1. ¿Ima ruwananchistan Jehová Dios munan? (Qhaway kay parrafopaq fotokunata).

 ¿PIQPA yanapaynintan mañakusunman llakisqa kashaspa otaq allinta imatapas ruwananchispaq? Jehová Diospa yanapaynintan. Pay kikinpunin niwanchis paymanta mañakunanchispaq. Arí, Diosqa sapa kutilla mañakunanchistan munan, chaymi Bibliapi nin: “Tukuy tiempo Diosmantaqa mañakushallaychispuni”, nispa (1 Tes. 5:17). Diospa yanapaynintaqa mana manchakuspan ima ratupas mañakusunman (Prov. 3:5, 6). Payqa manan phiñakunchu paymanta sapa ratu mañakuqtinchisqa.

2. ¿Imakunamantan kay yachachikuypi yachasun?

² Mañakuy atiyqa Jehová Diospa regalonmi, chaymi payta “gracias” ninchis chay regalomanta. Llapanchispas imaymana ruwaykunapin ocupasqa kashanchis, chaymi mayninpiqa mana tiemponchis aypawanchischu Jehová Diosmanta mañakunanchispaq. Chaymantapas yaqapaschá mañakusqanchispi allinyananchis kashan. Chhayna kaqtinqa ama llakikuychu, Bibliapiqa kashanmi yanapaykuna Diosmanta aswan allinta mañakunanchispaq. Kay yachachikuypin yachasun Jesuspa ejemplonmanta, payqa tiempotan orqorqan Diosmanta mañakunanpaq. Chaymantapas yachallasuntaqmi ima pisqa ruwaykunamanta mañakuysi yanapawasunman aswan allinta mañakunanchispaq chayta.

3. ¿Imatan Jesús allinta yacharqan?

³ Jesusqa yacharqanmi Diosmanta mañakusqanchista Jehová Dios ancha allinpaq qhawarisqanta. Jesusqa manaraq kay  pachaman jamushaspaqa janaq pachapin tiyarqan, chaypin payqa rikurqan serviqninkunaq mañakusqanman Jehová Dios kutichimusqanta. Jesusqa rikurqanmi Anaq mañakusqanman, Davidpa mañakusqanman, Eliaspa mañakusqanman, jujkunaq mañakusqanmanpas Jehová Dios kutichimusqanta (1 Sam. 1:10, 11, 20; 1 Rey. 19:4-6; Sal. 32:5). Chaychá Jesusqa qatikuqninkunata nirqan mana manchakuspa sapa kutilla mañakunankupaq (Mat. 7:7-11).

4. ¿Imatan yachasunman Jesuspa mañakusqanmanta?

⁴ Jesusqa kay pachapi kashaspaqa sapa kutillanmi Diosmanta mañakuq, chay ruwasqanmi noqanchispaq ejemplo karqan. Jesusmanqa askha runakunan asuykuqku, chaymi tiemponqa mana kaqchu mijunallanpaqpas, chaywanpas tiempotan orqorqan Diosmanta mañakunanpaq (Mar. 6:31, 45, 46). Jesusqa tutallataraq jatarispan ch’in ladoman rispa Diosmanta mañakuq (Mar. 1:35). Juj kutinpas discipulonkunata ajllananpaqmi tutantin Diosmanta mañakurqan (Luc. 6:12, 13). Wañupunan patapiña kashaspapas askha kutitan Diosmanta mañakurqan (Mat. 26:39, 42, 44).

5. ¿Imata ruwaspan Jesuspa ejemplonta qatikusunman?

⁵ Imaymana ruwanayoqña kanchis chaypas Jesús jinan tiempota t’aqananchis Jehová Diosmanta mañakunanchispaq. Yaqapaschá Jesús jina tutallamanta sayarispa otaq tutapi Diosmanta mañakusunman. Chayta ruwaspan Jehová Diosta “gracias” nishanchis mañakuyta atisqanchismanta. Lynnen hermananchisqa anchatas kusikusqa mañakuypi Jehová Dioswan rimay atisqanta yachaspa. Paymi nin: “Jehová Diosmanta ima ratupipas mañakuy atisqayta yachaspan payta juj amigota jina qhawarirqani, jinaspapas kallpachakurqanin allinta piensaspa tukuy sonqomanta mañakunaypaq”, nispa. Noqanchispas pay jinapaschá tarikushanchis. Chaymi kunan yachasunchis imaraykus Diosmanta mañakushaspa pisqa ruwaykunamantawan mañakunanchis chayta.

