1. ¿Imatan askha wayna-sipaskuna ruwashanku?

 SAPA watanmi waranqanpi wayna-sipaskuna bautizakunku. Qanpas wayna-sipas paykunamanta jujninchá kashanki, chhayna kaqtinqa Jehová Diospas, llapa hermanonchiskunapas ancha kusisqan kashanku (Prov. 27:11). Bautizakunaykipaqqa imaymanatachá ruwarqanki. Askha watapaschá Bibliata allinta estudiarqanki, jinaspa sut’ita repararqanki Bibliaqa Diospa siminpuni kasqanta. Chayraykuchá Jehová Diostapas anchata munakurqanki, jinaspa payta servinaykipaq bautizakurqanki. ¡Chay ruwasqaykiqa may allinpunin!

2. ¿Imatan kay yachachikuypi yachasunchis?

 ² Wayna-sipas, manaraq bautizakusqayki qhepamanqa imaymana sasachakuykunapichá tarikurqanki. Ichaqa jamuq tiempokunapipas imaymana sasachakuykunapin tarikullankitaq. Satanasqa imaymanatan ruwanqa Jehová Dios munakusqaykita chiriyachinanpaq, chhaynapi paymanta t’aqakunaykipaq (Efes. 4:14). Amapuni Satanaspa trampanmanqa urmaychu. Ichaqa, ¿iman yanapasunkiman Jehová Diospaq junt’aq kanaykipaq, prometekusqaykitapas junt’anaykipaq? Chaypaqqa kallpachakunaykin iñiypi allin poqosqa kayman chayanaykipaq (Heb. 6:1). Kay yachachikuypin yachanki imakunatas ruwawaq chayta.

3. ¿Imatan bautizakusqanchis qhepaman ruwashanallanchis?

³ Pipas bautizakuspaqa apóstol Pabloq Éfeso cristianokunaman yuyaychay qosqantan kasukunanku. Paymi Éfeso  cristianokunata kallpacharqan wiñay junt’asqa runa kayman chayanankupaq (Efes. 4:13). Chaywanmi nisharqan: “Iñiyniykichispi kallpachakushallaychis”, nispa. Apóstol Pablon allin iñiyniyoq kayninchista tupanachirqan juj wawaq wiñasqanwan. Tayta-mamakunaqa anchatan kusikunku wawayoq kaspaqa, ichaqa chay wawaqa manan tukuy tiempochu wawalla kanan. Tiempowanmi ichaqa qonqapunan kanqa wawa jina ruwaykunata (1 Cor. 13:11). Chhaynallataqmi pasanan Diosta serviqkunawanpas, bautizakusqanchis qhepamanqa kallpachakushanallanchismi iñiyninchispi wiñashanallanchispaq. Wayna-sipas, kaypin yachanki imakunas yanapasunkiman iñiyniykipi wiñashanallaykipaq chayta.

4. ¿Imata ruwaymi yanapasunki iñiyniykipi wiñarinaykipaq? (Filipenses 1:9).

⁴ Jehová Dios munakuyniykita wiñachishallay. Jehová Diosta munakunkiña chaypas, chay munakuytaqa wiñachishanallaykin. ¿Imatan chaypaq ruwawaq? Chaypaqmi Jehová Diosta allinta reqsinayki, chayta ruwaspan Jehová Diosta astawan munakunki. Chayta ruwananchispaqmi apóstol Pablopas llapanchista kallpachawarqanchis (leey Filipenses 1:9). Apóstol Pabloqa filipenses cristianokunatan nirqan Jehová Dios munakuyninkuta “aswan-aswanta” wiñachinankupaq. Chaypin reparanchis Jehová Dios munakuyninchis wiñashanallan kasqanta. Chaymi kallpachakunayki aswan-aswanta Jehová Dios munakuyniykita wiñachinaykipaq, chhaynapi munasqanman jina imatapas ruwanaykipaq.

5, 6. ¿Imata ruwaspan Jehová Dios munakuyninchista wiñachillasunmantaq?

