1. ¿Imaynatan kausanchis Diospa llaqtanpi?

JEHOVÁ DIOSPA llaqtanpi kayqa ancha kusikunapaqmi. Chaypiqa kusisqan llapa hermanonchiskunawan kausanchis. Ichaqa, ¿imaynatan sapankanchispas Diospa llaqtanpi yanapakusunman?

2. ¿Imawanmi apóstol Pablo Diospa llaqtanta tupanachiran?

² Apóstol Pabloqa askha kutipin willaran sapankanchispas Diospa llaqtanpi yanapakuyta atisqanchismanta. Chayta entiendechinanpaqmi Diospa llaqtanta tupanachiran runaq cuerponwan, sapankanchistaqmi chay cuerpoq miembronkuna jina kanchis (Rom. 12:4-8; 1 Cor. 12:12-27; Efes. 4:16).

3. ¿Ima kinsa yachachikuykunamantan kaypi yachasunchis?

³ ¿Ima kinsa yachachikuykunamantan kaypi yachasunchis? Ñaupaqta, sapankanchispas atisunmanmi Diospa llaqtanpi yanapakuyta. * Iskaypi, ¿imatan ruwananchis Diospa llaqtanpi mana yanapakuyta atiqpaq jina qhawarikuspa? Kinsapi, ¿imaraykun tukuy atisqanchista ruwananchis imachus ruway atisqanchispi yanapakunanchispaq?

4. ¿Imatan Romanos 12:4, 5 textomanta yachasunman?

⁴ Kaytan ñaupaqtaqa yachanchis apóstol Pabloq nisqanmanta: Sapankanchispas atinchismi Diospa llaqtanpi yanapakuyta.  Chaymi niran: “Cuerpopiqa askha partekunan kan, manataqmi llapankuchu kaq ruwanallayoq kanku. Chhaynan noqanchispas kanchis, askhaña kanchis chaypas, juj cuerpollan kanchis Cristowan jujllachasqa; sapankanchistaq jujkuna-jujkunawan jujllachasqa kashanchis”, nispa (Rom. 12:4, 5). Chaypi nisqan jina, llapanchispas Diospa llaqtanpiqa manan kaq ruwanayoqchu kanchis, chaywanpas Jehová Diosqa llapanchistan munakuwanchis.

5. ¿Pikunan Jehová Diospa llaqtanpi regalokuna jina kanku?

⁵ Yaqapaschá nishanchis: “Diospa llaqtanpiqa umalliqkunan astawanqa yanapakunku”, nispa (1 Tes. 5:12; Heb. 13:17). Jehová Diosqa Jesucristoq yanapayninwanmi paykunata churaran Diospa llaqtanta pusarinankupaq, chaymi regalokuna jina kanku (Efes. 4:8). Paykuna ukhupin kashanku umalliq t’aqamanta hermanokuna, paykunata yanapaqkuna, sucursalkunamanta encargakuqkuna, watukuq umalliqkuna, Diospa llaqtan escuelakunapi yachachiqkuna, iñiq t’aqapi umalliqkuna, yanapakuq kamachikunapas. Llapan chay hermanokunatan Jehová Diosqa santo espiritunwan ajllaran, chaymi paykunaqa Diospa ovejankunata sumaqta cuidanku (1 Ped. 5:2, 3).

6. 1 Tesalonicenses 2:6-8 nisqanman jina, ¿imata ruwanankupaqmi umalliqkuna kallpachakunku?

⁶ Iñiq t’aqapi umalliqkunaqa manan kaq ruwanayoqchu kanku. Imaynan chakipas makipas cuerponchispi juj miembronchiskunapas mana kaq ruwanayoqchu kanku, chay jinallataqmi umalliqkunapas mana kaq ruwanayoqchu kanku, paykunaq ruwasqankun ichaqa llapa hermanokunaq allinninpaq. Paykunaqa manan jujkunaq alabanankuraykuchu chaytaqa ruwanku, aswanpas hermanokunata yanapanankupaqmi (leey 1 Tesalonicenses 2:6-8). Chaymi Jehová Diosta gracias ninchis iñiq t’aqakunapi yanapakuq allin iñiyniyoq hermanokunamanta.