6. Apocalipsis 4:10, 11 nisqan jina, ¿imata chaskinanpaq jinan Jehová Diosninchis?

⁶ Jehová Diostan alabananchis. Apóstol Juanmi juj rijuriypi rikurqan iskay chunka tawayoq kuraq runakuna Jehová Diosta cielopi adorashasqankuta, paykunan nishasqaku: “Jehová Diosniyku, alabaytapas, jatunchaytapas, atiytapas chaskinaykipaq jinapunin kanki”, nispa (leey Apocalipsis 4:10, 11).  Angelkunapas Jehová Diostaqa jatunchankun. Paykunaqa Dioswan kuskan cielopi kashanku, allintataqmi yachanku Diosninchis imayna kasqanta, chaytaqa yachanku imakunachus ruwasqanpin, chaymi paykunaqa sonqomanta Diosta jatunchanku (Job 38:4-7).

7. ¿Imaynatan Jehová Diosta jatunchasunman mañakushaspa?

⁷ Noqanchispas mañakushaspaqa Jehová Diostan jatunchananchis. Chaymi mañakuspaqa willananchis imakunas paymanta gustawanchis chayta, imaraykus payta munakunchis chaytapas. Bibliata estudiashaspaqa kallpachakunaykin Jehová Dios imayna kasqanta yachanaykipaq (Job 37:23; Rom. 11:33). Chaymantataq mañakushaspa Diosta agredecekuwaq imaynachus kasqanmanta. Jehová Diostaqa jatunchallasunmantaqmi yanapawasqanchismantapas jujkunata yanapasqanmantapas. Jehová Diosqa makillan qhawamushawanchis, cuidashawanchistaqmi kanpas (1 Sam. 1:27; 2:1, 2).

8. ¿Imakunamantan Jehová Diosta “gracias” nisunman? (1 Tesalonicenses 5:18).

⁸ Jehová Diostan “gracias” ninanchis. Diosninchistaqa imaymanamantan agradecekusunman (leey 1 Tesalonicenses 5:18). Jehová Diostan “gracias” nisunman lliu imaymana qowasqanchismanta. Paymantan jamun tukuy allin kaqkunaqa (Sant. 1:17). Chaymantapas “gracias” nisunmanmi kay tiyasqanchis jallp’ata munayta ruwasqanmanta, lliu imaymanata kamasqanmanta, familianchismanta, amigonchiskunamanta, jamuq tiempopaq sumaq kausayta prometewasqanchismanta, paypa amigon kayta atisqanchismanta ima.

9. ¿Imaraykun sasa kanman agradecekuq kay?

⁹ Jehová Diostaqa imaymanamantan “gracias” ninanchis. Ichaqa askha runakunan mana agradecekuq kanku. Paykunaqa imachus munasqallankumantan astawanqa llakikunku, manan piensallankupaschu Jehová Diosman gracias qoytapas. Sichus noqanchispas chay runakuna jina piensayta qallarisunman chayqa, imachus necesitasqanchista qowanallanchispaqmi mañakusunman. Ichaqa chay ama pasawananchispaqqa kallpachakunanchismi agradecekuq kananchispaq, lliu imaymanakuna qowasqanchismanta Diosta “gracias” ninanchispaqpas (Luc. 6:45).

10. ¿Imaynatan juj hermananchista agradecekuq kay yanaparqan? (Qhaway kay parrafopaq fotota).

¹⁰ Sichus agradecekuq kasun chayqa imaymana sasachakuykunatan aguantasun. Yachasunchis Kyung-sook sutiyoq hermananchismanta, paymantan willashan 2015 watamanta 15 enero killamanta Qhawaq qelqanchispi. Paymanmi willarqanku pulmonninpi cáncer onqoyniyoq kasqanta. Hermananchismi nin: “Cáncer onqoyniyoq kasqayta yachayqa may llakin noqapaqqa karqan, manchasqan kasharqani”, nispa. Chaymantapas nillarqantaqmi: “Kunanqa manañachá imatapas ruwayta atisaqchu”, nispa. ¿Iman payta yanaparqan ama pisipananpaq? Payqa  sapa tutas manaraq puñuykushaspa Jehová Diosmanta mañakuq, chaypis agradecekuq chay p’unchaypi pisqa allin ruwaykuna pasasqanmanta. Chayta ruwaspas payqa thaj sientekuq, sonqomantas Jehová Diostapas may munakusqanta niq. Hermananchisqa repararqanmi Jehová Diosqa serviqninkunata sasachakuykunapi tarikuqtinku yanapasqanta. Chaymantapas payqa repararqanmi sasachakuykunaqa pisilla kasqanta, Diospa bendicionninkuna ichaqa aswan askha kasqanta. Kyung-sook hermananchis jinan noqanchispas ima llakipiña tarikuspapas Jehová Diosta agradecekunanchis tukuy imaymana qowasqanchismanta. Agradecekuq kaymi yanapawasun ima sasachakuytapas aguantananchispaq, llakipi tarikuspapas ama nishuta llakikunanchispaq.

