1. ¿Ima sasachakuykunapin mayninpi tarikusunman?

MAYNINPIQA imaymana sasachakuykunapin tarikunchis. Yaqapaschá juj hermano sonqonchista k’iriwasunman, otaq Diosta servisqanchisrayku escuelanchispipas otaq llank’ananchispipas noqanchismanta burlakunkuman (Sant. 3:2; 1 Ped. 4:3, 4). Otaq familianchiskuna mana munankumanchu juñunakuykunaman rinanchista, Diosmanta willaq rinanchistapas (Mat. 10:35, 36). Chaykunapi tarikuspaqa pisikallpayasunmanmi, Diostapas manañan serviyta munapusunmanchu. Ichaqa manan pisikallpayananchischu, Jehová Diosqa yanapawasunpunin chay llakikuykunata aguantananchispaq.

2. Romanos 15:4 nisqan jina, ¿imaynatan Biblia leesqanchis yanapawasunman?

² Bibliapin willashan imaynatas wakin runakuna sasachakuyninkuta atiparanku chayta. Chaykunatan Jehová Diosqa Bibliapi qelqachiran yachananchispaq. Chaytan apóstol Pablopas nin Romanos 15:4 (leey) textopi. Chaykunata leesqanchismi yanapawasun ama nishuta llakikunanchispaq, aswanpas Jehová Diospi confiananchispaq. Chaymi Bibliataqa mana leeyllachu leenanchis, aswanpas imatachus yachasqanchisman jinan kausananchis. Chaypaqmi kaykunata ruwasunman: Juj) mañakunanchis. Iskay) chaypipas kashasunman jinan piensananchis. Kinsa) reparananchismi imaynata Jehová Dios serviqninkunata yanapasqanta. Tawa) yachasqanchisman  jinan kausananchis. Sapankamantan kunan kay yachachikuypi yachasunchis. * Chaymantapas yachallasuntaqmi rey Davidmanta apóstol Pablomantapas.

3. ¿Imatan ruwananchis manaraq Bibliata estudiashaspa?

³ Juj) mañakunanchis. Manaraq Bibliata leeshaspaqa Jehová Diosmantan santo espiritunta mañakunanchis, chhaynapi Biblia leesqanchista entiendenanchispaq. Ima sasachakuykunapiña tarikuspapas Jehová Diosmantan mañakunanchis simin qelqawan yanapawananchispaq (Filip. 4:6, 7; Sant. 1:5).

4. ¿Imatan ruwananchis Bibliata leeshaspa?

⁴ Iskay) chaypipas kashasunman jinan piensananchis. Bibliata leeshaspaqa chaypipas kashasunman jinan piensananchis. Bibliapi pimantapas leeshanchis chayqa, reparananchismi imakunata rikushasqanta imayna kashasqantapas; paykunawan kuskapas purishasunman jinan piensananchis.

5. ¿Imatan ruwananchis Bibliaq nisqanta allinta reparananchispaq?

⁵ Kinsa) reparananchismi imaynata Jehová Dios serviqninkunata yanapasqanta. Chaypaqqa tukuy yuyaywanmi Bibliata leenanchis, reparananchistaqmi imaynata noqanchistapas Jehová Dios yanapawasunman chayta. Chhaynapin Biblia leesqanchistaqa aswan allinta entiendesun. Bibliata tukuy yuyaywan leeyqa wasita perqay jinan, tukuruspaqa sumaq wasitan rikusunchis. Mana yuyaykuspa comunta leeymi ichaqa pampapi adobekunata qhaway jinalla kanman, manaraqpas wasi perqayta qallarisunmanchu jina. Chaypaqqa pimantapas Bibliapi leeshaspaqa reparananchismi imaynata chay sasachakuykunata atiparan chayta, imaynata Jehová Dios payta yanaparan, imaynatan noqanchispas kaqllata ruwasunman chaytapas.

6. ¿Imaraykun Bibliaq nisqanman jina kausananchis?

