Apóstol Pablon niran: “Noqaqa kamachikuy simiq yanapayninwanmi kamachikuy simipaq wañurani, chhaynapi Diospaq kausanaypaq”, nispa (Gál. 2:19).

Chaytan apóstol Pabloqa Galacia provinciapi kaq iñiq t’aqaman qelqaran. Chay iñiq t’aqapin rijuriran yanqa yachachiqkuna, paykunan cristianokunata niqku: “Moisespa chaskisqan kamachikuyta kasukuspallan salvasqa kasunchis”, nispa. Astawanqa qhari kayninkuta kuchuchikuymanta kamachikuyta kasukunankupaqmi kallpacharanku. Apóstol Pabloqa allintan yacharan qhari kayninkuta kuchuchikuymanta kamachikuytaqa manaña junt’anankuchu kasqanta. Chaymi allinta entiendechiran chay yachachikuykunaqa pantasqa kasqanta, jinaspan chaypi cristianokunata kallpacharan Jesuspa wañupusqanpi iñinankupaq (Gál. 2:4; 5:2).

Bibliapi willasqan jina, wañusqa runakunaqa manañan imatapas reparankuchu nitaq imatapas yachankuñachu (Ecl. 9:5). Apóstol Pablon niran: “Kamachikuy simipaqmi wañurani”, nispa. Chaywanmi nisharan manaña Moisespa chaskisqan kamachikuykunaman jinañachu kausasqanta, aswanpas Jesuspa wañupusqanpi iñispa Diosllapaqña kausasqanta.

Apóstol Pabloqa kamachikuy simitan allinta entienderan, chaymi niran: “Allintan yachanchis runaqa mana kamachikuy simita junt’asqanraykuchu chaninpaq jap’isqa kananta, aswanpas Cristo Jesuspi iñisqanraykulla chaninpaq jap’isqa kananta”, nispa (Gál. 2:16). Chaymantapas Gálatas iñiq t’aqatan nillarantaq: “Chhaynaqa, ¿imapaqtaq kamachikuy simiri karan? Chayqa karan jucha sut’iman orqosqa kananpaqmi, pimantachus promesata ruwakuran chay miray chayamunankamallataqmi kananpas karan”, nispa (Gál. 3:19). Chaypi nisqan jina, Israel runakunaqa juchayoq runa kasqankuraykun Diospa kamachikuyninkunataqa mana llapantachu junt’ayta atiranku, chaymi necesitaranku juj ch’uya sacrificiota otaq Jesuspa sacrificionta. Chayta entiendenankupaqmi Moisespa chaskisqan kamachikuykunaqa Israel runakunata yanaparan. Chayta entiendespa Jesuspi iñipuqkunataqa chaninpaqmi Diosqa qhawaripuq (Gál. 3:24). Apóstol Pablopas Jesuspi iñisqanraykun chaninpaq qhawarisqa karan, chaymi Diosllapaqña kausaran.

Chaymantapas apóstol Pabloqa Romapi cristianokunaman qelqasqanpin nillarantaq: “Chhaynaqa, wayqe-panaykuna, Cristoq cuerponraykun qankunapas kamachikuy simipaq ña wañupunkichisña [...]. Chhaynaqa, ñataq watawaqninchis kamachikuypaq wañupunchisña chayqa, kunanqa libreñan kapunchis kamachikuy simimanta”, nispa (Rom. 7:4, 6). Kay textopi nisqan jina, chaymantapas Gálatas 2:19 textopi nisqan jina, apóstol Pabloqa manan Moisespa chaskisqan kamachikuyta mana kasukusqanchisrayku wañuymantachu rimasharan, aswanpas chay kamachikuy simimanta libreña kapusqanchismantan rimasharan. Chhaynaqa, apóstol Pablopas juj cristianokunapas Jesuspa wañusqanpi iñisqankuraykun libreña kapuranku.