1, 2. ¿Imayna yupaychananchistan Jehová Dios munan?

 ¿IMAN Jehová Diosta yupaychay? Chaypi piensaspaqa yaqapaschá nisunman: “Diosta yupaychayqa qonqoriykukuspa Diosmanta mañakuymi”, nispa. Chaymantapas yaqapaschá nisunman: “Diosta yupaychayqa llapa familiantin Bibliata estudiaymi”, nispa.

² Chaykunata ruwaspaqa Jehová Diostan yupaychashanchis. Ichaqa, ¿imayna yupaychananchistan Jehová Dios munan? Payqa munanmi tukuy sonqomanta respetowan yupaychananchista. Sichus munayninman jina Jehová Diosta yupaychasunchis chayqa kusisqan yupaychasqanchista chaskinqa. Chhaynaqa kallpachakunanchismi Jehová Diosta aswan allinta servinanchispaq.

3. ¿Imakunamantan kay yachachikuypi yachasunchis?

³ Kay yachachikuypin yachasunchis imaynatas ñaupa tiempopi runakuna Diosta yupaycharanku chayta, imaynatas noqanchispas Jehová Diosta yupaychananchis chaytapas. Chaypaqmi pusaq ruwaykunamanta yachasunchis. Chaykunamanta yachaymi yanapawasun aswan allinta Jehová Diosta yupaychananchispaq, chaymantapas yanapawasunmi aswan kusisqa kananchispaq.

4. ¿Imaynatan ñaupa tiempopi wakin runakuna rikuchiranku Jehová Diosta munakusqankuta?

⁴ Ñaupa tiempopi wakin runakunaqa anchatapunin Jehová Diosta munakuranku. Chaymi sonqomantapuni  Jehová Diosta kasukuranku, jinaspapas iñisqankuraykun munasqanman jina sacrificiokunata jaywaranku. Paykunan karanku Abel, Noé, Abrahanpiwan. Bibliapiqa manan llapantachu willan imaynatas paykuna Jehová Diosta yupaycharanku chaytaqa. Chhaynaña kaqtinpas kallpachakurankun Jehová Diosta jatunchanankupaq. Chaymi Jehová Diosqa paykunaq yupaychasqankuta chaskiran. Tiempowanmi Jehová Diosqa Abrahanpa mirayninman kamachikuykunata qoran. Chaypin Israel runakunata kamachiran munayninman jina payta yupaychanankupaq.

5. ¿Obligasqachu kashanchis Moisespa chaskisqan kamachikuykunata kasukunanchispaq?

⁵ Jesuspa wañupusqanwanmi cristianokunaqa manaña obligasqañachu karanku Moisespa chaskisqan kamachikuykunata kasukunankupaq (Rom. 10:4). Aswanpas Jesuspa kamachikuyninkunatan junt’ananku karan (Gál. 6:2). Chaypaqmi ichaqa kallpachakunanku karan Jesús jina yachachinankupaq, pay jina imatapas ruwanankupaq. Chayta ruwanankupaqmi kay tiempopi llapa hermanonchiskunapas kallpachakushanku, chayraykun kusisqa Jehová Diosta servishanku (Mat. 11:29).

6. ¿Ima tapuykunapi piensaymi yanapawasunman munasqanman jina Jehová Diosta yupaychananchispaq?

⁶ Kay yachachikuypin yachasunchis ima pusaq ruwaykunas yanapawasunman munayninman jina Jehová Diosta yupaychananchispaq chayta. Chayrayku sapankamanta yachashaspa kaykunata tapukuy: “¿Munasqanman jinachu Jehová Diosta yupaychashani? ¿Kallpachakuymanchu aswan allinta Jehová Diosta yupaychanaypaq?”, nispa. Munasqanman jinaña Jehová Diosta yupaychashasunman chaypas kallpachakunanchismi juj ruwaykunapipas payta astawan servinanchispaq.

7. ¿Imaynatan Jehová Dios qhawarin sonqomanta mañakusqanchista?

