1. ¿Imatan kay tiempopi llapa runakuna ajllakunanchis?

 KAY tiempopiqa llapa runakunan ajllakunanchis kanqa, Diospa ladonmantachus kasun icha Satanaspa ladonmantachus kasun chayta. Chay iskayllan kashan ajllakunanchispaqa manan jujqa kanchu. Imachus ajllakusqanchismantan kanqa wiñay kausay chaskinanchisqa (Mat. 25:31-33, 46). Tukuy sonqonkuwan Diosta serviqkunaqa “Manchay ñak’ariy” tiempopin wiñay kausayta chaskinanchispaq marcata chaskisunchis (Apo. 7:14; Ezeq. 9:4, 6). Manchay phiña animalpa marcanwan marcachikuqkunan ichaqa wiñaypaq chinkachisqa kanqaku (Apo. 14:9-11).

2. a) ¿Imata ruwananchispaqmi Hebreos 10:35-39 textokuna kallpachashawanchis? b) ¿Imaynatan chaypaq Apocalipsis libro yanapawasun?

² (Leey Hebreos 10:35-39). Sichus Jehová Diospa ladonmanta kashanki chayqa. ¡May allinpunin chayqa! Maytachá munashanki jujkunapas Diospa ladonmanta kanankuta. Chaypaqqa Apocalipsis libron yanapawasun, kay libropin willashan imakunas Diospaq gobiernon contranpi kaqkunawan pasanqa chayta, ima bendicionkunatas Diosta kasukuqkunapas chaskinqaku chaytapas. Apocalipsis libropi willasqan yachachikuykunataqa allintan estudiananchis, chaymi yanapawasun junt’aq sonqolla Jehová Diosta servinanchispaq, jujkunatapas yanapananchispaq. Chhaynapi paykunapas Jehová Diospa ladonmanta kanankupaq ama qhepaman kutinankupaqpas.

3. ¿Ima tapuykunamantan kay yachachikuypi yachasunchis?

³ Kay yachachikuypin kay tapuykunamanta yachasunchis: ¿Ima suyakuymi kashan Diospa gobiernonta apoyaqkunapaq?  ¿Iman pasanqa Apocalipsis libropi willasqan manchay phiña animalta yanapaqkunawan?

4. ¿Pikunatan apóstol Juan juj rijuriypi rikuran janaq pachapi Jesuswan kuska sayashaqta?

⁴ Apóstol Juanmi juj rijuriypi rikuran Diosta yupaychaq iskay t’aqa runakunata, paykunan askha bendicionkunata wiñay kausayta ima chaskinqaku. Ñaupaq kaq t’aqaqa 144.000 runakunan kanku (Apo. 7:4). Paykunaqa Jesuswan kuskan janaq pachapi juj gobiernota sayarichinqaku, chhaynapi kay pachata kamachimunankupaq (Apo. 5:9, 10; 14:3, 4). Apóstol Juanpas chaytan juj rijuriypi rikuran, Jesusta 144.000 runakunatawan Sion orqopi sayashaqta (Apo. 14:1).

5. ¿Iman pasanqa kay pachapi qhepaq wakin ajllasqa cristianokunawan?

⁵ Apostolkunaq tiemponmantapachan askha runakunata juñukuran 144.000 t’aqamanta kanankupaq (Luc. 12:32; Rom. 8:17). Apóstol Juanman rijuriypi rikusqanpin willasqaku kay tukukuy p’unchaykunapi 144.000 t’aqamanta juj tiempolla wakinkuna kay pachapi qhepananta. Manaraq manchay ñak’ariy p’unchay qallarishaqtinmi chay qhepaq t’aqamanta ajllasqa cristianokunan sellasqa kapunqaku (Apo. 7:2, 3; 12:17). Chay manchay ñak’ariy tiempopin chay qhepaq t’aqaqa janaq pachaman ripunqa wakin wañupuq ajllasqa cristianokunawan janaq pachapi juñukunankupaq. Chhaynapi Jesuswan kuska Diospa gobiernonpi kamachikunankupaq (Mat. 24:31; Apo. 5:9, 10).

6, 7. a) ¿Pikunatan apóstol Juan rikullarantaq? b) ¿Imaraykun Apocalipsis 7 capitulopi willasqan ancha allinpuni llapanchispaq?

