1. ¿Imakunapin bautizasqa waynakuna yanapakuyta atinkuman?

WAYNACHAKUNA, qankunaqa kallpayoqtaq kankichis chayqa atiwaqchismi astawan Jehová Diosta serviyta, iñiq t’aqapi yanapakuq kamachi kaytapas (Prov. 20:29). Ichaqa yaqapaschá waynachallaraq kasqaykirayku manchakushanki Diospa llaqtanpi yanapakuyta. Chhayna kaqtinqa ama manchakuychu. Kunanmantapacha kallpachakuy iñiq t’aqapi yanapakushanaykipaq, chhaynapin hermanokunapas allinta qhawarisunkiku.

2. ¿Imakunamantan kay yachachikuypi yachasunchis?

² Kay yachachikuypin yachasunchis rey Davidmanta, Judá ayllupi Asá reymanta, Jehosafat reymantawan. Chaymantapas yachallasuntaqmi ima sasachakuykunapis paykuna tarikuranku chaymanta, imatas waynachakunapas paykunamanta yachankuman chaytawan.

3. ¿Imakunapin wayna hermanonchiskuna iñiq t’aqapi kuraq hermanonchiskunata yanapankuman?

³ Rey Davidqa juch’uychanmantapachan kallpachakuran allin iñiyniyoq kananpaq. Payqa allintan arpa tocayta yacharan, chaywanmi yanaparan Diospa ajllasqan rey Saulta  (1 Sam. 16:16, 23). Chhaynatan qankunapas iñiq t’aqapi iñiqmasikunata yanapawaqchis. Kuraq iñiqmasinchiskunaqa celularninkupipas tabletninkupipas manan juñunakuykunapaq preparakuyta atishankuchu, chaykunapin kuraq hermanonchiskunata yanapawaqchis.

4. ¿Imata ruwanankupaqmi waynachakuna kallpachakunanku? (Qhaway tapanpi kaq dibujota.)

⁴ Davidqa juch’uychanmantapachan imachus kamachisqankuta allinta junt’aran. Papanmi Davidtaqa kamachiran ovejankunata michimunanpaq, chay ruway sasaña karan chaypas payqa allintan papanpa ovejankunata cuidaran. Chaymi juj kutipas Davidqa rey Saulta niran: “Noqa kamachiykiqa taytaypa ovejankunata michiqmi kani. Chayman leonkuna ukumarikuna jamuspa ovejata apashaqtinmi, qhepanta phawarispa siminmantapas qechullanipuni”, nispa (1 Sam. 17:34, 35). Davidqa mana manchakuspan papanpa ovejankunata cuidaran. Waynachakuna, chhaynatan qankunapas ruwawaqchis. Diospa llaqtanpi ima llank’aytapas chaskispaqa allintan chaykunata junt’anaykichis.

5. Salmos 25:14 nisqan jina, ¿imata ruwanankupaqmi waynachakuna astawan kallpachakunanku?

⁵ Davidqa allintaña arpa tocayta yacharan chaypas, waynachanmantapachan Jehová Diosta munakuran. Chhaynapin Jehová Diospa amigon kapuran (leey Salmos 25:14). Waynachakuna, qankunapas kallpachakuychis David jina Jehová Dioswan allin amigontin kanaykichispaq, chhaynapin iñiq t’aqapi astawan yanapakuyta atinkichis.

6. ¿Imanispan Davidta waynachallaraq kashaqtin niranku?

⁶ Waynachallaraqtaq David karan chayqa manan paypiqa confiaqkuchu. Chaymi Goliatwan maqanakuq rishaqtin rey Saulqa payta jark’aspa niran: “Qanqa erqellaraqmi kanki”, nispa (1 Sam. 17:31-33). Chaymantapas juj kaq wayqenmi nillarantaq: “Qantaqa reqsiykin gustonero kasqaykita”, nispa (1 Sam. 17:26-30). Jehová Diosmi ichaqa payta allinta reqsiran, chaymantapas paypin confiaran. Chaymi Goliatwan maqanakushaqtin Jehová Diosqa payta yanaparan (1 Sam. 17:45, 48-51).

