1954 watapin nacerani Estados Unidos nacionpa Saint Paul llaqtapi, familiayqa catolicon karan. Noqaykuqa pisqan hermanokunan karayku, noqataq iskay kaq karani. Wawa kaspayqa católica escuelapin estudiarani, chaypiqa sacerdoteq yanapaqninmi karani, ichaqa pisitan Bibliamanta yachaq kani. Iñiraniña Diospi chaypas, manan religionkunapiqa iñiraniñachu.

Qallariy watapi abogado kanaypaq estudiashaqtiymi iskay Testigokuna visitamuwaranku. Chay p’unchayqa p’achaytan t’aqsakusharani, chaymi kutimuwanankupaq niwaranku. Chaypin paykunata tapurani: “¿Imaraykun sumaq sonqoyoq runakuna sufrinku, millay runakunataq mana?” “¿Imaynatan kusisqa kausasunman?”, nispa. “La verdad que lleva a vida eterna” nisqa librotan, chaymantapas, q’omer tapayoq Mosoq Pachaq Bibliatawanmi saqewaranku. Chaypin paykunawan Bibliata estudiayta qallarirani. Chayraqmi yacharani Diospa gobiernonmanta, imaynata runakunata yanapanantapas.  Chaymantapas repararanin kay pachapi gobiernokunaqa mana runakunata yanapay atisqankuta, chayraqmi yacharani imarayku sasachakuykuna, ñak’ariy, mana chanin ruwaykunapas kasqanta.

1982 wata qallariypin bautizakurani kinsa p’unchay asambleapi “Verdad del Reino” nisqa, St. Paul Civic Center estadiopi. Chay semana pasayllatan kutirani abogado kanaypaq examen qoq. Octubre killapitaq yacharani abogadopaq examenta qosqay allinpuni kasqanta.

Chay asambleapin reqsirani, Mike Richardson iñiqmasita, paymi Brooklyn llaqta Betel wasipi yanapakusharan, willawaranmi oficina centralpi juiciokuna aparikusqanpi yanapakunapaq oficina kichakusqanta. Chaypin yuyarirani Hechos 8:36 nisqanta, jinaspan tapukurani: “¿Atiymanchu oficina centralpi juiciokuna aparikusqanpi yanapakuyta?”, nispa. Jinaspan junt’arani Betelman jaykunaypaq solicitudta.

Manan tayta-mamayqa Testigo kanayta munaqchu. Taytaymi tapuwaran: ¿Ima allintaq “Watchtower” nisqapaq llank’asqaykiri? ¿Yanapasunkichu abogado kasqaykipi?, nispa. Willaranin pisi qolqellapaq yanapakusqayta, chay tiempopaqqa betelitakunamanqa 75 dolarestan qoqku gastonkuwan yanapachikunankupaq.

Juj tribunalnapi llank’anaykunata tukuspan 1984 watapi Brooklyn llaqta Betelman ripurani. Chaypin juiciokuna aparikusqanpi yanapakunaypaq churawaranku. Ñaupa tiempopi juj tribunalpi llank’asqaymi yanapawaran Betelpi allinta yanapakunaypaq.

1983 noviembre killapin, Jehová Diospa testigonkunaqa rantisqaku Stanley teatrota, Jersey City llaqtapi. Iñiqmasikunan permisota mañakuranku chay teatrota, jinallataq ununtapas luznintapas allichanankupaq. Jinan juñukuranku chay llaqtapi autoridadkunawan, willarankun chay teatrotaqa asambleakunapi juñunakuyninkupaq munasqankuta. Ichaqa chay llaqtapi kamachikuykuna nisqanman jinaqa, religionpi juñunakuykunaqa manas chay teatropiqa aparakinanchu kasqa, negocio ruwana ukhupi kasqanrayku, chaymi mana munarankuchu allichanankuta. Jinan iñiqmasikunaqa jujmanta permisota mañakuranku chay teatro allichakunanpaq, chaywanpas manan munarankupunichu.

