1, 2. ¿Ima sasachakuykunapin Jehová Diosta serviqkuna tarikunku?

APÓSTOL Pablon Timoteota niran: “Imachus ruwanaykitapas allintapuni junt’ay”, nispa (2 Tim. 4:5). Chay nisqanwanqa manan Timoteollatachu nisharan aswanpas Jesuspa llapa qatikuqninkunatawanmi. Llapanchismi kallpachakunchis apóstol Pabloq nisqanta junt’ananchispaq, ichaqa chay ruwayqa manan facilchu. Askha iñiqmasinchiskunan manchakunkuña chaypas Diosmanta willashallanku (2 Tim. 4:2). Wakin llaqtakunapiqa autoridadkunan Diosmanta willananchista jark’akunku. Chhaynaña kaqtinpas iñiqmasinchiskunaqa kallpachakushallankun Diosmanta willanankupaq.

² Jehová Diosta serviqkunaqa imaymana sasachakuykunapin tarikushanchis, yaqapaschá chaykuna jawa Jehová Dios serviyninchispi pisikallpayasunman. Askha iñiqmasinchiskunan askha horata llank’ananku familiankuta mantenenankupaq. Paykunaqa maytan munanku Jehová Diosmanta runakunaman willayta, ichaqa sayk’usqa kasqankuraykun pisillata willanku. Jujkunapas pisillatan Jehová Diosmanta willanku onqosqankurayku otaq kuraqña kasqankurayku. Wakintaq wasinkumanta manaña lloqsiyta atinkuchu. Wakin iñiqmasinchiskunataq llaki onqoywan kasqankurayku mana valeqpaq qhawarikunku. Mary * sutiyoq hermananchismi nin: “Mayninpiqa manan ima ruwanaypaqpas kallpay kanku. Mana valeqpaqmi qhawarikuni, chay qhepamantaq mal sientekuni Jehová Diospaq mana imatapas ruwasqaymanta”, nispa.

3. ¿Imakunamantan kaypi yachasun?

³ Ima llakipiña tarikusunchis chaypas Jehová Diosmi kallpata qowasun atisqanchisman jina payta servishanallanchispaq. Kaypin yachasunchis imaynatas Jehová Dios apóstol Pablotapas Timoteotapas payta servishanallankupaq yanapasqanmanta.  Chaymantapas yachallasuntaqmi imaynatas Jehová Dios kay tiempopipas yanapawasqanchista.

4. ¿Ima llakikuykunapin apóstol Pablo tarikuran?

⁴ Apóstol Pabloqa imaymana llakikuykunapin tarikuran. Paytaqa maqaranku, rumiwan ch’aqeranku, carcelman iman wisq’aranku. Chaymi payqa kallpata necesitaran chaykunata aguantananpaq (2 Cor. 11:23-25). Jinaspapas mayninpin payqa mana valeqpaq qhawarikuran (Rom. 7:18, 19, 24). Chaymantapas Jehová Diosmantan rogakuran “kiska jina” nanayninta paymanta orqonanpaq (2 Cor. 12:7, 8).

5. ¿Imakunatan apóstol Pablo ruwaran llakikuykunapiña tarikuran chaypas?

⁵ Pabloqa imaymana llakikuykunapin tarikuran, Diosmi ichaqa kallpata qoran paymanta willashanallanpaq. Yuyarisun apóstol Pabloq ruwasqankunata. Payqa Roma llaqtapi autoridadkunaq kamachisqanmi wasillanpi kasharan, chaywanpas Diosmantan willashallaran judío religionpi umalliqkunaman. Chaymantapas yaqachus jina Diosmanta willallarantaq juj autoridadkunamanpas (Hech. 28:17; Filip. 4:21, 22). Chaymantapas Diosmantan willaran Roma reyta cuidaq soldadokunaman llapa visitaqninkunamanpas (Hech. 28:30, 31; Filip. 1:13). Chay tiempopin Jehová Diosqa apóstol Pabloman espiritunta qoran wakin cartakunata qelqananpaq, chay cartakunaqa chay tiempopi Dios serviqkunatan kallpacharan, kunanpas kallpachawanchismi. Pablomanta yachaspan Roma llaqtapi iñiqmasikunapas kallpachakuranku mana manchakuspa Jehová Diosmanta willashanallankupaq (Filip. 1:14). Manaña tukuy munasqantachu apóstol Pablo ruwaran chaypas, tukuy atisqantan ruwaran Diosmanta willashanallanpaq, chhaynapin askha runakuna Diosmanta yacharanku (Filip. 1:12).

