1. ¿Imaraykun wakin hermanonchiskuna sapallanku sientekunkuman?

LLAPANCHISPAS kusisqan kayta munanchis, mayninpin ichaqa askha runakunawanña kashaspapas sapallanchis sientekusunman. Chhaynatan wakin hermanonchiskunapas sientekunku juj iñiq t’aqaman ripusqankurayku, mayqen familiankupas wañupusqanrayku otaq chayllaraq bautizakusqankuraykupas. Chaymantapas chhaynatan wakin hermanonchiskunaqa sientekullankutaq familianku cheqnikapusqankurayku, otaq Jehová Diosta mana serviq amigonkunata saqepusqankurayku.

2. ¿Ima tapuykunamanmi kay yachachikuypi kutichisunchis?

² Jehová Diosninchisqa allintan reqsiwanchis. Payqa yachanmi mayninpi sapallanchis sientekusqanchista, chaymi imaymanamanta yanapawanchis. Kay yachachikuypin kay tapuykunata kutichisunchis: ¿Imaynatan Jehová Dios yanapawanchis ama sapallanchis sientekunanchispaq? ¿Imakunatan ruwasunman sapallanchis sientekuqtinchis? ¿Imaynatan iñiq t’aqapi hermanokunata yanapasunman sapallanku sientekuqtinku?

3. ¿Imaynatan Jehová Dios Eliasta yanaparan?

³ Jehová Diosqa noqanchismantan llakikun, chaymi sapallanchisña llakisqaña sientekuqtinchispas yanapawanchis (Sal. 145:18, 19). Chaymi pasaran profeta Eliaswanpas, paytaqa enemigonkunan qatikacharanku wañuchiytaraqmi munarankupas (1 Rey. 19:1, 2). Chhaynapi tarikuspan Eliasqa sinchitapuni llakikuran, Jehová Diospa profetankunamantapas sapallanña qhepananpaqmi piensaran (1 Rey. 19:10). Ichaqa chhaynapi tarikusqanta rikuspan Jehová Diosqa juj angelta  kacharan Eliasta kallpachananpaq, jinaspapas willachiranmi mana sapallanchu kashasqanta (1 Rey. 19:5, 18).

4. Marcos 10:29, 30 nisqan jina, ¿imaynatan Jehová Dios yanapawanchis familianchiskunaña amigonchiskunaña cheqnikuwanchis chaypas?

⁴ Jehová Diosqa yachanmi payta servisqanchisrayku familianchiskunapas amigonchiskunapas cheqnikuwananchista. Juj kutinmi apóstol Pedro Jesusta niran: “Noqaykuqa tukuy imata saqespaykun qatikamushaykiku, ¿imataq noqaykupaqri kanqa?”, nispa (Mat. 19:27). Jesusmi ichaqa munakuywan discipulonkunata niran Diospa llaqtanpi askha familiata chaskinankuta (leey Marcos 10:29, 30). Kunanpas Jehová Diosqa manan saqerpariwanchischu, payqa yanapawallasunpunin (Sal. 9:10). Ichaqa, ¿imakunatan ruwasunman ama sapallanchis sientekunanchispaq? Kunanmi chaymanta yachasunchis.

5. ¿Imaraykun allinpuni kanman Jehová Diospa yanapawasqanchispi piensay?

⁵ Jehová Diospa yanapawasqanchispin piensananchis (Sal. 55:22). Chaykunapi piensasunchis chayqa manan nishutachu llakikusunchis. Yachasunchis Carol hermananchismanta, * payqa sapallanmi familianpi Jehová Diosta servin. Paymi nin: “Sapallay sientekuqtiyqa imaynata ñaupaqpi Jehová Dios yanapawasqanpin piensani. Chhaynapin yuyarini Jehová Diosqa maytapuni munakuwasqanta”, nispa.

6. 1 Pedro 5:9, 10 nisqan jina, ¿imaynatan Jehová Dios yanapan sapallan sientekuq hermanokunata?

⁶ Hermanonchiskunata Jehová Dios yanapashasqanpin piensananchis (leey 1 Pedro 5:9, 10). Hiroshi hermanonchismanta yachasun, paypas sapallanmi familianpi Jehová Diosta servin. Paymi nin: “Llapanchispas imaymana sasachakuykunapin tarikunchis. Maytan munasunman familianchiskunapas Jehová Diosta servinankuta. Chaywanpas iñiq t’aqapi hermanokunaq kallpachakusqanta rikuspan manaña sapaychu sientekuni”, nispa.

