1. ¿Imatan Jehová Dios sapankanchiswan ruwaran?

JEHOVÁ DIOSMI sapankanchista llaqtanman pusamuwaranchis (Juan 6:44). Chaypaqqa kay pachapi millonnintin runakunaq sonqontan qhawariran, jinaspa sonqonchista qhawarispa rikuran allin sonqoyoq kasqanchista pay serviy munasqanchistapas (1 Crón. 28:9). Jehová Diosqa reqsiwanchismi, munakuwanchistaqmi. Chayta yachaspaqa anchatan kusikunchis ¿riki?

2. ¿Ima rijch’anachiywanmi Jesús rikuchiwanchis Jehová Dios sapankanchista munakuwasqanchista?

² Jehová Diosqa anchatan munakusunki, chay jinatan munakullantaq llapa iñiqmasinchiskunatapas. Chayta allinta entiendenanchispaqmi Jesusqa pachaj ovejayoq michiqmanta rimaran. Chay michiqqa jujnin ovejan chinkaruqtinmi isqon chunka isqonniyoq ovejankunata saqeykuspa chinkasqa ovejanta maskhaq purin. Tariruspaqa manan phiñakunchu aswanpas kusikunmi. Chay michiq jinan Diospas llapa ovejankunata munakun. Jesusmi niran: ‘Yayaypas manapunin munanchu kay juch’uykunamanta jujnillanpas chinkananta’, nispa (Mat. 18:12-14).

3. ¿Imakunamantan kaypi yachasunchis?

³ Noqanchisqa manan munanchischu rimasqanchiswanpas ruwasqanchiswanpas iñiqmasinchiskunata iñiyninkupi urmachiytaqa. Chaymi kunan kay tapuykunamanta yacharisunchis: ¿Imatan ruwasunman jujkunata ama urmachinanchispaq? ¿Imatan ruwasunman pipas sonqonchista k’iriwaqtinchis? Manaraq chaykunamanta yachashaspa ñaupaqta kay tapuymanta yachasun: ¿Pikunan kanku Mateo 18 capitulopi Jesuspa willasqan juch’uykuna?

4. ¿Pikunan kanku Jesuspa willasqan juch’uykuna?

⁴ Chay juch’uykunaqa kanku Jesuspa llapa qatikuqninkunan.  Kuraqña sullk’aña kanku chaypas paykunaqa wawakuna jinan kanku Jesuspa yachachisqanta uyarikusqankurayku (Mat. 18:3). Paykunaqa askha llaqtakunamantan kanku, sapankankupas jujniraymi kanku, chaywanpas llapallankun Jesuspi iñinku. Chaymi Jesusqa paykunata anchata munakun (Mat. 18:6; Juan 1:12).

5. ¿Imaynan Jehová Dios sientekun pipas serviqninkunata urmachiqtin?

⁵ Jehová Diospas anchatan munakun llapa juch’uykunata. Chayta allinta entiendenapaq rimasunchis wawakuna cuidaymanta. Wawakunaqa manan kuraqkuna jinachu kallpayoq, experienciayoq, yachayniyoq kanku. Chaymi paykunataqa astawan cuidanchis. Pipas runamasinchista sufrichin chayqa, llakikunchismi ¿riki? Wawakuna sufrichiqta rikuspan ichaqa phiñakunchisraq. Chay jinatan Jehová Diosqa noqanchistapas cuidawanchis, pipas mayqenninchista urmachiwaqtinchisqa payqa llakikunmi, mayninpitaq phiñakunraq (Isa. 63:9; Mar. 9:42).

6. 1 Corintios 1:26-29 nisqanman jina, ¿imaynatan juj runakuna Jesuspa qatikuqninkunata qhawarinku?

⁶ ¿Imaynapin Jesuspa qatikuqninkuna juch’uykunamanta kallankutaq? Yachasqanchis jina Diosta mana serviq runakunaqa qhapaq runakunata, allin reqsisqa runakunata, kay pachapi kamachikuqkunatan ancha allinpaq qhawarinku. Jesuspa qatikuqninkunan ichaqa mana allin reqsisqachu kanku, chaymi paykunata juch’uypaq otaq pisipaq jina qhawarinku (leey 1 Corintios 1:26-29). Jehová Diosmi ichaqa mana chhaynatachu paykunata qhawarin.

