1. ¿Ima ruwakunantan Jehová Dios munan?

 JEHOVÁ DIOSQA munan llapa nacionkunapi allin willakuykuna willasqa kanantan (Mar. 13:10; 1 Tim. 2:3, 4). Chayraykun Jehová Diosqa wawan Jesusta ajllarqan chay llank’ayta pusarinanpaq. Jesustaq chay llank’ayta pusarishan chayqa Jehová Diospa munasqanman jinan ruwashan, jinaspa pachantinpi Diosmanta willakushan (Mat. 24:14).

2. ¿Imatan kay yachachikuypi yachasunchis?

² Kay yachachikuypin yachasunchis imaynatas Señorninchis Jesús allin yuyayniyoq junt’aq kamachiwan Diospa llaqtanta pusarishan chayta. Imaynatas Diosmanta willaypas pachantinpi aparikushan chaytawan (Mat. 24:45). Chaymantapas yachallasuntaqmi imata ruwaspas Jesustapas allin yuyayniyoq junt’aq kamachitapas yanapasunman chayta.

3. ¿Imata ruwananpaqmi Jesús atiyta chaskirqan?

³ Yachasqanchis jina Jesusmi Diosmanta willaytaqa pusarishan. ¿Imaynapin chayta yachanchis? Manaraq janaq pachaman ripushaspan Jesusqa wakin qatikuqninkunawan Galilea orqopi juñukurqan, jinaspa paykunata nirqan: “Diosmi tukuy atiyta qowan janaq pachapipas kay pachapipas, […] chayrayku, llapa nacionmanta runakunaman riychis, jinaspa yachachimuychis discipuloykuna kanankupaq”, nispa (Mat. 28:18, 19). Chhaynaqa, Jehová Diosmi Jesusman atiyta qorqan Diosmanta willayta pusarinanpaq.

4. ¿Imaynapin yachanchis Jesús kay tiempopi Diosmanta willayta pusarishasqanta?

 ⁴ Jesusmi willarqan Diosmanta willayqa llapa pachantinpi aparikunanta. Chaymantapas qatikuqninkunatan nirqan: “Noqaqa sapa p’unchaymi qankunawan kashasaq kay tiempoq tukukapunankama”, nispa (Mat. 28:20). Chaywanmi sut’ita reparanchis kay tiempopi Diosmanta willayta Jesús pusarishasqanta.

5. ¿Imaynatan yanapakushanchis Salmos 110:3 textoq nisqan junt’akunanpi?

⁵ Jesusqa allintan yachan kay tukukuy tiempopi Diosmanta willaqkuna yapakunanta. Chaymantapas kay profecian junt’akushan. Chaypin nin: “Llaqtayki runakunan paykunallamanta jamunqaku, soldadoykikunata pusasqayki p’unchaymi kikillankumanta jamunqaku”, nispa (Sal. 110:3, TNM). Sichus Diosmanta willaypi yanapakushanki chayqa, Jesustawan allin yuyayniyoq junt’aq kamachitawanmi yanapakushanki. Chaymantapas Salmos 110:3 textoq junt’akunanpin yanapakushallankitaq. Chhaynapin Diosmanta willayqa pachantinpi aparikushan. Ichaqa chay llank’ayta junt’ananchispaqqa imaymana sasachakuykunapin tarikushanchis.

6. ¿Ima sasachakuypin kay tiempopi tarikushanchis?