7. ¿Imaynatan Jehová Diosmanta mañakuy yanapawanchis?

⁷ Kallpachakunanchismi Jehová Diosmanta  mañakunanchispaq, Bibliata estudiananchispaq, juñunakuykunamanpas rinanchispaq. Jehová Diosmanqa mana manchakuspan willakunanchis imayna kashasqanchista imayna sientekusqanchistapas (1 Ped. 5:7). Massiel hermananchismanta yachasun. Paypa familianqa sinchitan phiñakuran Jehová Diosta servisqanrayku, chaymi familianqa paymanta t’aqakapuran. Paymi nin: “Mayninpiqa sapallaymi sientekuq kani. Ichaqa Jehová Diosmanta mañakuymi yanapawaran ama sapallay sientekunaypaq. Jehová Diostaqa papayta jinapunin qhawarini, chaymi paymanqa imaymanata willakuni”, nispa.

8. ¿Imaynatan Biblia estudiaypas chaypi yuyaymanaypas yanapawanchis?

⁸ Kallpachakunanchismi sapa p’unchay Bibliata leenanchispaq. Chaypin reparasunchis Jehová Diosqa maytapuni munakuwasqanchista. Bianca hermananchismanta yachasun, paytaqa familianmi pisichaq Jehová Diosta servisqanrayku. Paymi nin: “Noqataqa Bibliata leeymi yanapawan. Chaypin tarini ima sasachakuykunapis Diosta serviqkuna tarikuranku chayta, imaynatas Jehová Dios paykunata yanaparan chaytapas”, nispa. Wakin hermanonchiskunaqa umankupin jap’inku Salmos 27:10, Isaías 41:10 textokunata. Chay textokunapin paykunaqa yuyaymananku, chaymi paykunata yanapan ama sapallanku sientekunankupaq. Wakin hermanonchiskunataq grabasqata Bibliata uyarikunku, chhaynatan juñunakuykunapaqpas preparakunku, chaymi paykunatapas yanapan ama sapallanku sientekunankupaq.

9. ¿Imaynatan juñunakuykunaman riy yanapawanchis?

⁹ Kallpachakunanchismi juñunakuykunaman ama faltakuspa rinanchispaq. Juñunakuykunapiqa anchatan kallpachanakunchis, hermanonchiskunatapas astawanmi reqsinchis (Heb. 10:24, 25). Massiel hermananchismi nin: “Noqaqa manchalin karani, chaywanpas kallpachakuranin juñunakuykunapi comentanaypaq. Chaymi yanapawaran llapa hermanokunata familiayta jina qhawarinaypaq”, nispa.

10. ¿Imaraykun allin amigokunayoq kananchispaq kallpachakunanchis?

¹⁰ Kallpachakunanchismi iñiq t’aqapi allin amigokunayoq kananchispaq. Paykunan yanapawanchis Jehová Diosta munakunanchispaq, ama sapallanchis sientekunanchispaq ima. Ichaqa amigonchiskunaqa manan wiñaymasinchis llaqtamasinchis hermanokunallachu kananku. Biblian nin: “Askha watayoq runakunapin yuyayniyoq kayqa kashan”, nispa (Job 12:12). Chaymantapas kuraq hermanokunapas imaymanatan waynakunamanta yachankuman. Yuyarisunchis Davidmanta, paypa amigonqa Jonatanmi karan. Davidqa aswan waynallan karan, ichaqa allin amigontinmi  karanku, Jehová Diostapas anchatan munakuranku (1 Sam. 18:1). Iskayninkun sasa tiempopipas kallpachanakuranku Jehová Diosta servinankupaq (1 Sam. 23:16-18). Irina hermananchismanta yachasun, payqa sapallanmi Jehová Diosta servishan. Paymi nin: “Iñiq t’aqapi iñiqmasinchiskunaqa tayta-mamanchiskuna hermanonchiskuna jinan kapunku. Paykunawanmi Jehová Diosqa anchatapuni kallpachawanchis”, nispa.

11. ¿Imatan ruwananchis iñiq t’aqapi allin amigokunayoq kananchispaq?

