Paulmi nin: “Primoywan phiñachinakushaqtiykun kunkanmanta jap’iruspa wañuchiyta munarani”, nispa.

Marcosmi nin: “Wasiypiqa usqhayllan ima jawallapas phiñakuq kani. Jinan p’akiq kani sillakunata ima tarisqaytapas”, nispa.

Manapaschá phiñasqa kaspa chaykunatachu ruwasunman. Chaywanpas mayninpiqa sasan kanman genionchista controlayqa. ¿Imarayku? Adanpa churinkuna kasqanchisrayku (Rom. 5:12). Wakinqa Paul jina Marcos jinan usqhaylla phiñakunku. Wakintaq sinchi manchali kanku otaq imatapas mana allinta ruwanallankupaq piensanku. Jujkunataq cuerponkuq munasqanwan aysachikuspa nishuta tragota ujanku otaq drogakunata mijunku.

Cuerponkuta, yuyaykusqankuta, imachus munasqankutapas kamachiyta mana atiqkunaqa mana allinkunapin tarikunku. ¿Imatan ruwananchis chhaynapi ama tarikunapaq? Cuerponchista imachus piensasqanchistawanmi kamachinanchis. Chay ruwayta yachanapaq kay tapuykunamanta yachasun: “¿Imataq cuerpota kamachiyri? ¿Imaraykun cuerponchista kamachinanchis? ¿Imaynatan cuerponchista kamachisunman?”, nispa (Gál. 5:22, 23). Yachallasuntaq genionchista controlananchispaq imatawan ruwananchismanta.

Cuerponta kamachiq runaqa manan sonqonpa munasqanman jinallachu ruwan. Chaymi mana rimanchu nitaq ruwanchu Diospa cheqnikusqankunata.

Jesusqa kamachiranmi cuerponta imachus piensasqantapas. Chaymi Bibliapi nin: “K’amishaqtinkupas manan k’amipakuranchu, ñak’arichishaqtinkupas manan pitapas amenazaranchu; aswanmi payqa chaninta juzgaq juezman qaqata jap’ipakuran”, nispa (1 Ped. 2:23). Jesusmi chayta ruwaran k’aspipi warkusqa kashaqtin enemigonkuna paymanta burlakushaqtinku (Mat. 27:39-44). Chaymantapas manan phiñakuranchu judío religionpi umalliqkuna rimayninpi urmachiyta munaspa tapupayaqtinku (Mat. 22:15-22). Juj kutipipas judiokunan sinchita phiñakuspa rumiwan ch’aqeyta munaranku, jinan vengakunamantaqa pakakuspa templomanta lloqsipuran (Juan 8:57-59).

¿Noqanchispas atisunmanchu Jesús jina mana usqhaylla phiñakuq kayta? Arí. Apóstol Pedro niran: “Cristopas qankunaraykun ñak’ariran ejemplota churanasuykichispaq, chhaynapi tukuy yuyaywan yupinta qatikunaykichispaq”, nispa (1 Ped. 2:21). Juchayoq runaña kanchis chaypas atisunmanmi tukuy yuyaywan Jesuspa ruwasqanta jina ruwayta. ¿Imanaqtinmi chayta ruwananchis?

Sichus munanchis Jehová Dios allinpaq qhawariwananchista chayqa, cuerponchista imachus piensasqanchistawanmi kamachinanchis. Askha  watakunaña tukuy sonqonwan Diosta servishasunman chaypas, manachus rimasqanchista ruwasqanchistapas kamachisun chayqa Diosmantan t’aqakusunman.

Moisesmanta yachasun. “Payqa aswan llamp’u sonqon karan, kay pachantin qharikunamantapas” (Núm. 12:3). Askha watakunan pacienciawan aguantaran israelitakunaq rimapakusqanta. Ichaqa juj kutinmi manaña aguantaranchu israelitakuna unu mana kasqanmanta rimapakusqankuta. Jinan paykunata niran: “Uyariwaychis, k’ullu runakuna, ¿kay qaqamantachu unuta orqosaqku qankunaman ujachinaykupaq?”, nispa (Núm. 20:2-11).

Moisesqa phiñakuspan k’araj simiwan rimaran. Manataq Jehová Diosta jatuncharanchu milagrota ruwaspa unuta llaqtaman qosqanmanta (Sal. 106:32, 33). Jinan Jehová Diosqa prometesqan allpaman mana jaykuchiranchu (Núm. 20:12). Moisesqa wañupunan p’unchaykamachá pesapakuran phiñakuspa rimasqanmanta (Deut. 3:23-27).

