1. ¿Imatan Jehová Dios ruwarqan Adanwan Evawan juchapakusqanku qhepaman? (Génesis 3:15).

 ADANWAN Evawan juchapakusqanku qhepamanmi Jehová Diosqa juj profeciata willachirqan miraynin juj suyakuyniyoq kananpaq. Chay profecian nin: “Qantawan warmitawanmi cheqninachisqaykichis, mirayniykitawanpas paypa miraynintawanpas, mirayninmi umaykipi t’ustusunki, qantaq talonninpi kaninki”, nispa (leey Génesis 3:15).

2. ¿Imaraykun Génesis 3:15 textopi willasqan profecía Bibliapi kaq juj librokunawan tupashan?

² Chay profeciaqa Génesis libropin qelqasqa kashan. Bibliapi kaq juj librokunawanpas tupashanmi, imaynan llant’ataqa waskhawan watanchis. Chay jinan Génesis 3:15 textopi willasqan profeciapas Bibliapi kaq llapa librokunawan tupan, jinaspa juj yachachikuyllamanta riman. ¿Ima yachachikuymantan rimashan? Chaypin willashan imaynata Jehová Dios juj salvaqta kachamuwananchismanta. Chayta ruwaspan chinkachinqa Satanasta payta qatikuqninkunatawan. * Chay willakuyqa may allinpunin Diosta serviqkunapaqqa.

3. ¿Imamantan kay yachachikuypi yachasunchis?

³ Kay yachachikuypin Génesis 3:15 textopi willaq profeciamanta tapuykunata kutichisunchis: ¿Pikunamantan Génesis 3:15 textopi willashan? ¿Imaynatan chay profecía junt’akushan? ¿Imaynatan chaymanta yachay kay tiempopi yanapawasunman?

4. ¿Pinmi “mach’aqway”, imaynapin chayta yachanchis?

⁴ Génesis 3:14, 15 textokunapin willashan juj “mach’aqwaymanta”, chay mach’aqwaypa “mirayninmanta”. Juj “warmimanta”, chay warmiq “mirayninmantawan”. Bibliaq yanapayninwanmi ichaqa sut’ita yachanchis pikunas kanku chayta. * Qallarisun mach’aqwaywan. Payqa manan mach’aqwaypunichu kanman karqan. ¿Imarayku? Sichus cheqaq mach’aqwaypuni kanman karqan chayqa manan entiendenmanchu karqan Edén huertapi imachus Jehová Diospa nisqantaqa. Chay mach’aqwayqa karqan juj mana allin angelmi. Chaytan sut’ita willashan Apocalipsis 12:9 textopi, chaypin nin: “Paymi chay ñaupa mach’aqwayqa, Saqra, Satanás”, nispa. Chhaynaqa, ¿pikunan kanku chay mach’aqwaypa mirayninkuna?

5. ¿Pikunan kanku mach’aqwaypa mirayninkuna?

⁵ Bibliapi miraymanta rimaspaqa, pikunachus taytanpa munasqanman jina imatapas ruwan chaymantan rimashan. Chhaynaqa mach’aqwaypa mirayninmanta kaqkunaqa Satanás jinan Jehová Dios contra llaqtan contra jatariq runakunan kanku. Paykunamantan kashallankutaq mana allin angelkunapas (Gén. 6:1, 2; Juan 8:44; 1 Juan 5:19; Jud. 6).

6. ¿Imaraykun manapuni Evachu kanman Génesis 3:15 textopi willasqan “warmi”?

⁶ Kunanqa yachasunchis Génesis 3:15 textopi willaq warmimanta. ¿Evamantachu chaypi rimashanman? Manan. Kaypi piensasun, chay profeciapin willashan chay warmiq miraynin mach’aqwaypa umanta ñut’unanmanta. Yachamusqanchis jina mach’aqwayqa juj mana allin  angelmi, paytan reqsikun Satanás nispa. Ichaqa, manan Evaq mirayninmanta juj juchasapa runaqa mach’aqwaypa umantaqa ñut’uyta atinmanchu.