⁶ ¿Imatawanmi apóstol Juan rikullarantaq? Chaypin apóstol Juanqa rikullarantaq “ancha askha runakunata”. Paykunaqa 144.000 ajllasqa cristianokunamantaqa mana yupay atiyraqmi kanku (Apo. 7:9, 10). ¿Pikunan kanku chay “ancha askha runakuna”? Apóstol Juanmi nin: “Paykunaqa manchay ñak’ariymanta lloqsimuqkunan kanku, paykunan pampakama p’achankuta corderoq yawarninwan t’aqsaspa yuraqyachiranku”, nispa (Apo. 7:14). Chay mana yupay atiy ancha askha runakunaqa manchay ñak’ariy qhepamanmi kay pachapi askha bendicionkunata chaskinqaku (Sal. 37:9-11, 27-29; Prov. 2:21, 22; Apo. 7:16, 17).

⁷ Janaq pachapaqña kay pachapaqña ajllasqa kanchis chaypas llapanchismi yachananchis Apocalipsis 7 capitulopi nisqanmanta. ¿Imarayku? Chay capitulopin willashan ima bendicionkunatas Diosta kasukuqkuna chaskinqaku chayta. ¡Chay bendicionkunata chaskiyqa may kusikunapaqmi kanqa! Janaq pachaman riqkunapaqpas kay pachapi tiyaqkunapaqpas. Chaypiqa llapanchismi kusisqa nisunchis: “Allipaqchá Diospa gobiernonta yanapakurani”, nispa. Ichaqa, ¿imatawanmi Apocalipsis libro willashan manchay ñak’ariy tiempomanta? (Mat. 24:21).

8. ¿Imaynatan qhallarinqa manchay ñak’ariy tiempo? Ichaqa, ¿imatan llapa runakuna ruwanqaku?

⁸ Ñaupa kaq yachachikuypi yachamusqanchis jina, kay pachapi gobiernokunan llapa pantasqa religionkunata chinkachipunqaku (Apo. 17:16, 17). Chay pasaqtinmi qallarinqa manchay ñak’ariy tiempo. ¿Imatan runakuna ruwanqaku chayta rikuspa? ¿Jehová Diostachu yupaychayta qhallarinqaku? manan. Apocalipsis capítulo 6 nisqanman jinaqa, Jehová Diosta mana serviqkunaqa gobiernokunapi qolqeyoq organizacionkunapin pakakuyta qhallarinqaku. Chay runakunaqa manan Diospa gobiernontaqa apoyanqakuchu. Chaymi Jehová Diosqa enemigonkunata jina paykunataqa qhawaripunqa (Luc. 11:23; Apo. 6:15-17).

9. ¿Imaraykun manchay ñak’ariy tiempopi Diospa llaqtan juñunasqa nacionkunaq phawaykusqan kanqa?

 ⁹ Chay manchay ñak’ariy tiempopiqa Jehová Diospa testigonkunallan Diosta servishanqaku. Paykunallan “manchay phiña animaltapas” mana apoyanqakuchu, chhayna kasqankuta rikuspa llapa runakunaq qhawarisqan kanqaku (Apo. 13:14-17). Diospaq junt’aq sonqo kasqankuta rikuspataq llapa juñunasqa nacionkuna Jehová Diospa llaqtanman phawaykunqa. Chaytan Biblia nillantaq Magog allpamanta Gogpa phawaykusqan nispa (Ezeq. 38:14-16).  

10. Apocalipsis 19:19-21 nisqan jina, ¿imatan Jehová Dios ruwanqa llaqtan contra phawaykuqtinku?

¹⁰ ¿Imatan Jehová Dios ruwanqa llaqtan contra phawaykuqtinku? Jehová Dios kikinmi nin: “Manchanatapuni phiñakuyniy raurarinqa”, nispa (Ezeq. 38:18, 21-23). Chaymantan Apocalipsis 19 capítulo willashan. Jehová Diosqa churin Jesustan kachamunqa llaqtanta pakaykunanpaq enemigonkunatapas chinkachipunanpaq. Jesusqa mana sapallanchu maqanakunqa. Chay maqanakuypin yanapakunqaku angelkunapas 144.000 ajllasqa cristianokunapas (Apo. 17:14; 19:11-15). Chay guerrapiqa Diosta mana kasukuq runakunapas Dios contra sayariq organizacionkunapas llapallanmi chinkachisqa kanqaku (leey Apocalipsis 19:19-21).

11. ¿Iman ancha kusikunapaq kallanqataq?

