1. ¿Imaniranmi apóstol Pedro Jerusalén fiestaman jamuq runakunata?

APOSTOLKUNAQ tiemponpin llapa llaqtakunamanta runakuna Jerusalenman riranku Pentecostés fiestaman. Chay p’unchaypin Jesuspa discipulonkunaqa Diospa santo espiritunta chaskiranku, jinaspa imaymana simikunapi rimayta qallariranku. Chaymi Jerusalén fiestaman jamuq runakunamanpas Diosmanta willayta qallariranku. Chaypin apóstol Pedroqa runakunata niran salvakunankupaqqa Jesuspi iñinankuta. Chayta uyarispan wakin runakunaqa niranku: “Wayqeykuna, ¿kunanri imatataq ruwasaqku?”, nispa. Jinan Pedroqa niran: “Juchaykichismanta pesapakuychis, jinaspa sapankaykichis bautizakuychis Jesucristoq sutinpi”, nispa (Hech. 2:37, 38).

2. ¿Imamantan kay yachachikuypi yachasunchis? (Qhaway tapanpi kaq fotota.)

² Apóstol Pedroq rimasqan qhepallamanmi 3.000 runakuna juj p’unchayllapi bautizakuranku. Chhaynapin Jesuspa qatikuqninkuna kapuranku, jinaspa runakunaman Diosmanta willayta qallariranku. Chaytan kunankamapas ruwashanchis, chaywanpas runakunata bautizakunankupaq yanapayqa manan facilchu. Yaqapaschá runakunataqa yachachinanchis kanqa askha killakuna otaq wata maspas. Kunanmi yachasunchis imaynatas estudiantenchiskunata yanapasunman bautizakunankupaq chayta.

3. Mateo 28:19, 20 nisqan jina, ¿imata ruwanankupaqmi estudiantenchiskunata yanapananchis manaraq bautizakushaqtinku?

³ Estudiantenchiskunataqa manaraq bautizakushaqtinkun yanapananchis Bibliapi yachasqankuman jina kausanankupaq  (leey Mateo 28:19, 20). Ñaupaqmantapacha chayta yachachisunchis chayqa “qaqa patapi” allin ruwasqa wasi jinan kanqaku, manataqmi ima sasachakuykunapi tarikuspapas pisikallpayanqakuchu (Mat. 7:24, 25; Luc. 6:47, 48). ¿Imaynatan estudiantenchiskunata yanapasunman Bibliapi yachasqankuman jina kausanankupaq? Kunanmi kinsa yanapaykunamanta yachasunchis.

4. ¿Imaynatan estudiantenchiskunata yanapasunman bautizakunankupaq? (Qhaway “ Estudiantenchiskunatan yanapananchis iñiyninkupi wiñarinankupaq” nisqata.)

⁴ Yanapasun pisi-pisimanta kallpachakunankupaq. May karu llaqtamanpas chakipi rishaspaqa sama-samarispan purinchis, chhaynapin mana usqhayllachu sayk’unchis, manataqmi karu kasqantapas reparanchischu. Chhaynallataqmi estudiantenchiskunawanpas, paykunapas pisi-pisimantan kallpachakunanku iñiyninkupi wiñarinankupaq bautizakunankupaq ima. Noqanchispas yanapasunmanmi estudiantenchiskunata Disfrute de la vida nisqa librowan. Chay libropiqa sapanka capituloq tukuyninpin nishan: “Kayta ruwanaykipaq kallpachakuy”, nispa. Chaypi nisqanta ruwanankupaqmi estudiantenchiskunata nisunman. Chaymantapas “Astawan ruwanaykipaq kallpachakuy” nisqapin qelqanman imapiwansi kallpachakunan kashan chayta. Chaykunan estudiantenchiskunata yanapanqa yachasqankuman jina kausanankupaq, bautizakunankupaq ima.

5. Marcos 10:17-22 nisqan jina, ¿imanispan Señorninchis Jesucristo juj qhapaq waynata niran? ¿Imaraykun chayta niran?

⁵ Yanapasun mana allin ruwaykunata saqepunankupaq (leey Marcos 10:17-22). Juj kutinmi Jesusqa juj qhapaq waynata niran llapa kaqninkunata vendespa payta qatikunanpaq (Mar. 10:23). Chaytaqa chay waynata munakuspan niran. Noqanchispas mana manchakuspan estudiantenchiskunata ninanchis imakunapis kallpachakunanku kashan Diospa munayninman jina kausanankupaq chayta  (Col. 3:9, 10). Chaytaqa qallariymantapachan ninanchis, chhaynapin paykuna munakusqanchista rikuchisun (Sal. 141:5; Prov. 27:17).