6. 2 Corintios 12:9, 10 nisqanman jina, ¿iman apóstol Pablota yanaparan Diosmanta willashanallanpaq?

⁶ Apóstol Pabloqa yacharanmi Diosmanta willasqanqa mana kallpanwanchu kasqanta, aswanpas Diospa atiyninwan kasqanta. Paymi niran: “Pisi kallpa kaspan noqaqa atiyniyoq kani”, nispa (leey 2 Corintios 12:9, 10). Paytaqa qatiykacharankun, carcelmanmi wisq’aranku, juj llakikuykunapi iman tarikuran, chaywanpas Diospa santo espiritunmi yanaparan lliu runakunaman Diosmanta willashanallanpaq.

7. ¿Ima llakikuykunatan Timoteo atipanan karan Diospaq llank’asqanta junt’ashanallanpaq?

⁷ Timoteopas Jehová Diospa yanapaynintan  necesitaran iñiq t’aqakunata watukunanpaqqa. Payqa apóstol Pablowan kuskan iñiq t’aqakunata watukuq riran, mayninpitaq sapallan iñiq t’aqakunata watukuq riran (1 Cor. 4:17). Timoteoqa niranpaschá: “Manan juj iñiq t’aqakunata watukuqqa riymanchu”, nispa. Chaypaschá apóstol Pabloqa niran: “Amapuni pipas pisichachunchu wayna kasqaykita”, nispa (1 Tim. 4:12). Chaymantapas Bibliapin willan Timoteoqa sapa kutilla onqosqanta, chay onqoyninmi paypaqqa sinchi nanay kiska jina karan (1 Tim. 5:23). Payqa yacharanmi Jehová Dios santo espiritunwan yanapananta, chaymi Diosmanta willashallaran iñiqmasikunatapas yanapashallaran (2 Tim. 1:7).

8. ¿Imakunatan Jehová Dios qowanchis kallpachawananchispaq?

⁸ Kay tiempopipas Jehová Diosqa qowanchismi “runaq mana aypay atisqan atiyta” (2 Cor. 4:7). Chaymi yanapawanchis junt’aq sonqowan payta servishanallanchispaq. Jehová Diosmi junt’aq kananchispaq yanapawanchis kaykunawan: mañakuywan, Bibliawan, iñiqmasinchiskunawan, Diosmanta willaywan ima. Chaykunamantan kaypi yachasunchis.

9. ¿Imaynatan Diosmanta mañakuy yanapawanchis?

⁹ Diosmanta mañakuy. Efesios 6:18 nin: “Diosmanta imay ratopas [...] mañakushallaychis”, nispa. Sichus sapa kutilla Diosmanta mañakusun chayqa, payqa kallpachawasunmi. Bolivia nacionmanta hermanonchis Jonnien Jehová Diospa yanapayninta repararan. Esposanwan tayta-mamanwanmi sinchita onqopuranku, chaymi paypaqqa kinsantinkuta cuidayqa sasa karan. Tiempowanmi maman wañukapuran, esposanwan papanwantaq unay tiempopi qhaliyapuranku. Hermanonchis Jonnie nin: “Llakikuna nishuta ñit’iwaqtinqa Jehová Diosmantan imachus necesitasqayta mañakuq kani”, nispa. Paymanqa Jehová Diosmi kallpata qoran chay sasachakuyninta aguantashanallanpaq. Bolivia nacionmanta iñiqmasinchis Ronaldmi yacharuran maman cáncer onqoywan kashasqanta, jinaspa juj killa qhepallaman wañukapuran. ¿Iman hermanonchista yanaparan ama nishuta llakikunanpaq? Paymi nin: “Jehová Diosmanmi lliuta willakuq kani, imaynachus sientekusqayta, imachus piensasqaytapas, payqa allintan reqsiwan”, nispa. Mayninpiqa yaqapaschá sayk’usqa sientekusunman, manataq mañakushaspa imatapas niyta atisunmanchu, Jehová Diosmi ichaqa niwanchis paywan rimananchispaq (Rom. 8:26, 27).

