1. ¿Imaynatan Jehová Dios llaqtanman pusamuwaranchis?

¿IMAYNATAN Jehová Diosta reqsiranki? Yaqapaschá tayta-mamayki Jehová Diosmanta rimapayarasunki. Otaq llank’anaykipipas escuelaykipipas juj testigo Diosmanta willarasunki. Otaq juj testigo wasiykiman jamuran, jinaspa Diosmanta jamuq ‘allin willakuykunata willarasunki’ (Mar. 13:10). Imaynataña Jehová Diosta reqsiranchis chaypas juj hermanon Bibliamanta allinta yachachiwaranchis, paymi yanapawaranchis Jehová Diosta munakunanchispaq. Jehová Diosmi llaqtanman pusamuwaranchis, chaymi kunanqa Jesuspa discipulonkuna kapunchis, chaymantapas juj sumaq kausaytan suyakushanchis (Juan 6:44). Maytan Jehová Diosta agradecekunchis juj hermanota wasinchisman kachamusqanmanta, Diosmantapas mana pisipaspa yachachiwasqanchismanta.

2. ¿Imakunamantan kay yachachikuypi yachasunchis?

² Noqanchisqa kusisqan kashanchis Diospa llaqtanpi kasqanchismanta, ichaqa kallpachakunanchismi juj runakunamanpas Jehová Diosmanta yachachimunanchispaq. Chhaynapin paykunapas noqanchiswan kuska wiñay kausayman apaq ñanninta purinqaku. Ichaqa yaqapaschá manchakushanchisraq runakunaman Diosmanta yachachiyta. Chhaynaqa, ¿imaraykun runakunaman Jehová Diosmanta yachachinanchis? ¿Iman yanapawasunman ama manchakuspa runakunaman yachachinanchispaq? Chaykunamantan kay yachachikuypi yachasunchis. Ichaqa ñaupaqtan yachasunchis imaraykun Jehová Diosmanta runakunaman willamunanchis yachachimunanchis chayta.

3. ¿Imaraykun runakunaman Diosmanta willamunchis?

³ Jesusmi kay pachapi kashaspa discipulonkunata kamachiran iskay llank’ayta aparinankupaq. Ñaupaqtaqa pachantinpin llapa runakunaman Diospa gobiernonmanta willamunanku karan (Mat. 10:7; Luc. 8:1). Ichaqa chay llank’ayta aparinankupaqmi discipulonkunaman yachachiran imaynatas runakunaman Diosmanta willananku karan chayta, imatas ruwananku karan mana uyarikuyta munaqtinku chaytapas (Luc. 9:2-5). Nirantaqmi: “Diospa gobiernonmanta allin willakuykunan pachantinpi willasqa kanqa”, nispa (Mat. 24:14; Hech. 1:8). Runakunaña mana uyarikuyta munaqtinkupas Jesuspa discipulonkunaqa kallpachakunankun karan Diospa gobiernonmanta runakunaman willashanallankupaq.

4. ¿Imata ruwananchispaqmi Jesús kamachiwaranchis Mateo 28:18-20 textopi?

⁴ Chaymantapas Jesusmi discipulonkunata kamachillarantaq runakunaman yachachimunankupaq. Chay kamachikuyqa manan discipulonkunallapaqchu karan, aswanpas noqanchispaqwanmi karan. Chayraykun Jesusqa niran: “Sapa p’unchaymi qankunawan kashasaq kay tiempoq tukukapunankama”, nispa (leey Mateo 28:18-20). Yaqapaschá Jesusqa chayta ninman karan kausarimpusqan qhepaman 500 iñiqmasikunaman rijurisqanpi (1 Cor. 15:6). Chaymantapas, apóstol Juanpa rijuriypi rikusqan jina Jesusqa munanmi llapa runakunaman Jehová Diosmanta yachachinanchista (Apo. 22:17).

5. 1 Corintios 3:6-9 nisqan jina, ¿imawanmi apóstol Pablo tupanachiran Diosmanta willasqanchistapas yachachisqanchistapas?