⁶ Juj sasachakuyqa Diosmanta willasqanchista jark’akusqankun. Chayqa pasanman Dios contra rimaq apostatakuna, politicokuna, juj religionta umalliqkuna noqanchismanta llullakuspa rimaqtinkun. Chay nisqankuta creespan familianchiskuna otaq amigonchiskuna niwasunman Diosmanta willayta saqepunanchispaq. Wakin nacionkunapiqa iñiqmasinchiskunatan qatiykachashanku Diosmanta willasqankurayku, wakintaqa carcelman imaraqmi wisq’ashanku. Chaykunaq pasasqanwanqa manan admirakunanchischu. Jesusmi nirqan: “Sutiyraykun lliu llaqtakuna cheqnikusunkichis”, nispa (Mat. 24:9). Chhayna cheqnisqa kasqanchismi sut’ita rikuchin Jesusta qatikusqanchista, Jehová Diospa allin qhawarisqa kasqanchistapas (Mat. 5:11, 12). Satanasmi chaykunata ruwanankupaq mana allin runakunata tanqan, chhaynapi Diosmanta willayta jark’awananchispaq. Chaykunataña ruwashan chaypas manan Diosmanta willayninchistaqa jark’awasunmanchu. Jesuspa yanapayninwanmi llapa llaqtakunaman Diosmanta willakushan.

7. ¿Imaynatan Apocalipsis 14:6, 7 textokuna junt’akushan?

⁷ Juj sasachakuymi kallanmantaq kay pachapi imaymana rimaykuna kasqan. Juj rijuriypin Jesusqa apóstol Juanman rikuchirqan llapa rimaykunapi Diosmanta willakunanta (leey Apocalipsis 14:6, 7). ¿Imaynatan chay sasachakuyta atipakushan? jw.org nisqa paginanchisman waranqa más rimaykunapi llapa qelqanchiskunata churakuspan. Chaymantapas Jehová Diospa testigonkunata pusariq hermanokunan nimurqanku ¿Munawaqchu wiñaypaq kusisqa kausayta? nisqa librota 700 rimaykunapi ruwakamunanta. Chaymantapas mana uyariyta atiq runakunapaqmi kashallantaq videokuna Diosmanta yachanankupaq, mana rikuqkunapaqpas braille nisqapin qelqanchiskuna kashallantaq. Chaykuna kasqanwanmi askha runakuna Diospa gobiernonmanta allin willakuykunata uyarikushanku. Chaykunaq pasasqanwanmi wakin profeciakuna junt’akushan, jinaspa nacionkunapi kaq llapa rimaykunapi askha runakuna Diosmanta yachashanku (Zac. 8:23; Sof. 3:9). Chaykunaqa pasashan Jesús Diosmanta willayta pusarisqanraykun.

8. ¿Iman pasarqan Diosmanta willasqanchisrayku?

⁸ Kay tiempopiqa 240 nacionkunamanta 8 millones más runakunan Jehová Diospa llaqtanpi kashanku. Sapa watataqmi waranqanpi runakuna bautizakushanku, paykunaqa Jehová Diosta munakusqankuraykun “mosoq  runa kaywan p’achakushanku” (Col. 3:8-10). Chaypaqmi ichaqa imaymana cambiokunata ruwarqanku. Jinaspa qhelli jucha ruwayta, sinchi maqakuq kayta, cheqnipakuyta ima saqepurqanku. Chaywanmi Isaías 2:4 textoq nisqan junt’akushan. Chaypin nin: “Manan mayqen suyupas juj suyuwan maqanakunqañachu”, nispa. Sichus kallpachakusunchis mosoq runa kaywan p’achakunanchispaq chayqa, juj runakunapas chayta rikuspan Diospa llaqtanpi kayta munanqaku. Chaymantapas chayta ruwaspan rikuchinchis pusariwaqninchis Jesusta qatikusqanchista (Juan 13:35; 1 Ped. 2:12). Chhayna kananchispaqmi Señorninchis Jesús yanapawashanchis.

9. Mateo 24:45-47 nisqan jina, ¿iman pasanan karqan kay tukukuy tiempopi?

⁹ (Leey Mateo 24:45-47). Jesusmi willaranña kay tukukuy p’unchaypi allin yuyayniyoq junt’aq kamachita churananpaq. Paykunaqa tiempollanpin imaymanata qowashanchis allin iñiyniyoq kananchispaq. Jinaspapas tukuy atisqankutan ruwashanku yanapawananchispaq. Ichaqa manan Jehová Diosta serviqkunallatachu yanapanku, yanapallankutaqmi Diosmanta yachay munaq runakunatapas. Chaymantapas paykunaqa manan “iñiyninchispi kamachikuqkunachu kanku” (2 Cor. 1:24). Aswanpas Jesustan umalliqninkuta jina qhawarinku (Isa. 55:4).

