1. ¿Imatan yaqapas David jina nisunman?

JEHOVÁ DIOSPA llapa kamasqankunata rikuyqa may admirakunapaqmi. Chaykunata qhawaspan Davidpas niran: “Kamasqayki janaq pachata qhawarispaymi chaypi churasqayki killatapas ch’askakunatapas rikuspaymi, nini: ¿Imataq runari payta yuyarinaykipaq? ¿Imataq wañuq runari paymanta llakikunaykipaq?”, nispa (Sal. 8:3, 4). Yaqapaschá noqanchispas David jina nisunman: “Noqaqa manamá imapaschu kani, ¿imaraykutaq Jehová Diosri munakuwan, llaqtanmanpas pusamuwaran?”, nispa. Kunanmi yachasunchis imaraykun Jehová Dios Adantapas Evatapas familianta jina qhawariran chayta.

2. ¿Imatan Jehová Dios munaran Adanpaqpas Evapaqpas?

² Jehová Diosqa anchatapunin kusikuran Adantawan Evatawan kamaspaqa. Chaymi paykunata munakuspa niran: “Askhata miraychis, kay pachamanpas junt’aykuychis, chaypi munayniyoq kaychis”, nispa (Gén. 1:28). Jehová Diosqa munaranmi Adanpas Evapas wawakunayoq kaspa kusisqa kausanankuta. Sichus Adanpas Evapas Diospa kamachikuyninkunata kasukunkuman karan chayqa, Jehová Diospa familianmantan kunankamapas kankuman karan, kusisqataqmi noqanchispas wiñaypaq kausasunman karan.

3. ¿Imaynapin yachanchis runakunata Jehová Dios munakusqanta?

³ Adanpas Evapas Jehová Diospa familianmi karanku. Diosqa anchatan paykunataqa munakuran, noqanchistapas munakuwanchismi. Chaymi Biblia nin: “[Runakunataqa] angelkunamanta juj chikan pisi atiyniyoqmanmi tukuchiranki, ichaqa qhapaq kaywan jatunchaywan iman coronawan jina churaranki”, nispa (Heb. 2:7). Manaña angelkunata jinachu Jehová  Dios atiyniyoqta kamawaranchis chaypas munakuwanchismi, manataqmi pisipaqchu qhawariwanchispas, aswanpas kusisqa kausananchistan munan. Chhaynata kausanankupaqmi Jehová Diosqa Adantapas Evatapas kamaran (Sal. 103:20).

4. a) ¿Iman Adanwanpas Evawanpas pasaran mana kasukuq kasqankurayku? b) ¿Imakunamantan kay yachachikuypi yachasunchis?

⁴ Adanwan Evawanqa Jehová Diospa wawankunan karanku, ichaqa manan payta kasukurankuchu. Chaymi imaymana sasachakuykunapi tarikuranku, jinaspapas manañan Jehová Diospa familianmantachu kapuranku. Noqanchispas mana kasukusqankuraykun imaymana sasachakuykunapi tarikushanchis. Chaywanpas Jehová Diosqa munanmi kasukuq runakuna wiñaypaq paraisopi tiyananchista. Kunanmi yachasunchis imaynatan Jehová Dios munakuwasqanchista rikuchiwaranchis chayta. Imatas ruwasunman Jehová Diospa familianmanta kananchispaq chaytapas. Chaymantapas yachallasuntaqmi ima bendicionkunatas kasukuq runakuna chaskinqaku chayta.

5. ¿Piman rijch’akuqtan Jehová Dios kamawaranchis? ¿Imaynatan chaymanta agradecekusunman?

⁵ Jehová Diosqa payman rijch’akuqtan kamawaranchis (Gén. 1:26, 27). Jehová Diosqa payman rijch’akuqtan kamawaranchis, chaymi kallpachakunanchis pay jina munakuq khuyapayakuq kananchispaq (Sal. 86:15; 145:17). Chayta ruwaspaqa Jehová Diostan jatunchasunchis, agradecido kasqanchistataqmi rikuchisunchispas (1 Ped. 1:14-16). Sichus Jehová Diospa munayninman jina kausasunchis chayqa kusisqan kasunchis, wawankunata jinataqmi Jehová Diospas munakuwasunchis.

6. ¿Imata ruwaspan Jehová Dios munakuwasqanchista rikuchiwaranchis?

