1. ¿Imaraykun Jesús Papanta valekurqan qatikuqninkunata waqaychananpaq?

 MANARAQ wañupushaspan Jesusqa Papanta valekurqan qatikuqninkunata Satanasmanta waqaychananpaq (Juan 17:15, 20). ¿Imaraykun Papanta Jesús nirqan qatikuqninkunata waqaychananpaq? Payqa yacharqanmi Satanasqa astawanraq qatikuqninkunata qatikachananta, chayraykun Papanta valekurqan paykunata yanapananpaq.

2. Salmos 33:18-20 nisqan jina, ¿imaraykun mana manchakunanchischu sasachakuykunapi tarikuqtinchis?

² Kay tiempopipas Satanasqa imaymanamantan iñiqmasinchiskunata mat’ipayashan, chayraykun mayninpiqa pisikallpayasunman jinaspa Jehová Diostapas saqepuytaraq piensasunman. Ichaqa manan manchakunanchischu, Jehová Diosqa manan sapallanchistachu saqerpariwanchis. Payqa yachashanmi ima sasachakuypis tarikushanchis chayta, yanapaytataqmi munawanchispas. Bibliapin nin: “Señor Diosmi ichaqa manchakuqninkunatapas, [...] qhawashallanpuni”, nispa (leey Salmos 33:18-20). ¿Imaynatan chayta ruwan? Iskaymanta yachasunchis.

3. ¿Imakunapi tarikuspan mayninpi sapallanchis sientekusunman?

³ Diospa llaqtanpiña kashanchis chaypas mayninpiqa yaqapaschá sapallanchis sientekusunman. Yaqapaschá wayna-sipaskunaqa sapallanku sientekunkuman iñiyninkumanta colegionkupi rimananku kaqtin otaq juj iñiq t’aqaman astakapuqtinku. Chaymantapas mayninpiqa yaqapaschá sinchi llakisqa tarikushanchis mana valeqpaq ima qhawarikunchis, chhaynapi tarikuspaqa yaqapaschá sapallanchis sientekunchis. Yaqapaschá  piensanchis mana pipas entiendewananchispaq mana pipas munakuwananchispaqpas, chayraykun mayninpiqa ch’inlla kanchis. Imaraykuña sapallanchis sientekushanchis chaypas pisikallpayasunmanmi, sinchi llakisqataqmi tarikusunman. Ichaqa Jehová Diosqa manan munanchu chhayna kanaykita, ¿imarayku?

4. ¿Imaraykun profeta Elías nirqan: “Noqa sapallayñan qhepani”, nispa?

⁴ Profeta Eliaspas sapallanmi sientekurqan. Juj kutinmi payqa tawa chunka p’unchay más Jezabelmanta ayqekusharqan wañuchiyta munasqanrayku (1 Rey. 19:1-9). Jinan qaqa t’oqoman jaykuspa Jehová Diosta nirqan: “Noqa sapallayñan qhepani”, nispa (1 Rey. 19:10). Payqa piensarqan sapallanña kausashananpaqmi, Abdiasmi ichaqa pachaj profetakunata Jezabelmanta pakarqan (1 Rey. 18:7, 13). Chhaynaqa, ¿imaraykun Elias sapallan sientekurqan? Yaqapaschá piensarqan Abdiaspa pakasqan profetakunatapas llapanta wañuchipunankupaq. Otaq sapallan sientekurqan Jehová Diosman mana pipas kutirikusqanmanta, rikurqankuña Carmelo orqopi Baalpa profetankunata wañuchisqanta chaypas. Otaq yaqapaschá piensarqan chhayna sasachakuykunapi tarikusqanta mana pipas yachasqanta mana pipas paymanta llakikusqanta. Chaykunaraykupaschá sapallan sientekurqan, Bibliaqa manan ninchu chaykunata. Jehová Diosmi ichaqa allinta yacharqan imarayku Elías sapallan sientekusqanta, payqa yacharqanmi imayna kashasqanta, chaymi yuyaykurqanña imayna yanapayta.

