1. ¿Ima sinchi sasachakuykunapin David tarikuran?

 DAVIDQA sinchi sasachakuykunapin tarikuran. Paytaqa Saulmi qatiykachasharan wañuchinanpaq. Chaymantapas manan mijunanpaq imapas karanchu. Chaymi juj kutin Nob llaqtaman chayaspa sacerdote Ahimelecmanta pisqa t’antata mijunanpaq mañakuran (1 Sam. 21:1, 3). Chay qhepamanpas runankunapiwanmi qaqa t’oqopi pakakuran (1 Sam. 22:1). ¿Imaraykun David chhayna sasachakuykunapi tarikuran?

2. 1 Samuel 23:16, 17 nisqan jina, ¿imatan Saúl allintapuni yacharan, ichaqa imatan Dios contra ruwasharan?

² Davidqa allin reqsisqa runan karan. Payqa askha llaqtakunatan maqanakuspa atiparan. Chayta rikuspan Saulqa envidiakuyta qallariran, jinaspa sinchitapuni Davidta cheqnikuran, wañuchiytaraq munaranpas. Saulqa yacharanmi mana kasukusqanrayku rantinpi Jehová Dios Davidta rey kananpaq ajllakusqanta (leey 1 Samuel 23:16, 17). Jehová Diosña Davidta ajllaran rey kananpaq chaypas Saulmi Israel llaqtapiqa kamachikusharan, chaymi soldadonkunaq yanapayninwan Davidta wañuchiytapuni munaran. Chaymi Davidqa paymanta ayqekuran. Saulpa ruwasqanqa manapunin allinchu karan. Payqa Jehová Diospa kamachisqan contran Davidta wañuchiyta munasharan (Isa. 55:11). Diospa contranpi churakusqanqa manapunin allinchu karan.

3. ¿Tumparanchu David Jehová Diosta sinchi sasachakuykunapi tarikusqanmanta?

³ Davidqa juch’uyaykukuq runan karan. Chaymi paytaqa Jehová Dios kikinpuni ajllaran Israelpi rey kananpaq (1 Sam. 16:1, 12, 13). Chayraykun Saulqa Davidta wañuchiyta munaran. Davidqa manapunin Jehová Diostaqa tumparanchu chhayna sasachakuykunapi tarikusqanmantaqa. Manataqmi rimapakuranchu  mana mijunayoq kasqanmantaqa qaqa t’oqokunapi tiyasqanmantapas. Aswanpas yaqapaschá payqa qaqa t’oqopi pakakushaspa qelqaran Salmos 34:10 textoq nisqanta. Chaypin nin: ‘Jehová Diosta maskhaqkunapaqqa manan ima allin kaqpas faltanqachu’, nispa.

4. ¿Ima tapuykunatan kay yachachikuypi kutichisunchis, imaraykun chaykunamanta yachay ancha allinpuni?

⁴ Kay tiempopi wakin hermanonchiskunaqa pisichikuypin tarikushanku. * Astawanqa kay coronavirus onqoy rijurimusqanwanmi chhaynapi tarikushanku. Ichaqa Bibliaq nisqan jina pisi tiempollamantan aswan sasachakuykunapiraq tarikusunchis (Mat. 24:21). Chayraykun kay yachachikuypi kay tawa tapuykunata kutichisunchis: ¿Imaraykun David niran: “Manan ima allin kaqpas faltawanqachu”, nispa? ¿Imaraykun imachus kapuwaqnillanchiswan kusisqa kananchis? ¿Imaraykun Jehová Diospa yanapayninpi confiananchis? ¿Iman yanapawasunman jamuq tiempopi aswan jatun sasachakuykunata atipananchispaq?

5, 6. ¿Imaynatan Salmos 23 capitulomanta yachay yanapawanchis Salmos 34:10 textopi Davidpa nisqanta allinta entiendenanchispaq?