⁶ Tawa) yachasqanchisman jinan kausananchis. Jesusmi niran: “Pipas kay nisqaykunata uyarispa mana junt’aqmi ichaqa, aqo patapi wasinta ruwaq mana yuyayniyoq runa jina kanman. Sinchita paramuqtinmi unu yapakuran, jinaspa chay wasiman jaykuran, wayrapas sinchita wayramuspa wasiman waqtakuran, chay wasitaq urmaspa manchayta thunikapuran”, nispa (Mat. 7:24-27). Yaqapaschá Bibliata leenanchispaq Jehová Diosmanta mañakushanchis, chaypipas kashasunman jina piensashanchis, imaynata Jehová Dios serviqninkunata yanapasqantapas reparashanchis. Ichaqa, manataq Bibliapi yachasqanchisman jinachu kausashanchis chayqa yanqapaqmi kanman. Jesuspa nisqan jina, mana yuyayniyoq runa jinan kasunman, ima sasachakuykunapi tarikuspapas manan aguantayta atisunmanchu. Bibliaq nisqanta kasukusunchis chayqa allintan imatapas ruwasun. Ima sasachakuykunapiña tarikusunchis chaypas aguantasunmi chaykunata (Isa. 48:17, 18). Kunanqa rey Davidmanta yachasun.

7. ¿Pimantan kunan yachasunchis?

⁷ Kunanmi yachasunchis rey Davidpa wawan Absalonmanta. Absalonqa taytan contran sayariran, rantinpitaq rey kayta munaran (2 Sam. 15:5-14, 31; 18:6-14). Yaqapaschá chhaynata mayqen familianchispas otaq mayqen amigonchispas noqanchis contra sayarinkuman. ¿Imatan ruwasunman chhaynapi tarikuspa?

8. ¿Imakunatan Jehová Diosmanta mañakunanchis manaraq Bibliata leeshaspa?

⁸ Juj) mañakunanchismi. Manaraq Davidpa  vidanmanta Bibliapi leeshaspaqa Jehová Diosmanmi willakunanchis imayna kashasqanchista (Sal. 6:6-9). Chaymantapas mañakunanchismi Bibliaq nisqanta allinta entiendenanchispaq, chhaynapi Bibliaq nisqanman jina allinta imatapas ruwananchispaq.

9. ¿Imatan Absalón ruwaran rey kayta munaspa?

⁹ Iskay) chaypipas kashasunman jinan piensananchis. Rey Davidqa imayna llakisqachá kasharan churin Absalón pay contra sayariqtinqa. Churin Absalonqa unay watakunañan runakunaq sonqonta suwasharan, chhaynapi pay rey kananpaq (2 Sam. 15:7). Davidpa amigon Ahitofeltan engañaran David contra sayarinanpaq. Jinaspan yanapaqnin runakunata kacharan llapa Israel runakunaman rey kapusqanta willamunankupaq. Chaymantataq pay kikin rey kananpaq churakuran, jinaspa papanta wañuchiyta munaran. Yaqapaschá chay kutipaqqa papanqa onqosqa kasharan (Sal. 41:1-9). Chayta yacharuspan Davidqa Jerusalén llaqtamanta ayqekuran. Qhepamanmi ichaqa Davidta yanapaq runakunaqa Absalonta runankunatawan wañuchipuranku.

10. ¿Imatan David mana ruwaranchu llakisqaña kasharan chaypas?

¹⁰ Rey Davidqa may llakisqachá kasharan munakusqan wawan Absalonpas amigon Ahitofelpas pay contra sayarispa wañuchiyta munasqankumanta. Davidqa sasachakuykunapiña tarikuran chaypas manan pisiparanchu. Manan payqa niranchu: “Wawaypas amigoypas noqa contrataq sayarinku chayqa, llapankuchá noqa contra kashanku. Aswanpas sapay maytapas ripusaq, jina imapas kachun”, nispaqa.

11. ¿Imatan David ruwaran sasachakuykunapiña tarikuspapas?

¹¹ Kinsa) reparananchismi imaynata Jehová Dios serviqninkunata yanapasqanta. Chhayna sasachakuykunapiña David tarikuran chaypas, manan chaywanchu pisikallpayaran, manataqmi chayraykuchu comunta imatapas ruwaran. Aswanpas Jehová Diospa yanapaynintan mañakuran. Chaymantapas Davidqa confiashallaranmi amigonkunapi, chaymi paykunaq yanapayninta mañakuran.

12. ¿Imaynatan Jehová Dios Davidta yanaparan?