⁵ Apóstol Pablon Diosmanta willasqanchista tupanachiran chajra llank’aywan. Chajrata llank’aq runaqa manan tarpuyllachu tarpun, aswanpas imaymanatan ruwan chajran sumaqta wiñananpaq. Chaymi Corinto cristianokunata niran: “Noqan plantarani, Apolostaq qarparan, [...] qankunataq Diospa llank’ashasqan chajra kankichis”, nispa (leey 1 Corintios 3:6-9). Noqanchispas chajra llank’aq runakuna jinan kallpachakunanchis runakunaman Jehová Diosmanta willananchispaq yachachinanchispaq ima. Chaymantapas chajra qarpaq runa jinan estudiantekunata sapa kuti yanapananchis (Juan 4:35). Chhaynapin paykunaqa Jehová Diospa yanapayninwan iñiyninkupi wiñarinqaku.

6. ¿Imata ruwanankupaqmi estudiantenchiskunata yanapananchis?

⁶ Kallpachakunanchismi “wiñay kausayman apaq ñanninta” llapa puriy munaq runakunata maskhamunanchispaq (Hech. 13:48). Jesuspa discipulon kanankupaqtaq yanapananchis Bibliaq nisqanta allinta entiendenankupaq, iñinankupaq, kasukunankupaq ima (Juan 17:3; Col. 2:6, 7; 1 Tes. 2:13). Estudiantekunataqa llapallanchismi yanapasunman, chaymi juñunakuykunaman jamuqtinkupas sumaqta chaskinanchis (Juan 13:35). Yaqapaschá yachachisqanchis runakunataqa unay tiempo yachachinanchis kanqa, chhaynapi Diospa cheqnisqan costumbrekunatapas mana allin ruwaykunatapas saqepunankupaq (2 Cor. 10:4, 5). Estudiantekunata yanapayqa manan facilchu. Ichaqa sichus yanapasunchis Jehová Diosta munakunankupaq kasukunankupaq chayqa tiempowanqa paykunapas Jehová Diostan servinqaku.

7. ¿Imaraykun kallpachakullanchistaq Diosmanta willamunanchispaq yachachinanchispaqpas?

⁷ ¿Imaraykun kallpachakunchis runakunaman Diosmanta willananchispaqpas yachachinanchispaqpas? Jehová Diosta munakusqanchisraykun kallpachakunchis. Diosmanta willaspapas yachachispapas Jehová Diosta  munakusqanchistan rikuchinchis (1 Juan 5:3). Wasin-wasinta Diosmanta willayqa manachá facilchu karan, yaqapaschá punku takaytapas manchakuranchis. Chaywanpas Jesuspa kamachiwasqanchista kasukuspan runakunaman Diosmanta willamushanchis. Ichaqa yaqapaschá manchakushanchisraq pi runamanpas Diosmanta yachachiyta. Chhayna kaqtinqa Jehová Diospa yanapaynintan mañakunanchis, paymi yanapawasun pillamanpas estudiota qonanchispaq.

8. Marcos 6:34 nisqan jina, ¿imaraykun kallpachakunallanchistaq runakunaman Diosmanta yachachinanchispaq?

⁸ ¿Imaraykun kallpachakullanchistaq runakunaman Diosmanta yachachinanchispaq? Runakunata munakusqanchisraykun. Chaytan Jesuspas ruwaran. Juj kutinmi payqa ch’isiyaqta runakunaman Jehová Diosmanta yachachiran, chaymi sayk’usqa kasharan. Jinan samariyta munaspa discipulonkunapiwan juj ladoman riranku, ichaqa chayman chayaqtinmi askha runakuna payta suyashasqaku. Jinan Jesusqa paykunata khuyapayaspa imaymanata Diosmanta yachachiyta qallariran (leey Marcos 6:34). Jesusqa anchatapunin chay runakunata khuyapayaran, yacharantaqmi chay runakunaq sufrisqanta mana ima suyakuyniyoq kasqankutapas. Kay tiempopi runakunapas chhaynan kashanku. Imaymanayoqña kanku chaypas manan kusisqachu kanku, paykunaqa chinkasqa ovejakuna jinan kashanku. Apóstol Pabloq nisqan jinapas “mana ima suyakuyniyoq mana Diosniyoq iman” kashanku (Efes. 2:12). Chaymantapas ‘wañuyman apaq’ ñannintan purishanku (Mat. 7:13). Sichus chay runakunata munakusun khuyapayasun chayqa, kallpachakusunmi paykunaman Diosmanta willamunanchispaq yachachinanchispaq ima.