7. ¿Imaynatan iñiqmasinchiskunata rikunanchis?

⁷ Jehová Diosqa llapa iñiqmasinchiskunatan munakun chayllaraq otaq unayña payta servishanku chaypas. Chaymi noqanchispas llapa hermanonchiskunata munakunanchis (1 Ped. 2:17). Liston kashananchis hermanonchiskunata cuidananchispaq yanapananchispaqpas. Sichus mayqen iñiqmasinchistapas malta sienterachinchis chayqa, manan jinallataqa qhawananchischu, nitaq ninanchischu payqa imawanpas ratollan phiñarukun nispaqa, aswanpas perdontan mañakunanchis. ¿Imanaqtinmi wakin iñiqmasinchiskuna phiñakunku? Yaqapaschá wawa kasqankumantapacha pisichasqa karanku, jinaspa mana valeqpaq qhawarikunku, otaq chayllaraq Diosta reqsishanku, jinaspa sasata jujkunata perdonanku. Imaynaña kaqtinpas kallpachakunanchismi iñiqmasinchiskunawan sumaqta allichananchispaq. Sichus imallamantapas ratolla phiñakunchis chayqa, kallpachakunanchismi ama chhayna kananchispaq. Chayta ruwaspan kusisqa kasun, iñiqmasinchiskunawanpas sumaqta kausasunchis.

8. ¿Imaraykun Jesuspa qatikuqninkuna allin qhawarisqa kayta munaranku?

⁸ ¿Imaraykun Jesús rimaran juch’uykunamanta? Manaraq chaymanta rimashaqtinmi qatikuqninkunaqa Jesusta tapuranku: “¿Pitaq janaq pacha gobiernopiri kuraq kanqa?”, nispa (Mat. 18:1). Chay tiempopiqa yaqa llapa judío runakunan munaranku allin reqsisqa kayta, kamachikuq kaytapas. Judío runakunamanta yachaqmi nin: “Chay runakunaqa ima jinaraqmi munaqku jujkunaq respetananta, allin qhawarisqa kayta, qhapaq kaytapas”, nispa.

9. ¿Imatan Jesuspa qatikuqninkuna ruwananku?

⁹ Jesusqa yacharanmi judío runakunaqa jujkunamanta aswan allinpaq qhawarikusqankuta. Chaymi Jesusqa qatikuqninkunata niran: “Pipas qankuna ukhupi kuraqpaq qhawarikuqqa sullk’a jina kachun, pipas umalliq  kaqtaq jujkunata serviq kachun”, nispa (Luc. 22:26). Sullk’a kaq kananchispaqqa jujkunatan noqanchismanta aswan allinpaq qhawarinanchis (Filip. 2:3). Sichus chhayna kananchispaq kallpachakusun chayqa, manan iñiqmasinchiskunata urmachisunchu.

10. ¿Apóstol Pabloq ima nisqantan kasukunanchis?

¹⁰ Iñiqmasinchiskunaqa wakin ruwaykunapin noqanchismanta aswan allin kanku. Chaytan reparasunman allin kaq ruwasqankuta qhawarispa. Apóstol Pabloq nisqantan allinta yuyarinanchis, paymi niran: “¿Imaykiwantaq qanri jujkunamanta jatunpaq qhawarikunki? ¿Manachu tukuy imatapas Dios qorasunki? Paytaq qorasunki chayqa, ¿imaraykutaq qanri jatunchakunki kallpaykiwanpas tariwaq karan jinaraq?”, nispa (1 Cor. 4:7). Chhaynaqa amapuni imatapas ruwasunchu jujkuna admirawananchispaq jinaqa, nitaq jujkunamanta aswan allinpaq qhawarikusunchu. Sichus mayqen hermanopas juñunakuypi allinta yachachin, otaq juj hermanapas askha runakunaman Bibliamanta yachachin chayqa, Jehová Diostan gracias ninan chay ruway atisqanmanta.

