1. ¿Imaynatan mañakuyta qhawarinanchis?

 JANAQ pachata kay pachatawan kamaq Jehová Diosmi juj sumaq regalota qowanchis. Chay regaloqa mañakuy atisqanchismi. Mañakuspaqa Jehová Dioswanmi rimanchis. Paymanqa imay ratupipas ima simipipas llapa piensasqanchistan willakusunman, chaypaqqa manan permisotaraqchu mañakunanchis. Hospitalpiña kasunman otaq carcelpiña wisq’asqa kasunman chaypas, Jehová Diosqa uyarinqapunin mañakusqanchistaqa. Chaymi mañakuytaqa Diospa sumaq regalonta jina qhawarinanchis, mana manchakuspataqmi mañakunanchispas.

2. ¿Imaynatan Diosmanta mañakuyta David qhawarirqan?

² Rey Davidqa ancha allinpaqmi Diosmanta mañakuyta qhawariq. Chaymi nirqan: “Mañakusqayqa ñaupaykipi allin preparasqa incienso jina kachun”, nispa (Sal. 141:1, 2, TNM). Davidpa tiemponpi runakunaqa ch’uya inciensowanmi Jehová Diosta yupaychaqku, chaymi sacerdotekunaqa chay inciensota cuidadowan preparaqku (Éx. 30:34, 35). Chhaynaqa, inciensomanta David rimaspaqa allinta piensaspa mañakuymantan rimasharqan. Noqanchispas David jinan manaraq Jehová Diosmanta mañakushaspaqa allinta piensananchis, chhaynapin mañakusqanchisqa Jehová Diospa sonqonpaq jina kanqa.

3. ¿Imaynatan Jehová Diosmanta mañakunanchis?

³ Jehová Diosmanta mañakushaspaqa manan comuntachu rimananchis, aswanpas respetowanmi rimananchis. Yuyarisun Isaiaspa, Ezequielpa, Danielpa, Juanpa rijuriypi rikusqankumanta; manaña kaqtachu rikurqanku chaypas yacharqankun Jehová Diosqa atiyniyoq rey kasqanta. Isaiasmi juj rijuriypi rikurqan Jehová Diosta “alto patapi tiyashaqta, trononpi tiyashaqta” (Isa. 6:1-3, TNM). Ezequieltaq Jehová Diosta rikurqan carronpi tiyashaqta, paypa “muyuriqninpiqa juj k’anchaymi k’anchamushasqa, chay k’anchayqa paramuqtin rijurimuq  k’uychi jinan kasqa” (Ezeq. 1:26-28, TNM). Danieltaq rikurqan “Kuraq Runata” rit’i jina yuraq p’achayoqta. Payqa trononpin tiyashasqa, trononqa nina rauray jinan kasqa (Dan. 7:9, 10, TNM). Juantaq Jehová Diosta rikurqan trononpi tiyashaqta, chay tronontaqa “esmeralda rumiman rijch’akuq k’uychin muyuykushasqa” (Apo. 4:2-4). Chay rijuriykunapi yuyaymanaymi reparachiwanchis Jehová Diosqa tukuy atiyniyoq Dios kasqanta, chaymi respetowan mañakunanchis. Ichaqa, ¿imakunatan Jehová Diosmanta mañakusunman?

4. ¿Imakunamanta mañakunankupaqmi Jesús yachachirqan? ¿Imatan chaymanta yachasunman? (Mateo 6:9, 10).

⁴ (Leey Mateo 6:9, 10). Orqopi kashaspan Jesusqa discipulonkunata yachachirqan Jehová Diospa munayninman jina mañakunankupaq. Chaymi nirqan: “Qankunaqa khaynatan mañakunkichis: Yayayku janaq pachapi kaq, sutiyki ch’uyapaq jap’isqa kachun”, nispa. Yachachillarqantaqmi “gobiernoyki jamuchun” nispa mañakunankupaq. Chay gobiernon Diospa enemigonkunata wiñaypaq chinkachipunqa. Chaymantapas nirqanmi: “Munayniyki kay pachapi ruwakuchun”, nispa. Chaywanmi mañakusharqan Jehová Diospa promesankuna kay pachapi junt’akunanpaq. Chhayna mañakuyta yachachisqanqa Jehová Diospa munayninman jinan karqan. Chaymi noqanchispas chaykunamanta mañakunanchis. Chhaynapin rikuchisunchis Jehová Diospa munaynin junt’akunanta munasqanchista.

5. ¿Imaraykun mana manchakuspa ima necesitasqanchistapas Jehová Diosmanta mañakunanchis?

