LISA * sutiyoq hermananchismi nin: “Hermanonchiskunaqa sumaq simiwanmi rimapayawarqanku, chaymi yanapawarqan Diospa llaqtanman jaykumunaypaq”, nispa. Chaytan Anne hermananchispas repararqan. Paymi nirqan: “Jehová Diospa testigonkunaqa sumaq sonqon karqanku, chaymi yanapawarqan Diosta servinaypaq”, nispa. Chay hermananchiskunaqa allintan Bibliata estudianku, yuyaymananku ima. Chhaynaña kaqtinpas iñiqmasinchiskunaq sumaq sonqo kasqankun paykunataqa yanaparqan Diospa llaqtanman jaykumunankupaq.

¿Imakunata ruwaspan sumaq sonqo kasqanchista rikuchisunman? Kay yachachikuypin yachasunchis imaynatas rimasqanchiswanpas ruwasqanchiswanpas sumaq sonqo kasqanchista rikuchisunman chayta. Chaymantapas yachasunmi pikunawansi sumaq sonqo kananchis chayta.

Proverbios 31 capitulopin willashan allin yuyayniyoq esposamanta, payqa “yachaywanpunin rimarin, ancha munakuywantaq yachachinpas” (Prov. 31:26). Payqa kallpachakunmi allinta yuyaykuspa rimananpaq, sumaq kunkawan rimananpaqpas. Tayta-mamakunapas kallpachakunankun sumaqta rimanankupaq. Tayta-mamakunaqa yachankun wawankuta k’araj simiwan rimapayaspaqa wawankuq sonqonta k’irinankuta. Sichus comunta imatapas rimanqaku chayqa manapaschá wawankuqa uyarikuyta munanqakuchu. Ichaqa sumaqllata rimapayanqaku chayqa yaqapaschá rimasqankuta uyarikuspa kasukunkuman.

Wawayoqña kasunman otaq manaña chaypas, ¿iman yanapawasunman sumaqta rimananchispaq? Proverbios 31:26 textopin niwanchis “yachaywanpuni” rimananchispaq. Chaypaqqa allin yuyaywanmi qhawarinanchis imatachus niyta munanchis chayta, imayna kunkawanchus rimananchistapas. Piwanpas parlashaspa phiñachinakuytaña qallarishaspaqa tapukuwaqmi: “Kay nisqay, ¿yanapanqachu uyariqniyta tranquilizakunanpaq icha astawanchu phiñachinqa?”, nispa (Prov. 15:1). Yachayniyoq runaqa allinta piensaspan imatapas rimanqa.

Chaymantapas Proverbios 12:18 textopin nin: “Jawan-ukhunta rimaqqa espadawan jinan k’irin”, nispa. Sichus reparakusun imachus nisqanchispas imayna kunkawan nisqanchispas jujkunata phiñachisqanta chayqa, cuidakusunmi ama chayta ruwananchispaq. Sumaq sonqoyoq kananchispaq kallpachakusun chayqa manan jujkunata k’iriq jinachu rimapayasunchis (Efes. 4:31, 32). Chaypaqqa mana allin piensasqanchistan sonqonchismanta wijch’unanchis, jinaspa allin kaqkunapi piensananchis, chaymi yanapawasun sumaq simikunawan rimayta yachananchispaq. Jehová Diosqa sumaq simikunawanmi jujkunata rimapayan. Juj kutinmi profeta Elías sinchi mancharisqa kasharqan, jinan Diospa angelninqa payta sumaqllata rimapayarqan (1 Rey. 19:12). Ichaqa sumaq sonqoyoq kasqanchistaqa manan rimasqallanchiswanchu rikuchinanchis. Chaytaqa rikuchinallanchistaqmi imachus ruwasqanchiswanpas. Qatimuqpin yachasun imaynatas chayta ruwasunman chayta.

Jehová Diosninchis jina kananchispaqqa sumaq simikunawanmi rimananchis, chaymantapas  ruwayninchispin chayqa rikukunan (Efes. 4:32; 5:1, 2). Ñaupaqpi rimasqanchis Lisa sutiyoq hermanaqa rikurqanmi iñiqmasinchiskunaq imachus ruwasqankuta. Paymi nillantaq: “Familiaywanmi qonqaylla juj ladoman astakunayku karqan, jinan iskay casarasqa testigokuna llank’anankumanta permisota mañakuspanku yanapawarqanku astakunaykupaq. Chay tiempopiqa manaraqmi Bibliataqa paykunawan estudiasharqaniraqchu”, nispa. Chayta rikuspan hermananchisqa Bibliamanta astawan yachayta munarqan.

