1, 2. ¿Imaraykun llapallanchis estudiantekunata yanaparinanchis?

JUÑUNAKUYKUNAMAN jamuq estudiantekunataqa llapanchismi yanaparinanchis. Chayta ruwasunchis chayqa allintan iñiyninkupi wiñarinqaku bautizakunqaku ima. Chaytan Fiyi nacionmanta Amy hermananchispas nin: “Bibliamanta yachasqayqa anchatan gustawaran, ichaqa sasan karan noqapaqqa Jehová Diospa kamachikuyninkunata kasukuy. Ichaqa hermanokunan yanapawaranku bautizakunaykama”, nispa.

² Chhaynaqa llapanchismi yanapakusunman iñiq t’aqanchis wiñarinanpaq (Efes. 4:16). Vanuatu nacionmanta Leilani hermananchismi nin: “Llaqtaypiqa khaynatan ninku: ‘Juj wawataqa manan jujllachu yachachinan, llapanchismi yachachinanchis’, nispa. Chhaynatan noqanchispas estudiantekunataqa llapallanchis yanapananchis”, nispa. Wawakunataqa manan tayta-mamallankuchu yachachinku, paykunaqa imaymanatan yachallankutaq colegionkupi profesorkunamanta, juj familiankumanta, amigonkumanta ima. Chhaynatan noqanchispas iñiq t’aqapiqa llapallanchis estudiantekunata yanapasunman iñiyninkupi wiñarinankupaq jinaspa bautizakunankupaq (Prov. 15:22).

3. ¿Imatan yachasunman Ana, Daniel, Leilani iñiqmasinchiskunaq nisqankumanta?

³ Pimanpas Bibliamanta yachachishanki chayqa juj iñiqmasinchiskunaq yanapaynintan mañakunayki. Paykunapas allintan yanaparinkuman yachachisqanchis runataqa. Moldavia  nacionmanta tukuy tiemponwan Diosta serviq hermananchis Anan nin: “Yachachisqanchis runakunaqa imaymanamanta yanapananchistan necesitanku. Noqallanchisqa manapaschá llapanpiqa yanapariyta atisunmanchu”, nispa. Chay nacionmanta tukuy tiemponwan Diosta serviq Daniel * hermanonchismi nillantaq: “Wakin iñiqmasinchiskunaqa sumaqtan yachachisqanchis runakunata kallpacharinku, chaymi paykunataqa anchatapuni yanapan”, nispa. Leilani iñiqmasinchispas khaynatan nin: “Allinpunin juj iñiqmasinchiskunawan yachachiq riyqa. Yachachisqanchis runakunaqa iñiqmasinchiskuna munakuq sumaq sonqo kasqankuta rikuspan reparanku Jehová Diospa llaqtanmantapuni kasqanchista”, nispa (Juan 13:35).

4. ¿Imakunamantan kay yachachikuypi yachasunchis?

⁴ Wakinninchisqa manapaschá pimanpas Bibliamanta yachachishanchischu. Chaywanpas atisunmanmi iñiq t’aqapi estudiantekunata yanapayta. Kay yachachikuypin kaykunamanta yachasunchis: Imaynatas compañasqanchis hermanota yanapasunman chayta, imaynatas juñunakuykunaman jamuq estudiantekunatapas chaskinanchis chayta, imaynatas umalliqkunapas estudiantekunata yanaparinkuman chaymantawan.

5. ¿Imatan ruwananchis juj iñiqmasinchista compañashaspa?

⁵ Sichus juj iñiqmasinchis niwasunman yachachisqan runaman compañananchispaq chayqa, allintan paytaqa yanaparinanchis, payña masta yachachinqa chaypas (Ecl. 4:9, 10). Chhaynaqa, ¿imaynatan allinta iñiqmasinchista yanapasunman?

6. Proverbios 20:18 nisqan jina, ¿imakunatan ruwananchis manaraq pitapas compañashaspa?

⁶ Allintan preparakunanchis. Manaraq iñiqmasinchista compañashaspaqa ñaupaqtan preparakunanchis. Chaypaqqa yaqapaschá iñiqmasinchista tapurisunman imapis yachachisqan runata yanaparisunman chayta. Chaymantapas tapurillasunmantaqmi imamanta yachashasqankuta, imakunata mana tapunanchistapas; chhaynapin iñiqmasinchispa yachachisqan runata allinta yanapasunchis (leey Proverbios 20:18). Tukuy tiemponwan Diosta serviq Yeni hermananchispas chhaynatas ruwan, paymi nin: “Compañaqniy hermanakunamanqa pisillapipas willarinin yachachisqay runakunamantaqa, chaymi paykunaqa yachachisqay runata allinta yanaparinku”, nispa.