¿Imatan chaymanta yachasunman? Askha watakunaña Jehová Diosta servishanchis chaypas, manan jayk’aqpas millay simikunawanqa rimananchischu phiñachiwaqninchista otaq pitapas correginanchis kaqtinqa (Efes. 4:32; Col. 3:12). Kuraqkunapaqqa sasan pacienciayoq kayqa. Ichaqa Moisestan yuyarinanchis. Manan munasunmanchu Jehová Dios mana allinpaq qhawariwananchista comunta rimasqanchisrayku otaq ruwasqanchisraykuqa. Chhaynaqa, ¿imatan ruwasunman cuerponchista kamachinanchispaq?

Diospa santo espirituntan mañakunanchis. ¿Imaraykun mañakunanchis? Cuerpota kamachiyqa Diospa espiritunpa rurun kasqanrayku, Diostaq mañakuqninkunaman qon (Luc. 11:13). Diospa espiritunmi yanapawasunman cuerponchista piensasqanchistapas kamachinanchispaq (Filip. 4:13). Chaymantapas espiritunmi yanapawanchis munakuq kananchispaq, chaymi yanapawallanchistaq cuerponchista kamachinapaq (1 Cor. 13:5).

Cuerponchis kamachiyta jark’awaqninchiskunamantan karunchakunanchis. Chaypaqqa manan internetpi qhawananchischu mana allin ruwaykunata nitaq pujllananchischu mana allin ruwaykunawan (Efes. 5:3, 4). Karunchakunanchismi mana allin ruwaykunaman apaq ruwaykunamanta (Prov. 22:3; 1 Cor. 6:12). Chay jinaqa sichus sonqonchis aysawanchis qhelli ruwaykunata ruwanapaq chayqa, manan leenanchischu qhelli  jucha ruwaykunamanta librokunata nitaq qhawananchischu chay jina peliculakunatapas.

Sasapaschá kanqa chaykunata ruwayqa. Ichaqa sichus kallpachakusun chayqa, Jehová Diosmi kallpanta qowasun cuerponchista kamachinapaq (2 Ped. 1:5-8). Yanapawasunmi piensasqanchista, rimasqanchista, ruwasqanchistapas kamachinanchispaq. Chaytan ruwaranku Paulpas Marcospas, yachasqanchis jina paykunaqa usqhaylla phiñakuqmi karanku. Juj hermanonchispas ratolla phiñakuqmi karan, chaymi carronta manejashaspa juj choferkunawan sapa kutilla phiñachinakuq. ¿Imatan ruwaran cambiananpaq? Paymi nin: “Sapa p’unchaymi tukuy kallpaywan Diosmanta mañakurani. Cuerponchista kamachiymanta qelqakunatan estudiarani, Bibliamanta textokunatataq umaypi jap’irani. Kunankamapas sapa tutamantanmi yuyarini ama pitapas phiñasqa rimapayanaypaq. Mayta rinaypaqpas tempranon rini ama phawan-phawan rishanaypaq”, nispa.

Mayninpiqa sasan kanqa cuerponchista kamachiyqa. Chay pasawaqtinchisqa p’enqakusunpaschá Diosmanta mañakuyta. Ichaqa chay kutipin astawan Diosmanta mañakunanchis. Jehová Diostan rogakunanchis perdonawananchispaq, yanapaynintataq mañakunanchis chay juchaman jujmanta ama urmananchispaq (Sal. 51:9-11). Diosqa uyariwasunmi sonqomanta mañakusqanchista (Sal. 102:17). Apóstol Juanmi niwanchis Diospa Churin yawarninta jich’asqanrayku juchanchismanta limpiasqa kasqanchista (1 Juan 1:7; 2:1; Sal. 86:5). Jehová Diosmi niwanchis jujkunaq juchanta sapa kutilla perdonananchispaq. Chaymi mana iskayananchischu Diospas juchanchista perdonawasqanchismanta (Mat. 18:21, 22; Col. 3:13).

Jehová Diosqa manan allinpaqchu qhawariran Moisés k’araj simikunawan llaqtanta rimapayasqanta, chaywanpas perdonaranmi. Chaymi Bibliapi willan Moisés allin iñiyniyoq runa kasqanta (Deut. 34:10; Heb. 11:24-28). Manaña Jehová Dios jaykuchiranchu prometesqan allpaman chaypas, paraisopin kausarichimpunqa, jinaspa wiñaypaq kausayta atinqa. Noqanchispas atisunmi wiñaypaq kausayta cuerponchista kamachispaqa (1 Cor. 9:25).