¹² ¿Imaynatan Jehová Dios Davidta yanaparan? Jehová Diosqa kallpatan Davidman qoran chay sasachakuykunata aguantananpaq (Sal. 3:1-8). Chaymantapas Jehová Diosqa yanaparanmi Davidpa ima ruwasqantapas, chaymi amigonkunatapas yanaparan Absalonpa runankunata atipanankupaq.

13. Mateo 18:15-17 nisqan jina, ¿imatan David jina ruwananchis pipas sonqonchista k’iriwaqtinchis?

¹³ Tawa) yachasqanchisman jinan kausananchis. Yaqapaschá pipas sonqonchista k’iriwasunman, chhayna kaqtinqa usqhayllan chayta allichananchis. Chaytan ruwasunman Jesuspa kamachiwasqanchisman jina (leey Mateo 18:15-17). Ichaqa manan piensasqanchisman jinallachu comunta imatapas ruwananchis, aswanpas Jehová Diosmantan yachayta mañakunanchis sumaqta chayta allichananchispaq. Chaymantapas confiashanallanchismi amigonchiskunapiqa, imataña allinninchispaq niwasun chaypas uyarikunanchismi (Prov. 17:17). Astawanqa simin qelqapi Jehová Diospa niwasqanchistan uyarikunanchis (Prov. 3:5, 6).

14. ¿Ima sasachakuykunapi tarikuspan yanapawasunman 2 Timoteo 1:12-16; 4:6-11, 17-22 textoq nisqan?

¹⁴ Yaqapaschá mayqen familianchispas mana munanmanchu Jehová Diosta servinanchista. Otaq gobiernokuna jark’akunkuman Diosmanta willananchista. Chhayna  sasachakuykunapi tarikuspan 2 Timoteo 1:12-16; 4:6-11, 17-22 yanapawasunman. * Chaykunatan apóstol Pablo carcelpi kashaspa qelqaran.

15. ¿Imatan Jehová Diosmanta mañakusunman?

¹⁵ Juj) mañakuy. Manaraq chay textokunata leeshaspan Jehová Diosman willakunanchis imayna kashasqanchista, ima sasachakuykunapi tarikushasqanchistapas. Chaymantapas Jehová Diosmantan mañakunanchis chaypi leesqanchista allinta entiendenanchispaq, chhaynapi chay kamachikuykunaman jina allinta imatapas ruwananchispaq.

16. ¿Imaynan apóstol Pablo kasharan?

¹⁶ Iskay) chaypipas kashasunman jinan piensananchis. Chay textokunata leeshaspaqa apóstol Pablowanpas kashasunman jinan piensananchis. Payqa Roma llaqtapin carcelpi wisq’asqa kasharan, chay kutipiqa yachakuranmi wañuchinankuta. Chaymantapas apóstol Pablotaqa compañeronkunan saqerpariranku, chaymi kallpanpas manaña karanñachu (2 Tim. 1:15).

17. ¿Imatan yaqapas apóstol Pablo ruwanman karan sasachakuykunapi tarikuspa?

¹⁷ Chhayna sasachakuykunapi tarikuspaqa yaqapaschá apóstol Pabloqa ninman karan: “Diosta mana serviymanchu karan chayqa, manapaschá carcelpichu kashayman karan”, nispa. Chaymantapas phiñakunmanpaschá karan Asia provinciapi amigonkunapaq, jinaspa manaña mayqen hermanokunapipas confianmanchu karan. Ichaqa manan chaytachu ruwaran, payqa confiashallaranmi Jehová Diospipas amigonkunapipas.

18. ¿Imatan apóstol Pablo ruwaran sasachakuypiña kashaspapas?

¹⁸ Kinsa) reparananchismi imaynata Jehová Dios serviqninkunata yanapasqanta. Apóstol Pablo yacharanña wañupunanta chaypas manan chaywanchu pisikallpayaran. Aswanpas kallpachakushallaranmi Jehová Diosta jatunchananpaq, hermanokunatapas yanapananpaq kallpachananpaq ima (2 Tim. 1:3). Chaymantapas apóstol Pabloqa manan saqerparisqankuraykuchu phiñakuran. Aswanpas ñaupaqpi yanapasqankumantan amigonkunata “gracias” niran. Chaymantapas Bibliataqa estudiashallaranmi (2 Tim. 3:16, 17; 4:13). Apóstol Pabloqa yacharanmi Jehová Diospas Jesuspas payta munakusqankuta, wiñay kausayta qonantapas.