⁵ ¿Imaraykun Salmos 34:10 textopi David niran: “Jehová Diosta maskhaqkunapaqqa manan ima allin kaqpas faltanqachu”, nispa? Chayta allinta entiendenanchispaqmi yanapawasun Salmos 23 capituloq nisqanmanta yachay (leey Salmos 23:1-6). Chaypin Salmos 23:1 textoq qallariyninpi David khaynata niran: “Señor Diosmi michikuwaqniyqa, manan imapas pisiwanchu”, nispa. Chay qhepamantaq willaran Jehová Dioswan amigontin kay imamantapas aswan importante kasqanta. Davidqa michiqninta jinan Jehová Diosta qhawariran. Chaymi niran: “Chanin ñanninkunatan pusakuwan”, nispa. Nillarantaqmi: “Llullu q’achu-q’achupin samachikuwan”, nispa. Davidqa allintan yacharan ima sasachakuykunapiña tarikuqtinpas Jehová Dios yanapananta. Davidqa yaqapaschá mayninpiqa pisikallpayaran enemigonkuna qatiykachasqankurayku. Yaqapaschá payqa laqhayaq wayq’opi purinanpaq jina qhawarikuran.  Ichaqa chhaynapiña tarikuspapas khaynatan niran: “Manan ima mana allintapas manchakunichu noqawan qan kashasqaykirayku”, nispa.

⁶ ¿Imaraykun David niran: “Manan imapas pisiwanchu”, nispa? Chaytaqa niran Jehová Dioswan allin amigontin kasqanraykun. Davidqa manan qhapaq kaykuna maskhaypichu afanakuran. Aswanpas imachus kapuqnillanwanmi Jehová Diosta tukuy sonqowan serviran. Davidpaqqa Jehová Dioswan amigontin kay, paypa pakaykusqan kaymi imamantapas aswan importante karan.

7. Lucas 21:20-24 nisqan jina, ¿ima sasachakuykunapin Jerusalén llaqtapi tiyaq cristianokuna tarikuranku?

⁷ Davidpa nisqanmi yachachiwanchis amapuni qolqe maskhaypipas imaymanakunayoq kaypipas nishuta afanakunanchispaq. Manan juchachu imachus kapuwaqninchiskunawan kusirikuyqa. Ichaqa manan chaykunachu noqanchispaqqa aswan importante kanan, aswanpas Jehová Diosta serviymi. Yachasun ñaupa tiempopi Jerusalén llaqtapi tiyaq cristianokunamanta. Juj kutinmi Jesusqa discipulonkunata niran Jerusalén llaqtata soldadokuna muyuykunanta. Chayta rikuspan paykunaqa Jerusalén llaqtankumanta usqhaylla lloqsipunanku karan, jinaspa orqokunaman ayqekunanku karan. Chay nisqanta kasukuspaqa salvakunankun karan. Ichaqa saqenankun karan llaqtankuta, wasinkuta, chajrankuta, tukuy imaymana kaqninkutapas (leey Lucas 21:20-24). Chaymanta rimaspan juj Qhawaq qelqanchispi niran: “Jerusalenpi tiyaq cristianokunaqa wasinkuta, chajrankuta, imaymana kaqninkutawanmi saqepuranku. Paykunaqa Jehová Diospa yanapayninpin confiaranku. Chayta ruwaspan paykunaqa rikuchiranku ima kaqninkumantapas Jehová Diosta serviy aswan importante kasqanta”, nispa.

8. ¿Imatan yachasunman ñaupa tiempopi Jerusalén llaqtapi tiyaq cristianokunamanta?