⁵ ¿Imata ruwaspan Jehová Dios munakuyninchista wiñachillasunmantaq? Chaypaqqa Jesustan allinta reqsinanchis, payqa sut’itan rikuchirqan Diospa lliflli kayninta (Heb. 1:3). Ichaqa, ¿imaynatan Jesusta allinta reqsisunman? Mateo, Marcos, Lucas, Juan librokunata allinta estudiaspan. Chaypaqmi ichaqa sapa p’unchay Bibliata leenayki, manaraq chayta ruwashankichu chayqa kallpachakuy kunanmantapacha Bibliata leenaykipaq. Sichus Jesusmanta leeshanki chayqa reparay imayna kasqanta. Jesusqa allin runa munakuqllañan karqan. Paymanqa mana manchakuspan llapa runakuna achhuykuqku, wawakunatapas anchatan munakuq (Mar. 10:13-16). Qatikuqninkunapas kusisqan paywan kaqku, chaymi imachus piensasqankuta mana manchakuspa payman niqku (Mat. 16:22). Jesusqa Taytan Jehová Dios jinan imatapas ruwaq. Jehová Diospas ancha munakuqllañan, chayraykun paymanqa tukuy llakikuyninchiskunata mana manchakuspa willakunanchis. Payqa anchatan munakuwanchis, llakikuntaqmi imayna kashasqanchismantapas (1 Ped. 5:7).

⁶ Jesusqa runakunatan khuyapayaq. Chayraykun apóstol Mateopas nirqan: “Runakunata rikuspan Jesusqa paykunata khuyapayaran, paykunatan rikuran mana michiqniyoq ovejakunata jina khuyay k’irisqata, ch’eqesqata”, nispa (Mat. 9:36). ¿Imaynatan Jehová Diospas runakunata qhawarin? Jesusmi nirqan: “Chhaynallataqmi janaq pachapi kaq Yayaypas manapuni munanchu kay juch’uykunamanta jujnillanpas chinkananta”, nispa (Mat. 18:14). ¡Jehová Dios anchata munakuwasqanchista yachayqa may kusikunapaqmi! Sichus Jesusta allinta reqsisunchis chayqa astawanmi Jehová Diosta munakusunchis.

7. ¿Imaraykun allin iñiyniyoq hermanokunawan amigontin kanayki?

⁷ Wayna-sipas, ¿imatawanmi ruwallawaqtaq  Jehová Dios munakuyniyki iñiyniykipas wiñashanallanpaq? Iñiq t’aqapi allin iñiyniyoq hermanokunawan amigontin kaymi yanapasunki. Chaypaqqa qhawarinaykin imaraykus kusisqa kanku chayta, imaraykus mana pesapakunkuchu Jehová Dios servisqankumanta chaytapas. Chaymantapas tapuriwaqmi: “¿Imakunapi tarikuspan Jehová Dios yanaparqasunki?”, nispa. Sichus imatapas ruwanaykipaq iskayashanki chayqa paykunatan tapuriwaq yanapanasuykipaq. Bibliapas ninmi: “Askha yuyaychaqkuna kaqtinmi ichaqa allin imapas lloqsin”, nispa (Prov. 11:14, TNM).

