1, 2. a) ¿Imaynan kanchis juj runata bautizakushaqta rikuspa? b) ¿Imakunamantan kay yachachikuypi yachasunchis?

 ¿JAYK’AQLLAPAS rikurqankichu bautizakuqkunata? Bautizakuqkunaqa tukuy sonqowanmi iskay tapuykunaman kutichinku, chayta uyarispan familiankunapas amigonkunapas anchata kusikunku. Bautizakuqkunapas anchatan kusikunku, unumanta lloqsiqtinkuqa uyankuraqmi k’ancharin, chaypi kaqkunapas kusikuymantan t’aqllakunku. Sapa semanan waranqanpi runakuna pachantinpi bautizakushanku. Chhaynapin paykunaqa Jehová Diospa testigonkuna kapunku.

² Bautizakuyta munaspaqa “Jehová Diostan maskhashanki”, chayta ruwaspan rikuchishanki kay tutayaq pachapi k’anchay jina kasqaykita (Sal. 14:1, 2). Kay yachachikuyqa bautizakuyta munaq runakunapaqmi ruwasqa kashan. Kaypin yachasunchis kinsa yanapaykunamanta, chaykunan yanapasunki Jehová Diosta servishanallaykipaq. Chaymantapas llapa bautizasqa kaqkunatan yanapawallasuntaq tukuy tiempo Jehová Diosninchista servinanchispaq.

3. ¿Imaraykun cheqaq kaqtapas chanin kaqtapas munakunchis? (Salmos 119:128, 163).

³ Jehová Diosmi payta serviqninkunata kamachiwanchis: “Munakuychis cheqaq kaqta”, nispa (Zac. 8:19). Jesuspas nirqanmi chanin kaqta munakunanchispaq (Mat. 5:6). Chaymi sapankanchis kallpachakunanchis allin kaqta ruwananchispaq, chaninta ch’uyata Diospa ñaupanpi kausananchispaq. Cheqaq kaqta chanin kaqta munakusqanchisraykun millay kaqkunataqa cheqnikunchis (leey Salmos 119:128, 163). Llullakuqkunaqa Satanás jinan kanku, paymi kay pachataqa kamachishan (Juan 8:44; 12:31). Ñaupa tiempomantañan Saqraqa Diospa sutinta qhellichashan. Payqa Edén huertapin Jehová Diosta tumparqan llullamanta mana allin kamachikuqmanta ima. Chaymantapachan llullakuspa imaymanata Diosmanta rimashan. Paypa piensasqanman jinaqa Diosqa manas munanchu allin kananchista (Gén. 3:1, 4, 5). Ichaqa  chayqa manan chhaynachu, chhaynata llullakusqanraykun runakunapas Diosmanta karunchakapunku. Wakin runakunaqa manan Diosmanta cheqaq kaqta yachayta munankuchu, chaymi Satanasqa paykunata tanqan mana chanin ruwaykunata millay ruwaykunata ruwanankupaq (Rom. 1:25-31).

4. ¿Imaynatan Jehová Dios “cheqaq rimaq” kasqanta rikuchin? (Kay parrafopaq dibujota qhaway).

⁴ Jehová Diosqa “cheqaq rimaq” Diosmi, serviqninkunamanpas cheqaq kaqtan yachachin, ¿imaynatan chayta ruwan? (Sal. 31:5). Saqraq llulla yachachikuyninkunaman ama urmanankupaqmi ñawinkuta kicharin. Chaymantapas Jehová Diosqa serviqninkunatan yachachin cheqaqllata chanillanta imatapas ruwanankupaq, chayta ruwaspan serviqninkunaqa thaj kusisqa kanku (Prov. 13:5, 6). Yaqapaschá qanpas Bibliata estudiaspa repararqanki Jehová Dioslla cheqaq kaqta serviqninkunaman yachachisqanta. Jehová Diosllan serviqninkunataqa ch’uya ñanta pusan (Sal. 77:13). Chaychá qanpas Jehová Diospa chanin kamachikuyninkunata kasukuyta munanki (Mat. 6:33). Cheqaq kaqtapas defiendeyta munanki, jinaspa Jehová Diosmanta Satanaspa nisqanqa llulla kasqanta rikuchiyta munanki. ¿Imaynatan chayta rikuchiwaq?

5. ¿Imata ruwaspan rikuchiwaq cheqaq kaqta chanin kaqta munakusqaykita?