5. ¿Imatan Jehová Dios ruwarqan Elías ama sapallan sientekunanpaq?

⁵ Jehová Diosqa imaymananmantan Eliasta yanaparqan. Ñaupaqtaqa Eliastan iskay kutita tapurqan: “Elías, ¿imatan kaypi ruwashanki?”, nispa. Chaytaqa tapurqan imayna kashasqanta willakunanpaqmi (1 Rey. 19:9, 13). Chay qhepamanqa makillan Jehová Diosqa uyarirqan Eliaspa nisqanta. Jinan reparachirqan mana sapallanchu kashasqanta, Jehová Diosqa paywan kashasqanta sinchi atiyniyoqpuni kasqantapas. Chaymantapas nillarqantaqmi Israelpiqa Jehová Diosta adoraqkunaqa askha kasqankuta (1 Rey. 19:11, 12, 18). Chaykunata uyarispaqa Eliasqa thajchá sientekurqan,  chaymantapas thajchá karqan Jehová Diosman imayna kashasqanta willakuspa. Chaymantan Jehová Diosqa Eliasta kamachirqan Hazaelta Siriapi reyta churananpaq, Jehuta Israelpi reyta churananpaq, Eliseotataq profeta kananpaq (1 Rey. 19:15, 16). Chaykunatan Jehová Diosqa Eliasta ruwachirqan ama sapallan jujmanta sientekunanpaq, chaymantapas Eliseotan qorqan yanapananpaq. Noqanchispas, ¿imatan ruwasunman sapallanchis sientekuqtinchis?

6. ¿Imanispan Jehová Diosmanta mañakusunman sapallanchis sientekuqtinchis? (Salmos 62:8).

⁶ Noqanchistapas Jehová Diosqa kallpachawanchismi paymanta mañakunanchispaq. Payqa yachashanmi imayna kashasqanchista chaymi munan yanapayninta mañakunanchista. Payqa uyariwasunpunin (1 Tes. 5:17). Paypaqqa may munaypunin chanin runaq mañakusqanqa, chaymi uyariwasunpuni (Prov. 15:8). ¿Imanispan nisunman Jehová Diosman sapallanchis sientekuqtinchis? Elías jinan noqanchispas sonqonchista Jehová Diosman kicharinanchis (leey Salmos 62:8). Willakusun payman imayna kashasqanchista, imakuna llakichiwashasqanchista, imaynata chaykunata atipasunman chaytapas. Sichus manchakushanki colegioykipi Jehová Diosmanta rimayta chayqa, paymantan mañakuwaq kallpata qonasuykipaq yachayta qonasuykipaqwan. Chhaynapi sumaqllata colegioykipi Diosmanta willanaykipaq (Luc. 21:14, 15). Sichus sinchi llakisqa kaspa mana valeqpaq sientekushanchis chayqa, ¿imatan ruwasunman? Chhaynapi tarikuspapas Jehová Diosmantan mañakusunman allin iñiyniyoq hermanonchiswan rimananchispaq, chhaynapi sumaqta kallpachawananchispaq. Jinaspapas mañakusunmanmi chay hermanonchis sumaqta entiendewananchispaq. Sichus Jehová Diosman willakusunchis imayna kashasqanchista chayqa manan sapallanchischu sientekusun. Chaymantapas reparananchismi imaynatan Jehová Dios mañakusqanchisman kutichimushan chayta, jujkuna yanapawaqtinchispas chaskikunanchismi.

7. ¿Imatan yachasunman Mauricio hermanonchismanta?