⁸ ¿Imatan yachasunman ñaupa tiempopi Jerusalén llaqtapi tiyaq cristianokunamanta? Qhawaq qelqanchispin nillarantaq: “Yaqapaschá noqanchispas ñaupa tiempopi cristianokuna jina imaymana sasachakuykunapi tarikusunchis. Yaqapaschá imaymana kaqninchiskunata saqepunanchis kanqa. Chhayna sasachakuykunapi tarikuspa, ¿Jehová Diospichu confiasunchis icha imaymana kaqninchiskunapichu confiasunchis? Chhaynaqa kunanmantapachan Jehová Diospi confiananchis. Manan wasinchischu, chajranchischu, kaqninchiskunachu aswan importanteqa kanan. Aswanpas Jehová Diosta serviymi aswan importanteqa kanan”, nispa. *

9. ¿Imaynatan apóstol Pabloq yuyaychasqan noqanchistapas yanapawanchis?

⁹ Ñaupa tiempopi Jerusalén llaqtapi tiyaq cristianokunapaqqa manapaschá facilchu karan wasinkuta, chajrankuta, llaqtankuta, imaymana kaqninkutawan saqespa Jesuspa nisqanta kasukuyqa. Ichaqa Jehová Diospa yanapayninpin confiananku karan, payqa manan imankutapas faltachinanchu karan. Manaraq Jerusalén llaqtata Roma soldadokuna muyuykushaqtinmi apóstol Pabloqa pisqa wata ñaupaqta cristianokunata niran: “Aman qolqe sonqoqa kankichischu, aswanpas imaykichischus kan chayllawan contento kausaychis. Diosmi nin: ‘Manan jayk’aqpas saqesaykichu, manan jayk’aqpas qonqasaykichu’, nispa. Chhaynaqa ama manchakuspa nisun: ‘Jehová Diosmi yanapawaqniyqa, manan manchakusaqchu’. ¿Imanawanmantaq runari?”, nispa (Heb. 13:5, 6). Wakin cristianokunaqa apóstol Pabloq nisqantan kasukuranku. Paykunaqa imachus kapuqnillankuwanmi kusisqa kausaranku. Chaymi paykunataqa yanaparan Roma soldadokuna llaqtankuta muyuykuqtin wasinkutapas chajrankutapas usqhaylla saqepunankupaq. Paykunaqa allintan yacharanku Jehová Diosqa llapa necesitasqankuta paykunaman qonanta. Chaymi apóstol Pabloq nisqanqa noqanchistapas yanapawanchis Jehová Diospi confiananchispaq.

10. ¿Iman apóstol Pablopaq aswan importante karan?

¹⁰ Apóstol Pablon Timoteota niran: “Mijunanchispas p’achanchispas kashaqtinqa, contentoyá chaykunawan kasun”, nispa (1 Tim. 6:8). Apóstol Pabloq nisqanqa anchatapunin noqanchistapas yanapawanchis. Apóstol Pabloqa manan niranchu: “Allin mijunata mijuypas allin wasipi tiyaypas p’achata rantikuypas juchan”, nispaqa. Aswanpas imachus kapuwaqnillanchiswan kusisqa kananchispaqmi niran (Filip. 4:12). Apóstol Pablopaqqa Jehová Dioswan allin amigontin kaymi imamantapas aswan importanteqa karan, chayraykun manapuni qhapaq kaykunata maskhaypichu afanakuran (Hab. 3:17, 18).

11. ¿Imatan yachasunman Israel runakunata Moisespa nisqanmanta?

¹¹ Jehová Diosqa manan runakuna jinachu piensan. Noqanchisqa imaymana faltawananchispaqmi piensanchis. Juj kutinmi Moisesqa Israel runakunata niran: “Yuyariychis Diosninchis Señor Dios tukuy ruwayniykichiskunapi saminchasqasuykichista, kay tawa chunka watantinmi ch’inneqpi qankunawan kasharqan, kay jatun ch’inneqpi purisqaykichispin waqaycharqasunkichis, manataq imamantapas pisichirqasunkichischu”, nispa (Deut. 2:7). Chay tawa chunka watakunapiqa Jehová Diosmi Israel runakunaman maná nisqa mijunata qoran. Manan p’achankupas usut’ankupas thantakuranchu (Deut. 8:3, 4). Wakin Israel runakunaqa manapaschá Jehová Diosmanta chaykuna chaskisqankuwan contentakurankuchu. Chaychá Moisesqa paykunata yuyarichiran Jehová Diosqa necesitasqankuta manapuni faltachisqanta. ¿Imatan chaymanta yachasunman? Noqanchispas imachus kapuwaqnillanchiswanmi kusisqa kananchis. Pisillaña  kapuwasunman chaypas chaykuna qowasqanchismantan Jehová Diosta “gracias” ninanchis, chhaynapin payta kusichisunchis.

