1. ¿Imanaqtinmi allinpuni imaynatachus Jehová Diosta reqsirqanchis chaymanta rimay?

 MAYNINPIN hermanonchiskunaqa tapuwanchis: “¿Imaynapin Jehová Diosta reqsirqanki?”, nispa. Jinan noqanchisqa kusisqa willakunchis imayna reqsisqanchista. Juj hermanokunata reqsishaspapas tapunchismi imaynatachus Jehová Diosta reqsirqanku chayta, jinaspa kusisqa uyarinchis willawasqanchista (Rom. 1:11). Chaymanta iñiqmasinchiskunawan rimasqanchismi yuyarichiwanchis Jehová Diospa testigon kasqanchismanta kusisqa kashasqanchista. Chaymantapas kallpachawanchismi “cheqaq kaqpi” purishanallanchispaq. Chhaynapi Jehová Diosninchista kusichinanchispaq, paypa bendicionninta chaskinanchispaqpas (3 Juan 4).

2. ¿Imakunamantan kaypi yachasun?

² ¿Imanaqtinmi cheqaq kaq yachasqanchista anchata valoranchis? ¿Imata ruwaspan rikuchisunman Bibliapi kaq cheqaq yachachikuyta valorasqanchista? Chaykunamantan kay yachachikuypi yachasunchis. Chaykunata yuyarispan astawanraq Diosta “gracias” nisun cheqaq kaqta yachachiwasqanchismanta (Juan 6:44). Chaymantapas kallpachawasunmi cheqaq kaqmanta jujkunaman willananchispaq.

3. ¿Imanaqtinmi cheqaq kaq yachasqanchista anchata valoranchis?

³ Jehová Diosninchismi cheqaq kaqtaqa yachachiwarqanchis, chaymi chayta anchata valoranchis. Bibliata estudiaspan yacharqanchis tukuy atiyniyoq Jehová Diosninchis janaq pachatapas kay pachatapas ruwasqanta. Chaymantapas yacharqanchismi munakuq papanchis kasqanta, noqanchismanta  llakikusqantapas (1 Ped. 5:7). Pay kikinmi niwarqanchis: “¡Khuyapayakuq sumaq sonqo Diosmi kani! Manan usqhaylla phiñakuqchu kani, tukuy tiempo munakuqmi cheqaqtaqmi kani”, nispa (Éx. 34:6). Chaymantapas Diosninchisqa chanillantan imatapas ruwan (Isa. 61:8). Chaymantapas Diosninchisqa llakikunmi sufrisqanchista rikumuspa, maytataqmi munashanpas kay pachamanta tukuy imaymana ñak’ariyta tukuchiytapas (Jer. 29:11). Noqanchispas ¡maytan chay p’unchay chayamunanta suyashanchis! Chaykunata yachaspan Jehová Diosninchista astawanraq munakunchis.

4, 5. ¿Imanaqtinmi apóstol Pablo jamuq tiempopi sumaq kausay suyakusqanchista juj anclawan tupanachirqan?

⁴ Chaymantapas cheqaq kaqta yachasqanchisqa yanapawanchismi kusisqa kausananchispaq. Bibliata estudiaspan yacharqanchis jamuq tiempopi sumaq kausay kananmanta. Chaymanta rimaspan apóstol Pablo nirqan: “Chay suyakuyqa ancla jinan noqanchispaq”, nispa (Heb. 6:19). Imaynan juj anclaqa barcota yanapan sinchita lamar-qocha phoqchiqeqtin ama chinkaykunanpaq, chhaynallataqmi jamuq tiempopi sumaq kausay kananta yachasqanchispas yanapawanchis sinchi llakipi tarikuqtinchis ama nishuta llakikunanchispaq.

⁵ Apóstol Pabloqa janaq pachaman rinankupaq suyakuyniyoq cristianokunatan chayta yuyarichisharqan. Ichaqa Pabloq nisqanqa yanapallantaqmi kay pachapi tiyanankupaq suyakuyniyoq cristianokunatapas (Juan 3:16). Chay sumaq kausayta suyakusqanchismi llapanchistapas yanapawanchis kusisqa kausananchispaq.

