1, 2. ¿Imaraykun sapa watan Jesuspa wañupusqanta yuyarinchis?

 YAQA iskay waranqa watakunañan pasarun Jesús noqanchisrayku wañusqanqa. Pay wañusqanraykun noqanchisqa atinchis wiñaypaq kausayta. Manaraq wañupushaspan Jesusqa apostolninkunawan juj cenata ruwarqan, chaypin t’antatapas vinotapas jap’ispa paykunata kamachirqan sapa kuti chayta ruwanankupaq (1 Cor. 11:23-26).

² Jesusta munakusqanchisraykun noqanchispas chay kamachikuyta kasukunchis (Juan 14:15). Jesuspa wañupusqanta yuyarisqanchis p’unchaykunapiqa imaymanamantan chay munakuyninchistaqa rikuchinchis. Tiempotan orqonchis mañakunanchispaq wañusqanpipas yuyaymanananchispaq. Wakinqa astawanmi chay killapiqa Diosmanta willaq lloqsinchis llapa runakunaman invitananchispaq, chhaynapi Jesuspa wañupusqanta yuyarinankupaq. Chaymi chay p’unchayqa mana imaraykupas chay juñunakuymanqa faltakuyta munanchischu.

3. ¿Imakunamantan kay yachachikuypi yachasunchis?

³ Diosta serviqkunaqa tukuy atisqanchistan kallpachakurqanchis Jesuspa wañupusqanta yuyarinanchispaqqa. Kay yachachikuypin kinsamanta yachasunchis. 1) Jesuspa nisqanman jinapunin Jesuspa wañupusqantaqa yuyarinchis, 2) jujkunamanmi invitanchis Jesuspa wañupusqanta yuyarinankupaq, 3) ima  sasachakuypiña tarikuspapas yuyarinchispunin Jesuspa wañupusqantaqa.

4. a) ¿Imakunatan sapa wata Jesuspa wañupusqan juñunakuyman rispa yachanchis? (Lucas 22:19, 20). b) ¿Imaraykun chay yachachikuykunata uyariy ancha allinpuni?

⁴ Sapa watanmi Jesuspa wañupusqan juñunakuyman rispaqa uyarinchis Bibliamanta yachachikuykunata. Chaypin yachanchis imaraykus Jesús wañusqanta, imaynatas juj runallawan juchanchismanta perdonasqa kasqanchistapas. Jinaspapas chay juñunakuypin uyarinchis pikunas t’antatapas vinotapas ujanku chayta, imatas t’antapas vinopas representan chaytapas (leey Lucas 22:19, 20). Jinaspapas chay juñunakuypin yachallanchistaq ima bendicionkunatas kay jallp’api tiyaqkuna qhepa tiempoman chaskinqaku chayta (Isa. 35:5, 6; 65:17, 21-23). Chay yachachikuykunaqa ancha importanten chaymi chay yachachikuykunataqa makilla uyarikunanchis. Askha runakunan mana yachankuchu imaraykus Jesús wañurqan chayta, chaymi wakinqa mana valorankuchu Jesuspa wañusqanta, jinaspapas manan Jesuspa nisqanman jinapunichu Jesuspa wañusqantaqa yuyarinku.

5. Jesuspa wañuspan qhepaman, ¿imaynatan runakuna Jesuspa wañupusqanta yuyaripurqanku?

⁵ Jesuspa apostolninkuna wañupusqan qhepallamanmi falso cristianokuna pantasqa yachachikuykunata iñiq t’aqaman apaykurqanku (Mat. 13:24-27, 37-39). Paykunan q’ewisqata Jesusmanta yachachiqku chhaynapi iñiqkuna qhepankuta aysakunankupaq (Hech. 20:29, 30). Paykunan yachachiqku Jesusqa mana juj kutillatachu wañusqanta, chaymi paykunaqa sapa kuti Jesuspa wañusqanta yuyariqku (Heb. 9:27, 28). Kay p’unchaykunapipas askha runakunan chay yachachikuytaqa creenku, chaymi sapa semana otaq sapa p’unchaypas iglesiaman rinku t’antata vinota ujanankupaq, chaytan sutichanku Santa Comunión nispa. b Wakin religionkunapas yanqa yuyariytaqa yuyarinkun Jesuspa wañupusqantaqa, ichaqa manan yachankuchu imaraykuchus chayta ruwasqankutaqa. Wakinqa tapukunkun: “¿Jesuspa wañusqanraykupunichu juchaykuna perdonasqa kanman?”, nispa. Noqanchisri, ¿imaynatan Jesuspa wañupusqanta yuyarinchis?