⁵ Kausayniykipin jujkunaqa reparanqaku Jehová Dios munakusqaykita, kamachikuyninkunatapas kasukuy munasqaykita, chanin kaqta munakusqaykitapas. Chaymantapas reparanqakun Saqraq yachachikuyninkunaqa llulla kasqanta. Chayta rikuchinaykipaqqa Jehová Diosmanmi prometekunayki, chaypaqqa juj mañakuypin willanayki payllapaqña kausay munasqaykita. Chaymantataq bautizakunayki, chayta ruwaqtiykin jujkunapas reparanqaku Jehová Diosllapaqña kausay munasqaykita. Chhaynaqa, bautizakunaykipaqqa cheqaq kaqta chanin kaqta munakusqaykin yanapasunki.

6. Salmos 45:4 nisqan jina, ¿imaraykutaq Jesusta munakunchis?

⁶ ¿Imaraykutaq Jesustari munakunanchis? Salmos 45:4 textopin niwanchis imaraykus Jesusta munakunanchis chayta (leey Salmos 45:4). Jesusqa cheqaq kaqta chanin kaqtan munakun, chaymantapas payqa juch’uyaykukuqmi. Chhayna kasqanraykun Jesustaqa llapapas munakunchis. Arí, Jesusqa tukuy atisqantan ruwarqan cheqaq kaqta chanin kaqta defiendenanpaq (Juan 18:37). ¿Imaynatan pay k’umuykukuq kasqanta rikuchirqan?

7. ¿Imaraykun Jesusta astawan munakunchis?

 ⁷ Jesusqa rimasqanwan ruwasqanwan iman rikuchirqan k’umuykukuq kasqanta. Kay pachapi kashaspaqa manan jayk’aqpas jatunchakurqanchu. Payqa ima ruwasqanmantapas janaq pacha Taytallantan jatuncharqan (Mar. 10:17, 18; Juan 5:19). Chhayna k’umuykukuq kasqanqa may sumaqmi, ¿manachu chaywan Jesusta astawanraq munakunchis? ¿Manachu pay jina kayta munanchis? Arí, munanchismi. ¿Imaraykutaq Jesusri k’umuykukuqri karqan? Taytan Jehová Dios k’umuykukuq kasqanrayku. Jesusqa Taytantan munakun, chaymi pay jina juch’uyaykukuq kananpaq kallpachakun (Sal. 18:35; Heb. 1:3). ¿Manachu chayta yachaspa Jesusta astawanraq munakunchis?

8. ¿Imaraykun kusikunchis Jesús reyninchis kasqanmanta?

⁸ Maytan kusikunchis Jesús reyninchis kasqanmanta. Payqa khuyapayakuq reymi. Kikin Jehová Diosmi paytaqa yachachirqan, paytataqmi rey kananpaqpas ajllarqan (Isa. 50:4, 5). Chaymantapas Jesusqa kay jallp’aman jamuspan rikuchiwarqanchis anchatapuni munakuwasqanchista (Juan 13:1). Chaymi munakuyninchisqa reynillanchispaq kanan. Pay kikinmi nirqan payta cheqaqtapuni munakuqkunapas kamachikuyninkunata kasukuqkunapas amigonkuna kasqankuta (Juan 14:15; 15:14, 15). ¡May kusikunapaqmi Jehová Diospa Churinpa amigonkuna kayqa!

9. ¿Imakunapin Jesuspa bautizakusqan qatikuqninkunaq bautizakusqanwan kaqlla?

⁹ Jesusmi munan llapa qatikuqninkuna bautizakunankuta (Mat. 28:19, 20). Paypas bautizakurqanmi, bautizakusqanqa jujniraymi karqan qatikuqninkunaq bautizakusqanmantaqa (qhaway “ ¿Imapin jujniray Jesuspa bautizakusqan qatikuqninkunaq bautizakusqanwan?” nisqata). Ichaqa, wakinpiqa qatikuqninkunaq bautizakusqanwanqa kaqllan karqan Jesuspa bautizakusqanwanqa, ¿imakunapin kaqlla karqan? Jesusqa Taytanpa munayninta ruwananpaqmi bautizakurqan (Heb. 10:7). Jesusta qatikuqkunapas chayta ruwanankupaqmi bautizakunku. Chay p’unchaymantapachan paykunaqa manaña munayninkuta ruwanankupaqchu kausanku, aswanpas Jehová Diospa munayninta ruwanallankupaqñan kausanku. Chaytan bautizakusqanku p’unchayqa sut’ita llapa runaman rikuchinku, chayta ruwaspan Jesusta qatikushanku.

10. ¿Imaraykun Jesusta munakunchis? ¿Imata ruwaspan Biblia estudiaqkuna Jesusta munakusqankuta rikuchinkuman?