6. ¿Imaraykun estudiantenchiskunata tapunanchispuni imachus piensasqankuta?

⁶ Estudiantenchiskunataqa tapurinanchismi imatas yachasqankumanta piensanku chayta. Chayta ruwasunchis chayqa reparasunmi yachachisqanchista entiendeshankuchus icha manachus chayta, reparallasuntaqmi imakunapis yanapananchis kashan chaytapas. Chaykunata tapurisunchis chayqa confianzawanmi paykunawanqa imamantapas rimasunchis. Chaymantapas Disfrute de la vida nisqa libropin askha tapuykuna kan estudiantenchiskunata tapunanchispaq. Chaypin 4 yachachikuypi nin: “¿Imaynan Jehová Dios sientekunman sutinmanta mañakuqtiyki?”, nispa. 9 yachachikuypipas khaynatan nin: “¿Imakunamantan Jehová Diosmanta mañakuyta munanki?”, nispa. Manaña usqhaychu estudiantenchiskuna chay tapuykunaman kutichiwasunchis chaypas, pacienciawanmi paykunataqa uyarinanchis. Chaymantapas estudiantenchiskunawanmi Bibliata leesunman, jinaspa yanapasunman chay leesqanpi yuyaymanananpaq, dibujokunawanpas yanapachikusunmanmi.

7. ¿Imaynatan estudiantenchiskunata yanapallasunmantaq?

⁷ Chaymantapas estudiantenchiskunatan yanapallasunmantaq videokunata qhawachispa. Yaqapaschá estudiantenchiskunapaqqa sasa kanman juñunakuykunaman riy. Chhayna kaqtinqa qhawachisunmanmi Jehová Diosmi noqata qhawariwan nisqa videota. Chay videon kashan Disfrute de la vida nisqa libropi, “Astawan yachanapaq” nisqapi 14 yachachikuypi. Chay libropiqa askhan experienciakunapas videokunapas kashan estudiantenchiskunata yanapananchispaq. * Chay videokunata qhawachispaqa manan jujkunawanqa comparananchischu. Nitaqmi ninanchispaschu: “Manachu qanpas paykuna jina kallpachakuwaq”, nispaqa. Chayta nispaqa sientechisunmanmi. Aswanpas estudiantenchiskunatan yanapananchis imapis kallpachakunanku kashan chayta paykunallamanta reparakunankupaq. Chaymantapas paykunallamantan reparananku imaynatas videopi qhawachisqanchis iñiqmasinchiskunata Jehová Dios yanaparan chayta, imaynatas paykunatapas yanapanman chaytapas.

8. ¿Imaynatan estudiantenchiskunata yanapasunman Jehová Diosta astawan munakunankupaq?

⁸ Yanapasun Jehová Diosta munakunankupaq. Estudiantenchiskunaman yachachishaspaqa reparachinanchismi Jehová Diosqa munakuq, khuyapayakuq, chanin Dios kasqanta; paytapas anchatapuni munakusqanta (1 Tim. 1:11; Heb. 11:6). Sichus estudiantenchiskunaman yachachisun munakuwasqanchisrayku Jehová Dios imatapas kamachiwasqanchista chayqa, astawanmi Jehová Diosta munakunqaku, kasukuytataqmi munanqakupas (Isa. 48:17, 18; 1 Juan 5:3).

9. Marcos 10:29, 30 nisqan jina, ¿imakunatan estudiantenchiskuna saqepunanku kanqa bautizakunankupaq?

⁹ Estudiantenchiskuna bautizakunankupaqqa Jehová Diospa kamachikuyninkunatan kasukunanku. Chaypaqqa yaqapaschá saqepunanku kanqa llank’anankuta mana Diospa munayninman jinachu kasqanrayku. Jehová  Diosta mana serviq amigonkunatapas saqepunankun kanqa. Chaykunata ruwayqa manapaschá facilchu estudiantenchiskunapaqqa kanqa. Yaqapaschá kikin familiankupas paykunata cheqnikapunqaku. Chaywanpas sichus kallpachakushallanqaku Jehová Diospa kamachikuyninkunata kasukunankupaq chayqa pachantinpin munakuq familiata chaskinqaku (leey Marcos 10:29, 30). ¿Imaynatan estudiantenchiskunata yanapallasunmantaq bautizakunankupaq?