7. ¿Imaraykun noqanchispas hermanokunata compañaspa allinta preparakunanchis?

⁷ Mayqen hermanonchistapas yachachisqan  runaman compañaspaqa allintan noqanchispas preparakunanchis (Esd. 7:10). Chhaynatan estudianteta yanapasun paypas allinta preparakunanpaq. Daniel hermanonchismi nin: “Noqaqa anchatan kusikuni compañawaqniy hermano allin preparasqa kaqtinqa, chhaynapin estudianteyta allinta yanapan”, nispa.

8. ¿Imapaqmi allin preparasqa kashanallanchistaq?

⁸ Yaqapaschá compañasqanchis hermanoqa niwasunchis Diosmanta mañakunanchispaq, chaypaqpas allin preparasqan kashananchis. Chhaynapin estudianteta allinta yanapallasuntaq (Sal. 141:2). Japón nacionmanta Jana hermananchismi nin: “Juj kutinmi yachachiwaqniy hermanaqa juj hermanapiwan jamusqanku. Compañaqnin hermanaqa sumaqtan Jehová Diosmanta mañakuran, chaymi noqapas pay jina kayta munarani. Chaymantapas payqa noqamantawanmi Jehová Diosmanta mañakuran, chaypin repararani anchatapuni munakuwasqankuta”, nispa.

9. Santiago 1:19 nisqan jina, ¿imatan ruwananchis compañasqanchis hermano yachachishaqtin?

⁹ Compañasqanchis iñiqmasinchista yanapasun. Nigeria nacionmanta tukuy tiemponwan Diosta serviq Olinda hermananchismi nin: “Compañaq hermanoqa tukuy yuyaywanmi uyarinan yachachiq hermanotapas estudiantetapas. Chaymantapas manan nishutachu rimanan, estudianteta kallpacharinanpaq jinallan rimanan”, nispa (Prov. 25:11). Chhaynaqa tukuy yuyaywanmi uyarinanchis yachachiq hermanotapas estudiantetapas, chhaynapin paykunata allinta yanapasunchis (leey Santiago 1:19). Rimaspaqa imamantachus yachachishan chayman jinallan yapaykunanchis. Ichaqa manan nishutachu rimananchis, manataqmi sapa ratochu yachachiqnin hermanotapas tatichinanchis. Manaña yachachisqan rato nishutachu rimasunman chaypas felicitananchismi estudiantekunataqa. Chhaynapin paykunataqa astawan kallpachasunchis.

10. ¿Imakunata willasqanchismi estudiantekunata yanapanman?

¹⁰ Imaynatas Bibliamanta yachasqanchis yanapawaranchis chayta willarisun. Estudiantekunamanmi willarisunman imaynata Biblia estudiayta qallarisqanchista, imaynata sasachakuykunapi kashaqtinchispas Jehová Dios yanapawasqanchista (Sal. 78:4, 7). Chaykuna willasqanchisqa yanapanmanmi estudiantekunata. Chhaynapin paykunapas kallpachakunqaku sasachakuykunata atipaspa iñiyninkupi wiñarinankupaq, bautizakunankupaq ima (1 Ped. 5:9). Brasil nacionmanta hermanonchis Gabrielmi nin: “Bibliamanta yachashaqtiyqa wakin hermanokunan willawaranku imaynatas sasachakuykunata atiparanku chayta. Chaymi yanapawaran noqapas ima sasachakuykunatapas aguantanaypaq”, nispa.

11, 12. ¿Imaraykun juñunakuykunaman jamuq estudiantekunata sumaqta chaskinanchis?

¹¹ Estudiantekunataqa juñunakuykunan yanapanqa iñiyninkupi wiñarinankupaq bautizakunankupaq ima (Heb. 10:24, 25). Mayqen estudiantepas juñunakuyman jamuqtinqa sumaqtan paykunata chaskinanchis. Kallpachananchistaqmi juñunakuykunaman jamushanallanpaq. ¿Imaynatan chayta ruwasunman?

