a) ¿Imatan tayta-mamakuna ruwananku wawankuta yanapanankupaq? b) Videopi qhawasqaykiman jina, ¿ima tawa ruwaykunatan ruwananchis comentananchispaq preparakushaspa? (Qhaway kay parrafopaq willakuyta).

¹⁷ ¿Imakunatawanmi ruwasunman juñunakuypi jujkuna-jujkunawan kallpachanakunanchispaq? Sichus wawayoq kanki chayqa, paykunatan yanapawaq atisqankuman jina juñunakuykunapi comentanankupaq (Mat. 21:16). Mayninpin juñunakuykunapiqa rimakun casado kausaymanta, qhelli juchakunapi ama purinanchismanta ima. Chhayna kaqtinqa manapaschá wawaykiqa comentayta atinqachu, ichaqa kanqapunin iskay kinsa parrafokunallapas comentanankupaq. ¿Imatawanmi ruwawaq? Wawaykitan yachachinayki imanaqtinsi mana sapa makinta oqarispachu comentayta atinqa chayta. Chaytachus yachachinki chayqa manan llakisqachu kanqaku mana comentasqankumanta (1 Tim. 6:18). d

18. ¿Imakunamantan juñunakuypi astawan rimasunman ama nishuta noqallanchismanta rimananchispaq? (Proverbios 27:2).

¹⁸ Llapanchismi kallpachakusunman comentaspa Jehová Diosta jatunchananchispaq, iñiqmasinchiskunatapas kallpachananchispaq (Prov. 25:11). Mayninpiqa atisunmanmi vidanchismanta juj chhikanta rimayta, ichaqa manan noqallanchismantaqa nishutaqa rimananchischu (leey Proverbios 27:2; 2 Cor. 10:18). Aswanpas comentaspaqa Jehová Diostan jatunchananchis, jinaspapas Diospa palabranmanta llaqtanmanta iman astawanqa rimananchis (Apo. 4:11). Sichus juj parrafopi vidanchismanta juj chhikanta willananchispaq niwasunman chayqa willasunmanmi. Chayman jina kutichinaykipaqmi qatimuq parrafopi juj tapuy kashan.

19. a) ¿Imaynan llapapas kasunchis juñunakuypi jujkunapi piensaspa? (Romanos 1:11, 12). b) ¿Imaraykun juñunakuykunapi tapuykunaman kutichiy gustasunki?

¹⁹ Manaña imayna comentananchismanta kamachikuykuna kanchu chaypas, llapanchismi atisunman comentasqanchiswan iñiqmasinchiskunata kallpachayta. Wakin hermanokunaqa yaqapaschá astawanraq kallpachakunanku kanqa juñunakuykunapi comentanankupaq. Wakinqa yaqapaschá pisillata comentasqankuwan contento kananku kanqa, chhaynapi juj iñiqmasikuna comentanankupaq. Sichus juñunakuykunapi jujkunapi piensasun chayqa llapanchismi kallpachasqa kasun (leey Romanos 1:11, 12).