8. Wayna-sipas, ¿imatan ruwawaq Jehová Diospa yachachikuyninmanta ama iskayanaykipaq?

⁸ Amapuni iskayaychu Diospa yachachikuyninkunamantaqa.  Iskay kaq parrafopi yachamusqanchis jina, Satanasqa imaymanatan ruwashan Jehová Dios munakusqayki chiriyananpaq. Payqa maytan munashan Jehová Diospa yachachikuyninkunamanta iskayanaykita. Ejemplopaq, yaqapaschá tiempowanqa evolución nisqa yachachikuymanta uyarinki. Ichaqa chay yachachikuykunaqa manan cheqaqchu. Chay yachachikuymantaqa manapaschá jayk’aqpas uyarirqankichu, colegiopi kaspaykin ichaqa chaykunamanta profesorniykikuna yachachisunkikuman. Yaqapaschá profesorniykikunaq yachachisqanqa creenapaq jinaraq kanman, ichaqa manapaschá jayk’aqpas kay pacha kamaqmantaqa t’aqwirirqankuchu. Biblian nin: “Ñaupaqta quejakuqpa rimasqanqa cheqaq jinan, qhepanta jamuq runa tapuspa sut’inchanankama”, nispa (Prov. 18:17, TNM). ¿Imatan chaymanta yachasunman? Wayna-sipas, manan usqhayllachu colegioykipi imachus yachachisqankutaqa creenayki. Aswanpas Bibliatan, chaykunamanta rimaq qelqanchiskunatan allinta estudianayki. Chaymantapas, ñaupaqpi evolución nisqapi creeq hermanonchiskunawanmi rimawaq, jinaspa tapurikuwaq: “¿Iman yanaparqasunki kay pachata Jehová Dios kamasqanmanta ama iskayanaykipaq?”, nispa. * Paykunawan parlariymi yanapawasunchis Jehová Diospa yachachikuyninkunamanta ama iskayananchispaq.

9. ¿Imatan yachasunman Melissa hermananchismanta?

⁹ Melissa hermananchismanta yachasun.  Paytaqa Diospa kamasqankunamanta yachaysi yanapasqa. * Paymi nin: “Colegioypin profesorniykuna yachachiqku evolucionmanta yachachikuyqa cheqaqpuni kasqanta. Qallariypin ichaqa iskayarqani, chaymi manchakusharqani evolución nisqamanta astawan estudiayta. Ichaqa allinta piensaykuspan chaymanta allinta estudiarqani, chhaynapi Jehová Diospa yachachikuyninmanta ama iskayanaypaq. Chaymi leerqani ¿Existe un Creador que se interese por nosotros? nisqa librota. Chaymantapas leerqanin ¿Es la vida obra de un Creador? nisqa folletota, El origen de la vida. Cinco cuestiones dignas de análisis nisqa folletotawan. Chaykunata estudiaymi allinta noqataqa yanapawarqan”, nispa.

10, 11. ¿Iman yanapasunkiman Satanaspa trampankunaman ama urmanaykipaq? (1 Tesalonicenses 4:3, 4).

¹⁰ Mana allin piensaykunamanta cuidakuy. Wayna-sipaskunaqa wiñasqankuman jinan warmi-qhari puñuyta munanku, otaq pipas mat’ipayanman qhelli juchata ruwananpaq. Satanasqa chaykunaman urmanaykitan munan. ¿Iman yanapasunkiman Satanaspa trampankunaman ama urmanaykipaq? (Leey 1 Tesalonicenses 4:3, 4). Wayna-sipas, Jehová Diosmanta mañakushaspaqa imayna kashasqaykita willakuy, jinaspa kallpata mañakuy ama chaykunaman urmanaykipaq (Mat. 6:13). Jehová Diosqa liston kashan yanapanasuykipaq, manan payqa juzgasunkichu (Sal. 103:13, 14). Biblia leeypas allintan yanapasunki. Melissa hermananchispas mana allin piensaykunata atipananpaqmi kallpachakurqan. Paymi nin: “Chay mana allin piensaykunata atipanaypaqqa sapa p’unchaymi Bibliata leerqani, chayta ruwaspan yuyarirqani Jehová Diosman prometekusqayta, paypas noqawan kashasqanta”, nispa (Sal. 119:9).

¹¹ Chaymantapas wayna-sipas, tayta-mamaykiman willakuy imachus pasashasqasuykita, manaña facilchu chayta ruway chaypas kallpachakunaykin chayta ruwanaykipaq. Melissa hermananchismi nillantaq: “Jehová Diospa yanapaynintan mañakurqani ama manchakuspa tayta-mamayman imachus pasawashasqanta willakunaypaq. Chayta ruwaspaymi thaj karqani, chaywanmi Jehová Diostapas kusichirqani”, nispa.

12. ¿Iman yanapasunki imatapas allinta ruwanaykipaq?

