1. 3 Juan 3, 4 nisqan jina, ¿imamantan anchata kusikunchis?

APÓSTOL JUANQA wawankunata jinan ñaupa tiempopi cristianokunata qhawariran, chaymi anchata kusikuran junt’aq sonqo kasqankumanta. Chay tiempopi cristianokunaqa imaymana sasachakuykunapin tarikusharanku, chaymi Juanqa kallpachakuran iñiyninkupi paykunata yanapananpaq. Qanpas kusisqachá kashanki, wawaykikuna Jehová Diospa llaqtanpi kasqankumantaqa, Bibliamanta yachachisqayki runakunapas Jehová Diosta servisqankumantapas (leey 3 Juan 3, 4).

2. ¿Imaraykun apóstol Juan kinsa cartakunata cristianokunaman qelqaran?

² Apóstol Juanqa Patmos islapin preso kasharan, yaqapaschá chaymanta lloqsispaqa Éfeso llaqtaman riran. Éfeso llaqtapi kashaspan Juanqa, Jehová Diospa santo espirituq yanapayninwan kinsa cartakunata qelqaran 98 watapi. Chay cartakunapin cristianokunata kallpacharan junt’aq sonqo kanankupaq, cheqaq kaqpi purishanallankupaq ima.

3. ¿Imakunamantan kay yachachikuypi yachasunchis?

³ Juanqa sapallanñan kausasharan apóstol jina. Arí, chay tiempopaqqa yaqa llapa apostolkunañan wañupusqaku. Chaymi chay tiempopiqa llulla yachachiqkuna rijuriranku cristianokunata pantachiyta munaspa (1 Juan 2:18, 19, 26). * Chay llulla yachachiqkunaqa “Diostan reqsiyku” nispan niranku, ichaqa manan Diosta kasukurankuchu. Kaypin yachasunchis: Imaynatas cheqaq kaqpi purisunman chayta, imakunamantas cuidakushanallanchis cheqaq kaqpi purinanchispaq chaytapas. Yachallasuntaqmi imaynatas noqanchispura yanapanakusunman cheqaq kaqpi purishanallanchispaq chaytapas.

4. 1 Juan 2:3-6 chaymantapas 2 Juan 4, 6 nisqan jina, ¿imatan ruwananchis cheqaq kaqpi purinanchispaq?

⁴ Cheqaq kaqpi puriyqa Jehová Diospa kamachikuyninkunata kasukuymi. Cheqaq kaqpi purinanchispaqqa, Bibliatan allinta estudiananchis (leey 1 Juan 2:3-6; 2 Juan 4, 6). Chaytan Jesuspas ruwaran, payqa Diospaq simintan allinta estudiaran, tukuy tiempotaqmi kasukuranpas. Chaymi payta qatikunanchis (Juan 8:29; 1 Ped. 2:21).

5. ¿Imakunatan Jehová Diospa testigonkuna allinta yachanchis?

⁵ Jehová Diosta serviqkunaqa allintan yachanchis Jehová Diosqa mana jayk’aqpas llullakusqanta, Bibliaq nisqanpas cheqaqpuni kasqanta. Yachallanchistaqmi Jesuspas rey jina janaq pachapi kamachikamushasqanta, pisi tiempollamanta taytanpa munayninta junt’anantapas. Kay tiempopi runakunan ichaqa mana Jesuspipas, Bibliaq nisqanpipas iñinkuchu. Chaymi llulla yachachikuykunawan engañayta munawashanchis. Chaymantan apóstol Juan niran: ‘Askha engañaqkunan kay pachantinpi rijurimunqaku’, nispa (2 Juan 7-11). Nillarantaqmi: “¿Pitaq llullari? ¿Manachu Jesusqa Cristo kasqanta negaq?”, nispa (1 Juan 2:22). Juanpa nisqan jina, chay runakunaqa pantasqata yachachisqankuwanmi Jesusta negashanku. Chaymi Testigonkunaqa Jehová Diosta Jesustawan allinta reqsinanchis. Chaykunata ruwasunchis chayqa manan jayk’aqpas llulla yachachikuykunawanqa engañachikusunchu (Juan 17:3).

