1. ¿Imatan allinta yachanchis, ichaqa imamantan mana iskayanchischu?

 NOQANCHISQA allintan yachanchis Diosmanta willasqanchista runakuna mana uyarikunankuta, jamuq tiempopiqa astawanraqchá manapas uyarikuyta munanqakuchu (Dan. 11:44; 2 Tim. 3:12; Apo. 16:21). Ichaqa Jehová Diospa yanapayninwanqa chay llank’aytaqa junt’asunpunin. ¿Imaraykun chayta ninchis? Ñaupa tiempopipas Jehová Diosqa serviqninkunatan kamachirqan imaymanata ruwanankupaq, mayninpiqa sasa llank’anakunata ruwanankupaqmi kamachirqan. Chay kutikunapiqa Jehová Diospunin paykunata yanapaq, chayraykun mana iskayanchischu noqanchistapas yanapawananchismanta. Chayta allinta entiendenapaq profeta Ezequielmanta yachasunchis, payqa Babiloniapi tiyaq judío runakunamanmi Diosmanta willarqan.

2. a) ¿Imayna runakunamanmi Ezequiel Diosmanta willanan karqan? (Ezequiel 2:3-6). b) ¿Imakunamantan kay yachachikuypi yachasunchis?

² ¿Imayna runakunamanmi Ezequiel Diosmanta willanan karqan? Jehová Diospa nisqan jina chay runakunaqa “mana kasukuq” “mana respetoyoq k’ullu sonqo runakunan” karqanku. Arí, chay runakunaqa “kiskakuna” jina “alacrán kurukuna” jinan millayllaña karqanku. Chayraykuchá Jehová Diosqa Ezequielta askha kutipi nirqan: “Aman ima nisqankutapas manchakunkichu”, nispa (leey Ezequiel 2:3-6). Chhaynaqa, ¿iman yanaparqan Ezequielta Diospa kamachisqanta junt’ananpaq? Ñaupaqtaqa allintan entienderqan Jehová Diospuni kachashasqanta, santo espíritu kallpata qosqantapas, jinaspapas Diospa simin qelqatan leellaqpuni. Chaykunan Ezequielta yanaparqan Diosmanta willashanallanpaq ¿Imaynatan noqanchistapas Jehová Dios kay p’unchaykunapi yanapawanchis?

3. ¿Jehová Diospa ima nisqanmi Ezequielta kallpachanman karqan, imaraykun Ezequiel mana iskayarqanchu paytapas yanapananpi?

³ Jehová Diosmi Ezequielta nirqan: “[Noqan] kachasayki”, nispa (Ezeq. 2:3, 4). Chayta uyarispaqa Ezequielqa yuyarirqanchá chhaynata Jehová Diosqa Moisestapas Isaiastapas ñaupaqpi nisqanta, chaychá Ezequieltaqa yanaparqan ama manchakuspa Diosmanta willananpaq (Éx. 3:10; Isa. 6:8). Ezequielqa allintan yacharqan imaynata Jehová Dios chay profetankunata yanaparqan sasa llank’anakunata junt’anankupaq chayta, chaychá Ezequielqa mana iskayarqanchu paytapas yanapananmanta. Chaymantapas Jehová Diosqa iskay kutipin Ezequielta kallpachananpaq nirqan: “[Noqan] kachasayki”, nispa. Jinaspapas Ezequiel kikinpunin askha kutipi nirqan: “Jehová Diosmi rimapayamuwarqan”, “jujmantan Jehová Diosqa rimapayamuwarqan”, nispa (Ezeq. 6:1; 14:2). Jehová Dios kikinpunitaq payta kacharqan chayqa manan iskayarqanchu yanapananmantaqa. Papanpas sacerdotetaq karqan chayqa yachachirqanchá Jehová Diosqa ima nisqantapas junt’aqpuni kasqanta, serviqninkunatapas yanapaykuqpuni kasqanta. Jinaspapas Jehová Diosmi Isaacta, Jacobta, Jeremiastapas nirqan: “Qanwanmi noqaqa kashani”, nispa (Gén. 26:24; 28:15; Jer. 1:8).

4. ¿Imakunan Ezequielta kallpacharqan Jehová Diosmanta willashanallanpaq?