10. Dibujokunapi rikusqanchisman jina, ¿ima librowanmi Diosmanta yachayta qallarirqanki?

¹⁰ Allin yuyayniyoq junt’aq kamachiqa 1919 watamantapachan qelqakunata ruwachimurqan, chay qelqakunawan askha runakuna Diosmanta yachanankupaq. 1921 watapin inglés simipi lloqsimurqan El Arpa de Dios nisqa libro, chay librowanmi Bibliamanta cheqaq yachachikuykunata runakunaman yachachiqku. Tiempowanmi ichaqa juj librokuna lloqsimurqan.  ¿Ima librowanmi Diosmanta yachayta qallarirqanki? Yaqapaschá kay librokunawan:“Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Imatapunin Biblia yachachin? otaq ¿Imatan Biblia yachachin?, nisqa librokunawan. Yaqapaschá kunanqa ¿Munawaqchu wiñaypaq kusisqa kausayta?, nisqa librowan yachashanki. Chay librokunaqa ruwakamurqan Diosmanta runakunaman yachachinanchispaqmi.

11. ¿Imaraykun llapanchis Diosmanta yachashanallanchis?

¹¹ Yachasqanchis jina llapanchismi Diosmantaqa yachashanallanchis allin iñiyniyoq kananchispaq. Chayraykun apóstol Pablopas nirqan: “Wiñasqa kaqkunan ichaqa khamuna mijunataña mijunku”, nispa. Chaymantapas nirqanmi chay yachasqanchisman jina kausananchispaq, chhaynapi “allin kaqta mana allin kaqtapas” reparananchispaq (Heb. 5:14). Kay tiempopi mana allin ruwaykuna rikukusqanwanmi mayninpiqa sasa kanman Diospa kamachikuyninkunata kasukuy. Señorninchis Jesusmi ichaqa allin yuyayniyoq junt’aq kamachiwan Bibliamanta orqosqa qelqakunawan, librokunawan, videokunawan ima yanapawashanchis allin iñiyniyoq kananchispaq.

12. ¿Imatan ruwakurqan Diospa sutin jatunchasqa kananpaq?

¹² Noqanchispas Jesús jinan Jehová Diospa sutinta jatunchanchis (Juan 17:6, 26). Chayraykun 1931 watamantapacha Jehová Diospa testigonkuna nisqa sutiwan reqsichikurqanchis. Chay sutiwan reqsichikuspan rikuchishanchis Jehová Diospa sutinta munakusqanchista respetasqanchistapas (Isa. 43:10-12). Chay watallapitaqmi octubre killapi Diospa sutinqa qelqanchiskunaq tapanpi churakurqan. Chaymantataq Traducción del Nuevo Mundo nisqa Bibliapi Diospa sutin  maypichus kananpi churakurqan. Wakin religionkunan ichaqa Diospa sutinta Bibliamanta orqopurqanku.

13. ¿Imaynapin yachanchis Jesús allin yuyayniyoq junt’aq kamachiwan Diospa llaqtanta pusarishasqanta? (Juan 6:68).

¹³ Señorninchis Jesusqa allin yuyayniyoq junt’aq kamachiwanmi Diospa llaqtanta pusarishan, chhaynapi Dios yupaychasqanchis ch’uya kananpaq. Ichaqa, ¿imatan Diospa llaqtanmanta piensanki? Yaqapaschá apóstol Pedro jina nishanki: “Señor, ¿pimantaq riykumanri? Qanpa rimasqaykikunaqa wiñay kausay simikunan”, nispa (Juan 6:68). ¿Imaynan kashasunman Diospa llaqtanpi mana kaspa? Manapaschá allinchu kasunman karqan. Jesusmi ichaqa Diospa llaqtanwan yanapawanchis allin iñiyniyoq kananchispaq allin yachachiq kananchispaqpas. Chaymantapas yanapawanchis “mosoq runa kaywan p’achakunanchispaq”, chhaynapi Jehová Diosta kusichinanchispaq (Efes. 4:24).

