Janaq pachapi kashaspan Jesusqa yacharan jujkunawan allinta llank’ayta. Chaymi kay pachaman jamuspaqa discipulonkunata yachachiran jujkunawan allinta llank’ayta yachanankupaq. ¿Imaynatan Jesuspa ruwasqanta qatikusunman? Kunanmi yachasun kinsa yuyaychaykunamanta, chaymi yanapawasun jujkunawan yanapanakuspa sumaqta llank’ananchispaq.

Jujkunawan sumaqllata llank’ayta yachaq runakunaqa k’umuykukuqmi kanku, valorankun llank’aqmasinpa ruwasqanta. Jesusqa rikuranmi Jehová Dios chhayna kasqanta. Bibliapiqa Jehová Diosllatan “kamaq” nispaqa nin. Chhaynaña kaqtinpas Jehová Diosqa ancha allinpaqmi qhawariran churinpa yanapayninta. Chaytan sut’ita reparanchis kay nisqanpi: “Runata ruwasunchis noqanchisman rijch’akuqta”, nispa (Gén. 1:26). Chayta nisqanwanmi Jesusqa repararan Jehová Diosqa k’umuykukuq kasqanta (Sal. 18:35).

Jesuspas kay pachapi kashaspaqa kˈumuykukuqmi karan. Askha runakunan Jesustaqa alabaranku imaymanata ruwasqanmanta, paymi ichaqa sut’ita niran Diospa yanapawayninwan chaykunata ruwasqanta (Mar. 10:17, 18; Juan 7:15, 16). Chaymantapas Jesusqa tukuy atisqantan ruwaran discipulonkunawan sumaqta kausananpaq, amigonkunata jinan paykunataqa rikuran, manan kamachinkunata jinachu (Juan 15:15). Juj kutipitaq paykunaq chakinta maqchiran, chaywanmi paykunata yachachisharan k’umuykukuq kanankupaq (Juan 13:5, 12-14). Jesús jinan noqanchispas llank’aqmasinchiskunata valorananchis, paykunaq allinnintataqmi  ñaupaqta maskhananchispas. Chayta ruwaspan jujkunawan sumaqta kausasun (Rom. 12:10).

Chaymantapas k’umuykukuq runaqa yachanmi “askha yuyaychaqkuna” kaqtin imapas allin ruwakusqanta (Prov. 15:22). Allin experienciayoqña kasunman, imaymana ruwaytaña yachasunman chaypas, manan tukuytaqa yachasunmanchu. Kikin Jesuspas niranmi mana llapantachu yachasqanta (Mat. 24:36). Jinaspapas Jesusqa yachaytan munaran discipulonkunaq imachus piensasqankuta (Mat. 16:13-16). Chaymi Jesuswan kuska llank’aq discipulonkunaqa kusisqa paywan llank’aranku. Sichus noqanchispas k’umuykukuq kasun, manataq yachaysapa runamanchu tukusun, jujkunaq nisqankutapas makilla uyarikusun chayqa, sumaqtan jujkunawan llank’asun, ima ruwasqanchispas allinmi kanqa.

Astawanqa umalliqkunan Jesús jina k’umuykukuspa juj umalliqkunawan llank’ayta yachananku. Diospa santo espiritunqa mayqen umalliqtapas yanapanmanmi imatapas ninanpaq, chay nisqanta uyarispan umalliqkunaqa allinta imatapas ruwankuman. Chaymi juñunakuspankuqa makilla uyarinanku juj umalliqkunaq imachus piensasqankuta.

Sichus llank’aqmasinchis atinallanchista ruwananchispaq niwanchis, uyariwanchistaq imachus nisqanchistapas chayqa, kusisqan paywanqa llank’anchis. Jesusqa askha kutipichá rikuran Jehová Diosqa serviqninkunata atinallankuta imatapas kamachisqanta. Chaychá Jehová Diosqa Jesusta kay pachaman kachamuran runakunata wañuymanta salvananpaq (Juan 3:16).

Jesusqa allin yuyaywanmi imatapas ruwaran. Payqa Israel runakunata yanapaqña jamuran chaypas yanaparanmi Fenicia llaqtayoq warmita (Mat. 15:22-28). Chaymantapas Jesusqa entienderanmi discipulonkunata, chaymi atinallankuta imatapas kamachiran. Juj kutinmi amigon Pedro runaq qayllanpi payta negaran, chaywanpas Jesusqa perdonaranmi, iñiqmasinkunata yanapananpaqtaq sumaq llank’ayta qoran (Luc. 22:32; Juan 21:17; Hech. 2:14; 8:14-17; 10:44, 45). Jesús jinan noqanchispas allin yuyaywan jujkunamanta atinallankuta mañananchis (Filip. 4:5).