7. Waynachakuna, ¿imatan Davidmanta yachawaqchis?

 ⁷ Waynachakuna, yaqapaschá iñiq t’aqapi hermanokunaqa nishu waynachata jinalla qhawarisunkikuman. Chhayna kaqtinri, ¿imatan ruwawaqchis? Chaypaqqa David jinan allin pacienciayoq kanaykichis. Jehová Diosqa manan rijch’aynillaykichistachu qhawarin, aswanpas payqa allintan sonqoykichista reqsin (1 Sam. 16:7). Chayrayku kallpachakushallaychis Jehová Diosta allinta reqsinaykichispaq. David jina Jehová Diospa tukuy imaymana kamasqankunapi yuyaymanaychis (Sal. 8:3, 4; 139:14; Rom. 1:20). Chaymantapas Jehová Diospa yanapayninta mañakuychis. Yaqapaschá colegioykipi Jehová Diospa testigon kasqaykimanta compañeroykikuna burlakunkuman. Chhaynapi tarikuspaqa Jehová Diospa yanapayninta mañakuy chay sasachakuykunata aguantanaykipaq. Kallpachakullaytaq Jehová Diospa kamachikuyninkunata kasukunaykipaq, Diospa llaqtanpi qelqakunata videokunata qhawanaykipaq ima. Sichus chayta ruwanki chayqa allintan Jehová Diospa yanapayninta reparanki, chaymantapas astawanmi paypi confianki. Sichus iñiq t’aqapi hermanokuna reparanqaku Jehová Diospi confiasqaykita chayqa, paykunapas qanpin confiallanqakutaq.

8, 9. a) ¿Imatan rey David ruwaran manaraq rey jina kamachikushaspa? b) ¿Imatan waynachakuna kunanmantapacha David jina ruwananku?

⁸ Davidqa juj sasachakuypin tarikullarantaq. Paytaqa Jehová Diosmi rey kananpaq ajllaran, ichaqa kamachikuyta qallarinanpaqqa askha watakunaraqmi pacienciawan suyakunan karan (1 Sam. 16:13; 2 Sam. 2:3, 4). Chaymantapas Davidtaqa rey Saulmi qatiykachayta qallariran. Chaywanpas Davidqa manan pisikallpayaranchu, aswanpas kallpachakuranmi Israel runakunata enemigonkunamanta cuidananpaq (1 Sam. 27:1-12).

⁹ Waynachakuna, qankunapas David jinan kunanmantapacha kallpachakunaykichis iñiq t’aqapi imaymana ruwaykunapi yanapakuspa. Chhaynatan hermanonchis Ricardopas * juch’uychanmantapacha kallpachakuran precursor regular kananpaq. Paymi nin: “Manaraq precursor kashaqtiyqa allintan kallpachakurani runakunaman Jehová Diosmanta yachachinaypaq. Chaypaqmi ichaqa allinta ñaupaqta preparakuq kani, chhaynapin mana manchakuspa Jehová Diosmanta runakunaman willaq kani. Chaymantapas juj runamanmi Jehová Diosmanta yachachiyta qallarirani”, nispa. Chhaynata kallpachakusqanraykun hermanonchis Ricardoqa iñiq t’aqapi yanapakuq kamachi kashan, chaymantapas tukuy tiemponwanmi Jehová Diosta servishan.

10. ¿Imatan David ruwaran manaraq enemigonkunata qatipashaspa?

¹⁰ Davidqa imaymana sasachakuykunapin tarikullarantaq. Juj kutinmi runankunapiwan maqanakuq rishanankukama llapa familiankuta enemigonkuna aparapusqaku. Davidqa manan enemigonkunaq qhepantaqa phawariranpachachu, aswanpas Jehová Diospa yanapaynintan mañakuran. Jinan Davidqa sacerdote Abiatarwan Jehová Diosta tapuchiran: “¿Chay llat’anaq suwakunata qatipasaqchu?”, nispa. Jinan Jehová Diosqa niran: “Qatipay, taripaspaykin  apasqakunata qechumunki”, nispa (1 Sam. 30:7-10).