12. ¿Imaynapin yachanchis David Jehová Diospi confiasqanta?

¹² Davidqa allintan Jehová Diosta reqsiran. Payqa yacharanmi Jehová Diosqa sasachakuykunapi tarikuqkunata yanapasqanta. Davidqa sinchi sasachakuykunapi tarikushaspan Salmos 34 capituloq nisqanta qelqaran. Chaymi niran: “Señor Diospa angelninqa, Señor Diosta manchakuqkunatan muyuykunpas qespichinpas”, nispa (Sal. 34:7). Yaqachus jina Davidqa Jehová Diospa angelninta juj soldadowan rijch’anachiran. Paypaqqa chay angelmi juj kallpasapa soldado jina enemigonkunamanta cuidasharan. Davidqa allin kallpasapa soldadon karan, paytaqa Jehová Diosmi rey kananpaq ajllakuran. Chaywanpas Davidqa manan kallpanpichu confiakuran, aswanpas Jehová Dios enemigonkunata atipananpin confiaran, chaymi mana vengakuranchu (1 Sam. 16:13; 24:12). Davidqa Diospi confiasqanraykun yacharan Jehová Diosqa angelninkunawan yanapachinanta. ¿Imatan chaymanta yachasunman? Manaña Jehová Dios juj milagrotachu ruwanqa yanapawananchispaq chaypas paypi confiaqtinchisqa sasa tiempokunapipas yanapawasunpunin.

13. ¿Imaraykun kay pachapi gobiernokuna piensanqaku mana piniyoq kananchispaq, ichaqa imaraykun manapuni paykunata manchakunanchischu? (Qhaway tapanpi kaq dibujota.)

¹³ Pisi tiempollamantan aswan sasachakuykunapiraq tarikusunchis, chhaynapi tarikuspan Jehová Diospi confiasqanchista rikuchinanchis kanqa. Pisi tiempollamantan kay pachapi juñunasqa gobiernokuna sinchitapuni qatiykachawasunchis, jinaspa chinkachiyta munawasunchis. Chay p’unchaykunapiqa Jehová Diospa yanapayninpin confiananchis. Kay pachapi gobiernokunaqa mana piniyoq ovejakunata jinan qhawariwasunchis, chayraykun chinkachiytapas munawasunchis (Ezeq. 38:10-12). Ichaqa manan reparanqakuchu Jehová Diospa angelninkuna cuidawashasqanchista. Diospa angelninkunaqa soldadokuna phawaykamuwashaqtinchismi pakaykuwasunchis. Chayta reparaspan kay pachapi gobiernokunaqa sinchitapuni mancharikunqaku (Apo. 19:11, 14, 15).

14. ¿Iman yanapawasunman pisi tiempollamanta aswan sasachakuykunata aguantananchispaq?

¹⁴ ¿Iman yanapawasunman jamuq tiempopi aswan sasachakuykunata aguantananchispaq? Chaypaqqa manan kay pachapi qhapaq kaykunata maskhaypichu afanakunanchis. Pisi tiempomantaqa yaqapaschá wasinchistapas, chajranchistapas imaymana kaqninchiskunatapas saqepunanchis kanqa. Chayraykun chaykunata saqenanchispaq listo kashananchis. Chaymantapas kunanmantapachan imachus kapuwaqnillanchiswan kusisqa kananchis. Noqanchispaqqa Jehová Dioswan allin amigontin kaymi imamantapas aswan importante kanan. Chayraykun kallpachakunanchis Jehová Diosta astawan reqsinanchispaq, chaymi yanapawasun paypi astawan confiananchispaq. Jehová Diosqa manapunin saqerpariwasunchu, aswanpas kay pachapi juñunasqa gobiernokunamantan pakaykuwasun.

