1, 2. ¿Imamantan kay yachachikuypi yachasunchis?

YAQAPASCHÁ juj amigoykita valekuranki imachus necesitasqaykita usqhaylla apamunanpaq, ichaqa mana chayamunchu. ¿Imatan ruwawaq chhaynapi tarikuspa? Yaqapaschá phiñakuwaq otaq llakikuwaqpas. Ichaqa, ¿imatan ruwawaq imapas pasasqanrayku mana usqhaychu chayamusqanta yachaspa? Chayta yachaspaqa yaqapaschá pacienciawan suyakuwaq. Chaymanta rimaspan Biblia nin: “Runaqa suyakusqan mana junt’akuqtinmi llakikun”, nispa (Prov. 13:12).

² Kay yachachikuypin yachasunchis imaynatas Bibliapi kaq Jehová Diospa yachachikuyninkuna yanapawasunman pacienciayoq kananchispaq chayta (Miq. 7:7). Chaymantapas yachallasuntaqmi imakunapi tarikuspas sasa kanman pacienciakuspa Jehová Diospi confiay chayta, ima bendicionkunatas chaskikusunchis pacienciayoq kaqtinchis chaytapas.

3. ¿Imata ruwananchispaqmi Proverbios 13:11 texto kallpachawanchis?

³ Proverbios 13:11 texton kallpachawanchis imatapas pacienciawan ruwananchispaq. Chaypin nin: “Qonqaylla qhapaqyayqa manan unaypaqchu, pisi-pisimanta juñuqmi ichaqa qhapaqyan”, nispa. ¿Imatan Proverbios 13:11 textoq nisqanmanta yachasunman? Chay textoq nisqan jina, pacienciawanmi pisi-pisimanta imatapas ruwananchis.

4. ¿Imatan yachasunman Proverbios 4:18 textoq nisqanmanta?

⁴ Proverbios 4:18 textopin nin: “Chaninkunaq puriyninqa pacha illarimuy k’anchay jinan, allinta p’unchayamuqtin  aswan-aswanta k’anchariq jinan”, nispa. Chay textoq nisqan jina Jehová Diosqa pisi-pisimantan llaqtanta yachachin. Chaymantapas noqanchisqa pisi-pisimantan iñiyninchispi wiñarinchis. Sichus kallpachakusunchis Bibliaq nisqanman jina kausananchispaq chayqa astawanmi Jehová Diostapas Jesustapas reqsisunchis, jinaspapas paykuna jinan pacienciayoq kasunchis.

5. ¿Imawanmi Jesús tupanachiran Diosmanta willasqanchista? ¿Imatan chaymanta yachasunman?

⁵ Jesusqa Diosmanta willasqanchistan juj mujuwan rijch’anachiran. Imaynan mujuqa allpaq sonqonpi pisi-pisimanta wiñan, chhaynatan Diosmanta willasqanchis mujupas runaq sonqonpi pisi-pisimanta wiñan. Chaymanta rimaspan Jesusqa niran: “Mujuqa ch’ijchimuspa jatunta wiñan, chay runaqa manan yachanchu imayna chay kasqanta. Allpaqa kikillanmantan pisi-pisimanta ruruchin: Ñaupaqtan q’achuta wiñachin, chaymantataq espigata rijurichimun, chaymantañataq espigapi ruruta junt’achin”, nispa (Mar. 4:27, 28). Chay textopi Jesuspa nisqan jina, Diospa siminta chaskikuq runakunaqa juj planta jinan pisi-pisimanta iñiyninkupi wiñarinku. Estudiantenchiskunapas Bibliapi yachasqankuman jinan pisi-pisimanta cambiayta qallarinku (Efes. 4:22-24). Ichaqa Jehová Diosmi paykunataqa iñiyninkupi wiñarinankupaq yanapan (1 Cor. 3:7).

6, 7. ¿Imatan yachasunman kay allpata Jehová Diospa kamasqanmanta?

⁶ Jehová Diosqa pacienciawanmi imatapas sutinrayku ruwan, allinninchista munasqanrayku ima. Kunanmi yachasunchis imaynatas kay pachatapas runakunatapas kamaran chayta.