6. ¿Imatan 1872 watapi Biblia estudiaqkuna entienderqanku?

⁶ Charles Russell hermanonchismi juj t’aqa hermanokunapiwan 1870 watakunapi Bibliata allinta t’aqwiyta qallarirqanku. Paykunaqa yachaytapunin munarqanku imaraykus Jesuspa wañusqan noqanchispaq ancha allinpuni kasqanta chayta, chaymantapas yachaytan munarqanku imaynatas Jesuspa wañusqanta yuyarina chayta. Bibliaq yanapayninwanmi paykunaqa 1872 watapi entienderqanku Jesusqa juj preciota vidanwan noqanchisrayku pagasqanta. Chay yachasqankutaqa manan paykunallapaqchu jap’ikurqanku, aswanpas llapa runakunamanmi willarqanku librokunapi, revistakunapi, periodicokunapi ima. Tiempowantaq Jesuspa wañupusqanta sapa wata yuyariyta qallarirqanku imaynan ñaupa tiempopi cristianokuna ruwarqanku jinata.

7. ¿Imaynatan yanapawanchis ñaupa tiempopi Biblia estudiaqkunaq t’aqwisqanku?

⁷ ¿Imaynatan kay tiempopi noqanchista yanapawanchis ñaupa tiempopi Biblia estudiaqkunaq t’aqwisqanku? Jehová Diosqa bendecirqanmi chay t’aqwisqankutaqa, chayraykun noqanchispas kunanqa allinta entiendenchis imaraykus Jesús wañusqanta, imakunas chay wañusqanmanta kanqa chaytapas (1 Juan 2:1, 2). Chaymantapas yachallanchistaqmi ima iskay suyakuykunatas Jehová Dios qon pay sonqo runakunaman chaytapas. Jujninmi kashan  janaq pachapaq suyakuy, jujtaq kay jallp’a pachapaq suyakuy. Kay jallp’a pachapi suyakuyniyoqkunaqa askha runakunan kanku. Chaykunapin reparanchis Jehová Dios mayta munakuwasqanchista Jesuspa sacrificakusqanpas allinninchispaq kasqanta, chaypi piensaymi astawan Jehová Diosman asuykachiwanchis (1 Ped. 3:18; 1 Juan 4:9). Chayraykun noqanchispas ñaupa tiempopi Biblia estudiaqkuna jina llapa runakunaman invitamunchis Jesuspa wañupusqanta yuyarinankupaq, chhaynapi paykunapas imaynatachus Jesús kamachirqan chayman jina Jesuspa wañupusqanta yuyarinankupaq.

8. ¿Imaynatan Diospa llaqtan runakunaman invitarqan Jesuspa wañupusqanta yuyarinankupaq? (Kay parrafopaq fotokunata qhaway).

⁸ Jehová Diospa llaqtanpi kaqkunaqa askha watakunañan runakunata invitashanchis Jesuspa wañupusqanta yuyarinankupaq. 1881 watapin kay qelqa Estados Unidos nacionpi hermanonchiskunata nirqan Allegheny llaqtapi juj wasipi juñukunankupaq, jinaspa Jesuspa wañusqanta yuyarinankupaq. Chay qhepamanqa sapanka iñiq t’aqakunañan Jesuspa wañusqanta yuyarirqanku. 1940 watapitaq marzo killapi llapa Diosmanta willaqkunata nikurqan tiyasqanku llaqtapi runakunaman invitanankupaq. 1960 watapitaq Betel wasi imprimisqata invitacionkunata apachirqan, chaymantapachan Diospa llaqtanqa invitacionkunata rakiyta qallarirqanchis. ¿Imaraykun chayta ruwananchispaq kallpachakurqanchis?

9, 10. ¿Pikunatan invitallanchistaq Jesuspa wañupusqanta yuyarinapaq juñunakuyman? (Juan 3:16).

⁹ ¿Imaraykun runakunaman invitamunchis Jesuspa wañupusqanta yuyarinankupaq? Chaytaqa ruwanchis imakunatas Jehová Diospas Jesuspas noqanchisrayku ruwarqanku chayta yachanankupaqmi (leey Juan 3:16). Munanchismi  Jesuspa wañusqanta yuyarinankupaq jamuq runakunaqa Jehová Dios imayna kasqanta yachanankuta, chhaynapi Jehová Diosta servinankupaq. Chay invitaciontaqa manan Diosta mana reqsiq runakunallamanchu rakinchis. ¿Pikunatawanmi invitasunman?