7. ¿Ima saminchaykunatan chaskinku precursorkunapas misionerokunapas?

⁷ Yaqapaschá iñiq t’aqanchispi kashan tukuy tiemponkuwan llank’aq misionerokuna, precursor especial, precursor regular hermanokunapas. Paykunaqa pachantinpin yanapakushanku runakunaman Diosmanta willaypi yachachiypipas. Chayta ruwasqankuwanmi askha runakuna Jesusta qatikushanku. Yaqa llapankupas manan askha qolqeyoqchu kanku, chaywanpas Jehová Diosmi paykunataqa saminchashan (Mar. 10:29, 30). ¡Anchatan kusikunchis iñiq t’aqanchispi kasqankumanta!

8. ¿Imaynapin yachanchis Jehová Dios llapanchista munakuwasqanchista?

⁸ Chhaynaqa, ¿umalliqkunallachu tukuy tiemponkuwan Diosta serviq hermanokunallachu yanapakunku? Manan, llapanchismi Diospa llaqtanpiqa yanapakunchis. Jinaspapas Diosqa llapanchistan munakuwanchis (Rom. 10:15; 1 Cor. 3:6-9). ¿Imaynapin chayta yachanchis? Munakuwasqanchisraykun sumaq llank’ayta qowaranchis, chayqa runakunaman Diosmanta willaymi yachachiy iman (Mat. 28:19, 20; 1 Tim. 2:4). Jehová Diosmanta llapa willaqkunan tukuy atisqankuta ruwanku chay llank’ayta ñaupaqman churanankupaq (Mat. 24:14).

9. ¿Imanaqtinmi hermananchiskunata valoranchis?

⁹ ¿Imanisunmantaq hermananchiskunamanta? Paykunapas Diospa llaqtanpiqa  yanapakunkun. Jehová Diosqa munakunmi tukuy sonqowan payta serviq esposakunata, mamakunata, viudakunata, soltera hermanakunatapas. Bibliapin willawanchis Diosta munakuq warmikunamanta, paykunaqa yachaywanmi imatapas ruwaranku, iñiyniyoqmi karanku, kusisqan Diosta serviranku, mana manchakuq qoykukuqtaq karankupas (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Kunanpas hermananchiskunaqa paykuna jinan kanku. Paykunamantan Jehová Diosta gracias ninchis.

10. ¿Imanaqtinmi kuraq hermanonchiskunata munakunchis?

¹⁰ Chaymantapas Diospa llaqtanpiqa kanmi kuraq hermanonchiskuna. Wakinqa unayñan Diosta servishanku, wakinmi ichaqa chayllaraq servishanku. Paykunaqa yaqapaschá kuraq kasqankurayku manaña wayna-sipaskuna jinañachu iñiq t’aqapi yanapakunku Diosmantapas willanku. Chaywanpas tukuy atisqankutan kallpachakunku Diosmanta willanankupaq hermanokunata kallpachanankupaq yachachinankupaqpas. ¡Paykunamantaqa imaymanatan yachasunman! Chaymi Jehová Diospas noqanchispas paykunataqa anchata munakunchis (Prov. 16:31).

11, 12. ¿Iñiq t’aqaykipi wayna-sipaskunaq ima ruwasqankun kallpachasunki?

¹¹ Kunanqa wayna-sipaskunamanta rimasunchis. Paykunapaqqa manan facilchu Saqraq kamachisqa pachapi kausayqa (1 Juan 5:19). Chaywanpas anchatan kusikunchis juñunakuykunapi tapuykunaman kutichisqankuta uyarispa, Diosmanta willasqankuta rikuspa, mana manchakuspa iñisqankumanta rimasqankuta uyarispapas. Wayna-sipaskuna, qankunaqa allintan Diospa llaqtanpi yanapakushankichis (Sal. 8:2).

¹² Wakin hermanokunan ichaqa ninku: “Noqaqa manan Diospa llaqtanpi yanapakuyta atinichu”, nispa. Sichus chhaynata piensanki chayqa, ¿iman yanapasunkiman Diospa llaqtanpi yanapakuy atisqaykita reparakunaykipaq? Qatimuqpi chaymanta yachasun.