⁷ Jehová Diosmi kay pachataqa kamaran. Biblia nisqan jina paymi kay allpataqa ‘waskhawan tupuran’, ‘teqsicharan’, ‘esquina rumitapas churaran’. Chay qhepamantaq llapa kamasqankunapi yuyaymanaran (Gén. 1:10, 12; Job 38:5, 6). Jehová  Diospa llapa kamasqankunata rikuspan angelkunapas anchatapuni kusikuranku q’ochukuranku ima (Job 38:7). Jehová Diosqa waranqa-waranqa watakunapin ch’askakunatapas animalkunatapas kamaran. Chay qhepamantaq rikuran llapa kamasqankunaqa ancha allinpuni kasqanta (Gén. 1:31).

8. ¿Imamantan kunan yachasunchis?

⁸ Kaypi yachamusqanchis jina, Bibliapi Jehová Diospa consejonkunan yanapawanchis pacienciayoq kananchispaq. Kunanmi yachasunchis imakunapi tarikuspan sasa kanman pacienciayoq kay chayta.

9. ¿Imapi tarikuspan pacienciayoq kananchis?

⁹ Mañakusqanchisman Jehová Dios mana usqhaychu kutichimuwaqtinchis. Yaqapaschá Jehová Diosmanta mañakuranchis sasachakuyninchiskunata allichaypi yanapawananchispaq, ichaqa manapaschá usqhaychu kutichimuwanchis. Chhaynapi tarikuspaqa yaqapaschá nisunman: “¿Imaraykutaq Jehová Diosri mañakusqayman mana usqhaychu kutichimuwan? Manapaschá payqa mañakusqayta uyarimuwanchu”, nispa.

10. ¿Imaraykun Jehová Diosmanta mañakuspa pacienciayoq kananchis?

¹⁰ Jehová Diosqa llapa mañakusqanchistan uyarimuwanchis (Sal. 65:2). Chaymi Jehová Diosqa munan paymanta mañakushanallanchista (Heb. 11:6). Chaymantapas munanmi mañakusqanchisman jina kausananchista (1 Juan 3:22). Sichus Jehová Dios mana usqhaychu mañakusqanchisman kutichimuwanchis chayqa manan pisikallpayananchischu. Aswanpas kallpachakunanchismi mañakusqanchisman jina kausananchispaq. Jehová Diosqa manapaschá kaqpachachu mañakusqanchisman kutichimuwasunchis. Chaymi Jesusqa niran: “Diosmanta mañakushallaychis, chaskinkichismi; maskhashallaychis, tarinkichismi; punkutapas takashallaychis, kicharimusunkichismi. Pipas mañakuqqa chaskinmi, pipas maskhaqqa tarinmi, pipas takaqmanqa punkupas kichasqan kanqa”, nispa (Mat. 7:7, 8). Jesuspa nisqan jina, mana pisipaspan Jehová Diosmantaqa mañakushanallanchis, payqa tiempollanpin mañakusqanchisman kutichimuwasun (Col. 4:2).

11. 1 Pedro 5:6 textoq nisqan jina, ¿iman yanapawasunchis mana usqhaychu Jehová Dios mañakusqanchisman kutichimuwaqtinchis?

¹¹ Sichus Jehová Dios mana usqhaychu mañakusqanchisman kutichimuwanchis chayqa manan pisikallpayananchischu. Jehová Diosqa tiempollanpin mañakusqanchisman kutichimuwasunchis (leey 1 Pedro 5:6). Chayraykun manapuni ninanchischu: “¿Imaraykutaq Jehová Diosri mana usqhaychu mañakusqayman kutichimuwan?”, nispaqa. Wakin hermanonchiskunaqa unay watakunañan Diospa gobiernon kay millay pachata tukuchipunanpaq mañakushanku. Chaymantapas kikin Jesusmi chayta mañakunanchispaq kamachiwaranchis (Mat. 6:10). Ichaqa manan phiñakunanchischu chay p’unchay manaraq chayamusqanmantaqa, nitaqmi iñiyninchispipas pisikallpayananchischu. Jehová Diospa p’unchayninqa tiempollanpin chayamunqa manataqmi munasqanchis horapichu (Hab. 2:3; Mat. 24:44). Chay p’unchay chayamunankamaqa tukuy tiempon Jehová Diosmanta mañakushanallanchis. Jehová Diosqa allintan yachan chay p’unchay jayk’aq chayamunanta, chay p’unchayqa allinninchispaqmi kanqa (Mat. 24:36; 2 Ped. 3:15).