¹² Jehová Diospa yachachikuyninkunawan pusachikuy. Tiempowanqa qanllamantañan imatapas ruwanaykipaqqa piensaykunayki kanqa. Chaywanpas jujpa yanapaynintaraqmi maskhanayki imatapas ruwanaykipaqqa. ¿Imatan ruwawaq Jehová Dioswan amigo kayniyki ama chiriyananpaq? (Prov. 22:3). Chaypaq Kari hermananchismanta yachasun. Payqa allintan repararqan juj allin iñiyniyoq cristianoqa manan juj kamachikuytaraqchu necesitan imatapas ruwananpaqqa. Kari hermananchismi nin: “Noqaqa allintan entiendenay karqan imaynatas Jehová Dios imamantapas piensan chayta”, nispa. Chayrayku Bibliata leeshaspa tapukuy: “¿Imatan kay leesqaymanta yachayman? ¿Kay leesqay imaynatan yanapawanman allin kaqta ruwanaypaq? ¿Allinchu imapas kanqa chayman jina imatapas ruwaqtiy?”, nispa (Sal. 19:7; Isa. 48:17, 18). Sichus Bibliata leenki, chaypitaq yuyaymananki chayqa imachus ruwasqaykiwanmi Jehová Diosta kusichinki. Chaymantapas allintan entiendenki imatas Jehová Dios imamantapas piensan chayta, jinaspa mana juj kamachikuytaraqchu necesitanki imatapas ruwanaykipaq. Chaykunata ruwaspan rikuchinki iñiyniykipi wiñarisqaykita.

13. ¿Imaynatan allin amigoykikuna yanapasunkikuman? (Proverbios 13:20).

¹³ Jehová Diosta munakuq amigokunata  maskhay. Chhayna amigokunan yanapasunki iñiyniykipi wiñarishanallaykipaq (leey Proverbios 13:20). Sara hermananchismanta yachasun. Payqa manan kusisqañachu Jehová Diosta servisharqan. Ichaqa, ¿iman payta yanaparqan? Paymi nin: “Chhaynapi tarikushaqtiymi allin amigokunata tarirqani, paykunan allinta yanapawarqanku. Juj amigaywanmi sapa semanan juñukuq kayku Qhawaq revistata estudianaykupaq, chaymantapas juj amigaymi kallpachawarqan juñunakuykunapi tapuykunaman kutichinaypaq. Paykunaq yanapayninwanmi kunanqa sapa kutilla sapallaypi Bibliata estudiani, Jehová Diosmantapas mañakuni. Chaykunata ruwaymi yanapawarqan pisi-pisimanta Jehová Dioswan allin amigontin kapunaypaq”, nispa.

14. ¿Imatan Julien wayna iñiqmasinchis ruwarqan allin amigokunata tarinanpaq?

¹⁴ Wayna-sipas, ¿imatan ruwawaq allin amigokunata tarinaykipaq? Julien hermanonchismanta yachasun. Payqa iñiq t’aqapi umalliqmi, paymi nin: “Noqaqa Diosmanta willashaspaymi allin amigokunata tarirqani, paykunaqa kusisqan Jehová Diosta serviqku, yanapawarqankutaqmi noqapas kusisqa Jehová Diosta servinaypaq. Chaymi kallpachakurqani tukuy tiempoywan Jehová Diosta servinaypaq. Kallpachakullarqanitaqmi kuraq hermanokunawanpas allin amigontin kanaypaq, paykunaqa anchatan yanapawarqanku. Chay qhepamanqa Betelmanmi invitawarqanku, chaypipas allin amigokunatan tarirqani. Paykunaqa yanapawarqankun allinta piensaspa imatapas ruwanaypaq, chayraykun Jehová Dioswanpas allin amigontin kani”, nispa.

15. ¿Ima nirqanmi apóstol Pablo Timoteota? (2 Timoteo 2:20-22).

¹⁵ Ichaqa, ¿imatan ruwanayki sichus iñiq t’aqapi juj hermano mana allin ruwashasqanta reparaspa? Timoteoman apóstol Pabloq yuyaychasqantan kasukunayki. Apóstol Pabloqa yacharqanmi chay tiempopi wakin cristianokuna mana allinchu iñiyninkupi kashasqankuta, chaymi Timoteota nirqan chay cristianokunawan ama juñukunanpaq (leey 2 Timoteo 2:20-22). Jehová Dioswan amigontin kayqa ancha valorniyoqmi, chaymi iñiq t’aqapipas allinta amigonchiskunataqa ajllakunanchis, chhaynapi Jehová Diosmanta ama t’aqawananchispaq (Sal. 26:4).