6. ¿Ima sasachakuykunapin wayna-sipas iñiqmasinchiskuna tarikunku?

⁶ Jehová Diospa testigonkunaqa, allintan cuidakunanchis ama runakunaq yachachisqanwan engañachikunanchispaq (1 Juan 2:26). Astawanqa wayna-sipaskunan cuidakunanku. Yachasun iñiqmasinchis Aliciamanta, * payqa 25 watanpin kashan, paymi nin: “Escuelapi kashaqtiymi yachachiwaranku: ‘Runakunaqa k’usillumantan paqarimunchis’, nispa. Chaykunamanta yachasqayqa gustawaranmi, ichaqa Jehová Diosmantan iskayayta qallarirani. Gustawaranña escuelaypi yachasqay chaypas, kallpachakuranin Bibliaq yachachisqanta estudianaypaq”, nispa. Alicia iñiqmasinchisqa, estudiasqas “La vida... ¿cómo se presentó aquí? ¿Por evolución, o por creación?” nisqa librota. Chaysi yanapasqa manaña Jehová Diosmanta iskayananpaq. Chaymi nillantaq: “Chay qelqakunata estudiasqay  qhepamanqa manañan iskayaranichu, jinaspapas repararanin Jehová Diosta kasukuspalla kusisqa kanayta”, nispa.

7. ¿Ima nispan kay tiempopi runakuna ninku? ¿Imaraykun chaymanta cuidakunanchis?

⁷ Kay tiempopi runakunan ninku: “Diosta servishaspapas atiwaqmi pakallapi ima ruwaytapas, munasqaykiman jina kausaytapas”, nispa. Noqanchispaqmi ichaqa mana chhaynachu. Juanpa nisqan jina, Jehová Diosta servishaspa mana allin ruwaykunapi purishasunman chayqa, manan “cheqaq kaqman jinachu kausashasunman” (1 Juan 1:6). Jehová Diospa testigonkunaqa manan juchanchistaqa pakananchischu. Biblian nin: “Diospa ñawinpaqqa manan ima kamasqapas pakasqachu kashan, aswanpas llapanmi [...] ñawinpaqqa alayrillapi kashan, sut’i rikuyllataqmi kashanpas”, nispa (Heb. 4:13).

8. ¿Imakunamantan Jehová Diospa testigonkuna cuidakunallanchistaq?

⁸ Jehová Diospa testigonkunaqa manan kay pacha runakuna jinachu juchapi puriytaqa qhawarinanchis. Kay pachapi runakunaqa manan juchapaqchu qhawarinku Bibliaq juchachasqan ruwaykunataqa. Chaymantan apóstol Juan niran: “‘Mana juchayoqmi kayku’ nisunmanchus chayqa, noqanchis kikillanchistaqmi engañakushasunman”, nispa (1 Juan 1:8). Juanpa tiempopin khaynata niqku: “Juchapiña purishaspapas atisunmanmi Jehová Dioswan amigontin kaytaqa”, nispa. Kay tiempopi runakunapas chhaynatan piensanku. Iñinkuña Diospi chaypas manan kamachikuyninkunataqa kasukunkuchu. Chaymi mana casarakuspa warmi qhari puñuytapas manan juchapaqchu qhawarinku.

9. Wayna-sipas, ¿imaraykun kallpachakunayki Bibliaq nisqanta kasukunaykipaq?

⁹ Wayna-sipas iñiqmasinchiskunan astawanqa mat’ipayasqa tarikunku qhelli juchapi purinankupaq. Wakinninkutaqa, llank’anankupi escuelankupi iman mat’ipayanku.  Chaymi pasaran Alejandro iñiqmasinchiswan, paymi nin: “Compañeraykunan nishuta mat’ipayawaqku paykunawan puñunaypaq, mana munaqtiytaq niwaqku: ‘Qanmanqa qharikunachá gustasunki, chaychá mana noqaykuwanqa puñuyta munankichu’”, nispa. Qanpas chhaynapi tarikushanki chayqa kallpachakushallay Bibliaq nisqanta kasukunaykipaq. Bibliaq nisqanta kasukuymi yanapasunki qhepaman ama ñak’ariykunapi tarikunaykipaq, Jehová Dioswanpas allin amigontin kanaykipaq. Wayna-sipaskuna, sichus Jehová Dios jina juchapi puriyta qhawarinkichis chayqa, kay pachapi Satanaspa trampankunatan atipankichis (1 Juan 2:14).