¹² Estudiantekunata sumaqta chaskisun (Rom. 15:7). Mayqen estudiantepas juñunakuyman jamuqtinqa sumaqtan napaykunanchis. Chayta ruwasunchis chayqa manan manchakunqakuchu, juñunakuykunamanpas jamushallanqakun. Chaymantapas juj hermanokunatan reqsichinanchis, rimasqankutapas tukuy yuyaywanmi uyarinanchis. Chaymantapas juj estudianteta sapallanta rikuspaqa manan qhawarparinanchischu. Dimitri hermanonchismi nin: “Chayllaraq juñunakuyman rishaqtiyqa manchasqan kasharani. Jinan juj hermano rikuramuwaspa sumaqta napaykuspa juñunakuyman pusaykuwaran. Chaypiqa askha hermanokunan sumaqta napaykuwaranku, chaywanmi noqaqa anchata kusikurani. Manan jayk’aqpas chhayna sumaqtaqa chaskiwarankuchu, chaymi munaq kani sapa p’unchay juñunakuykuna aparikunanta”, nispa. Kunanqa Dimitri hermanonchisqa iñiq t’aqapi yanapakuq kamachin kapun.

13. ¿Imaraykun kallpachakunanchis Bibliaq nisqanman jinapuni kausananchispaq?

¹³ Allin ejemplon estudiantekunapaq kananchis. Estudiantekunaqa mastaqa qhawanku imayna kausasqanchistan. Sichus Bibliaq nisqanman jina kausasunchis chayqa, paykunapas ninqakun: “Kaypunimá cheqaq religionqa”, nispa (Mat. 5:16). Moldavia nacionmanta Victor hermanonchismi nin: “Juñunakuykunaman rispan rikurani hermanokunaqa Bibliaq nisqanman jinapuni kausasqankuta. Chaymi nirani: ‘Kaypunimá Diospa llaqtanqa kasqa’”, nispa.

14. ¿Imaynatan estudiantekunata yanapallasunmantaq bautizakunankupaq?

¹⁴ Estudiantekuna bautizakunankupaqqa Bibliaq yachachisqanman jinapunin kausananku. Chaypaqqa ejemplonchismi paykunataqa yanapanqa. Bibliaq yachachisqanman jina kausasqanchista rikuspan paykunapas kallpachakunqaku (1 Cor. 11:1). Chaymi yanaparan Jana hermananchistapas, paymi nin: “Hermanokunaqa Bibliaq yachachisqanman jinapunin kausaranku. Kallpachakurankun jujkunata yanapanankupaq, munakunankupaq, perdonanankupaq ima. Chayta rikuspan noqapas kallpachakurani paykuna jina kanaypaq”, nispa.

15. Proverbios 27:17 nisqan jina, ¿imaraykun kallpachakunanchis estudiantekunaq amigon kananchispaq?

 ¹⁵ Kallpachakunanchismi estudiantekunawan amigontin kananchispaq. Estudiantekuna juñunakuykunaman jamuqtinkuqa, sumaqtan paykunawan parlarinanchis. Tapurisunmanmi familian imayna kashasqanta, llank’ananmanta, Biblia estudiashasqanmanta ima (Filip. 2:4). Chaymantapas nisunmanmi: “Allinpunin juñunakuykunaman jamusqaykiqa, Jehová Diospa kamachikuyninkunata kasukushasqaykipas”, nispa. Chhaynapin paykunawan pisi-pisimanta allin amigontin kapusunchis. Chaytaqmi paykunata yanapanqa allin iñiyniyoq kanankupaq, jinaspa bautizakunankupaq (leey Proverbios 27:17). Jana hermananchismi nin: “Wakin hermanokunaqa amigoykunan kapuranku, chaymi sayk’usqaña kashaspapas kallpachakurani juñunakuykunaman rinaypaq. Chhaynapin Jehová Diosta mana serviq amigoykunatapas facil-llata saqepurani. Noqaqa hermanokunawan kuskan Jehová Diosta serviyta munarani, chaymi bautizakapurani”, nispa. Kunanqa hermananchisqa precursoran kapun.

16. ¿Imaynatan estudiantekunata yanapallasunmantaq?