11. ¿Imaraykun Jesuspa qatikuqninkuna mana manchakuq kananku karqan?

¹¹ Ama manchakuspa paymanta willananchispaqmi mañakunanchis. Jesusqa manaraq janaq pachaman ripushaspan qatikuqninkunata yuyarichirqan paymanta willanankupaq. Nirqanmi: “Noqamantan willankichis Jerusalenpi, lliu Judeapi, Samariapi ima; kay pachaq k’uchunkunakamaraqmi chayankichis”, nispa (Hech. 1:8; Luc. 24:46-48). Chay qhepallamanmi judío runakunaq umallinkunaqa Pedrotawan Juantawan juñunakusqanku salaman aparqanku. Chaypin paykunata amenazaspanku kamachirqanku amaña Jesusmanta willanankupaq (Hech. 4:18, 21). ¿Imatan Pedrowan Juanwan ruwarqanku?

12. Hechos 4:29, 31 nisqan jina, ¿imatan Jesuspa qatikuqninkuna ruwarqanku?

¹² Pedrowan Juanwanmi nirqanku: “Diosta uyarinaykumanta qankunata uyariykuman chayqa, ¿allinpaqchu Dios chayta qhawarinman? Chhaynatachus piensankichis chayqa, qankunamantañachá chayqa kanqa. Noqaykun ichaqa manapuni imachus rikusqaykumanta imachus uyarisqaykumantawan willaytaqa upallakusaqkuchu”, nispa (Hech. 4:19, 20). Judío runakunaq umallinkuna Pedrota Juantawan kacharipusqanku qhepallamanmi paykunaqa Jesuspa juj qatikuqninkunawan juñukurqanku. Jinan Jehová Diosmanta llapanku yanapayta mañakurqanku paypa munayninta ruwashanallankupaq. Nirqankun: “Yanapaykuwayku mana manchakuspa simiykimanta rimashanallaykupaq”, nispa. Jehová Diosqa uyarirqanmi chay mañakusqankuta (leey Hechos 4:29, 31).

13. ¿Imatan yachanchis Jin-hyuk hermanonchismanta?

¹³ Sichus noqanchistapas autoridadkuna Diosmanta willananchista jark’awasunman chayqa, Jesuspa discipulonkunaq ruwasqantan ruwasunman. Chaytan Jin-hyuk hermanonchispas ruwarqan, payqa carcelpin kasharqan ejercitoman mana risqanrayku. Carcelpi kashaqtinsi churasqaku juj presokunata yanapananpaq. Chay runakunamanqa qayllaykuq imachus necesitasqankuta yachanallanpaqsi. Paytaqa nisqakus: “Aman chay runakunamanqa Bibliamanta rimapayankichu”, nispa. Ichaqa Jehová Diosmantas mañakusqa chay runakunaman rimapayananpaq (Hech. 5:29). Paymi nin: “Jehová Diosqa uyariwarqanmi mañakusqayta, jinan yachayta kallpata ima qowarqan. Chaymi askha presokunaman yachachiyta qallarirqani, sapanka celdapin pisqa minutota yachachiq kani. Tutakunataq presokunapaq cartata qelqaq kani, chaytataq qhepantin p’unchay paykunaman qoq kani”, nispa. Jin-hyuk hermanonchis jinan noqanchispas Jehová Diosmanta mañakusunman kallpatapas yachaytapas paymanta willashanallanchispaq.

14. ¿Iman yanapawasunman ima sasachakuytapas atipananchispaq? (Salmos 37:3, 5).

 ¹⁴ Sasachakuykunata atipananchispaqmi yanapayta mañakunanchis. Kay tiempopiqa imaymana sasachakuykunapin tarikushanchis, yaqapaschá wakinninchispaqqa jujnin familianchis wañukapurqan, wakinninchisqa qatikachasqapaschá kashanchis otaq imawanpas onqoshanchis. Onqoykunaq kasqanwan guerrakunaq kasqanwanmi runakunaqa imaymana sasachakuykunapi tarikushanku. Chayrayku sonqoykita Jehová Diosman kichariy, juj amigomanpas willashawaq jina payman willakuy. Jehová Diosqa yanapasunkipunin imachus necesitasqaykipiqa (leey Salmos 37:3, 5).