12. ¿Imakunapi tarikuspan sasa kanman pacienciayoq kay?

 ¹² Mana chaninta ruwawaqtinchis. Kay tiempopi wakin runakunaqa juj runakunatan pisichanku waj llaqtayoq kasqankurayku, juj simita rimasqankurayku, juj colorniyoq kasqankurayku ima. Wakin hermanonchiskunatapas Jehová Diosta servisqankuraykun mana chaninta ruwashanku, chhaynapi tarikuyqa sinchi sasan kanman. Jesusmi niran: “Tukukuykama aguantaqmi ichaqa salvasqa kanqa”, nispa (Mat. 24:13). Chaymantapas yaqapaschá yachasunman juj iñiqmasinchispa juchallikusqanta. Chhaynapi tarikuypas sinchi sasan kallanmantaq. Ichaqa sichus umalliqkuna yachankuña chaymanta chayqa manañan llakikunanchisñachu, aswanpas umalliqkunaq allichanantan pacienciawan suyakunanchis.

13. ¿Imatan umalliqkuna ruwanku juchallikuq hermanokunata yanapanankupaq?

¹³ Sichus umalliqkuna yacharunku juj iñiqmasinchispa juchallikusqanta chayqa Jehová Diospa yanapaynintan mañakunku. Chhaynapi Jehová Diospa munayninman jina juchallikuq hermanonchiskunata yanapanankupaq (Sant. 3:17). Umalliqkunaqa juchallikuq hermanokunatan yanapanku Jehová Diosman kutirikunankupaq (Sant. 5:19, 20). Chaymantapas umalliqkunaqa kallpachakunkun iñiq t’aqapi hermanokunata allinta cuidanankupaq, k’irisqa sonqoyoqkunatapas kallpachanankupaq (2 Cor. 1:3, 4). Umalliqkunaqa allintan yachananku ima juchamansi juj hermano urmaran chayta, imaraykus chay juchaman urmaran chaytapas. Chaypaqmi ichaqa ñaupaqta Jehová Diosmanta mañakunanku, Jehová Diospa nisqanman jinataqmi wanachinankupas (Jer. 30:11). Iñiq t’aqapi thaj kay kananpaqqa manan usqhayllachu umalliqkunaqa imatapas decidinanku, chaykunata decidiyqa tiempopaqmi. Ichaqa manan chayraykuchu juchallikuqkunataqa jinallata qhawarparinanku. Sichus umalliqkunaq decidisqanku qhepaman mayqen hermanopas k’irisqaraq tarikushanman otaq noqanchispas k’irisqa sientekusunman chayqa, pacienciakuqmi kananchis.

14. ¿Piqpa ejemplonmi yanapawasunman mayqen hermanonchispas mana chaninta ruwawaqtinchis?

¹⁴ Wakinninchistaqa yaqapaschá mayqen  hermanonchispas k’iriwaranchis otaq mana chanintapas ruwawaranchis. Chhaynapi tarikushanchis chayqa Bibliapi Dios sonqo runakunamanta yachaymi yanapawasunchis. Josemanta yachasun. Paytaqa mana chanintan wayqenkuna ruwaranku, paymi ichaqa mana paykunapaq phiñakuranchu. Aswanpas tukuy sonqonwanmi Jehová Diosta servishallaran, chaymi Jehová Diosqa imaymanamanta payta yanaparan (Gén. 39:21). Mana chanintaña Joseta hermanonkuna ruwaranku chaypas khuyapayaspan paykunata perdonaran. Chaymantapas repararanmi pacienciakusqanrayku Jehová Diospa yanapasqanta (Gén. 45:5). Noqanchispas José jinan kallpachakunanchis mana chaninta ruwawaqtinchis Jehová Diospi confiananchispaq (Sal. 7:17; 73:28).