10. 1 Juan 1:9 nisqan jina, ¿imatan ruwananchis ima juchamanpas urmaspa?

¹⁰ Kallpachakushanchisña Jehová Diospa munayninman jina kausananchispaq chaypas, pantasunpunin imallapipas. Ichaqa, ¿imatan ruwananchis ima juchamanpas urmaspa? Jehová Diosmanmi juchanchista willakunanchis (leey 1 Juan 1:9). Chaymantapas, umalliqkunaq yanapaynintan maskhananchis, Jehová Diosmi paykunataqa churan yanapawananchispaq cuidawananchispaq ima (Sant. 5:14-16). Ichaqa sichus juchaykimanta pesapakurankiña, perdonasqañataq karankipas chayqa, manañan pesapakushanaykichu. Jehová Diosqa ñan perdonasunkiña, qonqapunñataqmi juchaykitapas. Arí, Jehová Diosqa Jesuspa wañusqanraykun juchaykitaqa perdonapusunkiña (1 Juan 2:1, 2, 12; 3:19, 20).

11. ¿Imaraykun apóstata runakunamanta cuidakunanchis?

¹¹ Jehová Diospa testigonkunaqa cuidakunallanchistaqmi apóstata runakunamantapas. Apóstata runakunaqa, Diospa llaqtanmanta lloqsipuqkunan kanku. Paykunaqa sinchitan Diospa llaqtanta cheqnikunku, chaymi Jehová Dios contra, llaqtan contra ima rimanku. Satanasqa apóstata runakunawanmi iñiyninchispi urmachiyta  munawashanchis, chaymi allinta cuidakunanchis. * Apóstata runakunaqa, internetpin llulla willakuykunata Jehová Diospa llaqtanmanta churanku, chaymi chaykunataqa mana qhawashananchischu. Paykunaqa munankun Jehová Diosmanta llaqtanmantapas iskayananchista (1 Juan 4:1, 6; Apo. 12:9).

12. ¿Imakunatan ruwananchis llulla yachachikuykunawan ama engañachikunanchispaq?

¹² Satanaspa llulla yachachikuyninkunawan ama engañachikunanchispaqqa: Reyninchis Jesuspin iñinanchis, confiananchistaqmi allin yuyayniyoq junt’aq kamachipipas. Jehová Diosmi paykunataqa churan, llaqtanpi pusariwananchispaq (Mat. 24:45-47). Chaymantapas sapa p’unchaymi Bibliata estudiananchis. Chaykunata ruwasunchis chayqa manan imawanpas engañachikusunchu, allin saphichasqa sach’a jinataqmi kasunchispas. Apóstol Pablon Colosas llaqtapi cristianokunaman khaynata qelqaran: “Imaynan Señor Cristo Jesusta chaskirankichis, chhaynallatapuni payman jujllachasqa purishaychis. Imaynan yachachisqa karankichis chayman jina Jesuspi allin saphichasqa allin perqasqa ima kaychis, iñiyniykichispipas qaqata sayaychis”, nispa (Col. 2:6, 7). Allin iñiyniyoq kasunchis chayqa, manan Satanasqa jayk’aqpas engañawasunchu (2 Juan 8, 9).

13. ¿Imatan Jehová Diospa testigonkuna allinta yachanchis?