14. ¿Imaynatan Diospaq llaqtan yanaparqasunki kay corona virus onqoy tiempopi?

¹⁴ Sasachakuykunaña kaqtinpas Jesusqa allintan Diospa llaqtanta pusarishan. Chaytan sut’ita reparanchis kay corona virus onqoy tiempopi. Chay onqoy qallarishaqtinmi Diosta mana serviq runakunaqa manan imanakuytapas atisharqankuchu. Señorninchis Jesusmi ichaqa allin yuyaychaykunata qowarqanchis chay onqoymanta allinta cuidakunanchispaq. Allin yuyayniyoq junt’aq kamachiwanmi kallpachawarqanchis mascarillawan churakunanchispaq, runakunawanpas ama nishuta juñukunanchispaq. Chaymantapas iñiq t’aqapi umalliqkunatan yuyarichikurqan iñiqmasikunata wajarinankupaq, jinaspa imachus necesitasqankupi yanapanankupaq (Isa. 32:1, 2).  Umalliq t’aqamanta jamuq willakuykunapas anchatan kallpachawarqanchis.

15. ¿Ima kamachikuykunatan kay onqoy tiempopi chaskirqanchis? ¿Imaynatan Jehová Dios llaqtanta bendecirqan?

¹⁵ Kay corona virus onqoy tiempopiqa kamachikuykunatan chaskirqanchis imaynata juñunakuykunata, Diosmanta willayta aparinanchispaq. Chay ruwaykunata ama saqenanchispaqqa ratullan imatapas ruwakurqan, jinaspa juñunakuyninchiskunata asambleanchiskunata Zoom nisqanta aparishanchis. Diosmanta willaytapas cartakunata ruwaspa, telefononta iman willayta qallarirqanchis. Chaykuna ruwakusqantan Jehová Diosqa bendecimurqan. Chayraykun wakin sucursalkunamanta willakamurqanku Diosmanta willaqkuna askha yapakusqanta. Chaymantapas askha iñiqmasinchiskunan sut’ita repararqanku imaynata Jehová Dios llaqtanta bendecisqanta (qhaway “ Jehová Diosmi llaqtanta bendecishan” nisqa recuadrota).

16. ¿Imamantan mana iskayananchischu?

¹⁶ Wakin iñiqmasinchiskunaqa yaqapaschá piensarqanku: “Nishutamá Diospa llaqtanqa kay corona virus onqoymanta cuidakunanchispaq niwashanchis”, nispa. Ichaqa, chaykuna ruwakusqanwanmi sut’ita reparanchis allin yachaywan imapas ruwakusqanta (Mat. 11:19). Chaykunapi piensaspan reparanchis munakuywan Diospa llaqtanta Jesús pusarishasqanta. Chaymantapas chaywanmi yachanchis Jehová Diospas Jesuspas mana jayk’aqpas saqerpariwasqanchista (leey Hebreos 13:5, 6).

17. ¿Imaynan kashanchis Señorninchis Jesús Diospa llaqtanta pusarisqanmanta?

¹⁷ May kusisqan kashanchis Señorninchis Jesús Diospa llaqtanta pusarisqanmanta. Jesustaq Diospa llaqtanta pusarishan chayqa, manan imapas jark’awasunmanchu juj nisqalla Jehová Diosta servinanchistaqa. Diospa llaqtanqa allintan yanapawanchis allin iñiyniyoq kananchispaq, imaymanatataqmi qowanchispas Diosmanta willashanallanchispaq. Chaymantapas yanapawanchismi mosoq runa kaywan p’achakushanallanchispaq, jujkunatapas munakushanallanchispaq. Chayta yachayqa maytan kusichiwanchis.