⁴ ¿Uyarikunankuchu karqan judío runakuna Jehová Diosmanta Ezequielpa willasqanta? Manan. Jehová Dios kikinmi Ezequielta nirqan: “Israel runakunan ichaqa mana uyarisunkikuchu, paykunaqa manan uyariyta munawankuchu”, nispa (Ezeq. 3:7). Jehová Diospa chay nisqanta uyarispaqa manachá nishutañachu Ezequielqa llakikurqan. Payta mana uyarispankuqa Jehová Diostan mana  uyarikusharqankuchu. Chaymantapas manaña chay judío runakuna Ezequielpa willasqanta uyariyta munarqankuchu chaypas paykunaqa willasqanwanmi sut’ita yachananku karqan “paykuna ukhupi juj profeta kasqanta” (Ezeq. 2:5; 33:33). Chaykunachá Ezequieltaqa kallpacharqan Jehová Diosmanta ama manchakuspa willashanallanpaq.

5. ¿Imaynatan noqanchistapas kallpachawanchis Isaías 44:8 textoq nisqan?

⁵ Noqanchistapas Jehová Diosmi ajllakuwarqanchis testigon kananchispaq, chhaynapi jujkunaman paymanta willamunanchispaq (Isa. 43:10). Noqanchistapas Ezequielta jinan Jehová Diosqa niwanchis: “Ama mancharikuychischu”, nispa. ¿Imaraykun mana mancharikunanchischu noqanchis contra jatariqkunata? Noqanchistapas Jehová Diosmi kamachiwanchis paymanta willananchispaq, chayraykun payqa noqanchistapas yanapawasunchis (leey Isaías 44:8).

6. a) ¿Imaynatan Jehová Dios yanapawanchis? b) ¿Ima ruwasqanchiswanmi Jehová Dios anchata kusikun?

⁶ Noqanchistapas Jehová Diosqa yanapawasunpunin. Paymi “qankunan testigoykuna kankichis” nisqan qhepaman nirqan: “Unuta chimpaqtiykiqa chaypin qanwan kashasaq, mayuta pasaqtiykipas manan millp’usunkichu. Ninaq sonqonta puriqtiykipas manan ruphasunkichu, ninaqa manan imanasunkipaschu”, nispa (Isa. 43:2). Chaypi nisqan jina, Diosmanta willaspaqa imaymana sasachakuykunatan atipananchis kanqa. Wakin sasachakuykunaqa mayu jinan sasa atipana wakintaq nina jina sasa pruebakuna, chaywanpas Jehová Diospa yanapayninwanqa mana manchakuspan Diosmanta willashallanchis (Isa. 41:13). Noqanchistapas Ezequielta jinan runakunaqa mana uyariwanchischu, chaywanqa manan pisikallpayananchischu. Sichus kallpachakushallasun Diosmanta willananchispaq chayqa Jehová Diosmi kusisqa noqanchiswan kanqa. Apóstol Pablon nirqan: “Sapankan premiotaqa chaskinqa imaynachus llank’asqanman jina”, nispa (1 Cor. 3:8; 4:1, 2). Tukuy tiemponwan Diosmanta willaq hermananchismi nillantaq: “Jehová Diosqa tukuy kallpachakusqanchistan mastaqa qhawan, chayta yachaymi kusichiwan”, nispa.

7. ¿Imata yuyarisqanmi Ezequielta yanaparqan ama pisipaspa Diosmanta willashanallanpaq? (Tapanpi kaq dibujota qhaway).

⁷ Ezequielmi juj rijuriypi rikurqan Jehová Diospa santo espiritun may atiyniyoqpuni kasqanta. Chay espiritun janaq pacha Diospa carronpa ruedankunata kayman jaqayman apasqa jinallataq tawa kausashaqkunatapas (Ezeq. 1:20, 21). Chayta rikuspan Ezequielqa admirasqa “uyanpamanta pampaman kumpakusqa” (Ezeq. 1:28). Chay rikusqantaqa manachá jayk’aqpas Ezequielqa qonqarqanchu, chayta yuyarispaqa manachá iskayarqanchu Jehová Dios santo espiritunwan yanapananmanta, chhaynapi Diosmanta willashanallanpaq.

8, 9. a) ¿Imanispan Jehová Dios Ezequielta kamachirqan? b) ¿Imatawanmi Jehová Dios ruwarqan Ezequielta kallpachananpaq?

