Jehová Diosninchismi llaqtanta pusashan yanapashan kay “tukukuy p’unchaykunapi” (2 Tim. 3:1). Chaymi sapankanchis kasukuq kananchis. Imaynan ñaupa tiempo Israel llaqtanpas tarikuranku chhaynan kunanpas kashanchis. Chay Israel runakunaqa makillan uyarinanku karan trompetaq tocamusqanta.

Jehová Diosmi Moisesta kamachiran qolqemanta iskay trompetakunata ruwachinanpaq, ‘chay trompetakunan kanan karan Israel runakunaq juñunakunanta willananpaq, astakunankuta willananpaqwan’ (Núm. 10:2). Sacerdotekunan chay trompetakunataqa tocananku karan. Ima kamachikuychus kasqanta reparanankupaq jinan tocananku karan kuti-kutita otaq juj tocayllatapas (Núm. 10:3-8). Kunan tiempopas Diospa llaqtanpi kaqkunaqa trompetakunaq tocayninta jinan uyarishanchis imaymana willakuykunata. Mayninpin willakuykuna chayamun jatun juñunakuykunaman rinapaq, mayninpitaq umalliqkuna capacitacionman rinankupaq, mayninpitaq willakuykuna jina jamun mosoq yachachikuykuna, chay kinsantinmanta kaypi yachasunchis.

Jehová Dios llapa Israel runakuna karpaq ladonpi juñukunankuta munaqtinqa iskaynin trompetakunatan sacerdotekunaqa tocananku karan (Núm. 10:3). Chay tocaytaqa llapa Israel runakunan uyariranku, paykunaqa karpaq muyuriqninpin tawa t’aqapi tiyasharanku. Karpaq qayllanpi tiyaq Israel runakunaqa yaqapaschá ratulla chayamuqku. Ichaqa karupi tiyaqkunapaqqa sasapaschá karan jamunankupaq, manapaschá ratullachu chayamuqku. Imaynaña kaqtinpas Jehová Diosqa munaranpunin llapanku juñukunankuta chhaynapi willakuyninta uyarinankupaq.

Kunan tiempopas sapa kutillanmi wajasqa kanchis jatun juñunakuykunaman rinapaq. Chay juñunakuykunamanta wakinmi kashan kinsa p’unchay asambleakuna juj p’unchay asambleakunapas. Chay asambleakunapin imaymana yachachikuykunata chaskinchis. Pachantinpi iñiqmasikunan chay asambleakunaman rispa kallpachasqa kanku. Juj sonqollan paykunaqa chayman rinku. Chay asambleakunaman rinankupaqmi wakinqa karutaraq purinanku. Chaywanpas llapallankun may kusisqa chayman rinku.

Ima nisunmanmi karu llaqtachakunapi tiyaq hermanonchiskunamanta, ¿paykunapas uyarishankuchu chay asambleakunata? Internet nisqa televisorkunapas kasqanraykun paykunapas chaskikushanku chay sumaq yachachikuykunata, chay asambleapipas kashankuman jinan kanku. Chaypaq yachasun Benín nacionpi imachus pasaran chayta. Chay nacionpi sucursalmanmi Estados Unidos sucursalmanta watukuq umalliq riran. Chaypin juj jatun juñunakuy aparikuran. Chay juñunakuytan internetninta uyarinankupaq pasachikuran Sahara nisqa ch’in ladopi Arlit llaqtachaman. Chaytan uyarikuranku  21 hermanokuna, uyarikullarankutaqmi juj runakunapas. Paykunaqa karupiña kasharanku chaypas jatun juñunakuypi 44.131 kaqkunawanpas kashankuman jinan karanku. Arlit llaqtachamanta juj hermanonchismi niran: “Maytan gracias niykichis chay sumaq juñunakuyta pasachimusqaykichismanta, chaypin reparayku sonqomantapuni munakuwasqaykikuta”, nispa.

Sacerdotekuna jujnin trompetallata tocaqtinkuqa ‘ayllu umalliqkunallan’ juñunakuna karpaman riqku (Núm. 10:4). Chaypin Moisesqa paykunaman yachachiq ayllunkuta imayna umallinankupaq. Sichus jujnin umalli kasunman karan chayri, ¿manachu tukuy atisqanchista ruwasunman karan chay juñunakuyman rinanchispaq?