10. Hebreos 4:12 nisqanman jina, ¿imanaqtinmi Bibliata leesqanchispi allinta piensananchis?

¹⁰ Bibliata leey. Apóstol Pablo jinan noqanchispas Diospa qelqanta leenanchis kallpayoq kananchispaq sonqonchis tiyaykunanpaqpas (Rom. 15:4). Bibliamanta leesqanchispi piensasunchis chayqa, Jehová Diosmi espiritunwan yanapawasun chaypi yachasqanchisman jina ruwananchispaq (leey Hebreos 4:12). Ronaldmi nillarantaq: “Maytan kusikuni sapa tuta Bibliata leesqaymanta. Unaytan piensani Jehová Diosninchis imayna kasqanpi, serviqninkunata sumaqta yanapawasqanchispipas. Chaymi yanapawan ama pisipanaypaq”, nispa.

11. ¿Imaynatan juj hermananchista Biblia leesqan yanaparan?

¹¹ Bibliamanta yachasqanchispi allinta piensasun chayqa, manan nishutachu llakikusun sasachakuyninchiskunamanta. Juj viuda hermananchismanta yachasun. Juj umalliqmi hermananchista nisqa: “Job librota leeymi yanapasunki ama nishuta llakikunaykipaq”, nispa. Jinan hermananchisqa leesqa, qallariypiqa Jobpa imachus rimasqanta leespan sonqonpi nisqa: “Job, kaytaqa manamá allintachu nishanki”, nispa. Chayllamanmi payqa reparakusqa Job jina piensashasqanta.  Jinan payqa manaña sonqonpi phiñakuranchu sasachakuypi tarikusqanmanta, manataqmi nishutachu llakikuran qosanpa wañupusqanmanta.

12. ¿Imaynatan Jehová Dios iñiqmasinchiskunawan kallpachawanchis?

¹² Iñiqmasinchiskuna. Jehová Diosninchisqa hermanonchiskunawanmi kallpachawallanchistaq. Chaymi Pabloqa iñiqmasikunaman qelqaran: ‘Qankunawanmi tupayta munashani kallpachanakunanchispaq’, nispa (Rom. 1:11, 12). Ñaupaqpi rimasqanchis hermananchis Maryqa kusikunmi hermanonchiskunawan kaspa. Paymi nin: “Jehová Diosqa hermanonchiskunawanmi yanapawaran. Manaña paykuna yacharankuchu imayna kashasqayta chaypas, sumaq simikunawanmi parlapayawaranku, mayninpitaq sumaq cartakunata qelqamuwaranku, chaykunaqa allintan yanapawaran. Chaymantapas sasachakuyniypi jina tarikuq hermanakunawan parlasqaymi yanapawallarantaq. Umalliqkunapas sapa kutillanmi yuyarichiwaranku iñiqmasikunaqa anchata munakuwasqankuta”, nispa.

13. ¿Imaynatan juñunakuykunapi kallpachanakusunman?

¹³ Hermanonchiskunawanqa astawanqa kallpachanakunchis juñunakuypi kaspan. Chaypi kashaspan tukuy atisqanchista ruwananchis hermanonchiskunata kallpachananchispaq, paykunawan parlaspan nisunman: “Munakuykin, gracias iñiq t’aqapi yanapakusqaykimanta”, nispa. Peter sutiyoq umalliqmi Diospi mana iñiq qosayoq hermananchista juñunakuy manaraq qallarishaqtin nisqa: “Maytan kallpachawankiku kaypi kasqaykiwan. Tempranon soqta wawaykikunawan kaypi kashanki, yanapankitaqmi wawaykikunata allinta comentanankupaq”, nispa. Jinan hermananchisqa kusikuymanta waqasparaq hermanonchista nisqa: “Turáy, maytan kallpachawanki kay niwasqaykiwan”, nispa.

14. ¿Imaynatan yanapawasunman Diosmanta runakunaman willay?

¹⁴ Diosmanta willay. Kusisqan kanchis runakunaman Diosmanta willaspaqa uyariwanchisña manaña chaypas (Prov. 11:25). Stacy sutiyoq hermananchismi chayta allinta repararan. Diospa llaqtanmanta jujnin familian qarqosqa kaqtinmi payqa sinchi llakisqapuni kasharan. Jinaspa sapa kutilla sonqonpi niq: “Imallatapas ruwaymanchu karan payta yanapanaypaq”, nispa. Sapa kutillanmi chaypi piensaq. ¿Iman payta yanaparan ama nishuta llakikunanpaq? Diosmanta runakunaman willaymi. Diosmanta willashaspaqa uyarikuq runakunata yanapaypin yuyayninta churaq. Paymi nin: “Chay p’unchaykunapin Jehová Diosqa juj runata yachachinaypaq yanapawaran, yachachisqay runaqa allintan iñiyninpi wiñaran, chaymi anchata kallpachawaran. Jinan reparakurani Diosmanta runakunaman willaspa mana nishutachu llakikusqayta”, nispa.