⁷ Sonqomanta mañakuspa. Jehová Diosqa kusisqan chaskiran ñaupa tiempopi incienso q’apachisqankuta (Sal. 141:2). Chhaynallataqmi Diosmanta mañakusqanchispas sumaq q’apashaq incienso jina kanan. Jehová Diosqa kusikunmi sonqomantapuni mañakusqanchista rikuspa (Prov. 15:8; Deut. 33:10). Chaymi mana manchakuspa Jehová Diosman willakunanchis llapa sasachakuyninchiskunata. Chaymantapas imaymana qowasqanchismantan “gracias” ninanchis. Ñaupaqtan ichaqa allinta piensananchis imaynatas paymanta mañakusunman chayta. Chhaynapin munasqanman jina mañakusqanchiswan Jehová Diosta yupaychasunchis.

8. ¿Imata ruwaspan Jehová Diosta yupaychallanchistaq?

⁸ Jujkunaman Diosmanta willaspa (Sal. 34:1). Jehová Diosmi tukuy imaymanata kamaq Diosqa. Chaymantapas payqa munakuq, khuyapayakuq, chanin Diosmi. Chaykunamantan llapa runakunaman willamunanchis. Chaypaqmi ichaqa tiempota t’aqananchis Jehová Diosta astawan reqsinanchispaq. Chhaynapin sonqomanta kusisqa runakunaman yachachisunchis. Runakunaman Diosmanta willaspaqa Jehová Diostan yupaychashanchis (Heb. 13:15). Chaymi Diosmanta willaq lloqsinanchispaqqa ñaupaqta allinta preparakunanchis. Chhaynapin Jehová  Diospa munayninman jina allinta runakunaman yachachisunchis.

9. ¿Imaynatan juñunakuykunaman riy yanapawanchis?

⁹ Juñunakuykunaman rispa. Jehová Diosmi Israel runakunata kamachiran: “Llaqtaykichispi llapa qharikunan watapi kinsa kutita Jehová Diospa ñaupanman rinqaku. Maytachá pay ajllakunqa chaymanmi rinqaku”, nispa (Deut. 16:16 TNM). Israel runakunaqa wasinkuta chajrankuta ima saqespan Jehová Diosta yupaychaq riranku. Ichaqa Jehová Diosmi paykunata nillarantaq: “Manan pipas allpaykichistaqa munapayanqachu”, nispa (Éx. 34:24 TNM). Israel runakunaqa Jehová Diospin confiaranku, chaymi sapa watan kinsa kutita Jehová Diosta yupaychaq riranku. Chay ruwasqankuqa ancha allinpunin karan. Chaypin paykunaqa Jehová Diosmanta allinta yachamuranku. Jinaspapas jujkuna-jujkunawanmi kallpachanakuranku (Deut. 16:15). Noqanchispas Israel runakuna jinan kallpachakunanchis juñunakuykunaman rinanchispaq. Chaypin astawanraq Jehová Diosta reqsisunchis. Chaymantapas kallpachakunanchismi juñunakuypi tapuykunaman kutichinanchispaq. Chayta ruwaspaqa Jehová Diostan kusichisunchis.

10. ¿Imaraykun kallpachakunanchis Jehová Diosman takinanchispaq?

¹⁰ Hermanonchiskunawan kuska Jehová Diosman takispa (Sal. 28:7). Israel runakunaqa takispan Jehová Diosta yupaycharanku. Rey Davidpas 288 levitakunatan ajllaran templopi takinankupaq (1 Crón. 25:1, 6-8). Noqanchispas kallpachakunanchismi Jehová Diosta takispa yupaychananchispaq. Manaña allintachu takisunman chaypas mana p’enqakuspan takinanchis (Sant. 3:2). Chayta ruwaspan Jehová Diosta yupaychallanchistaq.