7. ¿Imaynatan Apocalipsis 12:1, 2, 5, 10 textokuna allinta yanapawanchis pipunichus Génesis 3:15 textopi willasqan “warmi” kasqanta?

⁷ Bibliamanta último kaq libron willawanchis pipuni Génesis 3:15 textopi willasqan “warmi” kasqanta (leey Apocalipsis 12:1, 2, 5, 10). Chay warmiqa manan noqanchis jina aychayoq tulluyoqchu. Paypa chaki uranpin killa kashan, umanpitaq chunka iskayniyoq ch’askakunayoq corona kashan. Chaymantapas chay warmin juj qhari wawata onqokurqan, chaymi representan Diospa gobiernonta. Chay gobiernoqa janaq pachamantataq chayqa, chay warmipas janaq pachamantan kanallantaq. Chay warmiqa representan janaq pachapi Jehová Diospa familiantan (Gál. 4:26).

8. ¿Pinmi karqan warmiq mirayninmanta jamuq? ¿Jayk’aqmi chay pasarqan? (Génesis 22:15-18).

⁸ Chaymantapas Biblian yanapawasunchis pipunichus chay warmiq miraynin kasqanta yachananchispaq. Chay warmiq mirayninqa jamunan karqan Abrahanpa mirayninmantan (leey Génesis 22:15-18). Jehová Dios Abrahanwan rimanakusqanqa junt’akurqanmi. Chaymi Jesusqa Abrahanpa mirayninmanta jamurqan (Luc. 3:23, 34). Chay warmiq mirayninmanta jamuqqa manan noqanchis jina runachu kanan karqan. Aswanpas aswan atiyniyoqmi kanan karqan, chhaynapi Satanasta chinkachinanpaq. Chaymi Jesusqa 30 watanpi kashaspa Diospa santo espiritunwan jawisqa karqan. Chaywanmi sut’ita rikuchirqan warmiq mirayninmanta jamusqanta (Gál. 3:16). Jesuspa kausarimpusqan qhepamanmi Jehová Diosqa “qhapaq kaywan jatunchaywan ima coronawan jina churarqan”. Chaymantapas “tukuy atiytan qorqan janaq pachapipas kay pachapipas”, chhaynapi “Saqraq imachus ruwasqankunata ch’usaqman tukuchinanpaq” (Heb. 2:7; Mat. 28:18; 1 Juan 3:8).

9, 10. a) ¿Pikunan kallankutaq warmiq mirayninmanta? b) ¿Imamantan kunan yachasunchis?

⁹ Warmiq mirayninmantaqa kallantaqmi iskay kaq t’aqa. Chaymantan apóstol Pablo sut’ita willarqan judío ajllasqa cristianokunaman, waj nacionkunamanta kaqkunamanpas. Paymi nirqan: “Cristoqchus kankichis chayqa, Abrahanpa mirayninpunin kankichis, prometesqa herenciata chaskiqkunataqmi kankichispas”, nispa (Gál. 3:28, 29). Sichus Jehová Dios santo espiritunwan juj cristianota ajllan chayqa, chay warmiq mirayninmantan kapullankutaq. Chhaynaqa, warmiq mirayninmantan kanku wiraqochanchis Jesuspas 144.000 ajllasqa cristianokunapas. Paykunan janaq pachamanta kamachikamunqaku (Apo. 14:1). Chaymantapas paykunaqa Jehová Dios jina piensanankupaq, pay jina imatapas ruwanankupaqmi kallpachakunku.

¹⁰ Kaykaman yachamurqanchis pikunas kanku Génesis 3:15 textopi willasqan miraykuna chayta. Kunanqa yachasunchis imakunatan Jehová Dios ruwashan promesankunata junt’ananpaq chayta. Chaymantapas yachallasuntaqmi imaynatan kay tiempopi chay profecía yanapawasunman chaytapas.

11. ¿Imaynatan warmiq mirayninmanta kaqta talonninpi k’irirqanku?