11. ¿Pikunatan tapurikunayki manaraq imatapas ruwashaspa?

¹¹ Imatapas ruwayta munaspaqa jujkunaq yanapaynintan maskhanayki. Chaypaqqa yaqapaschá tayta-mamaykita otaq umalliqkunata tapurikuwaq, paykunan yanapasunkiku allinta imatapas ruwanaykipaq. Umalliqkunaqa Diospa llaqtanpiqa sumaq ‘regalokunan kanku’ (Efes. 4:8). Sichus paykunaq nisqanta allinta uyarikunki chayqa, allintan imatapas ruwanki. Chayrayku kallpachakushallay paykuna jina allin iñiyniyoq kanaykipaq. Kunanqa Asá reymantañataq yachasunchis.

12. ¿Imaynan rey Asá karan kamachikuyta qallarishaspa?

¹² Asá reyqa waynachallaraq kashaspaqa juch’uyaykukuqmi karan. Papanpa wañupusqan qhepamanmi Judá ayllupi kamachikuyta qallariran, jinan Judá runakunata kamachiran llapa yupaychasqanku idolonkuta ñut’upunankupaq. Chaymantapas kamachillarantaqmi “ñaupa taytankuq Diosnin Señorta servinankupaq, yachachikuyninkunatapas kamachikuyninkunatapas junt’anankupaqwan” (2 Crón. 14:1-7). Juj kutinmi Etiopía nacionmanta Zera sutiyoq runa juj millón soldadokunantin Judá aylluman maqanakuq jamuran. Chaypin rey Asaqa Jehová Diosmanta mañakuyta qallariran. Jinan niran: “Señor Diosnilláy, qanllapunin kanki pisi kallpa runata atiyniyoqmanta jark’aykukuq. Diosniyku Señor Dios, yanapaykuwayku, qanmanmi jap’ipakuyku”, nispa (2 Crón. 14:8-12). Chaypi nisqan jina, Asá reyqa Jehová Diospin confiaran, chaymi Jehová Diosqa payta yanaparan jinaspa Etiopía soldadokunata atiparan.

13. ¿Piqpa yanapaynintan rey Asá mañakuran? ¿Ima sasachakuykunapin tarikuran chhayna ruwasqanmanta?

¹³ Rey Asaqa Jehová Diospin confiaran, tiempowanmi ichaqa manaña Jehová Diospa yanapayninta mañakuranñachu. Juj kutinmi Israel rey Baasá Judá ayllu runakunawan maqanakuq jamuran. Chay kutipin rey Asaqa Jehová Diospa yanapayninta mañakunanmantaqa Siria reypa yanapayninta mañakuran. Chaymantapachan  imaymana sasachakuykunapi tarikuran. Chaymi Jehová Diosqa profeta Hananiwan willachiran: “Qanqa manan Diosniyki Señor Diosmanchu jap’ipakunki, aswanpas Siria reymanmi, ajinapin Siria soldadokunata kacharparinki atipanayki kashaqtin”, nispa. Chaymi payqa mana thajchu kausaran, aswanpas guerrakunallapin puriran (2 Crón. 16:7, 9; 1 Rey. 15:32).

14. a) ¿Imakunapaqmi Jehová Diospa yanapayninta mañakunayki? b) 1 Timoteo 4:12 nisqan jina, ¿imaynatan Jehová Diospas iñiqmasikunapas qhawarisunkiku?