¹¹ Yaqapaschá wakinninchispaqqa sinchi sasa kanman amigokunayoq kay. Chaywanpas kallpachakunanchismi iñiq t’aqapi allin amigokunayoq kananchispaq. Rita hermananchismanta yachasun. Payqa nishu manchalin karan, familianpas manan munaranchu Jehová Diosta servinanta. Paymi nin: “Manchakuraniña hemanokunawan rimayta chaypas, iñiq t’aqapi hermanonchiskunaq yanapaynintan mañakurani. Chaymi paykunaqa sumaqta yanapawaranku”, nispa. Chhaynaqa amigonchiskunamanqa willakunanchispunin imayna kashasqanchista, imayna sientekusqanchistapas. Chhaynapin paykunaqa sumaqta yanapawasunchis.

12. ¿Imatan ruwananchis allin amigokunata tarinanchispaq?

¹² Kallpachakunanchismi Diosmanta willaq lloqsinanchispaq, chaymi yanapawasunchis ama sapallanchis sientekunanchispaq. Carol hermananchismi nin: “Jehová Diospa llaqtanpi yanapakuspan askha amigokunayoq kapurani. Diosmanta willaq lloqsispapas allin amigokunatan tarirani, chhaynapin manaña sapallaychu sientekuq kani”, nispa. Chhaynaqa kallpachakunanchismi iñiq t’aqapi allin amigokunayoq kananchispaq, paykunan yanapawasunchis ama sapallanchis sientekunanchispaq (Prov. 17:17).

13. ¿Imata ruwananchispaqmi llapallanchis kallpachakunanchis?

¹³ Llapallanchismi kallpachakunanchis iñiq t’aqapi thaj kay kananpaq, chaymantapas munakuywanmi iñiqmasinchiskunata qhawarinanchis. Chayta ruwasunchis chayqa manan pipas iñiq t’aqapiqa sapallanqa sientekunqachu (Juan 13:35). Juj hermananchismi nin: “Chayllaraq Bibliamanta yachashaqtiyqa hermanokunan familiay jina kapuranku, paykunan anchatapuni yanapawaranku bautizakunaypaqpas”, nispa. Chhaynatan noqanchispas iñiq t’aqapi hermanonchiskunata yanapananchis ama sapallanku sientekunankupaq.

14. ¿Imaynatan chaskinanchis iñiq t’aqaman chayllaraq jamuqkunata?

¹⁴ Kallpachakunanchismi jujkunata sumaqta chaskinanchispaq. Kallpachakunanchismi juñunakuykunaman chayllaraq jamuq estudiantekunatapas juj iñiq t’aqamanta jamuq hermanonchiskunatapas sumaqta chaskinanchispaq (Rom. 15:7). Chaypaqqa yaqapaschá paykunata tapurisunman imayna kashasqankuta, jinaspapas atisqanchisman jinan yanaparisunman. Chaymi yanapawasunchis paykunawan allin amigontin kananchispaq. Ichaqa manan nishutachu tapupayananchis, wakinninkuqa manchakuq kasqankuraykun pisita rimanku. Chaymi paykunatapas sumaqllata rimapayananchis, pacienciawantaqmi uyarinanchispas. Chaymantapas yaqapaschá tapurisunman imaynatas Jehová Diosta reqsiranku chayta.

15. ¿Imaynatan umalliqkuna yanapankuman iñiq t’aqapi hermanokunata ama sapallanku sientekunankupaq?

¹⁵ Umalliqkunan astawanqa kallpachakunanku iñiq t’aqapi hermanokunata kallpacharinankupaq, iñiyninkupi yanapanankupaq ima. Melissa hermananchismanta yachasun.  Payqa mamitallanwanmi wiñaran, kuskan Jehová Diostapas servinku. Paymi nin: “Noqataqa juch’uychaymantapachan hermanokunaqa yanapawaranku. Paykunaqa papay jinapunin rimapayawaqku, pacienciawanmi uyariwaqkupas”, nispa. Yachallasuntaq Mauricio hermanonchismanta. Payta yachachiq hermanoqa iñiyninpin chiriyapusqa, chaymi payqa sapallan sientekuran. Paymi nin: “Noqataqa waynacha kasqaymantapachan umalliqkuna yanapawaranku. Paykunaqa tiempotan orqoqku noqawan rimanankupaq. Paykunawan kuskan Diosmanta willaqpas lloqsiq kani, chaypin paykunaqa Bibliapi yachasqankumanta willariwaqku. Chaymantapas tiempotan t’aqaqku noqawan pujllanankupaq”, nispa. Melissa hermananchispas Mauricio hermanonchispas kunanqa tukuy tiemponkuwanmi Jehová Diosta servishanku.