⁵ Chay kutipin Jesusqa discipulonkunata yachachillarqantaq mana manchakuspa ima necesitasqankutapas Jehová Diosmanta mañakunankupaq. Chaymi yachachirqan: “Kunan p’unchaypaq t’antaykuta qoykuwayku. Juchaykuta perdonawayku [...]. Yanapaykuwayku tentacionkunaman ama urmanaykupaq, librawaykutaq Satanasmantapas”, nispa (Mat. 6:11-13). Noqanchispas mana manchakuspan chaykunataqa mañakunanchis. Chhaynapin rikuchisunchis Jehová Diospa yanapayninpi confiasqanchista, paywan amigontin kayta munasqanchistapas.

6. Yachachiwarqanchisña Jesús mañakuyta chaypas, ¿kaqllatachu sapa kuti mañakunanchis?

⁶ Yachachirqanña Jesús discipulonkunaman  mañakuyta chaypas manan kaqta sapa kutilla mañakunankutachu munarqan. Jesuspas manan kaqllatachu Diosmantaqa mañakurqan. Aswanpas imachus necesitasqanta, imachus llakichisqantan Jehová Diosmanqa willakurqan (Mat. 26:39, 42; Juan 17:1-26). Noqanchispas manan kaqllatachu mañakunanchis, aswanpas sonqomantan imachus llakichiwasqanchista willakunanchis. Wakinninchisqa yaqapaschá ima ruwaytapas munashanchis, chhayna kaqtinqa Jehová Diosmantan allin yachayta mañakunanchis (Sal. 119:33, 34). Sichus Diospa llaqtanpi ima llank’aytapas chaskikusunman chayqa allin yachayta allin reparaq kaytan mañakusunman (Prov. 2:6). Tayta-mamakunapas wawankupaqmi mañakunkuman, wawakunapas atinkumanmi tayta-mamankupaq mañakuyta. Chaymantapas llapanchismi Bibliamanta yachachisqanchis runakunapaq, jujkunapaqpas mañakusunman. Ichaqa manan mañakuyllachu mañakunanchis.

7. ¿Imaraykun mañakushaspa Jehová Diosta jatunchananchis?

⁷ Jehová Dios jinaqa manan pipas kanchu, chaymi mañakuspaqa Jehová Diosta jatunchananchis. Salmos takita qelqaq runan nirqan: “Señor Diosníy, qanqa sumaqmi, jucha pampachaykuqmi kanki”, nispa. Nillarqantaqmi: “Señor Diosníy, sumaq sonqo, llakipayakuq Diosmi kanki, mana usqhay phiñakuqmi kanki, munakuqllañan, junt’aqllañan kanki”, nispa (Sal. 86:5, 15). Chay textoq nisqan jina Jehová Diosqa munakuq, khuyapayakuq, junt’aq Diosmi. Payqa imaymanatan noqanchisrayku ruwarqan, chaymi mañakuspapas payta jatunchananchis.

8. ¿Imakunamantan Jehová Diosta “gracias” ninanchis? (Salmos 104:12-15, 24).

⁸ Mañakushaspaqa Jehová Diostan “gracias” ninanchis tukuy imaymana qowasqanchismanta. Jehová Diosqa anchatan munakuwanchis, kusisqa kausananchistataqmi munanpas. Chaymi imaymana colorniyoq t’ikakunata qowanchis, imaymana mijuykunata qowanchis, allin amigokunatapas qowanchis (leey Salmos 104:12-15, 24). Chaymantapas llaqtanpi askha espiritual mijunata qowasqanchismanta, juj sumaq suyakuyta qowasqanchismantawanmi “gracias” ninallanchistaq.

9. ¿Imatan ruwasunman Jehová Diosta “gracias” niyta ama qonqananchispaq? (1 Tesalonicenses 5:17, 18).

 ⁹ Jehová Diosqa imaymanatan noqanchisrayku ruwan, ichaqa yaqapaschá qonqapusunman chaykunamanta “gracias” niyta. Chhaynaqa, ¿imatan ruwasunman “gracias” niyta ama qonqananchispaq? Chaypaqqa imachus mañakusqanchistan papelpi qelqasunman, jinaspa reparananchis imaynatas mañakusqanchisman Jehová Dios kutichimusqanta. Chay qhepamanqa Jehová Diospa yanapawasqanchismantan “gracias” ninanchis (leey 1 Tesalonicenses 5:17, 18). Pitapas yanapaspa “gracias” niwaqtinchisqa anchatan kusikunchis, ¿riki? Chhaynatan Jehová Diospas kusikun mañakusqanchista kutichimuwasqanchismanta “gracias” niqtinchisqa (Col. 3:15). ¿Imamantawanmi Jehová Diosta “gracias” ninanchis?