15. ¿Iman Davidta yanaparan Jehová Diospi confiananpaq?

¹⁵ ¿Iman Davidta yanapallarantaq sasachakuykunata aguantananpaq? Paymi niran: “Reqsiykuychis, jinaspa rikuychis may sumaqchus Señor Diosqa kashasqanta”, nispa (Sal. 34:8). Davidpa nisqanta leespan reparanchis anchatapuni Jehová Diospi confiasqanta. Chayraykun Jehová Diosqa Davidta imaymana sasachakuykunapi tarikushaqtin yanapashallaran. Juj kutinmi Davidqa waynachallaraq kashaspa jatunkaray Goliat sutiyoq runawan maqanakuran. Chaypin Davidqa Goliat-ta niran: “Kunanmi qanta Señor Diosqa  makiyman jap’iykachiwanqa”, nispa (1 Sam. 17:46). Chay qhepamanqa rey Saultan Davidqa serviran, ichaqa tiempowanmi Saulqa Davidta askha kutipi wañuchiyta munaran. Chhaynapi tarikushaqtinqa Jehová Diosmi Davidwanqa kashallaran (1 Sam. 18:12). Davidqa yuyariranmi imaynatas Jehová Dios payta ñaupaqmantapacha yanaparan chayta. Chayta yuyariymi paytaqa yanaparan sasachakuykunata aguantananpaq, Jehová Diospa yanapayninpipas astawan confiashanallanpaq. Noqanchistapas Jehová Diospa yanapawasqanchista yuyariymi yanapawasun sasachakuykunata aguantananchispaq.

16. ¿Imakunapi tarikuspan reparasunman Jehová Diospa yanapawasqanchista?

¹⁶ Kunanmantapachan Jehová Diospa yanapayninpi confiananchis. Chayta ruwaymi yanapawasunchis aswan sasa tiempokunapi Jehová Diospi astawanraq confiananchispaq. Chaymantapas Jehová Diospin iñinanchis. Chaykunan yanapawasun imamantapas ama nishuta llakikunanchispaq. Wakinninchisqa yaqapaschá llank’ananchispi jefenchismanta tiempota mañakunanchis kanqa asambleanchiskunaman rinanchispaq, juñunakuykunaman rinanchispaq, Diosmanta willaqpas astawan lloqsinanchispaq. Sichus chayrayku llank’ananchismanta wijch’upuwasunman chayqa Jehová Diospa yanapayninpin confiananchis. Payqa manan jayk’aqpas saqerpariwasunchu, aswanpas llapa necesitasqanchistan qowasunchis (Heb. 13:5). Chaytan tukuy tiemponkuwan Jehová Diosta serviq hermanonchiskunapas repararanku.

17. ¿Iman kay 2022 watapaq texto, imaraykun chay textomanta yachay ancha allinpuni?

¹⁷ Noqanchisqa manan sapallanchischu kashanchis. Chaymi manapuni imatapas manchakunanchischu. Noqanchispaqqa Jehová Diosta serviymi imamantapas aswan importante kanan. Chayta ruwasunchis chayqa manan Jehová Diosqa jayk’aqpas saqerpariwasunchu. Chayraykun kay 2022 watapaq texto orqosqa kashan Salmos 34:10 textomanta. Chaypin nin: “Jehová Diosta maskhaqkunapaqqa manan ima allin kaqpas faltanqachu”, nispa. Chay textotan umalliq t’aqamanta hermanonchiskunaqa ajllaranku aswan sasachakuykunapi tarikuspa Jehová Diospi confiananchispaq.