1, 2. Manaraq listochu kashanki bautizakunaykipaq chayqa, ¿imaraykun mana pisikallpayanaykichu? (Qhaway tapanpi kaq fotokunata).

 SICHUS listoña kashanki bautizakunaykipaq, umalliqkunapas “arí bautizakuwaqmi” nisunkiku chayqa, ama iskayaspa bautizakullayña. Chayta ruwaspan kusisqa kanki, Jehová Diostapas kusisqan servinki.

² Sichus manaraq listochu kashanki bautizakunaykipaq, otaq umalliqkunapas nisunkiku juj tiempotawan suyarikunaykipaq chayqa, ama pisipaychu. Wayna-sipasña kuraqña kanki chaypas kallpachakullay bautizakunaykipaq.

3. ¿Imatan Etiopía llaqtayoq runa Felipeta tapurqan? ¿Imatan yaqapas tapukusunman? (Hechos 8:36, 38).

³ (Leey Hechos 8:36, 38). Etiopía llaqtayoq runan Felipeta tapurqan: “¿Atiymanñachu bautizasqa kayta, icha imatawanraqchu ruwanay?”, nispa. Payqa munasharqanmi bautizakuyta. Ichaqa, yaqapaschá nisunman: “¿Listoñachu kasharqan bautizakunanpaq?”, nispa.

4. ¿Imaynatan Etiopía llaqtayoq runa rikuchirqan astawanraq yachayta munasqanta?

⁴ Chay Etiopía llaqtayoq runaqa “Jerusalén llaqtatan risqa Diosta adoraq” (Hech. 8:27). Chay runaqa yaqapaschá judío runaman tukupurqan, chaymi payqa hebreo rimaypi librokunaq yachachikuyninta yacharqan, allintan Jehová Diostapas reqsirqan. Ichaqa astawanraqmi yachayta munarqan, chaymi Felipepas payta tarirqan profeta Isaiaspa qelqanta alto kunkawan leeshaqta (Hech. 8:28). Isaiaspa chay qelqasqanqa sasa entiendeymi karqan, chhayna kaqtinpas chaytan payqa leesharqan. Chay Etiopía llaqtayoq runa yacharqanña Diospa wakin yachachikuyninkunata chaypas, astawanraqmi yachayta munarqan.

5. ¿Imatan Etiopía runa ruwarqan imachus yachasqanwan?

 ⁵ Chay Etiopía llaqtayoq runaqa jatun umallin karqan, chaymantapas payqa “reinaq llapa qhapaq kayninkunamantan encargasqa karqan” (Hech. 8:27). Chaychá payqa imaymana ruwanayoq karqan, ichaqa tiempotan orqorqan Jehová Diosta yupaychananpaq. Payqa manan yachayllachu yacharqan, aswanpas yachasqanman jinan imatapas ruwarqan. Chayraykun payqa Jerusalén llaqtakama Diosta yupaychaq riq. Jerusalén templokama puriyqa sasachá paypaqqa karqan, qolqepaqchá karqanpas. Chhayna kaqtinpas Diosta yupaychayta munasqanraykun payqa tukuy atisqanta kallpachakurqan Jerusalenkama rinanpaq.

6, 7. ¿Imatan Etiopía llaqtayoq runa ruwarqan astawan Jehová Diosta munakunanpaq?

⁶ Felipeqa sasa entiendey yachachikuykunatan Etiopía llaqtayoq runamanqa willarqan, willarqanmi Jesús Mesías kasqantapas (Hech. 8:34, 35). Maytachá chay runaqa kusikurqan payrayku tukuy imaymanata Jesuspa ruwasqanta yachaspaqa, ichaqa, ¿imatan chay qhepaman ruwarqan? Manan jinallachu qhepakurqan, aswanpas Jehová Diosta Jesusta munakusqanraykun bautizakurqan. Jinaspa Jesuspa qatikuqnin kapurqan. Felipepas sut’itan repararqan chay runaqa bautizakunanpaq listoña kashasqanta, chaymi payta bautizarqan.

⁷ Etiopía llaqtayoq runamanta yachaymi yanapasunki manaraq bautizakushaspa allinta preparakunaykipaq, chayta ruwaspaqa manañan bautizakuyta manchakunkichu. Qanpas pay jinan kaykunata ruwawaq: Diosmanta astawan yachashallay, yachasqaykiman jina kausay, Jehová Diostapas astawan munakuy. Chaykunamantan kunan yachasun.