13, 14. ¿Imaraykun wakin hermanonchiskuna ninkuman: “Noqaqa manan iñiq t’aqapiqa yanapakuyta atinichu”, nispa?

¹³ Kunan tiempopas askha hermanonchiskunan ninku: “Manan yanapakuyta atinichu”, nispa. Apóstol Pablon niran: “Chakichus ninman: ‘Manataq makichu kani chayqa, manan cuerpoq partenchu kani’, nispa chayqa, ¿chayraykuchu mana cuerpoq parten kanman? Ninrichus ninman: ‘Manataq ñawichu kani chayqa, manan cuerpoq partenchu kani’, nispa chayqa, ¿chayraykuchu mana cuerpoq parten kanman?”, nispa (1 Cor. 12:15, 16). ¿Imatan chaypi nisqanmanta yachasunman?

¹⁴ Sichus iñiq t’aqanchispi kaq hermanonchiskunawan comparakusun chayqa, mana valeqpaq jinan qhawarikusunman. Wakin hermanokunaqa allintan yachachinku, sumaqtan hermanokunatapas cuidanku. Chaymi nisunman: “Paykunaqa noqamanta aswan allintan ruwanku”, nispa. Chayta nispaqa k’umuykukuq kasqanchistan rikuchishanchis (Filip. 2:3). Ichaqa sapa kutilla jujkunawan comparakusun chayqa, mana valeqpaqmi qhawarikusunman. Jinaspa nisunman: “Manan iñiq t’aqapiqa yanapakuyta atinichu”, nispa. ¿Iman yanapawasunman ama chhaynata piensananchispaq?

15. 1 Corintios 12:4-11 nisqanman jina, ¿imatan yuyarinanchis?

¹⁵ Apostolkunaq tiemponpin wakin hermanokunaman Jehová Dios espiritunta qoran, ichaqa manan kaq milagrokunatachu ruwaranku (leey 1 Corintios 12:4-11). Manaña kaqllatachu ruwaranku chaypas, Jehová Diosqa llapankutan munakuran. Kay tiempopiqa manan milagrokunata ruwanchischu. Chaymantapas noqanchisqa manan igual-llachu kanchis, nitaq kaqllatachu imatapas ruwanchis, chaywanpas Diosqa llapanchistan munakuwanchis.

16. Apóstol Pabloq nisqanman jina, ¿imatan ruwananchis?

¹⁶ Hermanonchiskunawan comparakunanchismantaqa apóstol Pabloq nisqantan  kasukunanchis, paymi niran: “Sapanka qhawarikuchun imaynas kashan imapas ruwasqankuna chayta, chhaynapi ama jujwan igualakuspachu kusikunanpaq, aswanpas paypa imachus ruwasqanwan kusikunanpaq”, nispa (Gál. 6:4).

17. ¿Imaraykun apóstol Pabloq nisqanta kasukuy allinpuni kanman?

¹⁷ Sichus apóstol Pabloq nisqanta kasukusun chayqa, reparakusunmi wakin ruwaykunata allinta ruwasqanchista. Yaqapaschá juj umalliqqa mana allintapunichu juñunakuypi yachachin, chaywanpas runakunatan allinta yanapan Jesusta qatikunankupaq. Otaq chay umalliqqa manan juj umalliqkuna jinachu iñiq t’aqapi wakin ruwaykunata ruwan, ichaqa sumaqtan hermanokunata yanapan, chaymi payman askha hermanokuna rinku yanapachikunankupaq. Otaq juj umalliqkunamanta aswan qoykukuq kanman (Heb. 13:2, 16). Sichus allinta reparasun imakunata allinta ruwasqanchista chayqa, kusisqan kasunchis. Manataqmi jujkunamanta envidiakusunchu juj ruwaykunata allinta ruwasqankumanta.

18. ¿Imatan ruwasunman aswan allinta yachachinanchispaq?

¹⁸ Imapiña yanapakunchis iñiq t’aqapi chaypas, llapallanchismi kallpachakunanchis aswan allinta Diosta servinanchispaq, allin yachachiq kananchispaqpas. Chaypaqmi Jehová Diosqa llaqtanwan yanapawanchis. Chaupi semana juñunakusqanchispin yachachiwanchis aswan allinta runakunaman yachachinanchispaq. ¿Kallpachakushankichu chayman jina runakunata yachachinaykipaq?

