1, 2. ¿Imaraykun noqanchispaq ancha allinpuni Apocalipsis libro?

 ¿JAYK’AQLLAPAS allin amigoykiq fotonkunata qhawaranki? Yaqapaschá chay fotokunata qhawashaspaqa mana reqsisqayki runakunata rikuranki. Ichaqa rikurunki qanpas juj fotopi kashasqaykita. Jinaspa piensaykuwaq: “¿Maypitaq chay fototari orqokurayku?”, nispa. Chay foto qhawasqaykiqa imaymanatachá yuyarichirasunki.

² Apocalipsis libroqa chay foto jinan. Chay libroqa noqanchispaqmi qelqasqa karan. Chayraykun chay libroq qallariyninpi nin: “Kayqa Jesucristoq rikuchisqanmi, chaytan Diosqa payman encargasqa imakunachus yaqaña pasanqa chaykunata kamachinkunaman rikuchinanpaq”, nispa (Apo. 1:1). Chay libroqa manan llapa runakunapaqchu qelqasqa karan, aswanpas Jehová Diosta serviqkunallapaqmi. Chayraykun noqanchisqa yanapakushanchis chay libropi kaq profeciakuna junt’akunanpaq.

3, 4. ¿Ima watamantan Apocalipsis libropi kaq profeciakuna junt’akuyta qallariran? ¿Imata ruwananchispaqmi kallpachakunanchis?

³ Apocalipsis libropi kaq profeciakuna jayk’aqchus junt’akunanmanta yachayqa may allinpunin noqanchispaqqa. Chaymanta rimaspan apóstol Juan niran: “Jinan santo espirituq apasqan kaspa qonqaylla Señorpa p’unchayninpi rikurukuni”, nispa (Apo. 1:10). Apóstol Juanqa 96 watapi jinan chayta qelqaran. Chay tiempopaqqa “Señorpa p’unchayninqa” manaraqmi chayamuranraqchu (Mat. 25:14, 19; Luc. 19:12). Profeciakunaq nisqanman jinaqa “Señorpa p’unchayninqa” 1914 watamantan qallariran. Chay watapin Jesusqa Rey jina janaq  pachapi kamachikuyta qallariran. Chay watamantapachan Apocalipsis libropi kaq profeciakunaqa junt’akuyta qallariran. Chaymi noqanchisqa “Señorpa p’unchayninpi” kausashanchis.

⁴ Señorpa p’unchayninpitaq kausashanchis chayqa, kasukunanchismi Apocalipsis 1:3 textopi nisqanta. Chaypin nin: “Kusisqa kachun pipas kay profeciata jujkunaman leeqqa, chayta uyarispa chaypi qelqasqa kaqkunata kasukuqkunapas; señalasqa tiempoqa cercapiñan kashan”, nispa. Chay textopi nisqan jina, kallpachakunanchismi Apocalipsis libropi kaq profeciakunata allinta estudiananchispaq kasukunanchispaq ima.

5. Apocalipsis libroq nisqan jina, ¿imaraykun allinta qhawarikunanchis imaynatachus Jehová Diosta servishasqanchista?

⁵ Apocalipsis qallariy capitulomantapachan reparakun Jesús iñiq t’aqakunapi imachus pasasqanta allinta yachasqanta (Apo. 1:12-16, 20; 2:1). Chaytan sut’ita reparakun Asia Menor nisqapi kaq qanchis iñiq t’aqakunaman willakuykunata apachisqanpi. Chay willakuykunapin Jesusqa qatikuqninkunata niran imakunatachus ruwananku Jehová Dios yupaychasqankuta chaskinanpaq chayta. Chaykunaqa kay tiempopi Jehová Diosta serviqkunatapas yanapawanchismi. Umalliqninchis Jesucristoqa allintan yachan imaynan iñiyninchis kasqanta. Payqa sumaqtan pakaykuwanchis pusariwanchis, manan paypaqqa imapas pakasqaqa kanchu. Payqa allintan yachan imakunatachus ruwananchis Jehová Dios yupaychasqanchista chaskiwananchispaq chayta. Kunanqa Jesuspa qosqan wakin consejokunamantan yachasun, chaykunatan kay tiempokunapipas kasukunanchis.

6. a) Apocalipsis 2:3, 4 nisqan jina, ¿ima mana allinta ruwasharanku Éfeso iñiq t’aqapi kaq cristianokuna? b) ¿Imatan chaymanta noqanchis yachasunman?