Chaymantapas allin yuyaywan jujkunata qhawarisun chayqa, kusisqan imaymana clase runawanpas llank’ayta atisun. Jesusqa imaymana runakunawanmi sumaqta apanakuran, chaymi  enemigonkunaqa paymanta envidiakuranku, nirankutaq: ‘Paypa amigonkunaqa impuesto cobraqkunan, qhelli juchapi puriq runakunan’ nispa (Mat. 11:19). ¿Imata ruwaspan Jesús jina jujkunawan kusisqa llank’asunman manaña noqanchis jinachu kankuman chaypas? Louis hermanonchismi askha watakuna watukuq umalliq karan, Betelpipas llank’aranmi, chaypin imaymana clase hermanokunawan reqsinakuran. Paymi nin: “Qhawarisqayman jinaqa, sapanka hermanopas imaymana clase rumikuna jinan kanku. Chay rumikunawan perqata sayarichinaykipaqqa allinta yuyaykuspan llank’anayki, chayta ruwaspaykiqa atillankin perqata sayarichiyta. Chaymantapas noqaqa kallpachakuranin cambianaypaq, chhaynapi hermanonchiskunawan sumaqta kausanaypaq, allinta llank’anaykupaqpas”, nispa. ¡Chay ruwasqanqa allinpunin karan!

¿Imaynatan noqanchispas iñiq t’aqapi hermanonchiskunawan allin yuyaywan llank’asunman? Yaqapaschá wakin grupokunapi hermanokunaqa kuraqña kanku, wakintaq familiankuta uywanankupaq imaymanata ruwashanku. Paykunawan Diosmanta willaq rispaqa yaqapaschá atisqankuman jinalla Diosmanta willanankupaq nisunman, otaq tapusunman: “¿Imaynatan Diosmanta willayta munawaq?”, nispa.

Allin llank’aq runaqa llank’aqmasinkunamanmi yachasqanta willan (1 Tim. 6:18). Jehová Diosqa manan payllapaqchu yachasqantaqa jap’ikuran, aswanpas yachachiranmi Jesusta (Prov. 8:27). Jesuspas kay pachapi kashaspaqa kusisqan discipulonkunaman willaran taytanpa yachachisqanta (Juan 15:15). Noqanchispas Jehová Dios jinan hermanonchiskunaman willananchis imachus yachasqanchista. Jujkunawan allinta llank’aq runaqa manan jujkunata kamachinanraykuchu payllapaq imachus yachasqanta jap’ikun. Aswanpas kusisqan imachus yachasqanta jujkunaman yachachin.

Chaymantapas allin llank’aq hermanoqa jujkunatan kallpachashallan. Sichus llank’aqmasinchis kallpachakusqanchista rikuspa felicitawanchis chayqa, kusisqan paywanqa llank’anchis ¿riki? Jesusqa tiempotan orqoran discipulonkunaq allin ruwasqankumanta felicitananpaq (tupanachiy Mateo 25:19-23; Luc. 10:17-20). Chaymantapas Jesusqa niranmi paykunaqa paypa ruwasqanmantapas aswantaraq ruwanankuta (Juan 14:12). Wañupunanpaq juj p’unchayllaña kashaqtinmi apostolninkunata felicitaran imaña kaqtinpas payta qatikusqankumanta. Jesusmi niran: “Qankunaqa noqallawanpunin kasharankichis pruebakunapiña tarikuqtiypas”, nispa (Luc. 22:28). Chayta uyarispaqa anchatachá discipulonkunaqa kallpachakuranku. Sichus noqanchispas tiemponchista orqosun hermanonchiskunata felicitananchispaq chayqa, paykunaqa kusisqan kanqaku, aswan allintataqmi imatapas ruwanqaku.

Hermanonchis Kayoden nin: “Llank’aqmasiykitaqa imachus ruwasqanmantan felicitawaq, atisqaykiman jinataqmi yanaparinaykipas”, nispa. ¿Chaytachu qanpas ruwashanki? Chayta yachanaykipaqqa tapuwaqmi llank’aqmasiykita kusisqachus pay qanwan kashan manachus chayta. Jesuspa discipulonkunaqa kusisqan karanku Jesuswan llank’aspanku, sichus compañeroykikunapas qanwan kusisqa kashanku chayqa apóstol Pablo jinan ninki: ‘Kusisqa kanaykichispaq llank’aqmasiykichiskunan kayku’, nispa (2 Cor. 1:24).