Kay tiempopipas Diospa llaqtanpiqa kanmi umalliqkuna, ichaqa manan paykunaqa patrón jinachu kanku, manan dueñochakuspachu Diospa ovejankunata michinku (1 Ped. 5:1-3). Aswanpas tukuy atisqankutan kallpachakunku Diospa ovejankunata allinta michinankupaq. Chay ruwayninkuta allinta junt’anankupaqmi mayninpiqa capacitacionman wajasqa kanku, chaytan chaskinku nombrasqa qharikunapaq escuela nisqapi. Chay capacitacionmanqa kusisqan paykunaqa rinku. Chaypin yachanku Diospa llaqtan imayna pusariyta. Chay capacitación chaskisqankuwanmi paykunaqa astawan Jehová Diosta munakunku. Manaña chay capacitacionman riranchischu chaypas, imachus yachamusqankun noqanchistapas yanapawasun astawan Jehová Diosta munakunanchispaq.

Mayninpiqa kuti-kutitan sacerdotekunaqa tocaqku trompetata. Chayta uyarispaqa llapallankun Israel runakunaqa puririnanku karan (Núm. 10:5, 6). Paykunaqa llapallankun ordenpi puririqku, ichaqa manan facilchu chay ruwayqa karan. Wakinpaqqa sasapaschá karan karpankuta q’epichakuy. ¿Imarayku chayta nisunman?

Bibliaq nisqan jina, “mayninpiqa juj tutallan phuyu” karpa patapi sayaq, “tutamantataq puriripuq”, mayninpitaq “iskay p’unchaytapas, juj killatapas, juj watatapas” karpa patapi phuyu sayaq (Núm. 9:21, 22). Chhaynaqa qonqayllamantachá mayninpiqa puririqku, wakinpaqqa sasachá chayqa karan. ¿Jayk’a kutitan astakunkuman karan? Manan sut’itaqa yachakunchu, ichaqa Bibliapi Números 33 capitulopi willasqan jina, yaqapaschá tawa chunka kutita astakuranku.

Chay purisqanku pampakunaqa ‘manchakuy ch’inneqmi’ karan, chaypiqa wakin Israel runakunaqa tarirankuchá tiyanapaq munay llanthu-llanthuchata (Deut. 1:19). Chhayna kaqtinqa, manapaschá wakinqa faciltachu ripuyta munaranku.

Sacerdotekuna kuti-kutitan trompetata tocaqtinkuqa llapa ayllu runakunan uyariqku, ichaqa manan llapankuchu kaq ratu puririqku. Chhaynataq karan chayqa yaqapaschá wakin Israel runakunaqa nisharanku: “Ima horastataq puririsunri”, nispa. Trompeta tocamuqtinqa inti lloqsimuy ladopi tiyaq ayllukunan ñaupaqtaqa puririnanku karan. Chay ladopiqa Judá ayllu, Isacar ayllu, Zabulón ayllu iman kasharanku (Núm. 2:3-7; 10:5, 6). Sacerdotekuna wajmanta trompetata kuti-kutita tocamuqtinkutaq uray ladopi karpakuq kinsantin ayllukunañataq puririnanku karan. Chhaynatan ruwakuq llapallanku ripunankukama.

Kunan tiempopas Diospa llaqtanpiqa imaymanakunan cambiakamushan, wakinninchispaqqa sasapaschá kanman chaykunata kasukuy. Yaqapaschá nisunman: “Imaraykutaq sapa kutillari kaykunari cambiakamun”, nispa. Yachasqapaschá kasharanchis ñaupaqpi imapas imayna ruwakusqanwan. Imaynaña karan chaypas kallpachakunanchischá karan mosoq ruwaykunaman yachakunanchispaq. Chhaynata ruwaranchis chayqa allinpunin karan, chayraykun Diospa bendicioninta chaskisunchis.

Moisespa tiemponpiqa waranqa-waranqanpi qharikunata, warmikunata, wawakunata iman Jehová Diosqa ch’inneq pampanta pusamuran. Manachus Dios paykunata cuidanman karan chayqa, wañupunkumanpaschá karan. Chay tiempopi jinan kay tukukuy sasa p’unchaykunapipas Jehová Diosqa llaqtanta cuidashan, imaymanakunatan apachimuwashanchis iñiyninchispi qaqata sayananchispaq. Chhaynaqa ñaupa tiempo Israel runakuna jina tukuy atisqanchista kallpachakusun Diospa kamachikuyninkunata kasukunanchispaq.