19. ¿Imaynatan apóstol Pablota Jehová Dios kallpacharan?

¹⁹ Apóstol Pabloqa yacharanmi Jehová Diosta servisqanrayku qatiykachasqa kananta (Hech. 21:11-13). Jehová Diosmi ichaqa apóstol Pablota yanaparan. Chaymi Jehová Diosqa Pabloq mañakusqanta uyariran kallpacharan ima (2 Tim. 4:17). Chaymantapas amigonkunatan Jehová Diosqa kacharan apóstol Pablota kallpachanankupaq. Nirantaqmi kallpachakusqanrayku wiñay kausay coronata chaskinantapas.

20. Romanos 8:38, 39 nisqan jina, ¿imata ruwananchispaqmi apóstol Pablo jina kallpachakunanchis?

²⁰ Tawa) yachasqanchisman jinan kausananchis. Yaqapaschá noqanchispas Jehová Diosta servisqanchisrayku qatiykachasqa kasunchis (Mar. 10:29, 30). Chaywanpas apóstol Pablo jinan noqanchispas mana jayk’aqpas Jehová Diostaqa saqenanchischu, aswanpas paytaqa servishanallanchismi. Chaypaqmi Jehová Diosmanta mañakunanchis, kallpachakunanchistaqmi sapa p’unchay Bibliata leenanchispaq. Jehová Diosqa manan jayk’aqpas saqerpariwasunchu, paymantaqa manan imapas t’aqawasunchu (leey Romanos 8:38, 39; Heb. 13:5, 6).

21. ¿Iman Yumi hermananchistapas Hector hermanonchistapas yanaparan sasachakuyninkuta atipanankupaq?

²¹ Bibliapin willashan ñaupa tiempopi Diosta serviqkunamanta. Paykunamanta yachaymi yanapawasun ima sasachakuypiña tarikuqtinchispas Jehová Diosta servishanallanchispaq. Japón nacionmanta Yumi * hermananchismi nishuta manchakuq askha runaq kasqanpi Diosmanta willayta. Ichaqa Jonasmanta yachasqanmi paytaqa yanaparan ama manchakunanpaq. Indonesia nacionmanta Hector hermanonchisqa sapallanmi Jehová Diosta servin, tayta-mamanqa manan Diosta servinkuchu. Chaymi paytaqa Rutpa ejemplon yanapasqa Jehová Diosta servishanallanpaq.

22. ¿Imatan ruwananchis videokunapas “Paykuna jina kay” nisqapas allinta yanapawananchispaq?

²² ¿Maypin astawan yachasunman ñaupa tiempopi Jehová Diosta serviq runakunamanta? Paykunamantan yachasunman videokunapi, Bibliamanta grabasqa yachachikuykunapi, “Paykuna jina kay” nisqapi ima. * Manaraq paykunamanta yachashaspaqa Jehová Diosmantan mañakunanchis allinta entiendenanchispaq, chayman jina kausananchispaqpas. Chaykunata leeshaspaqa otaq uyarishaspaqa paykunawanpas chaypi kashasunman jinan piensananchis, reparananchistaqmi imaynata Jehová Dios paykunata yanapasqanta, yachasqanchisman jinataqmi imatapas ruwananchis. Chaymantapas tukuy chaykuna yanapawasqanchismantan Jehová Diosta “gracias” ninanchis, jujkunamanpas chayta willarinanchis.

23. ¿Imatan Jehová Dios niwanchis Isaías 41:10, 13 textopi?

²³ Kay Saqraq kamachisqan pachapiqa sinchi sasan kausayqa kashan, chaymi mayninpiqa mana imanakuytapas atinchischu (2 Tim. 3:1). Ichaqa manan nishutachu chaykunamanta llakikunanchis, Jehová Diosqa yachanmi imayna kashasqanchista. Chaymi payqa niwanchis: “Noqan kallpachasqaykipas yanapasqaykipas”, nispa (leey Isaías 41:10, 13). Jehová Diosqa manan jayk’aqpas saqerpariwasunchu, payqa simin qelqawanmi yanapawasun tukuy ima sasachakuyninchiskunata aguantananchispaq.