¹⁶ Juj estudiante astawan iñiyninpi wiñarinanpaqqa wasinchismanmi pusasunman imallatapas invitananchispaq. Chhaynapin paykunaqa familianta jina qhawariwasunchis (Heb. 13:2). Moldavia nacionmanta hermanonchis Darion nin: “Bibliata chayllaraq esposaypiwan estudiashaqtiykuqa hermanokunan wasinkuman pusawaranku. Chaypin willawaqku Jehová Dios imaynata paykunata yanapasqanta”, nispa. Chaymantapas sichus juj estudiante Diosmanta willashanña chayqa, nisunmanmi paywan kuska Diosmanta willananchispaq. Brasil nacionmanta Diego hermanonchismi nin: “Chayllaraq Diosmanta willaq lloqsishaqtiyqa askha hermanokunan niwaranku paykunawan kuska lloqsinaypaq. Chaymi yanapawaran astawan Diosman achhuykunaypaq”, nispa.

17. ¿Imata ruwanankupaqmi umalliqkuna kallpachakunanku?

¹⁷ Umalliqkunaqa t’aqanankupunin tiemponkutaqa estudiantekunata yanapanankupaq. Chaymi paykunataqa yanapanqa iñiyninkupi wiñarinankupaq bautizakunankupaq ima. Imaymana ruwanayoqña umalliqkuna kankuman chaypas, kallpachakunankun estudiantekunata astawan reqsinankupaq, sutinkumanta napaykunankupaq ima. Chaykunan juj estudiantetaqa yanapanqa iñiyninpi wiñarinanpaq. Chaymantapas umalliqkunaqa kallpachakunankun Bibliamanta yachachiq hermanota compañanankupaq. Nigeria nacionmanta Yaki hermananchismi nin:  “Mayninpiqa umalliqkunatan pusani estudianteykunata kallpacharinanpaq, chayta rikuspan paykunaqa anchata kusikunku. Juj kutinmi juj estudiantey niwaran: ‘Juj iglesiapi kashaqtiyqa manan jayk’aqllapas pastorqa visitamuwaranchu. Paykunaqa qhapaqkunaq wasillanmanmi rinku’, nispa. Chay estudianteyqa mana faltakuspan juñunakuykunaman jamushan, chaywanmi noqapas ancha kusisqa kashani”, nispa.

18. Hechos 20:28 nisqan jina, ¿imata ruwanankupaqmi umalliqkuna kallpachakunanku?

¹⁸ Umalliqkunaqa hermanokunatan kallpachananku, yanapanankutaqmi allin yachachiq kanankupaq (leey Hechos 20:28). Umalliqkuna, yaqapaschá wakin hermanokunaqa manchakunqaku qankunawan Diosmanta yachachiq riyta. Chhaynaqa qankunan paykunata niwaqchis yanapanaykichispaq. Yaki hermananchismi nin: “Anchatan kusikuni umalliqkuna estudianteykunamanta tapuwaqtinkuqa. Paykunaqa sumaqtan yuyaychawanku imaynata estudianteykunata yanapanaypaq”, nispa. Chaymantapas umalliqkunaqa hermanokunatan kallpachanku kusisqalla runakunaman yachachishanallankupaq (1 Tes. 5:11). Yaki hermananchismi nillantaq: “Umalliqkunan niwanku: ‘Kusa, allintan ruwashanki, kallpachakushallay’, nispa. Chayta niwasqankun kallpachawan kusisqa runakunaman yachachishanallaypaq. Chaypin rikuni umalliqkunaqa ch’akichikuypi thasnuq unu jina kasqankuta”, nispa (Prov. 25:25).

19. ¿Imata ruwananchispaqmi llapallanchis kallpachakunanchis?

¹⁹ Manaña pimanpas Bibliamanta yachachishanchischu chaypas, kallpachakunanchismi juj estudiantekunata yanapananchispaq. Chayta ruwasunchis chayqa iñiyninkupin wiñarinqaku bautizakunqaku ima. Chaymi juj hermanota yachachinanpaq compañaspaqa mana nishutachu rimananchis, aswanpas yanapananchispaq jinallan rimananchis. Chaymantapas kallpachakunanchismi estudiantekunawan allin amigontin kananchispaq, allin ejemplotaqmi paykunapaqqa kananchis. Umalliqkunapas tiempotan orqonanku estudiantekunata yanapanankupaq, hermanokunatapas yanapanankun allin yachachiq kanankupaq. Sichus estudiantekunata llapallanchis kallpachasun Jehová Diosta servinankupaq chayqa kusisqan kasun.