¹⁰ Bibliata estudiaspaqa imaymanatan Jehová Diosmanta yacharqanki. Yacharqankin Jesusqa Diospa wawan kasqanta, Jehová Diospas Jesusta rey kananpaq gobiernonpi churasqanta. Chaymantapas yacharqankin Jesusqa k’umuykukuq kasqanta Taytan jina munakuq kasqantapas. Jesusqa yarqasqakunatan mijuchirqan, onqosqakunatan qhaliyachirqan, pisipaqkunatan kallpacharqan (Mat. 14:14-21). Kunanpas munakuywanmi Diospa llaqtanta pusarishan (Mat. 23:10). Mosoq pachapipas Diospa gobiernonpi rey kaspaqa imaymana bendicionkunatan apamunqa. ¿Manachu chaykunamanta yachaspa astawanraq Jesusta munakunki? ¿Imaynatan Jesús munakusqaykita rikuchiwaq? Chaypaqqa paypa ruwasqantan ruwanayki (Juan 14:21). Juj mañakuypin Diosman prometekunayki payllata servinaykipaq, jinaspataq bautizakunayki.

11. ¿Imaraykun bautizakunayki?

¹¹ ¿Imaraykun astawanqa bautizakunayki? Aswan jatun kamachikuymanta rimaspan Jesusqa nirqan: “Jehová Diosniykitan munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykipiwan”, nispa (Mar. 12:30). ¿Chhaynatachu qanpas Jehová Diosta munakunki?

12. ¿Imaraykun Jehová Diosta munakunki? (Kay parrafopaq fotokunata qhaway).

 ¹² Anchatan Jehová Diostaqa munakunchis. Paymantan “kausayqa paqarimun”, paymi “tukuy allin kaqkunatapas tukuy junt’asqa kaqkunatapas” qowanchis (Sal. 36:9; Sant. 1:17). Tukuy ima kaqninchiskunapas Jehová Diosmantan jamun, payqa qoykukuq munakuq Diosmi.

13. ¿Imatan Jehová Dios ruwarqan runakunata munakusqanrayku?

¹³ Jehová Diosqa wawantan noqanchisrayku kachamurqan. Chay ruwasqanqa juj jatun regalon karqan. Paykunaqa maytapunin munanakunku, chaymi Jesusqa nirqan: “Janaq pacha Taytaqa munakuwanmi noqapas paytaqa munakunin”, nispa (Juan 10:17; 14:31). Waranqa-waranqa wata kausasqankupiqa maytachá munakuyninkuqa wiñarqan (Prov. 8:22, 23, 30). Anchatataq wawanta Jehová Dios munakurqan chayqa, maytachá sonqonqa nanarqan wawanta ñak’arichispa wañuchisqankuta rikuspaqa. Chhaynaña kaqtinpas Jehová Diosqa anchatan runakunata munakurqan, qantapas munakusunkin, chayraykun wawanta noqanchisrayku wañunanpaq kachamurqan, chhaynapi wiñay kausayta chaskinanchispaq (Juan 3:16; Gál. 2:20). ¿Manachu chayta yachaspa astawanraq Jehová Diosta munakunchis?

14. ¿Imata ruwanaykipaqmi kallpachakunayki?

¹⁴ Jehová Diosmanta allinta yachaspaqa astawanraqchá paytaqa munakurqanki. Manachá  chay munakuytaqa ima kaqtinpas chinkachiyta munankichu. ¿Imatan chaypaq ruwawaq? Chaypaqqa ruwasqaykiwan rimasqaykiwan iman paypa sonqonta kusichinayki. Chayta ruwanaykitan Jehová Diospas munan (Prov. 23:15, 16). Diosta munakuspaqa kamachikuyninkunatan kasukunayki (1 Juan 5:3). Jehová Diospa munayninman jina kausaymi imamantapas aswan allinqa.

15. ¿Imata ruwaspan Jehová Diosta munakusqaykita rikuchiwaq?

¹⁵ ¿Imata ruwaspan Jehová Dios munakusqaykita rikuchiwaq? Chaypaqqa juj mañakuypin Jehová Diosman prometekunayki, jinaspa ninayki: “Jehová Diosníy, kunanmantaqa qanpa munaynillaykitañan ruwasaq”, nispa (Sal. 40:8). Chaymantataq bautizakunayki, chay ruwasqaykiwanmi jujkunapas yachanqaku Jehová Diosllapaqña kausay munasqaykita. Qallariypi rimamusqanchis jina, bautizakusqayki p’unchayqa may kusikunapaqmi. Chay p’unchaymantapachan manaña qanpaqñachu kausanki, aswanpas Jehová Diosllapaqñan kausanki (Rom. 14:8; 1 Ped. 4:1, 2). Chay ruwasqaykiqa may allinpunin, ichaqa chayqa manan chayllapichu tukupun. Jehová Diosta servispaqa kunanpas jamuq tiempopipas imaymana bendicionkunatan chaskinki.