6, 7. ¿Imaynatan hermananchis Yvonneta jamuq tiempopi sumaq kausay kananmanta yachasqan yanaparqan?

⁶ Yvonne hermananchismanta yachasun. Paypa tayta-mamanqa manan Jehová Diospa testigonchu karqanku, chaymi payqa erqecha kasqanmantapacha wañunanmanta manchakurqan. Juj libropi leesqantan payqa mana qonqarqanchu, chaypin nisqa: “Qhepa watakunamanqa manañan pipas kausanqañachu”, nispa. Hermananchismi nin: “Chayta leesqay p’unchaymi tutantin mana puñurqanichu. Jinan tapukurqani: ¿Imapaqmi kausani? Noqaqa manan wañuytaqa munanichu”, nispa.

⁷ Sipaschaña kashaqtinmi hermananchisqa Jehová Diospa testigonkunata reqsirqan. Hermananchismi nin: “Repararqanin kay pachapi wiñaypaq kausayta atisqayta”, nispa. Bibliamanta yachasqanmi paytaqa allinta yanaparqan. Hermananchismi nillantaq: “Kunanqa manañan tutakunata rijch’arispa piensashanichu imachus qhepaman pasananmanta otaq wañupunaymantapas”, nispa. Kunanqa hermananchis Yvonneqa anchatan valoran Bibliamanta cheqaq kaqta yachasqanta, anchatataq kusikun chayta jujkunaman willaspa (1 Tim. 4:16).

8, 9. a) ¿Imata ruwaspan Jesuspa willasqan runa rikuchirqan tarisqan qorita anchatapuni valorasqanta? b) ¿Imaynan sientekunki cheqaq kaqta yachasqaykimanta?

⁸ Diospa gobiernon jamuq tiempopi imakunatachus ruwananta yachasqanchispas allinpunin. Chaypas Bibliamanta cheqaq kaq yachasqanchismi kashan. Jesusmi Diospa gobiernonta tupanachirqan juj pakasqa qoriwan, paymi nirqan: “Janaq pacha gobiernoqa chajrapi pakasqa qorimanmi rijch’akun, chayta tarispan juj runaqa astawan pakaykun, anchata kusikuspataq ripuspa llapan kaqninkunata vendemun, jinaspa chay chajrata rantikapun”, nispa (Mat. 13:44). Chay runaqa manan chay qorita maskhasharqanchu, ichaqa chayta tariruspanmi llapa kaqninta vendemurqan chay qoriwan qhepakunanpaq. ¿Imaraykun chayta ruwarqan? Payqa yacharqanmi tarisqan qoriqa  ima kaqninkunamantapas aswan valorniyoq kasqanta.

⁹ ¡Qanpas cheqaq kaq yachasqaykitaqa anchatapunichá valoranki! Anchatan kusikunchis Jehová Diosta servisqanchismanta, jamuq tiempopi Diospa gobiernon kamachimuqtin chaypi kananchismantapas. Kunan tiempopi qhapaqña imaymanayoqña kasunman chaypas, manan chhayna kusikuytaqa tarisunmanchu. Imataña ruwasunman Jehová Dioswan allin amigontin kananchispaq chaypas, chayta ruwasqanchisqa ancha allinpunin kanqa. Paywan amigontin kayqa may munaypunin. Chaymi kusikunchis payta tukuypi kasukuspa (Col. 1:10).

10, 11. ¿Iman Michaelta kallpacharqan vidanta cambiananpaq?

