¿Kaq Mefibóset runallamantachu kaypi rimashan? Manan. Kay textokunapiqa Saulpa churinmantawan Jonatanpa churinmantawanmi rimashan. Chay tiempopi imachus pasasqanmanta yachaymi anchatapuni yanapawasun.

Rey Saulpa wawankunan karan qanchis qharikuna iskay warmikuna ima. Kuraq kaq wawanmi karan Jonatán, juj kaq churintaq karan Mefibóset. Paypa mamitanqa karan Rizpá. Ichaqa Saulpa nietonpas Mefibóset sutillayoqtaqmi karan.

Tiempowanmi Saulqa Gabaón runakunata sinchitapuni cheqnikuyta qallariran, chaymi llapankuta chinkachiyta munaran. Chay ruwasqanqa manapunin allinchu karan. Israel runakunaqa Gabaón runakunawanmi juj rimanakuyta ruwaranku thajpi kausanankupaq (Jos. 9:3-27).

Saulqa manan chay rimanakuy ruwasqankuta respetaranchu, chaymi llapa Gabaón runakunata chinkachipuyta munaran. Chhaynapin Saulpas wasinpi kaqkunapas ñakasqa karanku (2 Sam. 21:1). Tiempowanqa Davidmi rey kapuran. Chaymi Gabaón runakunaqa Davidman willakuranku Saulpa imachus ruwasqanta, rimanakuy ruwasqankutapas mana junt’asqanta. Chayraykun Davidqa paykunata tapuran: “¿Imatan ruwayman allipunananchispaq?”, nispa. Gabaón runakunaqa manan qolqetachu mañakuranku, aswanpas Saulpa qanchis wawankuna wañuchisqa kanankutan munaranku (Núm. 35:30, 31). Chaymi Davidqa Saulpa wawankunata Gabaón runakunaman entregaran. Chhaynapin Jehová Diosqa paykunata bendeciran (2 Sam. 21:2-6).

Chay kutipaqqa ñan Saulpas Jonatanpas wañupurankuña. Jonatanpa churin Mefibosetmi ichaqa kausasharan. Mefibosetqa manan qhali runachu karan. Chhaynaqa manan Saultaqa yanapanmanchu karan Gabaón runakunata wañuchinankupaqqa. Chaymantapas Davidqa amigon Jonatanwanmi juj rimanakuyta ruwaranku, chhaynapi paywanpas wawankunawanpas thajpi kausanankupaq (1 Sam. 18:1; 20:42). Chayraykun Bibliapipas nin: “Saulpa nieton Mefiboset-taqa manan wañuyman jap’ichiranchu, taytan Jonatanwan Señor Diospa ñaupaqenpi rimanakusqankurayku”, nispa (2 Sam. 21:7).

Davidqa Saulpa iskaynin churinkunatawan pisqantin nietonkunatawanmi Gabaón runakunaman entregaran. Paykunamanta jujninmi karan Saulpa churin Mefibóset (2 Sam. 21:8, 9). Chhaynapin Davidpa kamachisqan llaqtaqa manaña ñakasqachu kapuranku.

¿Imatan chay tiempopi pasasqanmanta yachasunman? Sichus Saulpa iskaynin wawankunapas pisqantin nietonkunapas Saulpa ruwasqanta mana yanapankumanchu karan chayqa manan wañuchisqachu kankuman karan. Jehová Diosmi Israel runakunata kamachiran: “Manan taytaqa churinpa juchanmanta wañuchisqa kanmanchu, manallataqmi churipas taytanpa juchanmanta wañuchisqa kanmanchu, aswanpas kikin juchallikuqmi wañunqa”, nispa (Deut. 24:16). Chhaynaqa Saulpa churinkunaqa juchankumantan wañuranku. Paykunaqa Saultan yanaparanku Gabaón runakunata wañuchinankupaq.

¿Imatan chaymanta yachallasunmantaq? Jatun juchata ruwaspaqa manan ninanchischu: “Noqaqa kamachiwasqallankutan ruwarani”, nispaqa. Aswanpas juchanchiskunatan reqsikunanchis. Biblian nin: “Purinaykita allinta tanteay, allillantapuni sarunaykipaq. Ama pañamanpas lloq’emanpas pantaychu, ama mana allinpi puriychu”, nispa (Prov. 4:24-27; Efes. 5:15).