¹⁴ Waynachakuna, amapuni rey Asá jinaqa kaychischu, aswanpas k’umuykukuqmi kanaykichis. Chaymantapas Jehová Diosllapi confiaychis. Imaynan bautizakushaspaykipas Jehová Diospi confiaranki, chhaynatan kunanpas paypi confiashanallayki. Imawanña kusirikuyta munaspapas, imapiña llank’ayta munaspapas manan yuyaykusqaykiman jinachu chaykunataqa ruwanayki, aswanpas Jehová Diospa munasqanman jinan ruwanayki (Prov. 3:5, 6). Chhaynapin Jehová Diosta kusichinki, hermanokunapas qanpin confianqaku (leey 1 Timoteo 4:12).

15. 2 Crónicas 18:1-3; 19:2 nisqan jina, ¿imaraykun Jehová Dios Jehosafat-ta wanachiran?

¹⁵ Waynachakuna, llapapas juchasapan kanchis. Chayraykun qankunapas mayninpiqa imallapipas pantankichispuni. Ichaqa ama chaywanqa pisikallpayaychischu, aswanpas kallpachakushallaychis Jehová Diosta servishanallaykichispaq. Rey Jehosafatpas waynachanmantapachan Jehová Diosta yupaycharan, lliu kamachikuyninkunatapas kasukuran. Chaymi oficialninkunata kamachiran llapa Judá ayllu runakunaman kamachikuy simita yachachimunankupaq (2 Crón. 17:4, 7). Jehosafatqa kallpachakuranmi Jehová Diosta kasukunanpaq, tiempowanmi ichaqa mana allinkunata ruwapuran chaymi Jehová Diosqa payta wanachiran (leey 2 Crónicas 18:1-3; 19:2).

16. ¿Imata ruwanaykichispaqmi kallpachakuwaqchis Raúl hermanonchis jina?

¹⁶ Wakin waynachakunaqa sasapaq jinan Jehová Dios serviytaqa qhawarinku. Chhaynapin hermanonchis Raúl waynachallaraq  kashaspa tarikuran, paymi nin: “Waynallaraq kashaqtiyqa pujllaymi mastaqa gustawaq. Manan juñunakuykunaman riytapas, nitaq Diosmanta yachachiq riytapas piensaqchu kani. Ichaqa juj umalliqmi yanapawaran, paymi leepuwaran 1 Timoteo 4:8 textota. Chaymantapachan kallpachakurani astawan Jehová Diosta servinaypaq, chaymi tiempowanqa iñiq t’aqapi yanapakuq kamachi kapurani”, nispa.

17. ¿Imaynatan Jehová Diosta serviq waynachakunata kuraq hermanokuna qhawarinku?

¹⁷ Waynachakuna, qankunaqa allintan Diospa llaqtanpi yanapakushankichis, chayta rikuspan noqaykuqa anchata kusikuyku (Sof. 3:9). Chayraykun kuraq hermanokunaqa qankunapi confianku, respetowantaqmi qhawarisunkikupas (1 Juan 2:14).

18. Waynachakuna, Proverbios 27:11 nisqan jina, ¿imatan ruwawaqchis Jehová Diosta kusichinaykichispaq?

¹⁸ Waynachakuna, Jehová Diosqa maytan munakusunki, chaymantapas qanpin confian. Chayraykun payqa willaran kay tukukuy p’unchaykunapi waynachakuna tukuy sonqonkuwan Jehová Diosta servinankuta (Sal. 110:1-3, TNM). Jehová Diosqa allintan reqsisunki payqa rikushanmi kallpachakusqaykitapas. Wakin iñiqmasikunaqa yaqapaschá waynachata jinalla qhawarisunkiku, chhaynaña kaqtinpas kallpachakushallay allin iñiyniyoq kanaykipaq. Mana allin ruwasqaykimanta yuyaychasunkiku chayqa juch’uyaykukuspa uyarikuy, Jehová Diosqa munakusqan runakunatan wanachin (Heb. 12:6). Chaymantapas ima ruwanaykipaqpas kamachisunkiku chayqa allinta chaykunata junt’ay, chayta ruwaqtiykiqa Jehová Diostan kusichinki (leey Proverbios 27:11).