Manan. Davidqa allillantan chaypiqa nisharqan.

Chaytan Davidqa nirqan Salmos 61:8 textopi, juj textokunapipas yaqa kaqllatataqmi nirqan. Paymi nirqan: “Sutiykimanta wiñaypaq takisaq, takispan promesa ruwasqayta sapa p’unchay junt’asaq”, “Jehová Diosníy, tukuy sonqoywanmi jatunchayki, sutiykitapas wiñay-wiñaypaqmi jatunchasaq”, “sutiykitan wiñay-wiñaypaq alabasaq”, nispa (Sal. 61:8; 86:12; 145:1, 2).

Davidqa manan jatunchakuspachu chaykunataqa nisharqan. Payqa yacharqanmi juchasapa runataq chayqa juj p’unchay wañupunanta, pay kikinmi nirqan juchasapa runa kasqantapas (Gén. 3:3, 17-19; Sal. 51:4, 5). Jinaspapas payqa allintan yacharqan Abrahanpas, Isaacpas, Jacobpas wañupusqankuta, junt’aq sonqoña Jehová Diospaq karqanku chaypas. Pay kikintaqmi yacharqan wañupunanta (Sal. 37:25; 39:4). Ichaqa Salmos 61:8 textopi nisqan jina Davidqa wiñaypaqmi otaq wañupunan p’unchaykaman Jehová Diosta serviyta munarqan (2 Sam. 7:12).

Davidqa kausasqan tiempopi imakunachus pasasqanmantan mayninpi qelqarqan, chaytan reparanchis Salmos 18, 51, 52 capitulokunapi. Salmos 23 capitulopin Jehová Diosta nirqan michiqninchis kasqanta. Paymi allin pastokunaman allin unukunaman pusawanchis, ima sasachakuykunamantapas jark’aykuwanchis. Davidqa chhaynatan ovejachankunata cuidaq, munarqantaqmi Jehová Diostapas wañupunan p’unchaykama serviyta (Sal. 23:6).

Jinaspapas Davidqa Jehová Diospa yuyaychasqanmi imatapas qelqarqan. Chaymi wakin qelqasqan profeciakunaqa tiempowan junt’akurqan. Salmos 110 capitulopin David nirqan Señornin Jehová Diospa paña ladonpi janaq pachapi tiyaykunanta, chaypi ancha atiyta chaskinanta. Chay atiywanmi Señorninqa Jehová Diospa llapa enemigonkunata atipanqa, jinaspa “llapa nacionkunaman castigota chayachimunqa”. Chay Señorninqa Mesiasmi karqan, paymi janaq pachamanta kamachikamushan, “wiñaypaq sacerdotetaqmi” kanpas. Mesiasqa Davidpa familianmantan jamurqan (Sal. 110:1-6). Salmos 110 capitulopi nisqanqa Jesuspin junt’akurqan, wakintaq jamuq tiempopi junt’akunqa (Mat. 22:41-45).

Reparasqachis jina Jehová Diosmi Davidtaqa yuyaycharqan imakunas paypa tiemponpi pasanan karqan chayta qelqananpaq, imakunas jamuq tiempopipas pasanqa chayta qelqanantapas. Jamuq tiempopin Davidqa kausarimpuspa Jehová Diosta wiñaypaq yupaychanqa. ¿Junt’akunqachu Salmos 37:10, 11, 29 textokunapi nisqanpas? Arí, junt’akunqan. Chay textopi nisqanqa ñaupa tiempopin junt’akurqan, jamuq tiempopipas junt’akullanqataqmi Jehová Dios llapa promesankunata junt’aqtin (Kay qelqapi qhaway 8 parrafota “Noqawanmi paraisopi kanki” nisqa yachachikuypi).

Chhaynaqa, Salmos 61:8 textopin Davidqa nisharqan wañupunan p’unchaykama Jehová Diosta yupaychananpaq, chaymantapas nishallarqantaqmi paraisopi kausarimpuspa wiñaypaq Jehová Diosta yupaychananta.