Semanallaraq Betelpi kashaqtiymi, iñiqmasinchiskunaqa juj tribunalpiñataq  permisota mañakuranku. Iskay watataq Saint Paul tribunalpi llank’arani chayqa, allintan yacharani chhayna juiciokuna aparikusqanta. Chaypin jujnin abogadoykuqa niran: “Stanley teatropiqa imaymana juñukuykunamá aparikuran, videokuna qhawarikunanpaq, rock takiqkuna jamunanpaq ima. Chhaynari, ¿imanaqtintaq manari apakunmanchu juj religionpaq juñunakuyninpas?”, nispa. Chayta reparaspan tribunalqa rikuchiran Jersey City llaqta autoridadkuna mana allinta ruwashasqankuta, jinaspan kamachiran chay llaqtapi autoridadkunata chay teatro allichakunanpaq permisota qonankupaq. Chaypin rikurani Jehová Dios llaqtanta yanapasqanta. Noqapas kusikuranin chaypi yanapakusqaymanta.

Iñiqmansinchiskunaqa sumaqtan allicharanku chay teatrota, yaqa juj wata ukhullapin tukukuran. 8 setiembre 1985 watapin Galaad escuela 79 kaq clase aparikuran, chhaynapin chay teatrotoqa Jersey City llaqtapi asambleakuna ruwakunanpaq kapuran. Kusikunin chay juiciopi yanapakusqaymanta, manan chay jina llank’aytaqa tariranichu manaraq Betelman jamushaspayqa. Manan yacharanichu chay sumaq llank’ayta Jehová Dios qowanantaqa.

1980 watakunapaqqa, manan hospitalkunapas doctorkunapas munarankuchu mana yawarllawan Testigokunata jampiytaqa. Wawata onqukuq warmikunapaqpas aswan sasan karan, chay tiempopi juezkunapas manan respetaqkuchu Testigokuna mana yawarllawan jampichikuy munasqankuta.

29 diciembre 1988 watapin, Denise Nicoleau hermananchistaqa nishutan yawar puririran wawanta onqokusqan qhepata. Chaymi doctorqa yawarta churayta munaran. Paymi ichaqa mana munaranchu. Qhepantin p’unchaymi doctorkunaqa juezmanta permisota mañakuranku yawarta churanankupaq. Chaymi mana ima juiciota aparispa nitaq Nicoleau hermanata ni qosantapas tapurispa juezqa permisota qosqa hermanaman yawarta churanankupaq.

Viernes 30 diciembre killapin, hermananchismanqa hospitalpi yawarta churasqaku, qosanpas familianpas manaña munarankuchu chaypas. Chaymantapas chay p’unchaymi, familiankunata wakin yanapakuq iñiq t’aqapi umalliqkunatapas carcemal apapusqaku. Paykunatan tumpasqaku hospitalpi doctorkunata ama yawar churanankupaq jark’akusqankumanta. Sábado p’unchaytataq, tutamanta llapan noticiakunapi Nueva York llaqtapi yacharanku hermananchispa  familiankunata umalliqkunatapas carcelman apasqankuta.

Chaymi jatun tribunalman rirayku, lunes tutamantataq rirani juezwan parlanaypaq, sutinmi karan Milton Mollen. Willaranin tukuypas imayna kasqanta, mana juiciota ruwaspa juj kaq juezpas yawarta churanankupaq permiso qosqanmantapas. Mollen sutiyoq juezmi niwaran tardenta oficinanta rispa, astawan willanaypaq, ima leykunachus karan chaymantawan. Noqawanmi riran watukuq umalli Philip Brumley iñiqmasi. Juezqa wajallarantaqmi hospitalpa abogadontapas. Chaykunamanta rimaspan yaqa ch’aqwarayku. Chaychá Brumley iñiqmasiqa cuadernonpi qelqaspa niwaran: “Ama nishu kunkawan rimaychu”, nispa. Chay niwasqanqa allinmi karan, juj kaq abogado mana allinta rimasqanta uyarispan, nishu kunkayoqta rimashasqani.

Yaqapas juj hora jinan rimarayku, jinan juez Mollenqa niwaranku qhepantin p’unchayta tukuy chaykunata qhawarinanpaq. Oficinanmanta lloqsishaqtiykun, abogadoqa hospital abogadomanta niran: “Sasan paypaqqa kanqa”, nispa. Chay nisqanpin repararani Jehová Dios chay juiciopi atipanaykupaq yanapawashasqankuta. Anchatan kusikuranin chaymanta.