11. ¿Imatan yachasunman Jesuspa willasqan rijch’anachiymanta?

¹¹ “Aman jujkunata urmachinkichischu” nisqan qhepamanmi Jesusqa juj rijch’anachiyta willaran, juj reymanta jujnin kamachinmantawan. Chay kamachiqa reymanmi sinchi askha qolqeta deberan, jinan reyqa payta khuyapayaspa llapa manunta perdonapuran. Chay qhepamantaq chay kamachiqa manukuqnin kamachimasinta mana perdonaranchu pisi qolqe manusqanta. Chayta yacharuspan reyqa mana khuyapayakuq kamachita carcelman wisq’achiran. ¿Imatan chaymanta yachasunman? Jesusmi niran: “Kaqllatataqmi janaq pacha Yayaypas ruwasunkichis manachus sapankaykichis wayqeykichista qankuna contra juchallikuqtin tukuy sonqowan perdonankichis chayqa”, nispa (Mat. 18:21-35).

12. ¿Imakunan pasanman hermanonchista mana perdonaqtinchis?

¹² Chay kamachi runaq mana allin ruwasqanqa paypaqpas jujkunapaqpas mana allinmi karan. Manukuqnin runatan carcelman wisq’achimuran manusqanta paganankama, jujkunapas chayta rikuspan sinchita llakikuranku. Chhaynallataqmi pitapas mana allinta trataqtinchisqa jujkunapas llakikunku. Sichus k’iriwaqninchis iñiqmasinchista mana perdonasunchu chayqa payqa llakikunqan. Chaymantapas chay hermanonchiswan mana allinpi kasqanchista rikuspan juj iñiqmasikunapas llakikunqaku.

13. ¿Imatan yachasunman Crystal hermananchista pasasqanmanta?

¹³ Iñiqmasinchiskunata perdonaspaqa kusisqan kanchis, jujkunapas kusisqan noqanchiswan kanku. Crystal sutiyoq precursora hermananchistan chay pasaran. Paymi nin: “Juj hermanawanmi mana allinpichu karayku. Paypa rimasqanmi sonqoyta k’iriwaq. Manan paywan kuskaqa Diosmanta willaqpas riyta munaqchu kani. Jinan manaña ñaupaqpi jinañachu Diosta kusisqa serviq kani”, nispa. Payqa niqmi: “Chay hermanapaqqa razonwanmi phiñasqa kashani”, nispa. Qhepamanmi ichaqa manaña paypaq phiñakuranchu nitaq payllapichu piensaran. 1999 watamanta 15 octubre killamanta La Atalaya revistapin rimashan “Sonqomanta perdonasun” nispa, chaypi nisqantan hermananchisqa kasukuran, jinan phiñachiqnin hermanata perdonapuran. Paymi nin: “Chayraqmi entiendeni llapanchispaqpas genionchista cambiayqa sasa kasqanta. Jinaspapas Jehová Diosqa munakusqanchisraykun sapa p’unchay perdonawanchis.  Kunanqa thajmi sientekuni, kusisqataqmi Diosta servishani”, nispa.

14. a) Mateo 18:21, 22 nisqanman jina, ¿iman Pedropaq sasa kanman karan, imatan yachasunman Jesuspa nisqamanta? b) ¿Iman yanapawasun perdonakuq kananchispaq?