Hermananchis Annepas rikurqanmi hermanonchiskunaq sumaq sonqo kasqankuta. Paymi nillarqantaq: “Noqaqa imaymana mana allin kausayta rikuspan mana pi runapipas confiaqchu kani. Jehová Diospa testigonkunata reqsishaspaypas qallariypiqa manan paykunapiqa confiarqanichu. Nirqanin: “Paykunaqa imaraykullapaschá noqawan sumaq kashanku, nispa”. Bibliamanta yachachiqniypin ichaqa pisi-pisimanta confiarqani, repararqanin cheqaqtapuni munakuwasqanta”, nispa. ¿Iman chay qhepaman pasarqan? Hermananchismi nin: “Tiempowanqa allintan yuyaymanarqani Bibliamanta yachashasqaypi, jinaspa chayman jina imatapas ruwarqani”, nispa.

 Chaypin sut’ita reparanchis hermanonchiskunaq sumaq sonqo kasqankuqa ancha allinpuni kasqanta. Chayta reparaspan paykunaqa astawanraq Bibliamanta yachayta munarqanku. Chaymantapas repararqankun iñiq t’aqapi hermanonchiskuna kallpachanapaq jina rimasqankuta, chaymi paykunataqa yanaparqan Jehová Diosta munakunankupaq.

Wakinqa mana sasachakuspallan asirikuspa sumaqta jujkunata rimapayanku llaqtankupi chay costumbre kasqanrayku. Chayqa allinmi, ichaqa chayraykulla chayta ruwasunman chayqa manan Diosninchis jina sumaq sonqoyoq kasqanchistachu rikuchishasunman (tupanachiy Hechos 28:2).

Diospa santo espiritunmi yanapawanchis sumaq sonqoyoq kananchispaqqa (Gál. 5:22, 23). Chay jinaqa, sichus munanchis Jehová Dios jina Jesús jina sumaq sonqoyoq kayta chayqa Jehová Diospa santo espirituntan mañakunanchis. Chaymi yanapawasun piensasqanchispas ruwasqanchispas allin kananpaq. Chaymantapas Jesusta qatikuqkunaqa cheqaqtapunin Diostapas runamasinchistapas munakunanchis. Chaymi kallpachakunanchis runamasinchiswan sumaq sonqoyoq kananchispaq, chhayna kasqanchismi Jehová Diosta kusichinqa.

Pikunachus sumaqta yanapariwasunman chayqa mana sasachakuspallan paykunawan sumaq sonqo kasunman (2 Sam. 2:6). Chaytaqa ruwasunman paykunata agradecekuspan (Col. 3:15). Ichaqa millayta tratawaqninchis runawanqa sasan kanman sumaq sonqoyoq kayqa.

Chaypaqqa Jehová Dios jinan kananchis, paypa sumaq sonqoyoqmi mana allinta ruwaqkunapaqpas, manan pipas pay jinaqa kanchu. Bibliapin chayta sut’inta willawanchis. Nuevo testamento nisqapin askha kutita Jehová Diosmanta rimaspa nin: “Payqa ancha khuyapayakuqmi”, nispa. ¿Imaynatan chhayna khuyapayakuq kasqanta rikuchirqan?

Jehová Diosqa millonninpi runakunamanmi sumaq sonqoyoq kasqanta rikuchin kausanankupaq imaymana mijuykunata qospa (Mat. 5:45). Chaymantapas Jehová Diosqa payta manaraq reqsishaqtinchismi sumaq sonqo noqanchiswan karqan (Efes. 2:4, 5, 8). Payqa runakunaraykun ancha munakusqan Churinta wañunanpaq kachamurqan. Apóstol Pabloq nisqan jina Jesuspa wañusqanraykun juchanchiskunamantapas perdonasqa kanchis (Efes. 1:7). Chaymantapas askha kutipiña sonqonta k’irirqanchis chaypas Jehová Diosqa yanapawashallarqanchismi, iphu para jinataq sumaqllata yachachiwarqanchis (Deut. 32:2). Manan jayk’aqpas kutichiyta atisunchu yanapawasqanchismanqa. Chaymantapas sumaq sonqoyoq kasqanraykun wiñay kausaytapas qowasun (tupanachiy 1 Pedro 1:13).

Sumaq sonqoyoq kasqanta yachaspan Diosman astawan asuykunchis, serviytapas munanchis. Chaymi noqanchispas mana wakin runakunallawanchu sumaq sonqoqa kananchis. Aswanpas kallpachakunanchismi sapa p’unchay Jehová Dios jina llapa runakunawan sumaq sonqo kananchispaq (1 Tes. 5:15). Sichus kallpachakusun sumaq sonqoyoq kananchispaq chayqa thajmi jujkunawan kausasunchis, kusisqataqmi kasunpas. Familianchiskunapas, iñiqmasinchiskunapas, llank’aqmasinchiskunapas, jujkunapas kusisqan noqanchiswan kanqaku.

Yaqapaschá mayqen familiaykipas otaq iñiqmasiykipas kallpachanata necesitashan otaq wasinta, huertanta limpiapunaykita necesitashan. Chaymantapas yaqapaschá mercadomanta ima rantipunaykitapas necesitashan. Wakin iñiqmasikunaqa necesitankun Diosmanta willaypi yanaparinanchistapas.

Jehová Dios jinan sumaq sonqoyoq kasqanchista rikuchisunman rimasqanchispipas ruwasqanchispipas.