¹¹ Génesis 3:15 textopin willashan imaynata warmiq mirayninmanta kaqta talonninpi k’irinankumanta. Chay nisqanmi junt’akurqan judiokuna romanokuna Jesusta wañuchisqankuwan, chayta ruwanankupaqmi Satanasqa paykunata tanqarqan (Luc. 23:13, 20-24). Imaynan talonninchista k’irikuqtinchisqa mana juj tiempo puriyta atinchischu. Chhaynallataqmi karqan Jesuspa wañupusqanwanpas. Payqa kinsa p’unchaymi wañusqa kasharqan (Mat. 16:21).

12. ¿Imaynatan mach’aqwaypa umanta ñut’unqaku?

 ¹² Chaymantapas Génesis 3:15 textoq junt’akunanpaqqa manan Jesusqa wañusqallachu kanan karqan, chay profeciaq nisqan jina warmiq mirayninmanta kaqmi mach’aqwaypa umanta ñut’unan karqan. Chayraykun warmiq mirayninmanta kaqqa otaq Jesusqa kinsa p’unchaymanta kausarimpurqan. Payqa mana wañuq espíritu jinan kausarimpurqan. Chhaynapi Jehová Diospa kamachisqanman jina Satanasta jujpaqkama atipananpaq (Heb. 2:14). Chaymantapas Jesuswan kuska kamachiqkunan yanapakunqaku kay pachapi Dios contra kaqkunata otaq mach’aqwaypa mirayninmanta kaqkunata chinkachipunankupaq (Apo. 17:14; 20:4, 10). *

13. ¿Imaynatan yanapawanchis chay profeciaq junt’akusqan?

¹³ Jehová Diospa serviqninkunataq kanchis chayqa, maytachá chay profeciamanta yachayqa yanapawashanchis. Jesusqa kay pachaman jamuspan sut’ita rikuchirqan Taytan Jehová Dios jina kasqanta (Juan 14:9). Jesusmi ejemplonwan yanapawarqanchis Jehová Diosta astawan reqsinanchispaq munakunanchispaq ima. Chaymantapas yanapawarqanchismi yachachikuyninkunawan imaynatas pay jina Jehová Diosta kusichisunman chayta. Wañupusqanwanpas llapanchistan yanapawarqanchis juchamanta ch’uyanchasqa kananchispaq (1 Juan 1:7).

14. ¿Imanaqtinmi Edén huertapi Jehová Diospa willasqan profecía mana usqhayllachu junt’akunan karqan?

¹⁴ Edén huertapi Jehová Diospa willasqanmi sut’ita reparachiwanchis chay profeciaqa mana usqhayllachu junt’akunan kasqanta. Askha watakunan pasanan karqan warmiq mirayninmanta kaq jamunanpaqqa, chhaynapin Satanaspas qatikuqninkunata juñunan karqan. Chhaynapi warmiq mirayninwan mach’aqwaypa mirayninwan cheqninasqa kanankupaq. ¿Imaynatan chaymanta yachay yanapawasunman? Kay Satanaspa kamachisqan pachapiqa askha runakunan Jehová Dios serviqkunata cheqnikunku. Chay pasananmantan Jesuspas qatikuqninkunaman willarqan (Mar. 13:13; Juan 17:14). Noqanchispas chay profeciaq wakin parte junt’akusqantaqa sut’itan reparanchis kay tiempokunapi. ¿Imaraykun chayta ninchis?

15. a) ¿Imaraykun kay pachapi runakuna cheqnikuwanchis? b) ¿Imaraykun Satanasta mana manchakunanchischu?