Tutakaman alistarayku juiciopaq imachus rimanayku karan chayta. Chay tribunalqa qayllallapin kasharan Brooklyn llaqtapi Betelmanta, chaymi juiciopi llank’aqmasiykunawan oficinamanta chakillapi rirayku. Juiciopi nisqaykuta uyarispan, tawantin juezkunaqa mana valechipurankuchu yawarta churanankupaq juezpa kamachisqanta, chaywanmi Nicoleau hermananchisqa juiciota atiparan. Chaymantapas tribunalqa sut’itan reparachiran, yawar churanankupaq juezpa kamachisqanqa mana allin kasqanta, chay juezqa hermanchista mana uyarispan yawar churanankupaq firmaran.

Chaymantapas Nueva York llaqtamanta jatun tribunalmi rikuchiran Nicoleau hermananchisqa mana yawarllawan jampichikuy munasqanta respetanankupaq. Chayraqmi yawarmanta chhayna juiciopiqa atiparayku, chaymantapas kinsa juiciokunatawanmi atiparayku Estados Unidos nacionpiqa, chay juiciokunapi yanapakusqaymantan ancha kusisqa kashani (qhaway “ Diospa llaqtan  atipasqan juiciokuna”, nisqata). Jinaspapas yanapakuranin Betelpi juj abogadokunawan, wawakunamanta, t’aqanakuymanta, allpakunamanta juiciokunapipas.

Dawn hermanatan reqsirani, payqa sapallanmi tiyasqa kinsa wawakunantin, tukuy tiemponwantaqmi Diosmanta willaq. Paypaqqa sasan wawakunayoq kayqa kasqa, chaywanpas tukuy sonqowanmi Jehová Diosta servishallasqa, chaymi noqamanqa anchata gustawaran. 1992 watapin rirayku kinsa p’unchay “Portadores de Luz”, nisqa asambleaman Nueva York llaqtapi. Chaypin payta nirani astawan reqsinaypaq, juj wata qhepamantaqmi casarakurayku, casarakusqay qhepamanqa yanapakushallaranin Betelpiqa. Anchatan kusikuni Diosta tukuy sonqowan munakuq esposayoq kaspa. Proverbios 31:12 nisqan jina, Dawn esposayqa tukuy kausasqayku p’unchaykunapin allintapuni imatapas ruwaran.

Casarakushaqtiykun, wawankunaqa 11, 13, 16 watayoq ima kasharanku. Allin taytan paykunapaq kayta munarani, chaymi qelqanchiskunapi leerani imaynata paykunapaq allin tayta kayman chaymanta. Karanña sasachakuykuna chaypas kusikunin esposaypa wawankuna munakuq taytanta jina qhawariwasqankumanta. Paykunaqa wawaykuna jinan kapuranku, amigonkupas jamullaqmi wasita, allinmi karan wasipi paykunawan kusirikuyqa.

2013 watapin Dawn esposaywan ripurayku Wisconsin llaqtaman tayta mamaykuta cuidanaykupaq. Chaywanpas Betelpiqa yanapakushallaranin, chaymi kusichiwaran. Niwarankun wasiymantapacha Diospa llaqtanpi juiciokuna aparikusqanpi yanapakushanallaypaq.

2018 wata setiembre killapin repararani manaraq rimashaspa nishuta ujusqayta. Doctorqa manan yacharanchu imarayku ujusqayta. Chaymi 2019 wata enero killapi juj doctor niwaran nervioykunamanta onqoyniyoq kasqayta.

Kinsa p’unchay qhepamanmi, chhullunku patapi pujllashaspa paña makiyta p’akikurani. Noqaqa sapa kutillanmi pujllaq kani, ichaqa pujllashaspan reparakurani onqoyniyrayku cuerpoy pisi-pisimanta manaña kuyupushasqanta. Astawanmi onqoykapurani chaymi rimayta, kuyuykachayta, mijuytapas mana atipuranichu.

Chhaynapiña kashaspapas anchatan kusikuni abogado kaspa Diospa llaqtanpi yanapakusqaymanta. Chaymantapas qelqaranin juj yanapaykunata abogadokunapaq, juezkunapaq, doctorkunapaqpas, juj nacionkunapipas yachachiranin profecionalkunapaq yanapaykunata. Chaykuna ruwasqaymi yanapawaran Jehová Diospaq siervonkunata, mana yawarllawan jampichikunankupaq yanapanaypaq. Chaywanpas Lucas 17:10 nisqan jina, mana valeqpaq kamachillan kani, imachus ruwanay karan chayllatan ruwarani.