⁶ (Leey Apocalipsis 2:3, 4). Amapuni chiriyachisunchu qallariypi Jehová Dios munakusqanchista. Jesuspa nisqanman jinaqa Éfeso cristianokunaqa aguantarankun sasachakuykunata. Imaña kaqtinpas paykunaqa manan Jehová Dios serviytaqa saqerankuchu. Chhayna kaqtinpas munakuyninkuqa manañan qallariypi jinañachu kasharan. Jehová Dios yupaychasqankuta chaskinanpaqqa jujmantan qallariypi jina Diosta munakunanku karan. Kay tiempopipas yaqapaschá Éfeso cristianokuna jina Jehová Dios munakuyninchis chiriyapushanman. Ichaqa tukuy atisqanchistan kallpachakunanchis qallariypi jina Jehová Diosta munakunanchispaq, chaymi yanapawasunchis Jehová Diosta tukuy sonqomanta servinanchispaq. Jehová Diosqa manan ima ruwasqallanchistachu qhawan, astawanqa qhawan sonqomantachu imatapas ruwasqanchistan. Chaymi payqa munan tukuy sonqonchismanta payta munakunanchista (Prov. 16:2; Mar. 12:29, 30).

7. a) Apocalipsis 3:1-3 nisqan jina, ¿ima mana allin ruwashasqankutan Jesús rikuran Sardis iñiq t’aqapi? b) ¿Imatan chaymanta yachasunman?

⁷ (Leey Apocalipsis 3:1-3). Rijch’asqallan kashananchis Jehová Dios serviyninchispi. Sardis iñiq t’aqamanta cristianokunaqa jujniray sasachakuypin tarikullarankutaq. Allintaña qallariypi Jehová Diosta serviranku chaypas pisi-pisimantan Jehová Dios serviyninkupi pisipapusharanku. Chayraykun Jesusqa paykunata kallpacharan qallariypi jina Jehová Diosta servishanallankupaq. ¿Imatan chaymanta yachasunman? Jehová Diosqa manapunin payrayku ima ruwasqanchistaqa qonqanqachu (Heb. 3:10). Ichaqa manan chayraykuchu Jehová Dios serviyninchispi pisipananchis. Yaqapaschá kunanqa manañan  qallariypi jinañachu Jehová Dios serviyninchispi ruwashanchis. Chhayna kaqtinpas kallpachakunanchis “Señorpa llank’ananpi tukuy tiempo imaymanata ruwananchispaq”. Rijch’asqallataq makilla kashananchis tukukuy p’unchay chayamunankama (1 Cor. 15:58; Mat. 24:13; Mar. 13:33).

8. ¿Imatan Laodicea iñiq t’aqaman Jesuspaq nisqanmanta yachasunman? (Apocalipsis 3:15-17).

⁸ (Leey Apocalipsis 3:15-17). Jehová Diostaqa tukuy sonqowanmi kusisqa yupaychananchis. Laodicea iñiq t’aqaman mensaje apachisqanpin Jesusqa juj sasachakuytan rikuchillarantaq. Paykunaqa manan sonqomantachu Jehová Diosta yupaychasharanku. Jesús kikinmi paykunamanta niran p’enqaypi kashasqankuta, chaymi paykunaqa kallpachakunanku karan wajmanta tukuy sonqowan Jehová Diosta yupaychanankupaq (Apo. 3:19). ¿Imatan chaymanta yachasunman? Sichus manaña qallariypi jinañachu tukuy sonqomanta Jehová Diosta servishanchis chayqa, jujmantan kallpachakunanchis Jehová Dios serviyninchista ñaupaqman churananchispaq (Apo. 3:18). Manan kay pachapi allinta kausayta munaspachu Diosmantaqa karunchakunanchis, aswanpas Jehová Dios serviyninchismi imamantapas ñaupaqpi kanan.

9. ¿Ima yachachikuykunamanta cuidakunanchis?

⁹ Amapuni Dios contra rimaq apostatakunaq yachachikuyninkunataqa chaskikunanchischu. Pérgamo iñiq t’aqapi kaq Jesuspa wakin qatikuqninkunaqa, iñiq t’aqatan t’aqanachisharanku, chaymi Jesusqa paykunata anyaran (Apo. 2:14-16). Tiatira iñiq t’aqapi kaqkunatan ichaqa “allinmi” nispa niran. Paykunaqa “Satanaspa pakasqa” yachachikuyninkunamantan t’aqakuranku. Chaymi Jesusqa chayta ruwashanallankupaq kallpacharan (Apo. 2:24-26). Chay pantasqa yachachikuykunawan apasqa cristianokunaqa jujmanta Diospa llaqtanman kutimunankupaqqa chay pantasqa yachachikuykunatan saqepunanku karan. Kaqllataqmi noqanchispas Jehová Diospa contranpi kaq yachachikuykunamantan karunchakunanchis. Jehová Dios contra rimaq apostatakunaqa, “Dios sonqo runamanmi rijch’akunku, ichaqa manan chayman jinachu kausanku” (2 Tim. 3:5). Sichus Bibliata allinta estudiasunchis chayqa manan chay pantasqa yachachikuykunawanqa engañachikusunchu (2 Tim. 3:14-17; Jud. 3, 4).