⁷ Jehová Diosqa anchatan kusikun iñiq t’aqapipas paymanta willaspapas llank’aqtinchis (Sal. 110:3). Sichus Jehová Diospaq astawan llank’asunchis chayqa manan sapallanchischu sientekusun, ¿imarayku? Chaypaq rimasunchis Mauricio hermanonchismanta. * Bautizakusqan qhepallamansi aswan allin amigon pisi-pisimanta Jehová Diosmanta t’aqakapusqa. Paymi nin: “Amigoy Jehová Diosmanta t’aqakapusqanta rikuspan noqapas iskayapurqani. Mayninpiqa niqmi kani: Noqapas pantarusaq chayri, atisaqchu Jehová Diosman prometesqayta junt’ayta, nispa. Chaymi sapallay sientekuq kani, mana entiendewanankupaqmi piensarqanipas”, nispa. ¿Iman yanaparqan ama  pisipananpaq? Paymi nillantaq: “Diosmanta astawan willasqaymi yanapawarqan. Chayta ruwaspaqa manañan mana valeqpaqchu qhawarikuq kani. Juj hermanokunawan kuska Diosmanta willaspaqa aswan kusisqan karqani”, nispa. Manaña hermanonchiskunawan kuskachu Diosmanta willanchis chaypas, kallpachakunanchismi paykunawan kuska telefononta cartakunata ruwaspa Diosmanta willananchispaq, chhaynapin aswan kallpachasqa sientekusunchis. ¿Imakunan Mauricio hermanonchista yanapallarqantaq? Paymi nin: “Iñiq t’aqapi leenaypaq otaq yachachinaypaq niwaqtinkuqa allintan preparakuq kani. Chayta ruwaspan astawan repararqani Jehová Dios munakuwasqanta iñiqmasinchiskunapas anchata munakuwasqankuta”, nispa.

8. ¿Imaynan sientekusunman sinchi sasachakuykunapi tarikuspa?

⁸ Tukukuy p’unchaypiñataq tiyashanchis chayqa sasachakuykunaqa kanqapunin (2 Tim. 3:1). Ichaqa yaqapaschá sasachakuykunaqa qonqay qati-qati chayamuwasunman. Yaqapaschá qolqenchis mana kapunmanchu, millay onqoy imapaschá jap’iwasunman otaq familianchismanta pipas wañukapunman. Chay sasachakuykunapi tarikuspaqa sinchi llakisqan tarikusunman manapaschá imanakuytapas atisunmanchu. Chhayna sasachakuykunapi tarikuqtinchisqa manan sapallanchischu kashanchis, Jehová Diosqa yachanmi imayna kashasqanchista, paypa yanapayninwanqa atillasunmi ima sasachakuytapas aguantayta.

9. ¿Ima sasachakuykunapin Job tarikurqan?

⁹ Jehová Diosqa yanaparqanmi Jobta imaymana sasachakuykunapi tarikuqtin. Jobqa qonqayllan imaymana sasachakuykunapi tarikurqan, allin kashaqtinmi qonqaylla juj p’unchayllapi uywankunapas, kamachinkunapas, wawankunapas wañukapurqanku (Job 1:13-19). Chaykunamanta khuyayta waqashallaqtinraqmi juj millay onqoyñataq jap’irqan, chhaynapin Jobqa mana reqsiypuni kapurqan (Job 2:7). Sinchi llakipunin Jobpaqqa chaykunaqa karqan. Chayraykun nirqan: “¡Jina kachun! Manan kausayta munaniñachu”, nispa (Job 7:16).

10. ¿Imaynatan Jehová Dios Jobta yanaparqan sasachakuykunata aguantananpaq? (Qhaway tapanpi kaq dibujota).

