Jehová Diosmi runakunaman kay jallp’ata qorqan chaypi tiyanankupaq chaypi munayniyoq kanankupaq, kay jallp’atapas paraisoman tukuchipunankupaq (Gén. 1:28). Paraisopi tiyaqkunapas chay kamachikuytan kasukunanku kanqa. Armagedón qhepamanqa manan juj sumaq paraisomanchu runakunaqa jaykusunchis, aswanpas pisi-pisimantan kay jallp’ata sumaq paraisoman tukuchipusunchis. ¡Chay llank’ayqa ima sumaqchá kanqa!

Israel runakunaqa chhaynatan ruwanallankutaq karqan Babiloniamanta kutimuspaqa, Israel llaqtaqa qanchis chunka watan wijch’usqa kasharqan. Chay jallp’ataqa Jehová Diospa yanapayninwanmi sumaqman tukuchipunanku karqan. Profeta Isaiasmi nirqan: “Ch’usaq pampankunatan Edén huertaman jina tukuchinqa, ch’in aqo pampakunatan Jehová Diosqa huertanman jina tukuchinqa”, nispa (Isa. 51:3). Israel runakunaqa jallp’ankutan sumaqman tukuchipurqanku,  chhaynallatataqmi Jehová Diospa yanapayninwan kay jallp’anchista sumaq paraisoman tukuchipusunchis. Kunanmantapachan ichaqa kallpachakunanchis kay jallp’ata sumaqman tukuchinanchispaq.

Kunanmantapachan kallpachakunanchis wasinchista limpiota allin ordenasqata jap’inanchispaq. Manaña vecinonchiskuna chay ruwayman yachasqachu kankuman chaypas tukuy atisqanchistan kallpachakunanchis wasi punkunchistapas pichananchispaq. Chaymantapas kallpachakusunmanmi juñunakuna wasitapas jatun juñunakuna wasitapas limpiananchispaq allichananchispaq ima. Chaymantapas sasachakuypi tarikuq hermanonchiskunata yanapaqmi risunman. Chaykunata ruwaspan rikuchishanchis hermanonchiskunata yanapay munasqanchista. Jinaspapas tapukunanchismi: “¿Imakunatan kunanmantapacha yachayman paraisopi astawanraq yanapakunaypaq?”, nispa.

Jairoq ususinta Jesús kausarichisqan qhepamanmi nirqan chay sipaschaman mijunata qonankupaq (Mar. 5:42, 43). Chay sipaschaman necesitasqanta qoyqa manachá nishu sasachu karqan. Paraisopi Jesús askha runakunata kausarichimpuqtinqa imaymanan ruwananchis kanqa. Jesusmi nirqan: “Chaypin sepulturakunapi llapa kaqkunaqa runaq Churinpa kunkanta uyarinqaku, jinaspa lloqsimunqaku”, nispa (Juan 5:28, 29). Bibliapiqa manan willanchu imaynatas Jesús llapa runakunata kausarichimpunqa chaytaqa, Ichaqa llapa kausarimpuqkunaqa necesitanqakun mijunata, p’achata, maypi tiyanankutapas. ¿Imaynatan kunanmantapacha rikuchisunman paykunata yanapayta munasqanchista?

Sichus iñiq t’aqaykiman juj watukuq umalli chayamunman chayqa invitawaqmi mijunata. Chaymantapas Betelpi llank’aq hermanotapas watukuq umallikunatapas llank’ananku tukupuqtinmi paykunata ninku Diosmanta willaq rinankupaq. ¿Imaynatan paykunata yanapasunman iñiq t’aqanchisman chayamuqtinku? Yaqapaschá maypi tiyanankupaq juj wasita maskhapusunman. Chaymantapas yaqapaschá tiyasqanchis llaqtapi aparikunman jatun asambleanchiskuna. Chhayna kaqtinqa yanapakusunmanmi asamblea ñaupaqta  sumaqta hermanonchiskunata chaskinanchispaq, asamblea pasaytapas yanapakullasunmantaqmi.

Hechos 24:15 textopi nisqan jinapas askha runakunan mosoq pachapiqa kausarimunqaku. Wakinqa Diosta mana reqsispan wañukapurqanku chaymi mosoq pachapiqa atinqaku Jehová Diosta reqsiyta. a Noqanchismi chay runakunamanqa yachachisunchis (Isa. 11:9). Charlotte hermananchismi Europa, Sudamérica, África ladokunapi yanapakusqa, payqa maytan suyakushan kausarimpuy p’unchay chayamunanta. Paymi nin: “Noqaqa maytan munashani kausarimpuq runakunaman yachachiyta. Wakin runakunaqa Diosta mana reqsispan wañukapurqanku. Chaymi Bibliata leespaqa piensani: Sichus Jehová Diosta reqsinkuman karqan chayqa sumaq runakunachá kankuman karqan, nispa. Chaymi paraisopiqa chay runakunaman Diosmanta yachachiyta munani”, nispa.

Ñaupa tiempopi junt’aq sonqo runakunapas imaymanatan kausarimpuspaqa yachananku kanqa. Paykunaman yachachiyqa ancha munaymi kanqa. Danielmanqa willasunmi imaynatas qelqasqan profeciakuna junt’akurqan chayta (Dan. 12:8). Rutmanpas Noemimanpas willasunmi mirayninmanta Mesías jamusqanta. Mosoq pachapi kausarimpuq runakunaman yachachiyqa munaypunin kanqa, manañan chaypiqa pipas mat’ipayawasunchu mana allinkunata ruwananchispaqqa.

¿Imata ruwaspan rikuchiwaq mosoq pachapi kausarimpuq runakunaman yachachiyta munasqaykita? Yaqapaschá chaypaqqa kunanmantaña kallpachakuwaq allin yachachiq kanaykipaq, kallpachakuwaqmi sapa kuti Diosmanta willanaykipaqpas (Mat. 24:14). Wakinninchisqa yaqapaschá kuraqña kashanchis otaq ima sasachakuypipas tarikushanchis, chhaynaña kaqtinpas tukuy atisqanchistan kallpachakunanchis runakunaman Diosmanta willananchispaq, chhaynapin rikuchisunchis mosoq pachapi yachachinanchispaq listo kashasqanchista.

¿Munashankipunichu mosoq pachapi tiyayta? ¿Munashankichu kay pachata sumaq paraisoman tukuchipuyta, kausarimpuq runakunamanpas yachachiyta? Sichus ima ruwaypipas kunanmantaña kallpachakushanki chayqa allintan paraisopipas yanapakunki.