8. Juan 17:3 nisqanman jina, ¿imatan ruwananchis?

⁸ (Leey Juan 17:3, willakuytawan). Yaqapaschá Juan 17:3 textopi Jesuspa nisqan yanaparqasunki Biblia estudiayta qallarinaykipaq, chaymi wakin runakunatapas yanaparqan. Chaypi Jesuspa nisqanqa llapanchistan kallpachawanchis Bibliamanta astawan yachashanallanchispaq, chhaynapi “sapallan cheqaq Diosta reqsinanchispaq”. Chay ruwayqa manan jayk’aqpas tukukunqachu (Ecl. 3:11). Manan jayk’aqpas Diosmantaqa yachayta tukusunchu, Diosmantaqa yachashallasunpunin. Diosmanta astawan yachasun chayqa astawanmi payta munakusun (Sal. 73:28).

9. ¿Imatan ruwananchis qallariy yachachikuykunata yachasqanchis qhepaman?

⁹ Chayllaraq Bibliata estudiaspaqa wakillantaraqmi Jehová Diosmantaqa yachanchis. Apóstol Pablo hebreo cristianokunata nisqan jina chay yachachikuykunaqa “Diospa  yachachikuyninkunamanta qallariy kaqkunallan”, chayta nispaqa manan pisichasharqanchu chay “qallariy yachachikuykunataqa”. Aswanpas chay qallariy yachachikuykunaqa wawapaq leche jinalla kasqantan nisharqan (Heb. 5:12; 6:1). Apóstol Pablon cristianokunata kallpacharqan aswan sasa yachachikuykunata yachanankupaq, ama qallariy yachachikuykunallawanchu contentakunankupaq. Qanpas, ¿munawaqchu chay ruwayta? ¿Munawaqchu Jehová Diosmanta munayninmantapas astawan yachayta? Chayta ruwaspaqa astawanraqmi iñiyniykipi wiñarinki.

10. ¿Ima ruwaymi wakinninchispaq sasa kanman?

¹⁰ Wakinmanqa manan estudiayqa gustawanchischu. Escuelapiqa yachachirqasunkikuchá leeytapas estudiaytapas, ¿gustaqchu kasunki chay ruway? Icha, ¿manachu rikuytapas munaq kanki librokunata? Chhayna kaqtinqa ama llakikuychu, jujkunamanpas manan estudiayqa gustanchu. Ichaqa kunanqa manan sapallaykichu kashanki, Jehová Diosmi yanapasunki. Pay jina yachachiqqa manan pipas kanchu.

11. ¿Imaraykun Jehová Diosta nikun “ancha allin yachachikuq” nispa?

¹¹ Jehová Diosmi “ancha allin yachachiqninchisqa” (Isa. 30:20, 21). Payqa pacienciawanmi, munakuywanmi, khuyapayakuywanmi paymanta yachay munaqkunata yachachin. Chaymantapas allin ruwasqankutan paykunapiqa astawanqa qhawan (Sal. 130:3). Payqa manan jayk’aqpas mana atinanchistaqa mañawasunmanchu. Paytaq ñusqhonninchista kamarqan chayqa yachanmi imatapas maykamachus ruway atisqanchista (Sal. 139:14). Chaymantapas payqa paymanta yachay munaqtan kamawarqanchis, chaymi munan paymanta astawan yachananchista. Chaytaqa wiñaypaqmi ruwasunchis. Imaynan chayllaraq naceq wawaqa lechemanta yarqachikun, chhaynatan Bibliapi kaq yachachikuykunataqa astawan yachayta munananchis (1 Ped. 2:2). ¿Imatan chaypaq ruwanayki? Chaypaqqa imakunatachus Diospaq astawan ruwayta munashanki chaypin piensanayki, jinaspa kallpachakunayki chaykunaman aypanaykipaq. Chaymantapas sapa p’unchaymi Bibliata leenayki estudianayki ima (Jos. 1:8). Jehová Diospa yanapayninwanqa astawanmi Biblia leeypas estudiaypas gustasunki.

12. ¿Imaraykun Jesusmantapas imakunachus ruwasqanmantapas allinta yachananchis?

¹² Chaymantapas tiempotan orqonanchis Jesuspa imakunachus ruwasqanpi, imaynatachus yachachisqanpi yuyaymanananchispaq. Kay sasa tiempokunapi Jehová Diosta servinanchispaqqa Jesuspa ejemplontan qatikunanchis (1 Ped. 2:21). Payqa sut’itan qatikuqninkunata nirqan imaymana sasachakuykunapi tarikunankuta (Luc. 14:27, 28). Chhaynaña kaqtinpas yacharqanmi pay jina junt’aq sonqo kanankuta (Juan 16:33). Chhaynaqa, kallpachakunanchismi Jesusmanta allinta yachananchispaq chhaynapi pay jina kananchispaq.

13. ¿Imatan Diosmanta mañakushanallayki, imaraykun chayta ruwanayki?