¹⁰ Jehová Diosqa munakurqanmi Jobta, allintataqmi yacharqan ima sasachakuykunapis tarikusharqan chayta. Chayraykun Jobta yanaparqan chay sasachakuykunata aguantananpaq, chhaynapi amapuni pisipananpaq. Chaymi Jehová Diosqa Jobwan rimarqan, jinaspa nirqan ancha yachayniyoq kasqanta. Chaymantapas willallarqantaqmi imaynatas kamasqan animalkunatapas cuidan chayta (Job 38:1, 2; 39:9, 13, 19, 27; 40:15; 41:1, 2). Chaymantapas Jehová Diosqa Elihú waynawanmi kallpacharqan Jobta, paymi Jobta yuyarichirqan Jehová Diosqa munakusqan runakunataqa manapuni jayk’aqpas saqerparisqanta. Chaymantapas Jehová Diosqa Elihuwanmi sumaqta yuyaycharqan Jobta, chaymi Elihuqa sumaqta rimapayaspa Jobta reparachirqan runaqa tukuy atiyniyoq Jehová Diospa ñaupanpiqa juch’uylla kasqanchista (Job 37:14). Chaymantataq Jehová Diosqa Jobta nirqan kinsantin amigonkunapaq mañapunanpaq (Job 42:8-10). Kunanpas, ¿imaynatan Jehová Dios yanapawanchis sasachakuykunapi tarikuqtinchis?

11. ¿Imaynatan Biblia yanapawanchis sasa tiempokunapi tarikuqtinchis?

¹¹ Jehová Diosqa manan kunanqa Jobwan jinachu pay kikin noqanchiswan riman, ichaqa simin qelqawanmi sumaqta kallpachawanchis (Rom. 15:4). ¿Imaynatan kallpachawanchis? Simin qelqapin Jehová Diosqa niwanchis  paypa munakuyninmantaqa manapuni ima sasachakuypas t’aqawananchista (Rom. 8:38, 39). Chaymantapas simin qelqapin niwanchis Jehová Diosqa payta wajakuqkunata uyarisqanta (Sal. 145:18). Jehová Dios niwasqanchis jina, sichus paypi confiasun chayqa ima pruebatapas atipallasunmi, ichaqa kusisqan aguantasunchis (1 Cor. 10:13; Sant. 1:2, 12). Chaymantapas simin qelqapin Jehová Diosqa yuyarichiwanchis kunan sasachakuykunapi tarikusqanchisqa pisi tiempolla kananta, paraisopi kausay ichaqa wiñaypaq kananta (2 Cor. 4:16-18). Jehová Diosmi prometewanchis Satanaspas, supaykunapas, millay runakunapas wiñaypaq chinkapunankuta (Sal. 37:10). Chayrayku kallpachakusun wakin textokunata umanchispi jap’inanchispaq, chhaynapi sasa tiempokunapi yanapawananchispaq.

12. ¿Imatan ruwananchis Bibliawan aswan allinta yanapachikunanchispaq?

¹² Jehová Diosmi munan simin qelqata sapa p’unchay leenanchista, leesqanchispi yuyaymanananchista, chayman jina kausananchistapas. Sichus chaykunata ruwasun chayqa aswan allin iñiyniyoqmi kasun, Jehová Dioswanpas aswan allin amigontinmi kasun. Tukuy chaykunataqmi yanapawasun sasachakuykunata aguantananchispaq. Chaymantapas sichus Jehová Diospa simin qelqapi confiasun chayqa paymi qowasunchis santo espiritunta, chhaynapi ima sasachakuytapas chay kallpawan atipananchispaq (2 Cor. 4:7-10).

13. ¿Imaynatan “allin yuyayniyoq junt’aq kamachiq” orqomusqan qelqakuna sasachakuykunapi tarikuqtinchis yanapawanchis?