⁸ Jehová Diosmi Ezequielta kamachirqan: “Runaq churin, sayariy qanwan rimanaypaq”, nispa. Chayta uyarisqanmi Ezequieltaqa kallpacharqan sayarinanpaq. Pay kikinmi nirqan: “Rimapayamuwaqtinmi Diospa espiritun junt’aykuwarqan, jinaspan sayarichiwarqan”, nispa (Ezeq. 2:1, 2). Chay espiritun otaq Jehová Diospa atiyninmi Ezequieltaqa yanaparqan tukuy tiempo Jehová Diosmanta willashanallanpaq (Ezeq. 3:22; 8:1; 33:22; 37:1; 40:1). Chay espiritullataqmi Ezequieltaqa kallpacharqan “mana kasukuq k’ullu sonqo” judío runakunaman Diosmanta willashanallanpaq (Ezeq. 3:7).  Chaymantapas Jehová Diosmi Ezequielta nirqan: “Uyaykitan paykunaq uyanta jina rumiyachini, mat’iykitapas paykunaq mat’inkuta jinan rumiyachini. Diamante rumiman jinan mat’iykitaqa tukuchini, rumimantapas aswan ch’ilamanraqmi tukuchini. Aman paykunataqa manchakunkichu, aman uyankutapas manchakunkichu”, nispa (Ezeq. 3:8, 9). Chaywanmi Jehová Diosqa Ezequielta nisharqan: “Mana uyarikuqtinkuqa aman pisikallpayankichu. Noqan kallpachasayki”, nispa.

⁹ Chaymantapachan Jehová Diospa espiritunqa Ezequielta yanaparqan Diosmanta willananpaq. Ezequielmi nirqan: “Jehová Diospa atiyninqa mana tukurikuqmi noqapi kasharqan”, nispa. Ezequielqa qanchis p’unchaymi chay rikusqanmanta mancharisqa kasharqan, chaymantaraqmi allinta repararqan imata judío runakunaman willananta (Ezeq. 3:14, 15). Chaymantan Jehová Diosqa payta kamachirqan juj pampaman rinanpaq, chaypin Diospa espiritun Ezequielman junt’aykurqan (Ezeq. 3:23, 24). Chhaynapin Ezequielqa allin kallpachasqa karqan Diosmanta willananpaq.

10. ¿Iman yanapawanchis Diosmanta willashanallanchispaq, imaraykun chay yanapayta necesitanchis?

¹⁰ Diospa santo espiritunmi Ezequieltaqa kallpacharqan ama manchakuspa Diosmanta willananpaq. ¿Iman noqanchistapas yanapawasun Diosmanta willashanallanchispaq? Diospa santo espiritunmi. Manachus Diospa santo espiritun yanapawasunman chayqa manan atisunmanchu Diosmanta willaytaqa. ¿Imaraykun chayta ninchis? Satanasqa tukuy atisqantan jark’akushan Diosmanta willananchista, chaymi Diospa santo espiritullanwan Diosmanta willashanchis (Apo. 12:17). Satanasqa runakunamantaqa aswan atiyniyoqmi chaywanpas Diosmanta willasqanchiswanmi paytaqa atipashanchis (Apo. 12:9-11). Arí, sapa kuti Diosmanta willaq lloqsispaqa Satanastan atipashanchis, chhaynapin rikuchinchis Satanasta mana manchakusqanchista. Chhaynaqa Diosmanta willaq lloqsiqtinchisqa manan sapallanchischu kashanchis, Jehová Diosmi santo espiritunwan yanapawanchis, jinaspapas kusisqan  kashan paymanta willasqanchismanta (Mat. 5:10-12; 1 Ped. 4:14).

11. ¿Imaynatan santo espíritu yanapawanchis, imatan ruwananchis chaskinanchispaq?

¹¹ Jehová Diosmi Ezequielpa uyantapas mat’intapas rumiyachirqan. ¿Imatan chaymanta yachasunman? Jehová Diospa santo espiritunqa noqanchistapas yanapawasunmi ima sasachakuytapas Diosmanta willashaqtinchis atipananchispaq (2 Cor. 4:7-9). Chhaynaqa, ¿imatan ruwananchis Diospa santo espiritunta chaskinanchispaq? Mana iskayaspan Jehová Diosmanta santo espiritunta mañakunanchis. Jesusmi discipulonkunata nirqan: “Mañakushallaychis”, “maskhashallaychis”, “punkutapas takashallaychis”, nispa. Chayta ruwaqtinkun Jehová Diosqa santo espiritunta qonan karqan. Payqa qonpunin santo espirituntaqa mañakuqninkunamanqa (Luc. 11:9, 13; Hech. 1:14; 2:4).

12. Ezequiel 2:9-3:3 nisqan jina, ¿maymantan chay qelqa k’uyu jamurqan, iman chaypi qelqasqa kasharqan?

¹² Chaymantapas Ezequieltaqa Diospa simin qelqan kallpacharqan Diosmanta willashanallanpaq. Juj rijuriypin payqa rikurqan juj maki qelqa k’uyuta jap’ishasqanta (leey Ezequiel 2:9–3:3). ¿Maymantan chay qelqa k’uyu jamurqan? ¿Iman chay qelqa k’uyupi kasharqan? ¿Imaynatan chay qelqa k’uyu Ezequielta yanaparqan? Chay qelqa k’uyuqa Jehová Diospa trononmantan jamurqan. Yaqapaschá Jehová Diosqa chay qelqataqa juj angelninwan apachirqan (Ezeq. 1:8; 10:7, 20). Chay qelqa k’uyupin qelqasqa kasharqan Diospa simin, chaytan Ezequielqa willanan karqan mana kasukuq judío runakunaman (Ezeq. 2:7). Chay qelqa k’uyupiqa ñaupanpipas qhepanpipas qelqasqan kasqa.