16. ¿Imakunatan ruwanayki iñiyniykipi wiñarinaykipaq?

¹⁶ Kallpachakuy allin ruwaykunata ruwanaykipaq. ¿Imakunatan ruwawaq iñiyniykipi wiñarinaykipaq, allin cristiano kanaykipaqpas? (Efes. 3:16). Chaypaqqa sapa semananmi sapallaykipi Bibliata allinta estudianayki, sapa p’unchaytaqmi leenaykipas (Sal. 1:2, 3). Chaymantapas kallpachakunaykin astawan Jehová Diosmanta mañakunaykipaq. Kallpachakunallaykitaqmi kusirikuykunata allinta ajllakunaykipaq, chhaynapi tiempoykita ama usuchinaykipaq (Efes. 5:15, 16). Jehová Diosqa anchatan kusikunqa payta servinaykipaq kallpachakusqaykita rikuspa, iñiyniykipipas wiñarisqaykita rikuspa.

17. ¿Imaraykun allinniykipaq kanqa jujkunata yanapay?

¹⁷ Jujkunata yanapaypas ancha allinpunin. Jesusmi nirqan: “Qoypin aswan kusikuyqa kan, manan chaskiypichu”, nispa (Hech. 20:35). Sichus tiempoykita kallpaykita jujkunata yanapanaykipaq utilizanki chayqa, chay ruwaymi yanapasunki allin iñiyniyoq kanaykipaq. Ichaqa, ¿imakunatan ruwawaq jujkunata yanapanaykipaq? Yaqapaschá kuraq hermanonchiskunata otaq onqosqa hermanonchiskunata yanapawaq imachus necesitasqankupi. Sichus bautizasqa kashanki chayqa, kallpachakuwaqmi umalliqkunata yanapakuq kamachi kanaykipaq, chhaynapin allinta jujkunata yanapanki (Filip. 2:4). Chaymantapas Diosmanta allin willakuykunata jujkunaman willamunaykipaq kallpachakuy (Mat. 9:36, 37). Atispaykiqa tukuy tiempoykiwan Dios servinaykipaqmi kallpachakuwaq.

18. ¿Imaynatan yanapasunkiman tukuy tiempo Diosta servisqayki?

¹⁸ Wayna-sipaskuna, tukuy tiempochus Jehová Diosta servinkichis chayqa, astawanmi iñiyniykichispi wiñarinkichis. Sichus precursor jina Jehová Diosta servinki chayqa, atiwaqmi Diospa gobiernonmanta willaqkunapaq escuelaman riyta, Betelpipas otaq juñunakunanchis wasikuna jatarichiypipas yanapakuyta. Kaitlyn sipas hermananchismi nin: “Tukuy tiempo iñiqmasinchiskunawan Diosmanta willaymi yanapawarqan bautizakusqay qhepaman iñiyniypi astawan wiñarinaypaq. Paykunamanta yachaymi yanapawallarqantaq Bibliata allinta estudianaypaq allin yachachiq kanaypaq ima”, nispa.

19. ¿Ima bendicionkunatan chaskinki astawan iñiyniykipi wiñarispayki?

¹⁹ Iñiyniykipichus astawan wiñarinki chayqa askha bendicionkunatan chaskinki. Wayna-sipas kayniykipi Jehová Dios servisqaykiqa manan yanqapaqchu kanqa (1 Juan 2:17). Chaymantapas kusisqan kanki, ima ruwasqaykipas allinmi lloqsinqa (Prov. 16:3). Allin cristiano kasqaykin juj wayna-sipaskunatapas kuraq hermanonchiskunatapas yanapanqa (1 Tim. 4:12). Astawanqa thaj kusisqan kanki Jehová Diospa allin qhawarisqa allin amigon kasqaykita yachaspa (Prov. 23:15, 16).