9. Filipenses 2:13 nisqan jina, ¿imaynatan Jehová Dios yanapawanchis paymanta yachachinanchispaq?

⁹ Wakinninchisqa yaqapaschá imaymana ruwanayoq kanchis, chaypaschá piensasunman tiemponchis mana aypawananchispaq. Chaypaschá mana pi runamanpas Jehová Diosmanta yachachishanchischu. Chhayna kaqtinqa Jehová Diospa yanapaynintan mañakunanchis, chhaynapi pillamanpas paymanta yachachinanchispaq (leey Filipenses 2:13). Jehová Diospa munayninman jinataq mañakushanchis chayqa payqa uyariwasunpunin (1 Juan 5:14, 15). Chhaynaqa Diospa yanapayninwanqa atisunpunin pillamanpas Jehová Diosmanta yachachiytaqa.

10, 11. ¿Imaraykun mayninpi Diosmanta yachachiyta mana atishasunmanchu?

¹⁰ Yachasqanchis jina ancha importanten runakunaman Diosmanta yachachiyqa. Ichaqa yaqapaschá manchakushasunmanraq pi runamanpas Diosmanta yachachiyta. ¿Imaraykun chaykuna pasawasunman? ¿Iman yanapawasunman ama manchakunanchispaq? Chaykunamantan kunan yachasunchis.

¹¹ Onqosqa otaq kuraqña kasqanchisrayku. Wakinninchisqa manapaschá atishanchischu runakunaman yachachiyta onqosqa tarikusqanchisrayku otaq nishu kuraqña kapusqanchisrayku. Chayraykupaschá mana atishasunmanchu runakunaman yachachiyta. Chaywanpas kallpachakusunmanmi telefononta internetninta runakunaman Diosmanta yachachinanchispaq. Chaytan llapanchispas ruwaranchis kay coronavirus onqoy kasqanwanpas. Wakin runakunaqa Diosmantan yachayta munashanku, ichaqa yaqapaschá Diosmanta willasqanchis horakunapiqa tiemponkuñataq mana kanmanchu. Chhayna kaqtinqa atisqanku ratopin yachachisunman. Yaqapaschá kanman tutachallamanta otaq tutapipas. Chaytan Jesuspas ruwaran, payqa tutallapin Nicodemota yachachiran (Juan 3:1, 2).

12. ¿Imaraykun manapuni manchakunanchischu runakunaman Jehová Diosmanta yachachiyta?

 ¹² Diosmanta yachachiyta mana atiqpaq qhawarikusqanchisrayku. Yaqapaschá wakinninchisqa nishasunman: “Noqaqa pisillatan Diosmanta yachani, manan atiymanchu Diosmanta yachachiytaqa”, nispa. Ichaqa atisunmanmi. Jehová Diosqa atinanchispaq jinapunin qhawariwanchis, paymi yanapawasun (2 Cor. 3:5). Chaymantapas Jesusmi kay llank’aytaqa aparishan. Chaymi kamachiwaranchis Diosmanta runakunaman yachachinanchispaq (Mat. 28:18). Jinaspapas manan sapallanchischu kay llank’aytaqa aparishanchis. Jesusta jinan Jehová Diosqa noqanchistapas yanapawasun runakunaman paymanta yachachinanchispaq (Juan 8:28; 12:49). Sichus manchakushanchis Diosmanta runakunaman yachachiyta chayqa, umalliqkunaq yanapayninta tukuy tiemponkuwan Diosta serviq hermanonchiskunaq yanapaynintan mañakunanchis. Chaymantapas paykunatan compañasunman yachachiq rishaqtinku, chayta ruwasunchis chayqa imaymanatan paykunamanta yachasunchis.

13. ¿Imakunamanmi yachakunanchis kanqa?

¹³ Jujniraymanta yachachiyta sasapaq qhawarisqanchisrayku. Yaqapaschá mana faciltachu yachakushanchis mosoq qelqakunawan yachachiyman. Kunanqa Disfrute de la vida nisqa mosoq librowanmi runakunaman yachachisunchis. Chay librowan yachachinanchispaqqa allintan preparakunanchis. Chay libropiqa pisillatan leesunchis. Astawanqa estudiantenchiskunawanmi masta rimasunchis, videokunatapas qhawachisunchis. Chaypaqqa JW Library^® programawanmi yanapachikunanchis kanqa. Chaymantapas yaqapaschá juj hermanokunaq yanapayninta mañakunanchis kanqa. Qallariypiqa sasapaschá kanqa. Yaqapaschá yachasqaña kasharanchis jujniraymanta yachachiyman. Ichaqa Jehová Diospa yanapayninwanqa hermanonchiskunaq yanapayninwanqa atillasunmi kay mosoq qelqakunawan runakunaman yachachiyta. Juj precursor hermanonchismi niran: “Kay mosoq librowan yachachiyqa aswan facilmi kanqa”, nispa.