15. ¿Imaynatan Diosmanta mañakuy yanapawanchis sasachakuypi tarikuqtinchis? Juj ejemplota willay.

¹⁵ Diosmanta sapa kutilla mañakuyqa maytan yanapawanchis ima sasachakuytapas aguantananchispaq (Rom. 12:12). Jehová Diosqa yachanmi sapanka serviqninkuna imapichus tarikusqankuta, chaymi “auxilio mañakusqankuta uyarin” (Sal. 145:18, 19). Tukuy tiemponwan Diosta serviq Kristie hermananchispas chaytan repararqan. Payqa qonqayllan onqopurqan, sinchita llakikusqanraykun depresión onqoywanpas jap’ichikurqan. Chaymantapas mamanmi onqopurqan, paypa onqoyninpaqqa manan jampi karqanchu. Kristie hermananchismi willakun: “Sapa p’unchaymi Jehová Diosmanta kallpata mañakurqani sasachakuyniykunata aguantanaypaq. Kallpachakurqanin juñunakuykunaman mana faltakunaypaq, sapa kutilla Bibliata estudianaypaqpas. Nishuta llaki ñit’iwaqtinqa sapa kutillanmi Diosmanta mañakuq kani ama pisikallpayanaypaq. Chaymantapas kusikurqanin Jehová Dios noqawan kashasqanmanta. Manan ratullachu onqoyniymantaqa qhaliyapurqani, ichaqa Jehová Diosmi thaj kayta qowarqan”, nispa. “Jehová Diosqa yachanmi pay sonqo runakunata pruebamanta librayta”, chhaynaqa amapuni Jehová  Diospa yanapayninmantaqa iskayasunchu (2 Ped. 2:9).

16. ¿Imanaqtinmi Diospa yanapayninta necesitanchis tentacionkunaman ama urmananchispaq?

¹⁶ Ama ima tentacionmanpas urmananchispaqmi mañakusunman. Llapanchispas imallapipas pantanchismi chaymi kallpachakunanchis ima tentacionmanpas ama urmananchispaq. Satanasqa maytan munan imallapipas pantananchista chhaynapi pisikallpayananchispaq. Chaymantapas Satanasqa millay kusirikuykunawanmi imaynachus piensasqanchista cambiayta munan. Sichus chaykunawan kusirikusun chayqa, qhelli ruwaykunapin piensasun, jinaspa Jehová Diospa ñaupanpi manaña ch’uyachu kapusunman, qhelli juchamanpas urmasunmanmi (Mar. 7:21-23; Sant. 1:14, 15).

17. ¿Imatawanmi ruwananchis ima tentacionmanpas ama urmananchispaq? (Qhaway kay parrafopaq fotokunata).

¹⁷ Manan ima tentaciontapas noqallanchismantaqa atipasunmanchu, aswanpas Diospa yanapaynintan necesitanchis. Jesusmi kay pachapi kashaspa khaynata mañakurqan: “Ama munaychu tentacionkunaman urmanaykuta, librawaykutaq Satanasmantapas”, nispa (Mat. 6:13). Jehová Diosqa maytan yanapayta munawanchis, chaypaqmi ichaqa yanapayninta mañakunanchis. Ichaqa manan mañakunallanchischu, aswanpas tukuy atisqanchistan ruwananchis ama ima mana allintapas ruwananchispaq (Sal. 97:10). Allinkunapi piensananchispaqqa Bibliatan leenanchis, juñunakuykunaman rinanchis, Diosmanta willaq ima rinanchis. Diosqa manan jinallatachu qhawanqa mana aguantananchiskama tentasqa kananchistaqa (1 Cor. 10:12, 13).

18. ¿Imatan llapanchispas ruwananchis?

¹⁸ ¿Imatan ruwananchis kay tukukuy p’unchaykunapi Jehová Diosta tukuy sonqowan servishanallanchispaq? Diosmantan sapa ratu mañakunanchis. Payqa “sonqonchista payman kicharinanchistan” munan (Sal. 62:8). Chayrayku sapa p’unchay tiempota t’aqay Jehová Diosmanta tukuy sonqowan mañakunaykipaq. Chaymantapas Jehová Diosta jatunchay, payta “gracias” niy tukuy imaymana ruwasqanmanta. Jehová Diosmanta mañakuy paymanta willaq rinaykipaq, ima sasachakuytapas sumaqllata allichanaykipaq, tentacionkunaman ama urmanaykipaq. Amapuni saqeychu Diosmanta mañakuytaqa. Ichaqa, ¿imaynatan Jehová Dios mañakusqanchisman kutichimun? Chaymantan qatimuq yachachikuypi yachasunchis.