15. ¿Imatan yachasunman hermananchis Mary nisqanmanta?

¹⁵ Yaqapaschá imapas jark’awasqanchisrayku mana munasqanchisman jinachu Diosmanta willayta atinchis. Ichaqa sichus tukuy atisqanchista ruwashanchis Diosmanta willananchispaq chayqa Diosninchisqa kusikunmi. Ñaupaq parrafokunapi rimasqanchis hermananchis Maryn juj simita rimaq iñiq t’aqaman riran yanapakuq. Paymi nin: “Qallariypiqa pisillatan juñunakuypi comentaq kani otaq Bibliamanta textollata leeq kani, runakunamanpas qelqakunallatan saqeq kani”, nispa. Chay simita allinta rimaq hermanokunaq ruwasqanwan ruwasqanta tupanachispaqa manapas imatapas ruwashanmanchu jinatan qhawarikuran. Ichaqa pisillataña chay simita rimayta yacharan chaypas, Jehová Diosqa yanapasharanmi jujkunata yanapananpaq, chaytan payqa reparakuran. Paymi nin: “Bibliapi kaq yachachikuykunataqa llapa runapas atinmi entiendeyta, chaykunata  yachaspan allin sonqoyoq runakunaqa vidankuta cambianku”, nispa.

16. ¿Iman wasinkumanta mana lloqsiyta atiqkunata yanapanman aguantanankupaq?

¹⁶ Sichus wasinchismanta mana lloqsiyta atinchischu chayqa, Jehová Diosqa yachashanmi runakunaman paymanta willayta munasqanchista, kusikuntaqmi chayta yachaspa. Yanapawasunmantaqmi cuidawaqninchis runakunaman, doctorkunaman otaq enfermerakunamanpas paymanta willananchispaq. Sichus kunan ruwasqanchista ñaupaqpi ruwasqanchiswan tupanachisun chayqa, yaqapaschá llakikusunman. Ichaqa sichus reparasun Jehová Dios imaynatachus yanapawasqanchista chayqa, kanqan kallpanchis ima pruebatapas kusisqalla aguantananchispaq.

17. Eclesiastés 11:6 nisqaman jina, ¿imanaqtinmi Diosmanta willashanallanchis runakuna manaña uyarikuqtinkupas?

¹⁷ Manan yachanchischu Diosmanta willasqanchista mayqen runachus sonqomanta uyarikuspa kasukunantaqa (leey Eclesiastés 11:6). Pusaq chunka watayoq Barbara sutiyoq hermananchismi sapa kutilla runakunaman Diosmanta willan cartakunata qelqaspa telefonopi wajaspa ima. Juj kaq cartanpin churasqa 2014 watamanta 1 marzo killamanta La Atalaya revistata. Juj kaq yachachikuyninpin chay revistapi niran: “¿Imatan qanrayku Dios ruwaran?”, nispa. Jinaspa juj casarasqa warmi-qhariman apachisqa, paykunaqa ñaupaqpin Jehová Diospa testigonkuna kasqaku, hermananchisqa manan chayta yachasqachu. Paykunaqa askha kutitan chay revistata leesqaku. Jinan qosanqa reparakusqa Jehová Diospas payta rimapayashanman jinata. Chayllamanmi iskayninku jujmanta juñunakuykunaman riyta qallarisqaku, jinaspan paykunaqa jujmanta Diospa llaqtanman kutimpusqaku. Paykunaqa 27 watakunañan iñiq t’aqamanta karunchakapusqaku. Hermananchis Barbaraqa anchatapunin kusikusqa carta apachisqanwan chay casarasqa warmi-qhari Diospa llaqtanman kutimpusqankumanta.

18. ¿Imatan ruwananchis Jehová Dios kallpachawananchispaq?

¹⁸ Kaypi yachasqanchis jina Jehová Diosqa imaymanatan qowaranchis ima sasachakuytapas aguantananchispaq. Chaykunamanta wakinmi kashan: Diosmanta mañakuy, Bibliata leey, iñiqmasinchiskunawan kallpachanakuy, Diosmanta willay ima. Chaykunata ruwaspan Jehová Dios yanapawananchispi confiasqanchista rikuchishanchis. Chhaynaqa tukuy sonqonchiswan janaq pacha papanchispi confiashallasun, Jehová “Diosqa kay pachantintan qhawashan tukuy sonqo payta serviqkunarayku atiyninta rikuchinanpaq” (2 Crón. 16:9).