10. ¿Imatawan yachasunman Pérgamo, Tiatira iñiq t’aqakunaman Jesuspa nisqanmanta?

¹⁰ Manan qhelli jucha ruwaykunapiqa purinanchischu. Pérgamo, Tiatira iñiq t’aqakunapi  wakin cristianokunaqa allinpaq jinan qhawarisharanku qhelli jucha ruwaykunata, chaymi Jesusqa paykunata anyaran (Apo. 2:14, 20). Chaypin reparanchis Jehová Diosqa manan jinallatachu qhawanqa qhelli juchapi purisqanchistaqa, may unayña otaq imaymana llank’aykunapiña Diospa llaqtanpi yanapakushasunman chaypas (1 Sam. 15:22; 1 Ped. 2:16). Diosta mana serviq runakunaqa allinpaqmi qhawarinku qhelli jucha ruwayta, noqanchismi ichaqa Jehová Diospa kamachikuyninkunaman jinan kausananchis (Efes. 6:11-13).

11. ¿Imatan kaykama yacharamunchis? (Qhaway “ Noqanchispaq yachachikuykuna” nisqata).

¹¹ ¿Imakunatan kaykama yacharamunchis? Kallpachakunanchismi Jehová Dios yupaychasqanchista chaskiwananchispaq. Ichaqa sichus imatapas mana allinta ruwashanchis chayqa usqhayllan chayta cambiananchis. Chhaynapin Jehová Diosqa yupaychasqanchista chaskinqa (Apo. 2:5, 16; 3:3, 16). Iñiq t’aqakunaman willakuykuna apachisqanpin Jesusqa jujkunamanta rimallarantaq. Chaymantan kunan yachasun.

12. ¿Imatan yachasunman Esmirna, Filadelfia iñiq t’aqakunaman Jesuspa nisqanmanta? (Apocalipsis 2:10).

¹² Jesusqa Esmirna, Filadelfia iñiq t’aqakunamanpas willakuykunata apachiran. Chay willakuykunapin Jesusqa paykunata kallpacharan qatiykachasqa kaspaqa ama manchakunankupaq. Jehová Diosmi paykunataqa chay ruwasqankumanta bendecinan karan (leey Apocalipsis 2:10; 3:10). ¿Imatan Jesuspa nisqanmanta yachasunman? Noqanchispas qatikachasqan kasun. Ichaqa manan manchakunanchischu aswanpas allin preparasqa kananchis chay p’unchaypi aguantananchispaq (Mat. 24:9, 13; 2 Cor. 12:10).

13, 14. Apocalipsis 12 willasqan jina, ¿imaynapin tarikunanku karan Diosta serviqkuna?

¹³ Apocalipsis libropin willashan kay tukukuy tiempopi Diosta serviqkunaqa qatikachasqa kanankuta. 12 capitulopin willashan Diospa gobiernon kamachikuyta qallarisqan qhepallaman janaq pachapi guerra qallarisqanta. Chaypin Miguel otaq Rey Jesucristo angelninkunantin Satanás contra supayninkunawan contra maqanakuranku (Apo. 12:7, 8). Chaypin Satanaspas supayninkunapas kay pachaman wijch’uykusqa karanku. Chaymi paykunaqa kay pachapi runakunata ñak’arichishanku (Apo. 12:9, 12). Ichaqa, ¿imapin Diosta serviqkuna chaykuna pasasqanwan tarikunanku karan?

¹⁴ ¿Imata ruwaran Satanás kay pachaman wijch’uykusqa kaqtin? Manañataq janaq pachaman riyta atiranñachu chayqa, janaq pachapaq ajllasqa cristianokuna contra jatariran. Paykunan kay pachapi Diospa gobiernon rantinpi kashanku, paykunaqa “Jesusmanta willanankupaqmi churasqa kanku”. Chayraykun  Satanasqa paykunapaq phiñasqa kashan (Apo. 12:17; 2 Cor. 5:20; Efes. 6:19, 20). ¿Imaynapin chay profecía kay tiemponchispi junt’akushan?

15. ¿Pikunan kanku Apocalipsis 11 capítulo willasqan iskay testigokuna? ¿Iman paykunawan pasaran?

¹⁵ Satanasqa Diospa enemigonkunawanmi kay pachapi predicacionta apariq ajllasqa cristianokuna contra jatariran. Chay hermanokunamanta wakinkuna Diospa llaqtanta umalliq hermanokunan karanku. Paykunamantan Apocalipsis libroqa rimashan “iskay testigoykunata wañuchiranku”, nispa * (Apo. 11:3, 7-11). 1918 watapin predicacionta umalliq pusaq hermanokunan yanqamanta tumpasqa kaspa carcelman wisq’asqa karanku, chaypi askha watakunan wisq’asqa kamunankupaq, chaywanqa manañapas ima ruwaytapas atinkumanñachu jinan kasharanku.