¹³ Bibliataqa manan imatapas yachayta munaspallachu estudiananchis. Aswanpas Jehová Diosta reqsinanchispaq, payta munakunanchispaq, paypi astawan iñinanchispaqmi estudiananchis (1 Cor. 8:1-3). Chaymi sapa estudiaspa Diospa yanapayninta mañakunanchis aswan iñiyniyoq kananchispaq (Luc. 17:5). Payqa uyarinqan mañakusqanchistaqa. Sichus allin iñiyniyoq kanki chayqa astawanraqmi Diospa llaqtanpi wiñarinki (Sant. 2:26).

14. Jesuspa qatikuqninkunaqa yachasqankuman jinan kausananku, ¿imaynatan apóstol Pedro chayta sut’incharqan? (Kay parrafopaq dibujota qhaway).

¹⁴ Apóstol Pedron nirqan Jesuspa qatikuqninkunaqa Bibliapi imachus yachasqankuman  jina kausanankuta. Chayta entiendechinanpaqmi Noemanta rimarqan. Jehová Diosmi Noeta nirqan jatun parata kachamunanta, chhaynapi llapa millay runakunata chinkachinanpaq. Noepas familianpas manan chayta yachaspallachu salvakunanku karqan. Aswanpas Diospa imachus nisqantan ruwananku karqan. Manaraq jatun para chayamusqan tiempomanta rimaspan apóstol Pedro nirqan: “Chay tiempopin arcapas ruwakusharqan”, nispa (1 Ped. 3:20). Noepas familianpas Jehová Diospa nisqanman jinan juj jatun arcata ruwarqanku (Heb. 11:7). Chay qhepamanmi apóstol Pedroqa Noepa ruwasqanta bautizakuywan tupanachirqan, paymi nirqan: “Chay pasasqanqa bautismowanmi tupan. Bautismon kunanqa qankunata […] salvashasunkichis”, nispa (1 Ped. 3:21). Imaynan Noepas familianpas askha watakuna imaymanata ruwarqanku arcata ruwanankupaq, chhaynatan qanpas bautizakunaykipaqqa allinta preparakunayki. Chhaynaqa, ¿imakunatan ruwanayki manaraq bautizakushaspa?

15. ¿Iman sonqomanta pesapakuy?

¹⁵ Manaraq bautizakushaspaqa sonqomantan juchanchiskunamanta pesapakunanchis (Hech. 2:37, 38). Sonqomanta pesapakuyqa mana allin ruwaykunata saqepuymi. Chhaynaqa Jehová Diospa cheqnisqan ruwaykunatan saqepunanchis, chaykunan kanman: qhelli juchapi puriy, machay, qhelli simikunata k’araq simikunata rimay ima. ¿Ñachu chaykunata saqepurqankiña? (1 Cor. 6:9, 10; 2 Cor. 7:1; Efes. 4:29). Sichus chay juchakunata ruwashankiraq chayqa kallpachakuy chaykunata saqepunaykipaq. Chaypaqqa yaqapaschá yachachiqniykiwan chaykunamanta rimawaq, otaq umalliqkunaq yanapayninta mañakuwaq. Tayta-mamaykiwanraqchus tiyashanki chayqa, paykunatapas niwaqmi yanapanasuykikupaq, chhaynapi bautismoman aypanaykipaq.

16. ¿Imakunatawanmi bautizakuyta munaqkuna ruwananku?

¹⁶ Chaymantapas bautizakunaykipaqqa kallpachakunaykin llapa juñunakuykunaman rinaykipaq, chaypi tapuykunaman kutichinaykipaqpas (Heb. 10:24, 25). Sichus umalliqkuna Diosmanta willaq lloqsinaykipaq nirqasunkikuña chayqa, tukuy atisqaykita ruway willaq lloqsinaykipaq. Chayta ruwaspaqa kusisqan kanki  (2 Tim. 4:5). Sichus tayta-mamaykiwanraq tiyashanki chayqa kaykunatan tapukuwaq: “¿Yuyarichisqallachu juñunakuykunaman rini, Diosmanta willaqpas lloqsini? Icha, ¿noqallamantachu chaykunata ruwani?”, nispa. Sichus qanllamanta chaykunata ruwashanki chayqa, allin iñiyniyoq kasqaykitan rikuchishanki. Chaymantapas Jehová Diosta munakusqaykita mayta agradecekusqaykitan rikuchishanki. Chayta ruwaspaqa Diosmanpas regalokunata qoshawaq jinan kanqa (2 Ped. 3:11; Heb. 13:15). Jehová Diosqa imatapas sonqomanta qonanchistan munan, manan kamachisqa jina qonanchistaqa munanchu (2 Corintios 9:7 textowan tupanachiy). Jehová Diosman imatapas sonqomanta qospaqa kusisqan kasun.