11. Salmos 48:13 nisqan jina, ¿imaraykun tiempota t’aqananchis familiantin Bibliata estudiananchispaq?

¹¹ Bibliata estudiaspa, wawanchiskunaman yachachispa ima. Israel runakunaqa tiempotan t’aqaranku sapa sábado Jehová Diosmanta astawan yachanankupaq (Éx. 31:16, 17). Chaymantapas wawankumanmi Jehová Diosmanta yachachiqku. Noqanchispas tiempotan t’aqananchis Bibliata allinta estudiananchispaq. Chayta ruwaspan Jehová Diosta yupaychashallanchistaq (Sal. 73:28). Chaymantapas familiantin Bibliata estudiashaspaqa wawanchiskunatan yanapananchis Jehová Diosta astawan munakunankupaq (leey Salmos 48:13).

12. ¿Imata ruwaspan Israel runakuna Jehová Diosta yupaychallarankutaq, imatan chaymanta yachasunman?

¹² Juñunakuna wasikunata jatarichispa allichaspa ima. Ñaupa tiempopi wakin Israel runakunaqa yupaychana karpata ruwaypin yanapakuranku. Chayta ruwaspan Jehová Diosta yupaychasharanku (Éx. 36:1, 4). Chhaynatan kay tiempopi wakin hermanonchiskunapas juñunakuna wasi jatarichiypi allichaypi ima yanapakushanku. Chayta ruwaspan paykunapas Jehová Diosta yupaychashanku. Wakinqa tukuy tiemponkuwanmi chay llank’aypi yanapakushanku. Chay ruwasqankuqa ancha allinpunin. Chaywanpas paykunaqa tiempotan t’aqanku Diosmanta willanankupaq. Paykunamanta wakinqa precursormi kayta munanku. Chaypaqqa iñiq t’aqapi umalliqkunan qhawarinanku atinkumanchu precursor kayta icha manachus chayta. Juñunakuna wasi jatarichiypiqa  llapanchismi yanapakusunman manaña allintachu chaykunamanta yachasunman chaypas.

13. ¿Imaynatan Jehová Diosta yupaychallanchistaq?

¹³ Donacionkunata churaspa. Israel runakunaqa manan q’ala makillachu Diospa ñaupanmanqa rinanku karan (Deut. 16:16). Aswanpas atisqankuman jinan ima sacrificiotapas apananku karan. Chaykunata ruwaspan rikuchiranku Jehová Diospa yachachikuyninkunamanta agradecido kasqankuta. ¿Imakunata ruwaspan noqanchispas rikuchisunman Jehová Diospa yachachikuyninkunamanta agradecido kasqanchista? Diospa llaqtanpi atisqanchisman jina qolqenchiswan yanapakuspan. Chhaynata yanapakuspan Jehová Diosta yupaychallanchistaq. Apóstol Pablon niran: “Tukuy sonqowan qosqataqa allinpaqmi Diosqa qhawarin, payqa pipas atisqanman jina qonantan munan, manan mana atinanta qonantachu”, nispa (2 Cor. 8:4, 12). Jehová Diosqa munanmi sonqomanta qolqenchiswan yanapakunanchista. Pisillataña churasunman chaypas Jehová Diospaqqa ancha valorniyoqmi (Mar. 12:42-44; 2 Cor. 9:7).

14. Proverbios 19:17 nisqan jina, ¿imaynatan Jehová Dios qhawarin pisichikuypi tarikuq hermanonchiskunata yanapasqanchista rikuspa?

¹⁴ Pisichikuypi tarikuq hermanonchiskunata yanapaspa. Ñaupa tiempopin Jehová Diosqa Israel runakunata kamachiran wajcha runakunata yanapanankupaq, chayta ruwaqtinkun Jehová Diosqa paykunata bendeciran (Deut. 15:7, 10). Chhaynatan Jehová Diosqa kunanpas munan pisichikuypi tarikuq hermanonchiskunata yanapananchista. Hermanonchiskunata yanapaspaqa Jehová Diosmanpas manushasunman jinan (leey Proverbios 19:17). Chaytan Filipos llaqtamanta cristianokunapas ruwaranku. Paykunaqa imaymana regalokunatan apóstol Pabloman apachiranku carcelpi kashaqtin. Chaymi apóstol Pabloqa niran: “Chay apachimuwasqaykichisqa sumaq q’apaq, Diospa sonqonman chayaq sacrificio jinan”, nispa (Filip. 4:18). Jehová Diosqa munanmi tiemponchiswan, kallpanchiswan, kapuwaqninchiskunawan ima pisichikuypi tarikuq hermanonchiskunata yanapananchista. Chayta ruwaspan Jehová Diosta yupaychashanchis. Chaymi tapukunanchis: “¿Mayqen hermanon pisichikuypi tarikushanman?”, nispa (Sant. 1:27).