10. ¿Imatan yachasunman Manuel hermanonchispa nisqanmanta?

¹⁰ Kallpachakusun estudiantenchiskunawan amigontin kananchispaq. Chayta ruwasunchis chayqa yanapasunmi iñiyninkupi wiñarinankupaq. México nacionmanta Manuel hermanonchismi nin: “Sapa kutinmi yachachiqniyqa tapuwallaqpuni imayna kashasqayta. Chayta tapuwaqtinmi noqaqa mana manchakuspa imaymanata payman willakuq kani. Chaypin repararani yachachiqniyqa anchatapuni munakuwasqanta”, nispa.

11. ¿Imaraykun tiempota t’aqananchis estudiantenchiskunawan kuska kananchispaq?

¹¹ Jesusqa tiempotan t’aqaran discipulonkunawan kuska kananpaq (Juan 3:22). Noqanchispas tiempotan t’aqananchis estudiantenchiskunawan kuska kananchispaq. Sichus allinta iñiyninkupi wiñarishanku chayqa invitasunmanmi wasinchisman imallatapas mijunanchispaq. Chaymantapas kuskan qhawasunman JW Canal programapi lloqsimuq videokunata. Chayta ruwananchispaq kallpachakusunchis chayqa manañan sapankuchu sientekunqaku, nitaqmi runakunaq costumbre ruwasqankutapas munapayanqakuchu. Uganda nacionmanta Kazibwe iñiqmasinchismi nin: “Noqaqa imaymanatan yachachiqniymanta yacharani. Yachachiqniywan kuska kaspan repararani Jehová Diosqa munakuwasqanta, kusisqa kanayta munasqantapas”, nispa.

12. ¿Imaraykun kallpachakunanchis yachachiq rishaspa hermanonchiskunawan compañachikunanchispaq?

¹² Kallpachakusun juj iñiqmasinchiskunawan yachachiq rinanchispaq. Wakinninchisqa  yaqapaschá sapallanchis otaq juj iñiqmasillawanpas yachachiq rishasunman. Ichaqa aswan allinmi kanman juj hermanonchiskunatapas estudiantenchiskunaman pusariy, chhaynapi paykunatapas reqsinanpaq. Moldavia nacionmanta Dimitri hermanonchismi nin: “Yachachiqniyqa sapa semananmi juj hermanowanñataq yachachiq jamuwaq. Noqaqa sapanka hermanokunamantan imaymanata yacharani. Chaymi juñunakuyman rispapas manaña p’enqakuqchu kani askha hermanokunata reqsisqayrayku”, nispa.

13. ¿Imaraykun estudiantenchiskunata kallpachananchis juñunakuykunaman rinankupaq?

¹³ Yanapasun juñunakuykunaman rinankupaq. Jehová Diosmi kamachiwanchis juñunakuspa payta adorananchispaq (Heb. 10:24, 25). Chaymantapas iñiq t’aqapi hermanonchiskunaqa familianchismi kanku, paykunawanmi noqanchisqa juñunakuykunapi astawan kallpachanakunchis. Chaymi estudiantenchiskunata yanapananchis juñunakuykunaman rinankupaq. Chaymi paykunataqa yanapanqa Jehová Diosta munakunankupaq, jinaspa bautizakunankupaq. Ichaqa yaqapaschá estudiantenchiskunaqa sasapaq qhawarinkuman bautizakuyta. Chhayna kaqtinqa Disfrute de la vida nisqa librowanmi yanapachikusunman. ¿Imaynatan chayta ruwasunman?

14. ¿Imaynatan estudiantenchiskunata yanapallasunmantaq juñunakuykunaman jamunankupaq?

¹⁴ Disfrute de la vida nisqa libropiqa 10 yachachikuypin estudiantekunata kallpachashan juñunakuykunaman rinankupaq. Manaraq chay libro lloqsimushaqtinmi allin experienciayoq hermanokunata niranku chay libropi 10 yachachikuywan estudiantenkuta yanapanankupaq. Chay ruwasqankuqa allinpunin karan. Chay librowanmi hermanonchiskunaqa estudiantenkuta yanaparanku juñunakuykunaman rinankupaq. Noqanchispas ñaupaqmantapachan estudiantenchiskunata kallpachananchis juñunakuykunaman rinankupaq. Ichaqa manan llapa estudiantenchiskunachu kaqlla kanku, chaywanpas pacienciawanmi paykunata yanapananchis kanqa.