17, 18. a) ¿Iman Biblia estudiaqkunata yanapanqa bautizakunankupaq? b) ¿Imaynatan Diosta munakuy paykunata yanapanqa? (Proverbios 3:3-6).

¹⁷ Bautismoman aypanaykipaqqa imaymana sasachakuykunan kanqa. Yaqapaschá wakinqa Diosta servisqaykirayku asipayasunkikuman otaq qatikachasunkikumanpas (2 Tim. 3:12). Chaymantapas yaqapaschá ima mana allintapas saqenaykipaq allintaña kallpachakushaspa jujmanta chayman urmaruwaq. Otaq yaqapaschá piensawaq: “Bautizakunaypaqqa mayraqmi faltawan”, nispa, chaywantaq pisikallpayayta qallariwaq. ¿Iman yanapasunki chaykunawan ama pisipanaykipaq? Jehová Diosta astawan munakuymi yanapasunki.

¹⁸ Jehová Diosta munakuyqa ancha munaymi (leey Proverbios 3:3-6). Sichus Jehová Diosta tukuy sonqoykiwan munakunki chayqa atipallankin ima sasachakuytapas. Bibliapiqa askha kutitan willashan Jehová Diosqa mana tukukuq munakuyninta serviqninkunaman rikuchisqanta. Jehová Diosqa manan jayk’aqpas serviqninkunataqa saqerparinqachu. Imaña kaqtinpas munakushawallasunpunin (Sal. 100:5). Jehová Diosqa payman rijch’akuqtan runakunataqa kamarqan (Gén. 1:26). Chhaynaqa, ¿imaynatan noqanchispas chay mana tukukuq munakuyta rikuchisunman?

19. ¿Imakunatan ruwanayki Jehová Diosta agradecekunaykipaq? (Gálatas 2:20).

¹⁹ Chaypaqqa Jehová Diostan tukuy imamanta “gracias” ninanchis (1 Tes. 5:18). Sapa p’unchaymi kayta tapukunayki: “¿Imaynatan kay p’unchay Jehová Dios munakuyninta rikuchiwarqan?”, nispa. Chaymantataq Diosmanta mañakuspa llapa chaykunamanta “gracias” ninayki. Noqanchisrayku Diospa llapa ruwasqankunataqa,  sapanka jujninchispaqpas kanman jinatan qhawarinanchis, chaytan apóstol Pablopas ruwarqan (leey Gálatas 2:20). Jinaspapas tapukunanchismi: “¿Noqapas munanichu Jehová Diosta munakusqayta rikuchiyta?”, nispa. Jehová Diosta munakuspaqa ima sasachakuytapas atipallasunmi, manataqmi faciltachu ima tentacionmanpas urmasun. Jehová Diosta munakuspaqa manan Biblia leeytapas, juñunakuyman riytapas, Diosmanta willaytapas saqesunchu. Chaykunata ruwaspan sapa p’unchay Jehová Dios munakusqanchista rikuchisun.

20. ¿Iman Jehová Diosman prometekuy, imaraykun payman prometekuy ancha importante?

²⁰ Tiempowanqa Jehová Diosta munakusqaykin yanapasunki sapallaykipi juj mañakuypi Diosman prometekunaykipaq. Prometekusqayki qhepamanqa Jehová Diospaqñan kapunki. Prometekuspaqa Jehová Diostan nishanki: “Sasachakuykunaña kaqtinpas qanllatañan tukuy tiempo servisayki”, nispa. Jehová Diosmanqa juj kutillatan prometekunchis, chaymi payman prometekuyqa ancha importante (Sal. 50:14). Satanasqa imaymana trampakunatan churasunki Jehová Diosmanta t’aqakunaykipaq, ichaqa ama chayta gustachiychu; aswanpas tukuy atisqaykita kallpachakushallay (Job 27:5). Jehová Diosta munakusqaykin yanapasunki prometekusqaykita junt’anaykipaq, payman astawan asuykunaykipaqpas.

21. ¿Imaraykun bautismowan Dios serviyninchis qallarin?

²¹ Prometekusqayki qhepamanqa umalliqkunamanmi willanayki bautizakuy munasqaykita. Ichaqa manan bautizakuyllawanchu Diosta serviyqa tukun, aswanpas bautizakuywanmi Jehová Dios serviyninchisqa qallarin. Chayrayku sichus bautizakuyta munashanki chayqa kunanmantapacha kallpachakuy Jehová Diosta astawan reqsinaykipaq, chhaynapi payta sapa p’unchay astawan munakunaykipaq. Chay ruwaymi yanapasunki bautizakunaykipaq. Chhaynaqa, kallpachakuy Jehová Diosta Jesustawan astawan munakunaykipaq.