¹⁰ Jesuspa wañupusqanta yuyarinanchispaq juñunakuymanqa iñiyninpi chiriyapuq iñiqmasinchiskunatawanmi invitallanchistaq. Chaywanmi paykunata yuyarichishanchis Jehová Dios paykunata mayta munakusqanta. Kusikunchismi chay juñunakuyman jamuqtinkuqa, chayman jamuqtinkuqa yuyarinkun imaynatas ñaupa tiempopi Jehová Diosta servisqankuta. Mónica hermananchismanta yachasun. c Payqa kay coronavirus onqoy tiempopin jujmanta kallpachakurqan Diosmanta willaq lloqsinanpaq, payqa 2021 watapi Jesuspa wañusqanta yuyarinapaq juñunakuyman risqanmantan nirqan: “Chay juñunakuyman risqayqa anchatan kusichiwarqan. Noqaqa iskay chunka watamantañan jujmanta lloqsirqani Jesuspa wañusqanmanta runakunaman invitanaypaq. Chaytaqa tukuy sonqomanta ruwanaypaqmi kallpachakurqani, chhaynapi Jehová Diospas Jesuspas noqarayku tukuy ruwasqankuta agradecekunaypaq”, nispa (Sal. 103:1-4).

11. ¿Imaynatan Jehová Dios llaqtanta bendecirqan Jesuspa wañupusqanta yuyarinankupaq invitacionta rakisqankumanta? (Ageo 2:7).

¹¹ Jehová Diosqa bendecirqanmi llaqtanpa tukuy kallpachakusqantaqa. Coronavirus onqoyña 2021 watapi imaymana ruwayninchiskunata jark’arqan chaypas 21.367.603 runakunan Jesuspa wañupusqanta yuyarina juñunakuyta uyarirqanchis. Chayqa mundontinpi testigokuna kasqanchismantaqa iskay kuti masraqmi karqan. Askhaña karqanchis chaypas Jehová Diosqa manan jayk’a runakuna kasqanchistachu qhawan aswanpas payqa runakunaq sonqontan qhawan (Luc. 15:7; 1 Tim. 2:3, 4). Chayqa sut’itan rikuchiwanchis Jehová Diosqa chay invitacionkunawan allin sonqoyoq runakunata maskhasqanta chhaynapi llaqtanman jaykumunankupaq (leey Ageo 2:7).

12. ¿Imakunapi tarikuspan mayninpi noqanchispaq sasa kanman Jesuspa wañupusqanta yuyariy? (Kay parrafopaq fotota qhaway).

¹² Jesusqa willarqanñan kay tukukuy p’unchaykunapi imaymana sasachakuykunapi tarikunanchista. Paymi nirqan familianchis noqanchis contra jatarinanta, qatikachasqa kananchista, guerrakunapas onqoykunapas kananta (Mat. 10:36; Mar. 13:9; Luc. 21:10, 11). Yaqapaschá noqanchispas chhayna sasachakuykunapi tarikusunman, jinaspa sasa noqanchispaq kanman Jesuspa wañupusqanta yuyariy. ¿Imatan ruwarqanku chhaynapi tarikuspa wakin iñiqmasinchiskuna? ¿Imaynatan paykunata Jehová Dios yanaparqan?

13. ¿Imaynatan Jehová Dios Artiom hermanonchista bendecirqan Jesuspa wañupusqanta yuyarinanpaq kallpachakusqanmanta?

¹³ Carcelpi wisq’asqa kaqtinchis. Wakin iñiqmasinchiskunaqa carcelpin wisq’asqa kashanku. Chaywanpas paykunaqa kallpachakunkun Jesuspa wañusqanta yuyarinankupaq. Yachasun Artiom iñiqmasinchismanta, 2020 watapiqa carcelpin wisq’asqa kasharqan. Wisq’asqanku cuartoqa juch’uyllan karqan, chaymanqa tawa otaq pisqa runakunallan jaykuqku. Jesuspa wañupusqanta yuyarinapaq tutapaqqa hermanonchisqa kallpachakurqanmi vinonpas t’antanpas kananpaq, chhaynapi Jesuspa wañupusqanta yuyarinanpaq. Kallpachakurqanmi Jesuspa wañupusqanmanta yachachikuyta qonanpaq, chaytaqa pay kikillanpaqtaqmi ruwanan karqan. Ichaqa paywan wisq’asqa kaqkunaqa millay runakunan karqanku. Chaypin cigarrota pitaqku, sapa p’unchaytaq millay simikunata rimaqku. Chhaynaña karqan chaypas, ¿imatan Artiom  hermanonchis ruwarqan? Payqa chaypi compañeronkunatas nisqa: “¿Manachu juj horallapas saqeruwaqchis cigarro pitayta millay simi rimaytapas?”, nispa. Jinas chay compañeronkunaqa “yá” nisqaku. Paymi nin: “Paykunatan nirqani: Yachachiytan munaykichis imaynatas Jesuspa wañupusqanta yuyarikun chayta, nispa”. Manaña compañeronkuna chaymanta imatapas yachayta munarqankuchu chaypas chay yachachikuyta qosqan qhepamanqa imaymanatas hermanonchista tapusqaku.