¹¹ ¿Imaynan Diosta junt’aq sonqowan serviqkuna kanqaku Armagedón guerra tukupuqtin? ¡May kusisqan kanqaku! Janaq pachapipas ancha kusikuymi kanqa Jatun Babilonia chinkachisqa kapusqanrayku. Ichaqa mana chaykuna pasasqallanwanchu kusikuyqa kanqa (Apo. 19:1-3). Aswanpas Apocalipsis libropi nisqan jina “corderoq casarakunan p’unchaymi” ancha kusikunapaq kallanqataq (Apo. 19:6-9).

12. ¿Jayk’aqmi corderoq casarakunan p’unchay kanqa? (Apocalipsis 21:1, 2).

¹² ¿Jayk’aqmi corderoq casarakunan p’unchay kanqa? Manaraq Armagedón guerra qallarishaqtin 144.000 ajllasqa cristianokuna janaq pachapiña kanqaku chaypas, manan chay p’unchaychu corderoqa casarakunqa (leey Apocalipsis 21:1, 2). Chay casarakuyqa aparikunqa Armagedón guerra pasaytañan, Jehová Diospa enemigonkuna chinkachisqa kapuqtinñan (Sal. 45:3, 4, 13-17).

13. ¿Imaynan kanqa corderoq casarakuynin p’unchay?

¹³ ¿Imaynan kanqa corderoq casarakuynin p’unchay? Juj casarakuypiqa qhariwan warmiwanmi jujllachakunku. Chhaynallataqmi corderoq casarakuynin p’unchaypipas kanqa. Jesusmi 144.000 ajllasqa cristianokunawan kuska juj nisqalla kanankupaq jujllachakunqaku. Chay qhepatataq waranqa watata kuska kay pachata kamachimunqaku (Apo. 20:6).

14, 15. ¿Imawanmi Apocalipsis 21 capítulo tupanachishan 144.000 ajllasqa cristianokunata? (Qhaway tapanpi kaq dibujota).

¹⁴ Apocalipsis 21 capitulon rijch’anachishan 144.000 ajllasqa cristianokunata juj sumaq llaqtawan. Chay llaqtaq sutinmi “mosoq Jerusalén” nisqa (Apo. 21:2, 9). Kay llaqtaq cimientonkunaqa “chunka iskayniyoq cimiento rumikunayoqmi”, chay rumikunapin “qelqasqa kasqa corderoq, chunka iskayniyoq apostolninkunaq sutin”. Chayta rikuspaqa anchatachá apóstol Juanqa admirakuran. ¿Imarayku? Chay rumikunapi sutinta rikusqanrayku. Chayta rikuspaqa apóstol Juanqa anchatan kusikuran (Apo. 21:10-14; Efes. 2:20).

¹⁵ Kay llaqtaqa manan ima llaqtawanpas igualakunchu. Jatun kaq callenqa chuya qorimantan ruwasqan kasqa, chunka iskayniyoq punkunkunapas chunka iskayniyoq perlakunan  kasqa. Perqankunapas cimientonkunapas imaymana sumaq rumikunawanmi ruwasqa kasqa. Kay llaqtaqa allin k’apaj medisqan kasqa (Apo. 21:15-21). Chay rijuriy rikusqanpiqa apóstol Juanqa manas ima templotapas rikusqachu. ¿Imarayku? Paymi nin: “Chaypiqa manan ima templopas kasqachu, tukuy atiyniyoq Jehová Dioswan corderowan iman temploqa kasqaku. Chay llaqtaqa manan necesitasqachu intiq k’anchaynintapas ni killaq k’anchaynintapas, Diospa lliflli kayninmi chay llaqtataqa k’anchaykusqa, corderopas k’anchaymi kasqa”, nispa (Apo. 21:22, 23). Mosoq Jerusalén llaqtamanta kaqkunaqa mana juj templotaraqchu necesitanqaku Diosta adoranankupaqqa (Heb. 7:27; Apo. 22:3, 4). Paykunapaqqa Jehová Diosmi, Jesusmi templonqa kanqa.

16. ¿Ima bendicionkunan kanqa Diospa gobiernon waranqa wata kamachikamuqtin?