¹⁴ Diosta serviqkunaqa yachananchismi jujkuna perdonayta, ichaqa mayninpiqa sasan jujkunata perdonayqa. Apóstol Pedropaqpas yaqachus jina perdonayqa sasa karan (leey Mateo 18:21, 22). Chhaynaqa, ¿iman yanapawasunman perdonakuq kananchispaq? Ñaupaq kaq, yuyarinanchismi Jehová Dios sapa kutilla perdonawasqanchista (Mat. 18:32, 33). Manaña perdonawananchispaq jinachu kanchis chaypas, munakuwasqanchisraykun perdonawanchis (Sal. 103:8-10). Chaymantapas ‘obligasqan kashanchis jujkuna-jujkunawan munanakunanchispaq’. Chaymi iñiqmasinchiskunataqa perdonananchispuni (1 Juan 4:11). Iskay kaq, jujkunata perdonasun chayqa imaymana allinkunan kanqa: k’iriwaqninchis runatan yanapashanchis, yanapakushanchismi iñiq t’aqapi sumaq kausay kananpaq, manan Jehová Diosmanta karunchakusunchu, sonqonchispipas thajmi sientekusun (2 Cor. 2:7; Col. 3:14). Kinsa kaq, Diosmantan mañakunanchis, paymi munan jujkunata perdonananchista. Satanasmi ichaqa munan phiñachinakunanchista, chaymi tukuy atisqanchista ruwananchis iñiqmasinchiskunawan allinpi kananchispaq (Efes. 4:26, 27). Jehová Diospa yanapayninwanqa manan Satanaspa trampanman urmasunchu.

15. Colosenses 3:13 nisqanman jina, ¿imatan ruwananchis pi iñiqmasinchispas phiñachiwaqtinchis?

¹⁵ ¿Imatan ruwananchis iñiqmasinchis phiñachiwaqtinchis? Tukuy atisqanchistan ruwananchis paywan thajpi kananchispaq. Jehová Diosmanmi willakunanchis imayna sientekusqanchista. Phiñachiwaqninchis iñiqmasinchispaqpas mañapunanchismi, chaymantapas mañakunanchismi chay hermanoq allinkuna  ruwasqanta reparananchispaq (Luc. 6:28). Mana perdonayta atispaqa paywanmi sumaqllata parlananchis. Manataqmi ninanchischu: “Payqa yuyaypin kaytaqa ruwawan”, nispaqa (Mat. 5:23, 24; 1 Cor. 13:7). Imachus niwasqanchistan creenanchis. Ichaqa, ¿imatan ruwanayki mana allichayta atiqtiykichis? Biblian nin: “Qankunapura paciencianakuychis”, nispa. Chhaynaqa paywanmi pacienciakunayki (leey Colosenses 3:13). Manataqmi paypaqqa phiñasqachu kashanayki, chhaynapin Diosmanta mana karunchakunkichu. Imaynaña kaqtinpas amapuni iñiyniykipi pisipaychu. Chayta ruwaspan rikuchishanchis Jehová Diosta imamantapas astawan munakusqanchista (Sal. 119:165).

16. ¿Imaynatan kausananchis iñiqmasinchiskunawan?

¹⁶ ¡Maytan Jehová Diosta agradecekunchis juj jinalla iñiqmasinchiskunawan payta servisqanchismanta, juj michiqnillayoq kasqanchismantapas! (Juan 10:16.) Organizados para hacer la voluntad de Jehová nisqa libropin 165 paginapi nin: “Llapallanchismi kallpachakunanchis iñiqmasinchiskunawan thajpi kausananchispaq”, nispa. Chaymantapas ninmi: “Sichus Jehová Dios jina iñiqmasinchiskunata qhawarisun chayqa, sumaqtan paykunawan kausasunchis”, nispa. Payqa llapallanchistan juch’uy wawakunata jina qhawariwanchis. Noqanchispas chhaynatan iñiqmasinchiskunata qhawarinanchis. Jehová Diosqa makillan qhawamushan iñiqmasinchiskunata yanapasqanchista cuidasqanchistapas, chaymi payta anchata kusichin (Mat. 10:42).

17. ¿Imakunatan ruwananchis?

¹⁷ Noqanchisqa llapa iñiqmasinchiskunatan munakunchis, chaymi manapuni ‘iñiqmasinchispa ñaupanpiqa ima urmachinatapas’ churananchischu (Rom. 14:13). Yuyarinanchismi iñiqmasinchiskunaqa noqanchismanta aswan allin kasqankuta, yachananchistaqmi sonqomanta perdonayta. Ama jujkunaq ima ruwasqanwanpas iñiyninchispi pisipasunchu. Aswanpas “tukuy atisqanchista ruwasun jujkunawan sumaqta kausananchispaq, kallpachanakunanchispaq ima” (Rom. 14:19).