14. a) ¿Imaraykun kallpachakushanallanchis runakunaña mana uyarikuyta munankuchu chaypas? b) ¿Imaynatan kallpachawanchis 1 Corintios 3:6, 7 textoq nisqan?

¹⁴ Diosmanta willasqanchista mana uyarikuyta munasqankurayku. Wakin runakunaqa manan Diosmanta willasqanchista uyarikuyta munankuchu. Chaymi noqanchis contra jatarinku. Ichaqa kay tiyasqanchis pachapiqa qonqaymi imapas cambian, chaymi runakunapas allinpi kashaspa qonqaylla mana allinpi tarikunkuman, jinaspa Diosta maskhayta qallarinkuman (Mat. 5:3). Qelqanchiskunata mana chaskikuyta munaq runakunapas tiempowanqa Bibliatan estudiayta qallariranku. Chayraykun kallpachakushanallanchis runakunaman Diosmanta willamunanchispaq (Mat. 9:38). Chaymantapas Jehová Diosmi chajrayoqqa, paymi munan chajrata qarpaq runa jina runakunaman yachachimunanchista, chayta ruwananchispaq kallpachakusunchis chayqa Jehová Diosmi yachachisqanchis runakunata yanapanqa iñiyninkupi wiñarinankupaq (1 Cor. 3:6, 7). Manaña pimanpas kunan rato Diosmanta yachachishanchischu chaypas Jehová Diosqa rikumushanmi kallpachakusqanchista. *

15. ¿Imaynan Jehová Dios sientekun yachachisqanchista runakuna uyarikuqtinku, yachasqankutapas jujkunaman willaqtinku?

¹⁵ Jehová Diosqa anchatan kusikun paymanta yachachisqanchista runakuna uyarikuqtinku, yachasqankutapas jujkunaman willaqtinku  (Prov. 23:15, 16). Kay p’unchaykunapi Diosmanta willananchispaq kallpachakusqanchista rikuspapas ancha kusisqachá kashan. Kay 2020 watapi coronavirus onqoyña pachantinpi mast’arikuran chaypas 7.705.765 runakunamanmi Diosmanta yachachikuran, chaymantapas 241.994 runakunan Jehová Diosman entregakuspa bautizakuranku. Kunanqa paykunawan kuskan Jehová Diosmanta runakunaman willashanchis yachachishanchis ima (Luc. 6:40). Sichus kallpachakusunchis Jehová Diosmanta runakunaman willananchispaq yachachinanchispaq chayqa, Jehová Diospa sonqontan kusichisunchis.

16. ¿Imata ruwananchispaqmi llapanchis kallpachakunanchis?

¹⁶ Pi runamanpas Diosmanta yachachiyqa manan facilchu, ichaqa Jehová Diospa yanapayninwanqa atillasunmi paymanta runakunaman yachachiytaqa. Chaywanpas kallpachakunanchismi juj runallamanpas Diosmanta yachachinanchispaq. Chaypaqqa llapa runamanmi Diosmanta rimapayananchis, astawan yachayta munaqtinkutaq estudiota qonanchis. Chaykunata ruwananchispaq kallpachakusunchis chayqa Diosmi sumaq bendicionkunata qowasunchis.

17. ¿Imaynan sientekusunchis runakunaman Diosmanta yachachispa?

¹⁷ Jehová Diosmanta willaq riypas paymanta yachachiypas sumaq llank’aymi, anchatapunin kusichiwanchis. Apóstol Pablopas Tesalónica runakunatan yanaparan Jesuspa discipulonkuna kanankupaq. Chaymi niran: “¿Pikunataq paypa ñaupanpi kanqaku suyakuyniyku, q’ochukuyniyku, ancha kusikunayku coronapas? ¿Manachu qankuna kankichis? Arí, qankunan kankichis q’ochukuyniykupas kusikuyniykupas”, nispa (1 Tes. 2:19, 20; Hech. 17:1-4). Kunanpas ancha kusisqan kashanchis Jesuspa discipulonkuna kanankupaq runakunata yanapaspa. Stéphanie hermananchismi nin: “Qosaypiwan kuskan askha runakunata yanaparayku Jehová Diosta reqsinankupaq bautizakunankupaq ima. Chaymi ancha kusisqa kashayku”, nispa.