¹⁰ Askha iñiqmasinchiskunan imaymanata ruwarqanku Jehová Diosta kusichinankupaq. Wakinqa universidadpi estudiasqankutan saqepurqanku. Wakintaq manaña qhapaq kaykunata nishutachu maskharqanku. Jujkunataq Jehová Diosta reqsispanku vidankuta cambiapurqanku. Chaytan Michael hermanonchispas ruwarqan cheqaq kaqta yachaspa. Waynallaraq kashaqtinsi karateca nisqata yacharqan. Paymi nin: “Kusisqan kasharqani ejerciciota ruwaspa cuerpoy allin kasqanmanta. […] Mayninpiqa pitapas maqaspa gananaypaqmi yuyaykurqani”, nispa. Bibliata estudiaspan ichaqa yacharqan Jehová Diosqa maqakuq runakunata cheqnikusqanta (Sal. 11:5). Juj casarasqa iñiqmasinchismi paymanqa Bibliamanta yachachirqan, Michaelmi nin: “Paykunaqa manan jayk’aqpas niwarqankuchu karateca ruwasqayta saqepunaypaq, aswanpas Bibliaq nisqallantan yachachiwarqanku”, nispa.

¹¹ Jehová Diosmanta astawan yachaspan Michaelqa Jehová Diosta astawan munakurqan. Paymi yacharqan Jehová Diosninchis serviqninkunata khuyapayasqanta, chay yachasqanmi sonqonman chayarqan. Chaymantapas Michaelqa entienderqanmi vidanta cambianan kasqanta. Paymi nin: “Karate ruwasqayta saqeyqa sasan noqapaqqa karqan. Ichaqa yacharqanin chayta saqepuspa Jehová Diosta kusichisqayta, chaymi karateca ruwasqayta saqepurqani”, nispa. Michaelqa anchatan valorarqan Bibliamanta cheqaqta yachasqanta, chay yachasqanmi yanaparqan vidanta cambiananpaq (Sant. 1:25).

12, 13. ¿Imaynatan hermananchis Maylita Bibliamanta yachasqan yanaparqan?

¹² Bibliamanta cheqaq yachasqanchistan tupanachikullantaq tutayaqpi k’anchaq lamparawan (Sal. 119:105; Efes. 5:8). Azerbaiyán llaqtamanta Mayli hermananchismi kusisqa kashan Diospa palabran kausayninpi allinta yanapasqanmanta. Familianqa iskay religionmanmi perteneceqku, papanqa musulmán religionmantan, mamantaq judiokunaq religionninmantan. Maylinmi nin: “Noqaqa manan iskayarqanichu Dios kasqanmantaqa, ichaqa wakin yachachisqankutan mana entienderqanichu. Sapa kutinmi tapukuq kani: ¿Imapaqtaq Diosri kamawarqanchis? ¿Imaynataq juj runari ñak’arishaspa wañupusqan qhepaman infiernopi ñak’arinman?, nispa. Chaymantapas runakunaqa ninkun: Runakunaqa Diospa munayninpin ñak’arinchis, nispa. Chaymi niq kani: Chhaynaqa Diospa nisqallanta ruwananchispaqchá ruwasqa karqanchis, chaywantaqchá payqa kusikun, nispa”.

¹³ Mayliqa chaykunamantan allinta yachayta munarqan. Jinan qhepaman juj iñiqmasinchis Bibliamanta yachachirqan, jinaspa hermananchis kapurqan. Paymi nin: “Bibliamanta yachasqayqa sut’i entiendeymi noqapaqqa, chaymi yanapawan sonqoy ukhupi thaj kanaypaq”, nispa. Mayli jinan  llapa Jehová Diosta serviqkunaqa Diosta jatunchanchis “laqhayaqmanta ancha allin k’anchayninman wajamuwasqanchisrayku” (1 Ped. 2:9).

14. ¿Imatan ruwasunman Bibliamanta cheqaq kaqta yachasqanchista astawan valorananchispaq? (Qhaway “ Juj rijch’anachiykuna” nisqa recuadrota).