⁶ Jehová Diosqa kusisqa kausananchispaqmi kay pachata kamaran. Jehová Diosqa manaraq Adantapas Evatapas kamashaspan kay pachata ñaupaqta kamaran chaypi runakuna tiyanankupaq (Job 38:4-6; Jer. 10:12). Jehová Diosqa munakuq qoykukuq Diosmi, chaymi kay pachata kamaspaqa imaymanatawan kamaran (Sal. 104:14, 15, 24). Chaymi Jehová Diosqa kamasqankunata rikuspaqa anchatapuni kusikuran (Gén. 1:10, 12, 31). Chaymantapas Jehová Diosqa munakuwasqanchisraykun kay pachapi llapa animalkunata plantakunata cuidananchispaq qowaranchis (Sal. 8:6). Jehová Diosqa munanmi kay pachata wiñaypaq cuidananchista, chaymi imaymana kamasqanmanta “gracias” ninanchis.

7. Josué 24:15 nisqan jina, ¿imaynatan Jehová Dios kamawaranchis?

⁷ Jehová Diosqa noqallanchismanta imatapas decidinanchispaqmi kamawaranchis. Jehová Diosqa manan payta servinanchispaqqa obligawanchischu, aswanpas sapankanchismi decidikunanchis imatas vidanchiswan ruwasunchis chayta (leey Josué 24:15). Jehová Diosqa anchatan kusikun payta servinanchispaq decidikuqtinchisqa (Sal. 84:11; Prov. 27:11). Chaymi imataña ruwashaspapas allinta imatapas decidikunanchis, chaypaqqa Jesuspa ejemplonmi yanapawasunchis.

8. ¿Imatan Jesús ruwaran askha runakunata rikuspa?

⁸ Jesusqa manan payllapichu piensaq, noqanchispas pay jina kananchispaqmi kallpachakunanchis. Juj kutinmi Jesuspas discipulonkunapas sayk’usqa kasharanku, chaymi juj ladoman samarikuq riranku. Ichaqa chayman chayaqtinkun askha runakuna payta suyashasqaku. Chayta rikuspan Jesusqa mana samaranñachu, aswanpas chay runakunata khuyapayaspan Diosmanta yachachiyta qallariran  (Mar. 6:30-34). Noqanchispas Jesús jinan kallpachakunanchis jujkunata yanapananchispaq (Mat. 5:14-16). Chayta ruwasunchis chayqa Jehová Diostan jatunchasunchis, paypa familianmantataqmi kasunchispas.

9. ¿Imata ruwanankupaqmi tayta-mamakuna kallpachakunanku?

⁹ Jehová Diosqa wawakunayoq kananchispaqmi kamawaranchis, kamachiwaranchistaqmi paymanta yachachinanchispaqpas. Angelkunaqa manan wawakunayoq kaytaqa atinkuchu. Jehová Diosqa runakunallatan wawakunayoq kanankupaqqa kamaran, chaymantan Jehová Diosta “gracias” ninanchis. Wawayoq kanchis chayqa kallpachakunanchismi wawanchiskunata Jehová Diospa kamachisqanman jina uywananchispaq (Efes. 6:4; Deut. 6:5-7; Sal. 127:3). Jehová Diospas Jesuspas anchatapunin wawanchiskunataqa munakunku. Chaymi wawakunata sumaqta uywananchispaq imaymana yanapaykunata qowanchis. Chaykunan kashan: Biblia, videokuna, takikuna, jw.org paginapi yanapaykuna ima (Luc. 18:15-17). Sichus tayta-mamakuna Jehová Diospi confianqaku, wawankutapas Jehová Diospa kamachisqanman jina uywanqaku chayqa wawankutan yanapanqaku Jehová Diospa familianmanta kanankupaq.

10, 11. ¿Imatan suyakushanchis Jesuspa wañusqanrayku?

¹⁰ Jehová Diosqa familianmanta kananchispaqmi munakusqan wawanta kachamuran. Adanwan Evawanqa yuyaypin Jehová Dios contra juchallikuranku, chaymi paykunaqa Jehová Diospa familianmanta qarqosqa kapuranku. Chaymantapachan llapa runakunapas manaña Diospa familianmantachu kapuranchis (Rom. 5:12). Ichaqa Jehová Diosmi munaran jujmanta paypa familian kapunanchista, chaymi sapallan wawanta kachamuran noqanchisrayku wañunanpaq (Juan 3:16; Rom. 5:19). Jehová Diosqa Jesuspa wañusqanraykun 144.000 runakunata ajllakunña wawankuna kanankupaq (Rom. 8:15-17; Apo. 14:1).