10. ¿Imaraykun Jehová Diosta “gracias” ninanchis wawan Jesusta kay pachaman kachamusqanmanta? (1 Pedro 2:21).

¹⁰ (Leey 1 Pedro 2:21). Jehová Diostan “gracias” ninanchis wawan Jesusta kay pachaman kachamusqanmanta. Jesusqa imaymanatan yachachirqan, allin ejemplotaqmi karqanpas. Paypa vidanmanta estudiayqa yanapawasunmanmi Jehová Diosta astawan reqsinanchispaq, munasqanman jina servinanchispaqpas. Chaymantapas Jesuspa wañusqanpin iñinanchis. Chaymi yanapawasun Jehová Dioswan allin amigontin kananchispaq, kusisqa payta servinanchispaqpas (Rom. 5:1).

11. ¿Imaraykun Jesuspa sutinpi Jehová Diosmanta mañakunanchis?

¹¹ Jehová Diostan “gracias” ninallanchistaq Jesuspa sutinpi mañakusqanchismanta. Payqa wawan Jesuswanmi mañakusqanchisman kutichimuwanchis. Sichus Jesuspa sutinpi Jehová Diosmanta mañakusunchis chayqa uyarinqan mañakusqanchista, jinaspa kutichimuwasunchis. Chaymi Jesuspas nirqan: “Imatapas sutiypi mañakuqtiykichisqa noqan ruwapusaykichis, chhaynapi Yayaqa Churirayku jatunchasqa kananpaq”, nispa (Juan 14:13, 14).

12. ¿Imaraykun Jehová Diosta wawan Jesusmanta “gracias” ninanchis?

¹² Jehová Diosqa Jesuspa wañusqanraykun juchanchiskunamanta perdonawanchis. Chaymi Jesusmanta Bibliapi nin: “Uma sacerdotenchisqa janaq pachapin jatun Diospa paña ladonpi tiyashan”, nispa (Heb. 8:1). Nillantaqmi: “Kashanmi yanapaqninchis, payqa Jesucriston, payqa chaninmi, Yayawantaqmi kashanpas”, nispa (1 Juan 2:1). Chay uma sacerdotenchisqa khuyapayawanchismi, yachantaqmi mayninpi pisipananchista, jinaspa “Diosmanta rogapuwashanchis” (Rom. 8:34; Heb. 4:15). Sichus Jesús mana wañunmanchu karqan chayqa manan Jehová Diosmantaqa mañakuyta atisunmanchu karqan. ¿Imarayku? Juchayoq runa kasqanchisrayku. Chaymi Jesuspa wañusqanmantapas Jehová Diosta “gracias” ninanchis.

13. ¿Imatan Jesús ruwarqan discipulonkunata munakusqanrayku?

¹³ Jesusqa anchatan discipulonkunata munakurqan. Chaymi manaraq wañupushaspa Jehová Diosta rogakurqan discipulonkunata Satanaspa trampankunamanta cuidananpaq (Juan 17:15). Pisillaña Jesuspa wañupunanpaq faltasharqan chaypas discipulonkunamantan llakisqa kasharqan.

14. ¿Imata ruwaspan rikuchinchis hermanonchiskunata munakusqanchista?

¹⁴ Manan necesitasqallanchistachu Jehová Diosmantaqa mañakunanchis, aswanpas Jesús jinan hermanonchiskunapaqwan mañakunanchis. Chayta ruwaspan hermanonchiskunawan  munanakuspa Jesuspa kamachisqanta kasukushanchis, Jehová Diospas reparanqan hermanonchiskunata munakusqanchista (Juan 13:34). Hermanonchiskunapaq mañakuspaqa manan tiemponchistachu usuchishanchis. Biblian nin: “Chanin runaq rogakuyninqa ancha atiyniyoqmi jujkunata yanapananpaq”, nispa (Sant. 5:16).

15. ¿Imaraykun iñiqmasinchiskunapaq Jehová Diosmanta mañakunanchis?