16, 17. ¿Imakunapin hermanonchiskunata yanaparisunman ama sapallanku sientekunankupaq?

¹⁶ Kallpachakunanchismi jujkunata yanapananchispaq (Gál. 6:10). Leo hermanonchisqa karutaraqmi ripuran Diosta tukuy tiemponwan servinanpaq. Paymi nin: “Juj kutinmi carroyta manejashaspa accidentakurani, chaymi sinchi llakisqa kasharani. Ichaqa chayllamanmi juj casarasqa hermanokuna invitawaranku wasinman mijuq rinaypaq. Paykunaqa sumaqtan uyariwaranku kallpachawaranku ima. Manan chay p’unchay mijusqaytaqa yuyanichu, astawanqa hermanokunaq kallpachawasqankutan yuyashani”, nispa.

¹⁷ Jatun juñunakuykunaman rispaqa kusisqan kanchis. Chaypin hermanonchiskunawanpas amigonchiskunawanpas tuparinchis, chaymantapas sumaqtan rimarinchis ima munay asamblea kasqanmanta. Wakin hermanonchiskunapaqmi ichaqa mana chhaynachu. Carol hermanchispas sapanmi sientekun jatun juñunakuykuna kaqtin. Paymi nin: “Jatun juñunakuykuna kaqtinqa sumaqtan wakin hermanokunaqa familiankuwan amigonkunawan tuparinku. Noqan ichaqa sapallay sientekuni, chaymi noqapaqqa sasa asambleakunaman riy”, nispa. Chaymantapas wakinpaqqa sasan asambleakunaman riy kallanmantaq qosanku otaq esposanku wañupusqanrayku. Yaqapaschá iñiq t’aqanchispi chhaynapi tarikuq hermanokunata reqsishanchis. Chhaynaqa kallpachakusunmanmi juj asambleakunapi paykunawan kuska kananchispaq, chhaynapin mana sapallankuchu sientekunqaku.

18. 2 Corintios 6:11-13 nisqan jina, ¿imaynatan hermanonchiskunaman sonqonchista kicharisunman?

 ¹⁸ Kallpachakunanchismi hermanonchiskunawan kuska kananchispaq. Hermanonchiskuna ama sapallanku sientekunankupaqqa yaqapaschá imallatapas wasinchispi ruwasunman paykunawan kuska kananchispaq, kusirikunanchispaq ima. Paykunamanqa ‘sonqonchistan jatunta kicharinanchis’ (leey 2 Corintios 6:11-13). Melissa hermananchismi nin: “Iñiq t’aqaypi hermanokunaqa wasinkumanmi invitawaqku. Chaymantapas paykunawan kuska maytapas rinaykupaqmi niwaqku. Paykunawan kaspayqa manan sapallaychu sientekuq kani, aswanpas kusisqan karani”, nispa. Noqanchispas chhaynatan kallpachakunanchis iñiq t’aqapi hermanonchiskunawan kuska kananchispaq.

19. ¿Ima p’unchaykunapin astawanqa hermanonchiskunawan kuska kananchis?

¹⁹ Wakin hermanonchiskunaq familianqa imaymana fiestakunatan ruwanku, chay p’unchaykunapin hermanonchiskunaqa sapallanku sientekunku. Chaymantapas sapallankun sientekullankutaq wañupuq familiankuta yuyarispanku. Chaymi kallpachakunanchis chay p’unchaykunapi paykunawan kuska kananchispaq, chhaynapin manaña sapallankuchu sientekunqaku (Filip. 2:20).

20. ¿Imaynatan Mateo 12:48-50 nisqan yanapawasunman ama sapallanchis sientekunanchispaq?

²⁰ Llapanchismi mayninpiqa sapallanchis sientekusunman. Jehová Diosmi ichaqa allinta entiendewanchis, chaymi hermanonchiskunawan kallpachawanchis (leey Mateo 12:48-50). Chaymantapas yaqapaschá imaymana sasachakuykunapi tarikushanchis, chaywanpas atisunmanmi sapallanku sientekuq hermanonchiskunata kallpachayta. Chhaynaqa manan sapallanchischu kashanchis, Jehová Diosmi noqanchiswan kashan.