¹¹ Chaymantapas kay pachapiqa millonninpi runakunan Jehová Diospa kamachisqanta kasukushanku. Paykunan suyakushanku waranqa wata pasayta Jehová Diospa familianmanta kapuyta (Sal. 25:14; Rom. 8:20, 21). Chhayna suyakuyniyoq kasqankuraykun Diosmantapas “Yayayku” nispa mañakunku (Mat. 6:9). Kay pachapi kausarimpuq runakunapas Jehová Diosmantan yachananku kanqa, tukuy kamachikuyninkunatapas kasukunankun kanqa, chhaynapin paykunapas Jehová Diospa wawankuna kapunqaku.

12. ¿Imamantan kunan yachasunchis?

¹² Jehová Diosqa munakuwasqanchisraykun imaymanata ruwaran. Chaymi Jehová Diosqa ajllasqa cristianokunata ajllakunña wawankuna kanankupaq. Chaymantapas maytapunin munashan mana yupay atina ‘ancha askha runakunapas’ waranqa wata pasayta wawankuna kapunankuta (Apo. 7:9). ¿Imatan kunanmantapacha ruwananchis Jehová Diospa familianmanta kananchispaq? Chaymantan kunan yachasunchis.

13. Marcos 12:30 nisqan jina, ¿imatan ruwananchis Jehová Diospa familianmanta kananchispaq?

¹³ Jehová Diostan tukuy sonqonchiswan munakunanchis (leey Marcos 12:30). Llapa runakunapas atinchismi Jehová Diosta serviytaqa, chayqa Diospa sumaq regalonmi. Chaymi kallpachakunanchis Jehová Diospa llapa kamachikuyninkunata kasukunanchispaq, chayta ruwaspaqa Jehová Diosta munakusqanchistan rikuchisunchis (1 Juan 5:3). Chaymantapas Jehová Diosta munakusqanchistaqa  Jesusta kasukuspan rikuchishallanchistaq. Jesusmi kamachiwaranchis runakunaman Diosmanta yachachinanchispaq (Mat. 28:19). Chaymantapas jujkuna-jujkunawan munanakunanchispaqmi kamachiwaranchis (Juan 13:35). Jehová Diosqa payta kasukuq runakunallatan familianpiqa chaskinqa, chaymi tukuy sonqowan kamachikuyninkunata kasukunanchis (Sal. 15:1, 2).

14. ¿Imaynatan runakuna munakusqanchista rikuchisunman? (Mateo 9:36-38; Romanos 12:10.)

¹⁴ Runamasinchistan munakunanchis. Jehová Diosqa munakuq Diosmi (1 Juan 4:8). Payqa manaraq payta reqsishaqtinchismi munakuwaranchisña (1 Juan 4:9, 10). Chaymi noqanchispas Jehová Dios jina runakunata munakunanchis (Efes. 5:1). ¿Imaynatan runakuna munakusqanchista rikuchisunman? Llapa runakunaman Jehová Diosmanta yachachispan (leey Mateo 9:36-38). Chayta ruwaspaqa runakunatan yanapashanchis Jehová Diospa familianmanta kanankupaq. Chaymi paykunataqa bautizakunankukama yanapananchis, bautizakusqanku qhepamanpas sumaqtan qhawarinanchis (1 Juan 4:20, 21). Ima mana allintaña ruwawaqtinchispas manan usqhayllachu phiñakunanchis, aswanpas kallpachakunanchismi jujkuna-jujkunawan munanakunanchispaq. Paykunataqa noqanchismanta aswan allinpaqmi qhawarinanchis (leey Romanos 12:10; Filip. 2:3).

15. ¿Imata ruwananchispaqmi Jesús kamachiwaranchis?

¹⁵ Llapa runakunatan khuyapayananchis, sumaqtataqmi tratananchispas. Jehová Diospa familianmanta kananchispaqqa Bibliaq kamachisqanman jinapunin kausananchis. Jesusmi kamachiwanchis runakunata khuyapayananchispaq, enemigonchiskunatapas munakunanchispaq (Luc. 6:32-36). Mayninpiqa yaqapaschá sasa kanman runamasinchiskunata munakuy. Chhaynapi tarikuspaqa kallpachakunanchismi Jesús jina piensananchispaq, pay jina imatapas ruwananchispaq. Jehová Diosta kasukuspaqa Jesuspa ejemplontapas qatikuspaqa Diospa familianmanta kananchispaqmi kallpachakushanchis.