¹³ Jehová Diospa testigonkunaqa yachanchismi Diosta servisqanchisrayku runakuna cheqnikuwananchista (1 Juan 3:13). Yachallanchistaqmi ‘kay pachapas Satanaspa makinpi kashasqanta’ (1 Juan 5:19). Arí, kay pachataqa Satanasmi kamachishan. Payqa sinchi phiñasqan kashan ‘tiempon pisillaña kasqanrayku’ (Apo. 12:12). Satanasqa imaymanatan ruwashan qhelli juchaman urmananchispaq, apóstata runakunawan engañachikunanchispaq ima. Chaymantapas payqa manan munanchu runakunaman Diosmanta willamunanchista, chaymi Diospa llaqtanta qatiykachashan. Wakin iñiqmasinchiskuna qatiykachasqaña, carcelpi wisq’asqaña kashanku chaypas, junt’aq sonqollapunin Jehová Diospaq kashanku.

14. ¿Imaynatan iñiqmasinchiskunata yanapasunman cheqaq kaqpi purishanallankupaq?

¹⁴ Jehová Diospa llaqtanpiqa llapanchismi iñiqmasinchiskunawan munanakunanchis khuyapayanakunanchis ima. Khuyapayakuq kasunchis chayqa, iñiqmasinchiskunatan yanapasunchis cheqaq kaqpi purishanallankupaq (1 Juan 3:10, 11, 16-18). ¿Imaynatan iñiqmasinchiskunawan munakuq khuyapayakuq kasqanchista rikuchisunman? Manan simillawanchu, aswanpas ruwayninchiswanmi. Wakin iñiqmasinchiskunaqa imaymana llakipin tarikushanku onqosqa kasqankurayku otaq mayqen familiankupas wañupusqanrayku. Wakinqa mana wasiyoqpaschá kashanku, unu lloqllapas terremotokunapas pasasqanrayku. Chaymi kallpachakunanchis iñiqmasinchiskunata tukuy sonqowan yanapananchispaq.

15. 1 Juan 4:7 nisqan jina, ¿imaynatan munakuq kasqanchista rikuchisunman?

¹⁵ Jehová Diosqa munakuqmi. Chaymi noqanchispas pay jina munakuq kananchis (leey 1 Juan 4:7, 8). ¿Imaynatan munakuq kasqanchista rikuchisunman? Jujkunata perdonaspa (Col. 3:13). Yachasun iñiqmasinchis  Aldomanta. Payqa sinchitas phiñakusqa llaqtanmanta juj hermano mana allinta rimaqtin. Paymi nin: “Jehová Diostan tukuy sonqoywan mañakurani chay hermanota perdonanaypaq”, nispa. Aldo iñiqmasinchisqa manas Diosllamantachu mañakusqa, aswanpas hermanotas nisqa Diosmanta willaq kuska lloqsinankupaq. Chaymi nillantaq: “Diosmanta willaq lloqsispan hermanoman willarani llaqtaymanta mana allinta rimasqanwan imayna sientekusqayta, chaymi payqa niwaran: ‘Perdonaykuway wayqechay’, nispa. Chay p’unchayqa sumaqtan sasachakuyniykuta allicharayku”, nispa.

16, 17. ¿Imakunata ruwananchispaqmi kallpachakushanallanchis?

¹⁶ Apóstol Juanqa anchatan munakuran ñaupa tiempopi iñiqmasikunata, chaymi kinsa cartakunata qelqaran paykunata yanapananpaq. Kay tiempopipas ajllasqa cristianokunaqa apóstol Juan jinan anchata munakuwanchis, chaymi iñiyninchispi yanapawashanchis. Chayqa ancha kusikunapaqmi (1 Juan 2:27).

¹⁷ Wayqe-panaykuna kallpachakushallaychis cheqaq kaqpi purinaykichispaq, Jehová Diosta kasukunaykichispaq, sapa p’unchay Bibliata leenaykichispaq, Bibliaq nisqanpi confianaykichispaq ima, iñishallaychispuni Diospa wawan Jesuspipas. Wayqe-panaykuna amapuni engañachikuychischu Jehová Diospa contranpi rimaq runakunawanqa. Amapuni Jehová Diosta servishaspapas qhelli juchakunapiqa puriychischu. Jehová Dios jina juchata qhawariychis, ama kay pachapi runakuna jinachu. Yanapashallaychispuni sasachakuykunapi tarikuq iñiqmasinchiskunatapas. Jujkuna-jujkunawanpas perdonanakushallaychispuni.