¹⁵ Jesusmi 1914 watamanta janaq pachapi rey jina kamachikuyta qallarirqan. Chaymantataq Satanasta janaq pachamanta qarqomurqan. Chayraykun Satanasqa kay pachapi imaymanata ruwashan, yachantaqmi pisi tiempollamanta chinkachisqa kanantapas (Apo. 12:9, 12). Chaymantapas Diospa llaqtanpaqmi sinchi phiñasqa kashan, jinaspa Jehová Dios serviqkunata qatiykachashan (Apo. 12:13, 17). Chayraykun Dios contra kaqkuna sinchitapuni cheqnikuwanchis. Ichaqa manan Satanastapas qatikuqninkunatapas manchakunanchischu. Aswanpas apóstol Pablo jinan kananchis. Paymi nirqan: “Noqanchiswantaq Dios kashan chayqa, ¿pitaq contranchispiri kanman?”, nispa (Rom. 8:31). Chhaynaqa, Jehová Diospin confiananchis paypa profeciakuna willasqanqa junt’akunqapunin, imaynan Génesis 3:15 textopi willasqanpas junt’akushan jinata.

16-18. ¿Imaynatan Curtis, Ursula Jessica iñiqmasinchiskunata yanaparqan Génesis 3:15 textota entiendey?

¹⁶ Génesis 3:15 textopi nisqanmi yanapawanchis ima sasachakuytapas atipananchispaq. Curtis sutiyoq hermanonchismanta yachasun, payqa misionero jinan Guam llaqtapi Jehová Diosta servishan. Paymi nin: “Mayninpiqa  imaymana sasachakuykunapi tarikuqtiymi mana facilchu karqan Jehová Diospi confiay. Ichaqa chay pasawaqtinmi Génesis 3:15 textopi piensaq kani, chaymi yanapawaq Jehová Diospi confiashanallaypaq”, nispa. Curtis hermanonchisqa maytan munashan Jehová Diospa p’unchaynin chayamunanta, tukuy llakikuykunapas tukupunanta.

¹⁷ Kunanqa Ursula hermananchismanta yachasun, payqa Baviera llaqtamantan. Paytaqa Génesis 3:15 textota allinta entiendeysi sut’ita reparachisqa Bibliaqa Diospa siminpuni kasqanta. Chaymantapas reparasqas Génesis 3:15 textoqa Bibliapi kaq wakin profeciakunawan tupasqanta. Paymi nin: “Jehová Diosqa manan jinallatachu qhawarpariwarqanchis. Payqa usqhayllan juj sumaq suyakuyta qowarqanchis. Chaypin reparani anchatapuni munakuwasqanchista”, nispa.

¹⁸ Jessica hermananchismantañataq yachasun, payqa Micronesia llaqtamantan. Paymi nin: “Noqaqa may kusisqapunin kashani cheqaq religionta tarisqaymanta. Chaypin sut’ita reparani Génesis 3:15 textoq nisqan junt’akusqanta. Chaymantapas chay textota entiendespan reparallanitaq Jehová Diosta servispalla kay tiempopipas, jamuq tiempopipas kusisqa kausananchismanta”, nispa.

19. ¿Imaynapin yachanchis Génesis 3:15 textopi profecía llapan junt’akunanta?

¹⁹ Yachamusqanchis jina Génesis 3:15 textoqa junt’akushanmi. Chaymantapas yachamurqanchismi pinmi karqan warmiq mirayninmanta chayta, pikunas mach’aqwaypa mirayninmanta kanku chaytapas. Señorninchis Jesusmi warmiq mirayninmanta karqan, chaymi kunanqa janaq pachapi Rey jina kamachikushan. Chaymantapas Jehová Diosqa Jesuswan kuska kamachimunankupaq ajllasqa cristianokunatan ajllayta tukushanña. Yachasqanchis jina Génesis 3:15 textopi profeciaqa ñan wakin parteqa junt’akushanña, ichaqa pisi tiempollamantan chay profeciaqa llapan junt’akunqa. Jinaspa mach’aqwaypa umanqa ñut’usqa kanqa, chay pasasqanqa may kusikunapaqchá kanqa Jehová Diosta llapa serviqkunapaqqa. Chay pasanankaman ichaqa mana pisipaspa Jehová Diosta servinanchis. Jehová Diosqa warmiq mirayninmanta kaqkunawanmi allpa pachapi llapa nacionkunata bendecinqa (Gén. 22:18).