16. ¿Imata ruwaspan Jehová Diospa familianta allinta qhawarichisunman?

¹⁶ Jehová Diospa familianta allinta qhawarichinanchispaqmi kallpachakunanchis. Juj familiapiqa sullk’a wawakunan kuraqninkuq ejemplonta qatikunku. Kuraqninku mana allinta ruwaqtinkuqa sullk’akunapas kaqtan ruwallankutaq. Ichaqa sichus kuraqninku Bibliaq kamachisqanman jina kausanku chayqa, allin ejemplon sullk’ankupaq kanku. Chhaynallataqmi Jehová Diospa llaqtanpipas. Sichus mayqen iñiqmasinchispas Jehová Diospa contranpi jatarinman otaq ima mana allinkunatapas ruwanman chayqa, manan allin ejemplochu jujkunapaq kanman. Yaqapaschá wakin hermanonchiskunaqa pay jina imatapas mana allinta ruwayta qallarinkuman, chayta ruwaspaqa Jehová Diospa llaqtantan p’enqayta qhawarichinkuman (1 Tes. 4:3-8). Noqanchisqa manan jujkunaq mana allin ruwasqankutachu qatikunanchis, chayta ruwaspaqa Jehová Diosmantan t’aqakapushasunman.

17. ¿Imaraykun mana qhapaq kaykunapichu confiananchis?

¹⁷ Jehová Diospin confiananchis manan qhapaq kaykunapichu. Diospa gobiernontachus ñaupaqta maskhasunchis, kamachikuyninkunatapas kasukusunchis chayqa, payqa manan mijunanchistapas p’achanchistapas faltachiwasunchu (Sal. 55:22; Mat. 6:33). Chayraykun manapuni qhapaq kaykunataqa maskhananchischu, chaykunata maskhaspaqa manan kusisqachu kasunchis. Ichaqa sichus Diospa munayninman jina kausananchispaq kallpachakusunchis  chayqa kusisqan kasunchis thajmi sientekusunpas (Filip. 4:6, 7). Yaqapaschá wakinninchispaqqa qolqechanchis kashan imaymanata rantikunanchispaq. Ichaqa manaraq imatapas rantikushaspan piensaykunanchis tiemponchis kanqachus chay rantikusqanchista cuidananchispaq icha manachus chayta. Chaymantapas imayna kasqanchistan reparakunanchis. Yaqapaschá Jehová Diospi confiananchismantaqa kaqninchiskunapi nishuta confiashasunman. Jehová Diospa familianmanta kananchispaqqa tukuy yuyaywanmi Jehová Diosta servinanchis, manataqmi kay pachapi qhapaq kaykunatachu maskhananchis. Mana chayqa Jesuspa tiemponpi qhapaq wayna jinan kasunman, chay waynaqa imaymana kaqninkunata munakusqanraykun Jesusta mana qatikuranchu. Sichus chay wayna Jesusta qatikunman karan chayqa Jehová Diospa familianmantan kanman karan (Mar. 10:17-22).

18. ¿Ima bendicionkunatan chaskikunqaku kasukuq runakuna?

¹⁸ Jehová Diosta kasukuqkunaqa sumaq paraisopin tiyanqaku, chaypin Diosta wiñay-wiñaypaq yupaychanqaku, chaypin animalkunatapas plantakunatapas sumaqta cuidanqaku. Pisi tiempollamantan Jehová Diosqa tukuy imaymana mana allinkunata chinkachipunqa, jinaspa juj sumaq paraisota qowasunchis. Chaypiqa manan ima ñak’ariypas sasachakuypas kanqañachu. Chaymantapas wañupuq runakunan millonninpi kausarimpunqaku, paykunapas Jehová Diosmanta yachaspan wiñaypaq kausanqaku, manataqmi jayk’aqpas onqonqakuñachu (Luc. 23:42, 43). Mosoq pachapiqa pisi-pisimantan llapa runakunapas ch’uya runakunaman tukupusunchis, jinaspapas Diospa wawankunan kapusunchis (Heb. 2:7).

19. ¿Imakunapin sapa p’unchay piensananchis?

¹⁹ Sichus munashanki sumaq paraisopi kausakuyta chayqa kallpachakushallay Jehová Diosta servinaykipaq. Jehová Diosqa munakusunkin, munantaqmi familianmanta kanaykitapas. Chaypaqmi ichaqa sapa p’unchay Jehová Diospa promesankunapi piensanayki, tukuy atisqaykitataqmi Jehová Diosta servinaykipaq kallpachakunayki.