15. ¿Imatan juj hermananchis ruwaran mana chaninta ruwaqtinku?

¹⁵ Wakinninchistaqa yaqapaschá mayqen iñiqmasinchispas otaq Diosta mana serviq runakunapas mana chaninta ruwawasunman. Chhaynapi tarikuspapas Jehová Diospa consejonkunatan kasukunanchis (Filip. 2:3, 4). Chaymi juj hermananchistapas pasasqa. Llank’ananpis juj compañeran paymanta llullakuspa mana chaninta rimasqa, chaysi payqa sinchi k’irisqa sientekusqa. Ichaqa Jesuspa ejemplonta yuyariysi yanapasqa compañeranwan ama phiñakunanpaq, chaysi compañerantaqa mana imanisqapaschu (1 Ped. 2:21, 23). Hermananchisqa tiempowanmi yacharusqa juj onqoyniyoq kasqanrayku compañeran chhayna kasqanta. Chayta yachaspas payqa thaj sientekusqa compañeranwan pacienciakusqanmanta.

16. ¿Iman yanapawasunman pipas mana chaninta ruwawaqtinchis? (1 Pedro 3:12.)

¹⁶ Sichus pipas k’iriwaranchis otaq mana chanintapas ruwawaranchis chayqa Bibliaq nisqantan yuyarinanchis. Chaypin nin: “Señor Diosqa llakisqa sonqoyoqkunaq qayllanpin kashan, payqa llakiq ñit’isqan sonqoyoqkunatan qespichin”, nispa (Sal. 34:18). Jehová Diosqa munanmi pacienciayoq kananchista, llakikuyninchiskunatapas sasachakuyninchiskunatapas payman willakunanchista (Sal. 55:22). Jehová Diosqa tukuy imaymana mana allinkuna ruwawasqanchistapas  rikumushanmi (leey 1 Pedro 3:12). Chhaynaqa piña mana chaninta ruwawasunman chaypas Jehová Diosmanmi chaykunataqa saqenanchis.

17. Isaías 30:18 nisqan jina, ¿ima bendicionkunatan pisi tiempollamanta Jehová Dios apamunqa?

¹⁷ Jehová Diosqa pisi tiempollamantan imaymana bendicionkunata qowasunchis. Chaymi Isaías 30:18 textopi nin: “Señor Diosmi ichaqa suyashasunkichis anchata khuyapayananpaq, payqa chanintapuni ruwaq Dios kaspan sinchitapuni munashan qankuna khuyapayaykuyta. ¡Kusisamiyoqmi paypi suyakuqkunaqa!”, nispa. Bibliaq nisqan jina, sichus Jehová Diospi confiasunchis, llakikuyninchiskunatapas payman saqesunchis chayqa imaymana bendicionkunatan chaskisunchis. Jamuq tiempopipas wiñay kausaytan chaskisunchis.

18. ¿Ima bendicionkunatan jamuq tiempopi chaskikusunchis?

¹⁸ Mosoq pachapiqa llapa sasachakuyninchiskunapas llakikuyninchiskunapas wiñaypaqmi chinkapunqa. Chaypiqa manan pipas mana chanintaqa ruwawasunchu (Apo. 21:4). Chaymantapas mosoq pachapiqa Jehová Diosmi junt’asqata imaymana mijuykunata qowasunchis. Chaypiqa kusisqan wiñaypaq tiyasunchis (Sal. 72:16; Isa. 54:13).

19. ¿Imaraykun kunanmantapacha Jehová Dios imaymanata yachachiwashanchis?

¹⁹ Pisi tiempollamantan Diospa gobiernonqa kay pachata wiñaypaq kamachinqa. Chaypaqmi Jehová Diosqa kunanmantapacha imaymanata yachachiwashanchis, chaymi Jehová Diosqa munan pay jina pacienciayoq kananchista. Chhaynaqa manapunin pisikallpayananchischu ima sasachakuykunapiña tarikuspapas, aswanpas Jehová Diosmanmi ima sasachakuyninchiskunatapas saqenanchis. Sichus pacienciayoq kasunchis chayqa Jehová Diosmi imaymana bendicionkunata qowasunchis.