15. ¿Imatan yaqapas estudiantenchiskuna manchakunkuman?

¹⁵ Chayllaraq Bibliata estudiashaspaqa yaqapaschá manchakuranchis Diosmanta willayta. Chaymantapas yaqapaschá niranchis: “Diosmanta willaq lloqsiqtiyqa familiaychá phiñakunqa”, nispa. Wakin estudiantenchiskunapas chhaynapin tarikunku, chaymi paykunata kallpacharinanchis. Jesuspas discipulonkunatan kallpacharan ama manchakuq kanankupaq (Mat. 10:16, 17, 27, 28). ¿Imaynatan Jesús discipulonkunata yanaparan ama manchakuq kanankupaq? ¿Imaynatan noqanchispas estudiantenchiskunata yanapasunman ama manchakuq kanankupaq?

16. ¿Imaynatan estudiantenchiskunata yanapasunman Diosmanta yachasqankuta runakunaman willanankupaq?

¹⁶ Yanapasun Bibliapi yachasqankumanta jujkunaman willanankupaq. Yaqapaschá Jesuspa discipulonkunaqa manchakuranku Diosmanta willayta. Ichaqa Jesusmi paykunata yanaparan maykunapichus imaynatachus runakunaman yachachinanku karan chayta (Mat. 10:5-7). Chhaynatan noqanchispas estudiantenchiskunata yanaparisunman. Chaypaqqa yaqapaschá Bibliamanta yachachishaqtinchis estudiantenchista tapurisunman: “¿Pimantaq kay yachasqaykimanta willariwaq?”, nispa. Chaymantapas kuskan preparakusunman imaynatas runakunaman Diosmanta willanman chayta. Chaymantapas Disfrute de la vida nisqa librowanmi yanapachikusunman.  Chaypin nishan “Wakin runakunan kayta ninku”, “Wakin runakunan kayta tapukunku” nispa. Chaywanmi yanapachikusunman estudiantenchiskunata yanapananchispaq.

17. Mateo 10:19, 20, 29-31 nisqan jina, ¿imaynatan estudiantenchiskunata yanapasunman Jehová Diospi confianankupaq?

¹⁷ Yanapasun Jehová Diospi confianankupaq. Jesusqa discipulonkunatan niran Jehová Diosqa paykunata munakusqanta, Diosmanta willaqtinkupas yanapananta (leey Mateo 10:19, 20, 29-31). Noqanchispas sapa kutinmi estudiantenchiskunaman yuyarichinanchis Jehová Diosqa maytapuni paykunata munakusqanta, Diosmanta willaqtinkupas yanapananta. Chaymantapas kallpacharisunmanmi iñiyninpi wiñarinanpaq pay kikin mañakunanpaq. Polonia nacionmanta Franciszek iñiqmasinchismi nin: “Yachachiqniyqa mañakullaqpunin Jehová Diosmanta iñiyniypi wiñarinaypaq. Chaypin repararani imaynata Jehová Dios mañakusqanman kutichimusqanta. Chaymi noqapas mañakuyta qallarirani. Juj kutinmi Jehová Diosmanta mañakurani llank’anaypi permisota qowanankupaq. Chhaynapi asambleamanpas juñunakuykunamanpas rinaypaq. Jehová Diosqa uyariwaranmi mañakusqayta, chaymi anchatapuni kusikurani”, nispa.

18. ¿Imaynan Jehová Dios sientekun paymanta runakunaman yachachiqtinchis?

¹⁸ Yaqapaschá wakinninchisqa manaraq pimanpas Diosmanta yachachishanchischu. Chaywanpas hermanonchiskunaq estudiantenkunatan yanaparisunman. Chaypaqqa kallpachakunanchismi juj hermanonchiskunata yachachiq rishaqtin compañananchispaq. Jehová Diosqa anchatan estudiantenchiskunata munakun, yanapaytataqmi munashanpas. Noqanchistapas anchatan munakuwanchis, kusikuntaqmi paymanta runakunaman yachachiqtinchispas (Isa. 52:7).