14. ¿Imatan Diospa llaqtan ruwarqan Jesuspa wañusqanta yuyarinanchispaq coronavirus onqoy kasqan tiempopi?

¹⁴ Coronavirus onqoy kaqtin. Kay onqoypa kausanpin Diospa llaqtanqa mana juñunakunanchis wasipichu Jesuspa wañupusqanta yuyarirqanchis. Chaywanpas, ¿imatan Diospa llaqtan ruwarqan? d Internetniyoq iñiq t’aqakunaqa videopin Jesuspa wañupusqanta yuyarinapaq yachachikuytaqa uyarirqanku. Mana internetniyoq hermanonchiskunapaqtaq televisionpi radiopi ima chay yachachikuyta churamurqanku. Chaymantapas sucursalpi hermanokunan karupi tiyaq hermanokunapaq 500 más simikunapi grabamurqanku Jesuspa wañupusqanta yuyarinapaq yachachikuyta. Jinaspapas askha iñiqmasinchiskunan karupi tiyaq hermanonchiskunaman chay yachachikuyta aparqanku.

15. ¿Imatan Sue hermananchismanta yachasunman?

 ¹⁵ Familianchiskuna jark’akuqtin. Wakinpaqqa familianku jark’akusqanraykun sasa kanman Jesuspa wañupusqanta yuyarinapaq juñunakuyta uyariy. Chhayna sasachakuypin 2021 watapi Sue hermananchis tarikurqan. Payqa chay kutipaqqa Bibliatan estudiasharqan, familiansi paypaqqa mana munarqanchu Jesuspa wañupusqanta yuyarinanta. Jinas payqa juj p’unchay chayta yachachiqninman willasqa, chaysi yachachiqnin hermanaqa Lucas 22:44 textota leepusqa. Jinas nisqa Jehová Diosmanta Jesús jina tukuy sonqomanta mañakunanpaq, chaysi qhepantin p’unchaypaq t’antanpas vinonpas listo kananpaq preparakusqa. Jinaspa jw.org paginanchispi qhawasqa sapa tutamanta Diosta adorananchispaq nisqa programata. Chaymantataq discursota uyarikunanpaq cuartonpi wisq’arukusqa, chaypis payqa celularninpi Jesuspa wañupusqanta yuyarinapaq discursota uyarisqa. Chay qhepamantaq juj mensajeta yachachiqninman apachisqa, chaypin nisqa: “Qayna tarde niwasqaykiqa maytan kallpachawarqan, chaymi tukuy atisqayta ruwarqani Jesuspa wañupusqanta yuyarinapaq juñunakuyta uyarinaypaq. Jehová Diospa yanapayninwanqa atikurqanmi, chaymantan may agradecisqa kashani”, nispa. Chhayna sasachakuypi noqanchispas tarikushanchis chayqa Jehová Diosmi yanapawasun.

16. ¿Imatan Jehová Dios ruwanqa wawanpa wañupusqanta yuyarinanchispaq kallpachakusqanchismanta? (Romanos 8:31, 32).

¹⁶ Jehová Diosqa anchatan kusikun wawanpa wañupusqanta yuyarinanchispaq juñunakuyman riqtinchisqa, chaymi payqa kallpachakusqanchismanta bendeciwasun. Chayman rispaqa wawanta noqanchisrayku qosqanmantan “gracias” nishanchis (leey Romanos 8:31, 32). Chaymi kay watapas imaña kaqtinpas manapuni faltakunanchischu Jesuspa wañupusqanta yuyarinanchispaq juñunakuymanqa. Kallpachakushallasun juj runakunatapas chay juñunakuyman invitamunanchispaq.