19. ¿Imakunatan ruwananchis Diospa gobiernonmanta willaqkunapaq escuelaman rinanchispaq?

¹⁹ Chaymantapas kanmi Diospa gobiernonmanta willaqkunapaq escuela, chaymanqa tukuy tiemponkuwan Diosta serviq iñiqmasikunan riyta atinku, 23 watayoqmanta 65 watayoqkama. Ninchischu: “Manan chaymanqa riyta atiymanchu”, nispa. Wakinqa ninkumanpaschá: “Imaymanan jark’awan chayman rinaytaqa”, nispa. Chayta ninanchismantaqa imaraykuchus chay escuelaman riyta munasunman chaypin piensananchis. Chaymantapas tukuy atisqanchista kallpachakusun chayqa Jehová Diosmi yanapasun chay escuelaman rinanchispaq.

20. ¿Imatan yachasunman Romanos 12:6-8 textomanta?

²⁰ ¿Imata ruwananchispaqmi apóstol Pablo niwallaranchistaq Romanos 12:6-8 (leey) textopi? Chaypipas Pabloqa nillarantaqmi sapankanchispas mana kaqllatachu imatapas ruway atisqanchista. Ichaqa niranmi imachus ruway atisqanchiswan Diospa llaqtanpi kaqkunata yanapananchis kasqanta.

21, 22. ¿Imatan yachasunman Robertomanta Felipemantawan?

²¹ Rimasun Roberto * sutiyoq umalliqmanta. Payqa waj nacionpin Diosta servisharan, jinaspa llaqtanpi kaq Betel wasipi llank’ananpaq invitaranku. “Manan mana allinta ruwasqaykiraykuchu llaqtaykimanqa kutishanki” nispaña niranku chaypas, payqa askha killakunan mana valeqpaq qhawarikuran, jinaspa Betelmantaraq lloqsipuyta munaran. ¿Iman hermanonchista yanaparan kusisqa sonqowan Diosta servishanallanpaq?  Juj umalliqmi yuyarichiran: “Jehová Diosqa imaymanatan ñaupaqpi yachachiwaranchis, chaykuna yachasqanchiswanmi kunanqa hermanonchiskunata yanapananchis”, nispa. Chaymi Robertoqa kallpachakushan atisqanman jina hermanokunata yanapananpaq.

²² Chay jinatan hermanonchis Felipetapas pasaran. Payqa esposanwan kuskan Galaad Escuelaman riranku 1956 watapi, chay qhepamantaq Bolivia nacionpi watukuq umalli jina serviranku. 1964 watapin ichaqa juj wawayoq kapuranku. Felipen nin: “Watukuq umalliq kasqaykuta saqespaqa llakikuraykun. Yaqa juj watan llakikurani, Jehová Diosmi ichaqa yanapawaran ama llakisqalla kanaypaq, allin tayta kanaypaqpas”, nispa. ¿Roberto, Felipe jinachu llakikushanki ñaupaqpi Diospaq llank’asqaykita saqesqaykimanta? Chhaynapi tarikushanki chayqa, piensay astawanqa imatachus kunan Diosta servinaykipaq hermanokunata yanapanaykipaq ruwayta atinki chaypin. Kallpachakunanchismi imachus ruway atisqanchiswan iñiqmasinchiskunata yanapananchispaq. Chayta ruwaspaqa kusisqan kasunchis.

23. a) ¿Imata ruwananchispaqmi kallpachakunanchis? b) ¿Imamantan qatimuq yachachikuypi yachasun?

²³ Jehová Diosqa sapankanchistan anchata munakuwanchis. Payqa munanmi familianmanta kananchista. Sichus yachasun hermanonchiskunata imayna yanapayta, jinaspa tukuy atisqanchista ruwasun chayta ruwananchispaq chayqa, atisunmi paykuna yanapayta. Ichaqa, ¿imaynatan jujkunata qhawarishanchis? ¿Imakunatan ruwasunman paykuna munakusqanchista rikuchinanchispaq? Chaykunamantan qatimuq yachachikuypi yachasunchis.