15. ¿Sasachu Jehová Diosta tiemponchiswan kallpanchiswan yupaychay?

¹⁵ Munayninman jina Jehová Diosta yupaychayqa manan sinchi sasachu (1 Juan 5:3). ¿Imarayku? Payta sonqomanta munakusqanchisrayku. Kaypi piensay. Wakin wawakunaqa unaypin juj dibujota ruwanku taytankuman regalanankupaq. ¿Imaraykun chayta ruwanku? Taytankuta munakusqankurayku. Chhaynatan noqanchispas kallpachakunanchis Jehová Diosta munakusqanchisrayku tiemponchiswan kallpanchiswan ima payta yupaychananchispaq.

16. Hebreos 6:10 nisqan jina, ¿imaynatan Jehová Dios qhawarin payta yupaychananchispaq kallpachakusqanchista rikuspa?

¹⁶ Tayta-mamakunaqa yachankun wawankuqa mana kaqllachu kasqankuta. Jujninqa yaqapaschá aswan juch’uyllaraq kanman. Manapaschá kuraqnin jinachu ima regalotapas paykunaman qonman. Chhaynatan  Jehová Diospas serviqninkunata allinta reqsiwanchis. Wakinninchisqa yaqapaschá kuraqña kapunchis, onqosqa kashanchis, otaq familianchistapas uywananchis. Chhaynapi tarikuspaqa manapaschá juj hermanonchiskuna jinachu Jehová Diosta servisun. Chhaynaña kaqtinpas manapunin pisikallpayananchischu (Gál. 6:4). Jehová Diosqa allintan reqsiwanchis, manataqmi jayk’aqpas qonqanqachu payrayku ima ruwasqanchistapas. Payqa anchatan kusikun sonqomanta yupaychananchispaq kallpachakusqanchista rikuspa (leey Hebreos 6:10). Jehová Diosqa allintan sonqonchista reqsin, chaymi munan atisqanchisman jina payta servispa kusisqa kananchista.

17. a) ¿Imatan ruwasunman Biblia leeyta otaq Diosmanta willayta sasapaq qhawariqtinchis? b) ¿Imaynatan yanaparasunki “ Imatan ruwananchis kusisqa kananchispaq” nisqa willakuy?

¹⁷ ¿Imatan ruwasunman Biblia leeyta otaq Diosmanta willayta sasapaq qhawariqtinchis? Kaypi piensasun, guitarra tocayta allinta yachananchispaqqa manan tiemponchis kaqtillanchu practicananchis. Aswanpas tiempotan t’aqananchis sapa p’unchay practicananchispaq, chhaynapin guitarra tocayta allinta yachasunchis. Chhaynatan tiempota t’aqananchis sapa p’unchay Bibliata leenanchispaq Diosmantapas willananchispaq. Chhaynapin munasqanman jina Jehová Diosta kusisqa servisunchis.

18. ¿Imaynan kasunchis munasqanman jina Jehová Diosta yupaychaspa?

¹⁸ Sichus kallpachakusunchis Jehová Diosta tukuy sonqowan yupaychananchispaq chayqa kusisqan kasunchis, Jehová Diospas kusisqan kanqa (Prov. 10:22). Ima sasachakuykunapiña tarikunchis chaypas Jehová Diosqa yanapawanchismi. Payqa kusisqa kananchistan munan (Isa. 41:9, 10). Chaymantapas Jehová Diosqa tukuy imaymanatan kamaran. Chayraykun paytaqa tukuy sonqomanta kusisqa yupaychananchis (Apo. 4:11).