16. Salmos 41:12 nisqan jina, ¿ima bendicionkunatan Jehová Dios qonqa serviqninkunaman?

¹⁶ Jehová Diosqa qoykukuq Diosmi. Manan pipas pay jinaqa kanmanchu. Imataña paypaq ruwapusunman chaypas payqa askhanpin kutichipuwasun (Mar. 10:29, 30). Kay tukukuy p’unchaykunapiña kausashanchis chaypas payqa may sumaq kausaytan qosunki. Chaymantapas thaj kayta kusikuyta iman tarinki. Ichaqa chaykunaqa manan kay tiempollapaqchu, Jehová Diostaqa wiñaypaqmi servinki. Watakunaq pasasqanwanqa astawanmi Jehová Diosta munakunki, paypas sapa p’unchaymi astawanraq munakusunki. Jinan Jehová Dios jina qanpas wiñay-wiñaypaq kausanki (leey Salmos 41:12).

17. ¿Imatan Jehová Diosman qoyta atisunman?

¹⁷ Tukuy ima kaqninchiskunapas kausayninchispas Jehová Diosmantan jamun. Llapantaq paypaq chayqa, ¿imatan payman qoyta atisunman?  Paymanqa qoyta atisunman junt’aq sonqo kasqanchista munakuyninchista ima (Job 1:8; 41:11; Prov. 27:11). ¿Imata ruwaspan chayta rikuchiwaq? Bautizakuspan, chayta ruwaspan Jehová Dios munakusqaykita rikuchinki. Chay ruwaymantaqa manan ima ruwaypas aswan allinqa kanmanchu.

18. ¿Imatan Biblia estudiaqkuna tapukunanku?

¹⁸ Chhaynaqa, ¿munawaqchu bautizakuyta? Qanllan chaytaqa yachanki, ichaqa kaytan tapukuwaq: “¿Atiymanñachu bautizasqa kayta, icha imatawanraqchu ruwanay?”, nispa (Hech. 8:36). Bautizakunaykipaqqa kaypi yachamusqanchis yachachikuykunan yanapasunki. Chaykunan karqan: Juj, cheqaq kaqta chanin kaqta iman munakunayki. Iskay, Jesustan munakunayki. Kinsa, Jehová Diostan munakunayki. Chaymantapas kaykunatan tapukullawaqtaq: “¿Munashanichu llapa runakunapas cheqaqllata chanillanta ruwanankuta? ¿Munashanichu Jesús reyniy kananta yupintapas qatikuyta? ¿Munashanichu Jehová Dios serviyta sonqontapas kusichiyta?”, nispa. Sichus “arí” nispa kay tapuykunaman kutichinki chayqa listoñan kashanki bautizakunaykipaq (Hech. 16:33).

19. Juan 4:34 nisqan jina, ¿imaraykun mana iskayanaykichu bautizakunaykipaq?

¹⁹ Sichus iskayashankiraq bautizakunaykimanta chayqa Jesuspa willasqanmi yanapasunkiman (leey Juan 4:34). Paymi nirqan: “Mijunayqa kachamuwaqniypa munayninta ruwaymi”, nispa. ¿Imaraykun chayta nirqan? Imaynan mijunaqa allinninchispaq chhaynallataqmi Jehová Diosta kasukuypas allinninchispaq. Jehová Diosqa allinninchispaqmi imatapas kamachiwanchis, chaymi mana manchakunaykichu bautizakuytaqa. Chaytan Jehová Diosqa munan (Hech. 2:38). Paypa kamachikusqanta kasukuspa bautizakunki chayqa kusisqan kausanki. Pipas gustasqayki mijunata qosunkiman chayqa, usqhayllan mijuruwaq ¿riki? Chhaynallataqmi mana iskayaspa bautizakunayki.

20. ¿Imatan qatimuq yachachikuypi yachasunchis?

²⁰ Wakinqa manaraqmi bautizakuytaqa munankuchu, ¿imarayku? Mana listochu kanankupaq piensasqankurayku. Jehová Diosman qokuspa bautizakuyqa ancha importanten, chayraykun ñaupaqta allinta piensanayki, jinaspapas kallpachakunaykin allin preparasqa kanaykipaq. Ichaqa bautizakuytaña munashanki chayqa, ¿iman yanapasunkiman allin preparasqa kanaykipaq? Chaymantan qatimuq yachachikuypi yachasunchis.