¹⁴ Kay yachachikuypin wakin iñiqmasinchiskunata Bibliamanta cheqaq kaqta yachasqanku allinta yanaparqan, chayta yachaspan noqanchispas anchata kusikunchis. Ichaqa kashanmi juj razonkunapas Bibliamanta cheqaq kaq yachasqanchista astawan valorananchispaq. Kallpachakuwaqmi chaykunata reparanaykipaqpas. Bibliamanta cheqaq kaq yachasqanchista astawan valorasun chayqa, aswan allintan Diosninchista servisun.

15. ¿Imatan ruwananchis Bibliamanta cheqaq yachachikuykunata tarinanchispaq?

¹⁵ Bibliapi kaq cheqaq yachachikuykunata valorasqanchistan rikuchisunman, sapa kutilla Bibliata qelqanchiskunata allinta estudiaspa. Askha watakunaña Diosta servishanchis chaypas imaymanaraqmi Diosmantaqa yachananchis kashan. Inglés simipi juj Qhawaq revistanchismi nirqan: “Bibliamanta  cheqaq yachachikuykunaqa qorakuna ukhupi juj munay t’ika jinan. ¿Imarayku? Chay qora jina yanqa yachachikuykuna askha kasqanrayku. Chay munay t’ikata tarinaykipaqqa tukuytan kallpachakunayki. Sichus tarirunkiña chay munay t’ikata chayqa, manan jujllawanchu qhepakunayki. Aswanpas kallpachakunaykin Bibliapi kaq askha cheqaq yachachikuykunata tarinaykipaq”, nispa. Chaypaqmi ichaqa sapa kutilla Bibliata allinta estudianayki.

16. ¿Imakunatan ruwarqanki Bibliamanta cheqaq yachachikuykunata allinta entiendenaykipaq? (Proverbios 2:4-6).

¹⁶ Manan llapanchismanchu leeyqa gustawanchis, Jehová Diosmi ichaqa munan cheqaq yachachikuykunata allinta entiendenanchista (leey Proverbios 2:4-6). Chayraykun chayta ruwananchispaq kallpachakunanchis. Corey iñiqmasimanta yachasun, payqa Bibliata leeshaspas juj textollata allinta t’aqwirin. Paymi nin: “Juj textomanta rimaq qelqanchiskunata maskhanaypaqmi kallpachakuni, chhaynapi chay textota allinta entiendenaypaq”, nispa. Sichus tiempota t’aqasunchis Bibliata allinta estudiananchispaq chayqa, Bibliapi kaq cheqaq yachachikuykunata valorasqanchistan rikuchisun (Sal. 1:1-3).

17. ¿Imatan ruwananchis Bibliapi cheqaq yachachikuykunata yachasqanchiswan? (Santiago 1:25).

¹⁷ Bibliapi cheqaq yachachikuykunataqa manan yachayllachu yachananchis. Aswanpas yachasqanchisman jinan kausananchis, chhaynapin kusisqa kausasunchis (leey Santiago 1:25). Juj iñiqmasinchismi nin: “Sapa kutillanmi qhawarikunanchis Bibliapi yachasqanchisman jinachus kausashanchis icha manachus chayta, chhaynapin yachasun imapichus cambiananchisraq kasqanchista, jinaspan usqhaylla cambiananchis”, nispa. Apóstol Pablon nirqan: “Chaywanpas, maykamachus iñiyninchispi wiñaranchis chayman jinapuni purisun”, nispa (Filip. 3:16).

18. ¿Imaraykun kallpachakunanchis cheqaq kaqpi purishanallanchispaq?

¹⁸ Sichus kallpachakushallasun cheqaq kaqpi purishanallanchispaq chayqa kusisqan kasunchis. Yachamusqanchis jina Bibliapi kaq cheqaq yachachikuykunaqa kausayninchispin yanapawanchis. Jehová Diospas hermanonchiskunapas anchatan kusikunku cheqaq kaqta yachasqanchismanta (Prov. 27:11; 3 Juan 4). Chaymi kallpachakushanallanchis Bibliapi cheqaq yachachikuykunata valorananchispaq, chaypi yachasqanchisman jina kausananchispaqpas.