16. ¿Iman pasaran 1919 watapi? ¿Imatan Satanás chay watamantapacha ruwashallan?

¹⁶ Apocalipsis capítulo 11 profecian willashallantaq chay “iskay testigokunaqa” pisi tiempollamanta jujmanta kausayman kutirimpunankumanta. Chayqa junt’akuran wisq’asqa kasqankumanta manaraq juj wata junt’akushaqtinmi. 1919 watapin marzo killapi ajllasqa cristianokunata carcelmanta kacharimpuranku. Chay hermanokunaqa usqhayllan Diosmanta willayta jujmanta qallarichiranku. Chaymantapachan Satanasqa “mayu jinaraq” Jehová Diospa serviqninkunata qatikachashan (Apo. 12:15). Chayraykun llapanchispas allinta aguantananchis, iñiyninchispipas qaqata sayananchis (Apo. 13:10).

17. Saqraña jarq’akuran chaypas, ¿ima yanapaytan Jehová Diosta serviqkuna chaskiranku?

¹⁷ Apocalipsis 12 capitulon willashan Diosta serviqkunaqa yanapayta chaskinankumanta. Chaypin nin: “Allpaqa […] mayuta millp’upuran”, nispa (Apo. 12:16). ¿Imaynapitaq allpari mayuta millp’upuran? Mayninpiqa kay pachamanta wakin organizacionkuna juezkuna iman Diospa llaqtanta yanaparanku. Paykunaq yanapayninkuwanmi Jehová Diospa testigonkunaqa askha kutikunapi juiciokunata atiparanku chhaynapi mana piqpa jark’asqallan Diosmanta willanankupaq (1 Cor. 16:9).

18. ¿Ima llank’aymi kay tukukuy p’unchaykunapi aparikushan?

¹⁸ Jesusmi niran manaraq tukukuy chayamushaqtin “Diospa gobiernonmanta allin willakuykunan  pachantinpi willasqa” kananmanta. Chay llank’aytaqa Jesuspa qatikuqninkunan ruwananku karan (Mat. 24:14). Chay llank’ayta junt’anankupaqqa angelkuna yanapakushanku. Apocalipsis libron chaymanta rimaspa nin: “Chayllamanmi rikuruni juj angelta altonta volashaqta, paymi wiñaypaq allin willakuykunata willanan kasqa allpa pachapi llapa tiyaqkunaman, llapa nacionkunaman, ayllukunaman, rimaykunaman, llaqtakunamanwan”, nispa (Apo. 14:6).

19. ¿Ima willakuytan Diosta serviqkuna willamunanchis kashan?

¹⁹ Diosta serviqkunaqa manan allin willakuykunallatachu willananku karan. Apocalipsis 8 capitulomanta 10 capitulokama willasqan jinapas, Diospa juicionmanta willaq angelkunatan yanapanallankutaq karan. Chayraykun noqanchisqa Diospa juicionmanta runakunaman willamushanchis. Ichaqa chay willakuykunaqa “chijchi” jinaraq “nina” jinaraqmi Dios contra kaqkunapaqqa kanqa. Pisi tiempollamantan Jehová Diosqa Satanaspa llapa kay pachapi kamachisqan organizacionkunata chinkachipunqa (Apo. 8:7, 13). Chayrayku llapa runakunan yachananku Diospa phiñakuynin p’unchay cercapiña kashasqanta, chhaynapi mana allin kausayninkuta saqepuspa Jehová Diosman kutirikunankupaq (Sof. 2:2, 3). Ichaqa manan llapa runakunachu Diosmanta willasqanchistaqa uyarikunqaku, chaywanpas mana pisipananchischu. Bibliaq nisqan jinapas manchay ñak’ariy p’unchaykunapiqa astawanraqmi Diospa juicionmanta runakunaman willasunchis (Apo. 16:21).

20. ¿Imakunamantan qatimuq yachachikuypi yachasunchis?

²⁰ Sichus Apocalipsis libropi willasqan profeciakunaq nisqanta kasukusunchis chayqa, chay profeciakunaq junt’akunanpaqmi yanapakushanchis (Apo. 1:3). Ichaqa, ¿imakunan yanapawasun qatikachasqaña kashaspapas Jehová Diosmanta willashanallanchispaq? Chaypaqqa iskay ruwaykunan yanapawasun. Ñaupaqtaqa, allintan yachananchis imanispan Apocalipsis libropi nishan Diospa enemigonkunamanta chayta. Iskaypitaq, allintan yuyarinanchis ima bendicionkunatas Dios sonqo runakuna chaskikunqaku chayta. Chaykunamantan qatimuq yachachikuypi astawan yachasunchis.