¹³ Jehová Diospa yanapayninwanmi “allin yuyayniyoq junt’aq kamachiqa” imaymana qelqanchiskunata ruwamunku, videokunata, takikunata ima. Chaykunan yanapawanchis iñiyninchispi allin kananchispaq, ima sasachakuy kaqtinpas amapuni pisipananchispaq (Mat. 24:45). Tukuy chaykunaqa Jehová Diospa regalonmi. Chhaynaqa, ¿leeshanchischu qhawashanchischu chaykunata? Estados Unidos nacionmanta hermananchismi chay regalokunamanta anchata agradecekun. Paymi nin: “Tawa chunka watañan Jehová Diosta servishani, ichaqa sasachakuykunaqa manan faltanchu”, nispa. Paypa abuelontan juj machasqa runa carrowan wañuchipusqa, tayta-mamankunataq millay onqoywan wañupusqaku, paytapas iskay kutipin cáncer onqoy jap’isqa. ¿Iman payta yanaparqan chay sasachakuykunata aguantananpaq? Paymi nillantaq: “Jehová Diosmi yanapawarqan. Paymi yanapawarqan qelqanchiskunawan videonchiskunawan ima. Chaykunallan yanapawarqan  sasachakuykunata aguantanaypaq. Chaymi kunanqa Job jina nini: ¡Wañupunaykaman noqaqa Dios sonqollapuni kasaq!, nispa” (Job 27:5, TNM).

14. ¿Imaynatan Jehová Dios iñiqmasinchiskunawan yanapawanchis sasachakuykunapi tarikuqtinchis? (1 Tesalonicenses 4:9).

¹⁴ Chaymantapas sasachakuykunapi tarikuqtinchisqa iñiqmasinchiskunan yanapawanchis, chhaynatan Jehová Diosqa yachachiwarqanchis jujkuna-jujkunawan yanapanakunanchispaq (2 Cor. 1:3, 4; leey 1 Tesalonicenses 4:9). Iñiqmasinchiskunaqa Elihú jinan kanku, sasa tiempokunapin yanapawanchis qaqata sayananchispaq (Hech. 14:22). Chhaynatan Diane hermananchista iñiq t’aqanpi iñiqmasikuna yanapasqaku. Qosan sinchita onqopuqtinmi iñiqmasinchiskunaqa payta kallpachasqaku iñiyninpi qaqata sayashanallanpaq. Paymi nin: “Qosay onqopuqtinqa sinchi sasan noqaykupaqqa karqan. Ichaqa Jehová Diosqa manan saqerpariwarqankuchu, payqa marq’anpipas apashawankuman jinan karqan. Iñiq t’aqapi iñiqmasikunaqa tukuy necesitasqaykupin yanapawarqanku. Paykunan wasiykuman jamurqanku, telefonopi wajamuwarqanku, abrazaykuwarqanku ima. Diosmanta willanaypaqpas juñunakuykunamanpas carronkupin apawarqanku”, nispa. Chhaynatan iñiqmasinchiskunaqa sumaqta yanapawanchis sasa tiempokunapi.

15. ¿Imaraykun mana iskayananchischu sasachakuykunata atipananchismanta?

¹⁵ Sasachakuykunaqa kanqapunin, ichaqa manan sapallanchischu kashanchis. Jehová Diosmi ancha munakuq taytanchis jina sumaqta yanapawasunchis. Paymi sasa tiempokunapi yanapawasunchis, mañakuqtinchispas uyariwasunchismi (Isa. 43:2). Sasachakuykunataqa atipasunpunin manan chaymantaqa iskayananchischu. Chaypaqmi Jehová Diosqa qowanchis mañakuyta, simin qelqata, qelqanchiskunata, videokunata, iñiqmasinchiskunata ima.

16. ¿Imatan ruwananchis Jehová Dios yanapashawanallanchispaq?

¹⁶ Jehová Diosqa yanapawasunpunin, chayraykun payta “gracias” ninchis. Paymi sonqonchista kusichiqqa (Sal. 33:21). Chhaynatataq Jehová Dios cuidawanchis chayqa noqanchispas kallpachakunanchismi qelqanchiskunata leenanchispaq videokunatapas qhawananchispaq. Chaymantapas Jehová Dios cuidashawanallanchispaqqa kallpachakunanchismi llapa kamachiwasqanchista kasukunanchispaq, imachus allin kaqta imachus mana allin kaqta reparananchispaqpas. Sichus chaykunata ruwasunchis chayqa Jehová Diosqa wiñaypaqmi yanapawasunchis (1 Ped. 3:12).