¹⁶ Ajllasqa cristianokunaqa kusisqachá kashanku chay sumaq llaqtapi piensaspaqa. Noqanchispas anchatan kusikunchis chay llaqtapi piensaqtinchisqa. Waranqa wata Diospa gobiernon kamachikuqtinqa mosoq Jerusalén llaqtaqa imaymana bendicionkunatan qowasunchis. Apóstol Juanmi willan chay bendicionkunaqa “kausay unu mayu” jina kasqanta. Chay mayuq cantonkunapis “kausay sach’akuna” kasqa chay sach’akunaq “raphinkunataq nacionkunaq qhaliyananpaq” kasqa (Apo. 22:1, 2). Mosoq pachapi llapa tiyaqkunaqa chay bendicionkunatan chaskinqaku, pisi-pisimantataq ch’uya runakunaman tukupunqaku. Manañan onqoypas, nanaypas, llakikuypas chaypiqa kanqañachu (Apo. 21:3-5).

17. ¿Pikunan Jesuspa kamachimusqan waranqa watapi bendicionkunata chaskinqaku? (Apocalipsis 20:11-13).

¹⁷ ¿Pikunan chay sumaq bendicionkunata chaskinqa? Ñaupaqtaqa Armagedón guerramanta kausashaqlla paraisoman jaykuqkunan, paykunaqa mana yupay atiy runakunamantan kanku. Chaymantapas paraisopi naceq wawakunapas chay bendicionkunata chaskillanqakutaq. Ichaqa manan paykunallachu chay bendicionkunataqa chaskinqaku. Apocalipsis 20 capitulon willallantaq askha runakuna paraisopi kausarimpunankumanta (leey Apocalipsis 20:11-13). ¿Pikunataq kausarimpunqaku? Chaypiqa kausarimpunqaku chanin runakuna mana chanin runakunapiwanmi. Chanin runakunaqa kanku tukuy sonqonkuwan Diosta kasukuq runakunan. Mana chanin runakunataq kanku Diosta mana jayk’aq reqsiq runakunan (Hech. 24:15; Juan 5:28, 29). Chhaynaqa,  ¿Jesuspa kamachimusqan waranqa watapichu llapa runakuna kausarimpunqaku? Manan. Diosmanta mana yachay munaq runakunaqa, mana cambiayta munaq runakunaqa manañan kausarimpunqakuñachu (Mat. 25:46; 2 Tes. 1:9; Apo. 17:8; 20:15).

18. ¿Imaynan llapa runapas waranqa wata tukuyta kasunchis?

¹⁸ Waranqa wata tukuytaqa llapa chaypi tiyaqkunaqa ch’uya runakunan kapusunchis. Adán Evaq jucha saqewasqanchispas manañan kapunqañachu (Rom. 5:12). Manañan pipas ima juchayoqpas kasunñachu, jucharayku imaymana ñak’ariykunapas llapallan chinkapunqa. Waranqa wata tukuytaqa wiñaypaq kausayta atisunchis ch’uya runakuna kapusqanchisrayku (Apo. 20:5).

19. ¿Imaraykun waranqa wata qhepata pruebaman churasqa kasun?

¹⁹ Jesús kay pachapi kashaspaqa junt’aq sonqowanmi Jehová Diosta serviran imaymana pruebakunamanña Satanás churaran chaypas. Waranqa wata pasaytaqa wajmantan Satanás kacharisqa kanqa. Chaypiqa llapallanchistan Saqraqa pruebaman churawasunchis. Chay tiempo chayamuqtin, ¿junt’aq sonqochu Jehová Diospaq kasun? Chayqa noqanchismantan kanqa (Apo. 20:7). Chay tiempopi chay pruebata llapa pasaqkunaqa wiñay kausay premiotan chaskinqaku, chaymantapas paykunaqa Diospa wawankuna jinan libre kapunqaku (Rom. 8:21). Ichaqa chay tiempopi Saqraq partenmanta churakuqkunaqa Saqrawan kuska supaynikunawan kuskan wiñay-wiñaypaq chinkachisqa kanqaku (Apo. 20:8-10).

20. ¿Imaynan llapapas kashanchis Apocalipsis libropi willasqan profeciakunamanta yachaspa?

²⁰ Kay yachachikuykunapiqa imaymanatan Apocalipsis libromanta yacharunchis. ¿Imaynan kashanchis chaykunamanta yachaspa? Llapanchispas kusisqachá kashanchis, maytachá munashanchisña chay profeciakunaq junt’akunantaqa. Chayraykun kallpachakunanchis chay profeciakunamanta jujkunaman willananchispaq chhaynapi paykunapas Jehová Diosta wiñay-wiñaypaq servinqaku (Apo. 22:17). Jamuq tiempomanta sumaq kausay kananmanta yachayqa anchatan kusichiwanchis, Apóstol Juan jinapaschá nishanchis: “¡Amén! Jamuy, Señor Jesús”, nispa (Apo. 22:20).