¹⁵ Wakin hermanonchiskunaqa imaymana sasachakuykunapin tarikushanku. Wakinqa sinchitan onqoshanku, qatiykachasqa kashanku, otaq unu lloqllapas terremotopas pasasqanrayku imaymana kaqninkuta chinkachipurqanku. Chaymi paykunapaq Jehová Diosmanta mañakunanchis, chhaynapi ima sasachakuytapas aguantanankupaq. Chaymantapas llakipi tarikuq hermanokunata yanapaq iñiqmasinchiskunapaqmi mañakusunman, atispaqa sutinkumantan mañakusunman. Hermanonchiskunapaq Jehová Diosmanta mañakuspaqa paykunata munakusqanchistan rikuchinchis.

16. ¿Imaraykun Diospa llaqtanta pusariq hermanonchiskunapaq mañakunanchis?

¹⁶ ¿Imaraykun Diospa llaqtanta pusariq hermanonchiskunapaqpas mañakunanchis? Chhaynapi ima ruwasqankupas allin kananpaq. Chay iñiqmasinchiskunaqa apóstol Pablo jinan kusikunku paykunapaq mañakuqtinchisqa. Apóstol Pablon qelqarqan: “Noqapaqpas mañapuwaychis rimaqtiy Dios simita qowananpaq, chhaynapi allin willakuykunamanta pakasqa yachayta mana manchakuspa rimanaypaq”, nispa (Efes. 6:19). Kay tiempopipas askha hermanonchiskunan imaymanata ruwashanku Diospa llaqtanta pusarinankupaq. Chaymi paykunaq ruwasqankuta Jehová Dios yanapananpaq mañakunanchis. Chhaynapin rikuchisun Diospa llaqtanta pusariq hermanonchiskunatapas munakusqanchista.

17, 18. ¿Maypi mañakunanchispaqmi mayninpi niwasunman, imatan qhawarinanchis manaraq mañakushaspa?

¹⁷ Mayninpiqa yaqapaschá jujkunaq qayllanpi mañakusun. Sichus juj hermananchis Bibliamanta yachachinanpaq juj iñiqmasinchista compañanman chayqa, yaqapaschá yachachiq hermananchisqa payta ninman mañakuywan qallarinanpaq. Sichus compañaq hermananchis mana allintachu iñiqmasinchispa yachachisqan  runata reqsin chayqa yaqapaschá estudiayta tukunankupaqña mañakunman. Chhaynapin estudiantepaq allinta mañakunqa.

¹⁸ Mayninpiqa yaqapaschá juj hermanonchista ninkuman juñunakuypi mañakunanpaq otaq Diosmanta willaq lloqsinapaqpas mañakunanpaq. Chhayna kaqtinqa yachananmi imamantas juñunakuypi yachasunchis chayta, chayman jina mañakunanpaq. Mañakuspaqa manan hermanokunatachu yuyaychanan, nitaqmi iñiq t’aqapi imapas ruwakunantachu willanan. Wakin juñunakuykunapiqa yaqa pisqa minutopi jinan takinku mañakunku ima. Chaymi juñunakuy qallarishaqtinqa mana nishutachu rimananku (Mat. 6:7).

19. ¿Imata ruwaymi yanapawasun Diospa p’unchayninta kusisqa suyakunanchispaq?

¹⁹ Jehová Diospa p’unchayninqa cercapiñan kashan, chaymi mana pisipaspa mañakushanallanchis. Chaymanta rimaspan Jesús nirqan: “Rijch’ashaqlla kashaychis Diosmanta tukuy tiempo rogakuspa, chhaynapi llapa chaykuna pasananmanta salvasqa kanaykichispaq”, nispa (Luc. 21:36). Sichus kay tukukuy p’unchaykunapi mañakushallasun chayqa manan iñiyninchispi pisipasunchu, kusisqataqmi Diospa p’unchaynintapas suyakusunchis.

20. ¿Imatan ruwananchis sumaq q’apashaq incienso jina mañakusqanchis kananpaq?

²⁰ Kay yachachikuypi yachamusqanchis jina Diosmanta mañakuyqa juj sumaq regalon. Chaymi mañakushaspaqa Jehová Diospa munaynin junt’akunanpaq mañakunanchis. Jinaspapas wawan Jesusmanta, gobiernonmanta iman “gracias” ninanchis, hermanonchiskunapaqpas mañakunanchismi. ¿Imatawanmi Jehová Diosmanta mañakusunman? Necesitasqanchista qowananchispaq, iñiyninchispi yanapawananchispaq ima. Ñaupaqtan ichaqa allintaraq piensananchis Jehová Diosmanta mañakunanchispaq. Chhaynapin mañakusqanchisqa sumaq q’apashaq incienso jina sonqonpaq kanqa, mañakuymanta agradecido kasqanchistataqmi rikuchisunpas (Prov. 15:8).