13. ¿Imatan Ezequiel ruwarqan chay qelqa k’uyuwan, imaraykun misk’illaña karqan?

¹³ Chaymantan Jehová Diosqa Ezequielta nirqan: “Kay qelqa k’uyu qosqayta sajsanaykikama mijuy”, nispa. Jinan Ezequielqa mijurqan chay qelqa k’uyuta. ¿Imaraykun chay qelqa k’uyuta mijunan karqan? Chaywanmi Jehová Diosqa Ezequielta nisharqan chay qelqa k’uyupi qelqasqa kaqkunata allinta entiendenanpaq jinaspa sonqon ukhupi waqaychananpaq, chhaynapi Diosmanta willashanallanpaq. Chay qelqa k’uyuqa Ezequielpa siminpiqa “miel misk’i jinaraqsi” kasqa (Ezeq. 3:3). ¿Imarayku? Ezequielpaqqa may sumaqpunin karqan Jehová Diospa rantinpi runakunaman Diosmanta willayqa (Sal. 19:8-11). Jinaspapas may agradecisqan kasharqan profeta kananpaq ajllasqa kasqanmanta.

14. ¿Iman Ezequielta yanaparqan Jehová Diospa kamachisqanta junt’ananpaq?

¹⁴ Chaymantan Jehová Diosqa Ezequielta nirqan: “Llapa rimasqaykunata allinta uyariy, llapa chaykunata sonqoykipi waqaychay”, nispa (Ezeq. 3:10). Chayta nispan Jehová Diosqa Ezequielta nisharqan qelqa k’uyupi qelqasqa kaqkunata allinta yuyarinanpaq jinaspa chaykunapi yuyaymanananpaq, chaymi Ezequieltaqa yanapanan karqan allin iñiyniyoq kananpaq chhaynapi Diospa nisqanta mana manchakuspa llapa runakunaman willananpaq (Ezeq. 3:11). Diospa siminqa sonqonpitaq kasharqan chayqa Ezequielqa liston kasharqan Jehová Diospa kamachisqanta junt’ananpaq (tupachiy Salmos 19:14 textowan).

15. ¿Imatan ruwananchis Diospa simin qelqa sonqonchis ukhumanraq jaykunanpaq?

¹⁵ Jehová Diosmanta mana manchakuspa willashanallanchispaqqa noqanchispas allintan Diospa simintaqa estudiananchis, chaymi yanapawasun sonqonchis ukhumanraq jaykunanpaq. Kay tiempopiqa simin qelqawanmi Diosqa rimapayawanchis. Chhaynaqa, ¿imatan ruwananchis Diospa simin qelqa sonqonchismanpas yuyayninchismanpas jaykunanpaq?

16. ¿Imatan ruwananchis Diospa simin qelqa sonqonchis ukhumanraq jaykunanpaq?

 ¹⁶ Ima mijunatapas allinta khamuspa mijunchis chayqa cuerponchispa allinninchispaqmi. Chhaynallataqmi sichus Diospa simin qelqata estudiasunchis chay estudiasqanchispi yuyaymanasunchis chayqa iñiyninchispi allinta yanapawasunchis. Jehová Diosmi Ezequielta kamachirqan qelqa k’uyuta mijunanpaq, chhaynatan noqanchispas Diospa simin qelqataqa yuyayninchisman junt’achinanchis, chhaynapi chaykunata allinta entiendenanchispaq. ¿Imatan chaypaq ruwasunman? Diospa simin qelqa sonqonchis ukhupi kananpaqqa Diosmantan mañakunanchis, Bibliata leenanchis, leesqanchispitaq yuyaymanananchis. Chaytachus ruwasunchis chayqa Diospa siminqa sonqonchis ukhumanmi jaykunqa.

17. ¿Imaraykun Bibliata leesqanchispi yuyaymanananchis?

¹⁷ ¿Imaraykun Bibliata leespa allinta chaykunapi yuyaymanananchis? Chayta ruwasqanchismi yanapawasun ama manchakuspa Diosmanta willashanallanchispaq, chaymi jamuq tiempopipas kallpachawasun ama manchakuspa Diospa juicionmanta willananchispaq. Chaymantapas leesqanchispi yuyaymanasunchis chayqa Jehová Dioswanmi allin amigontin kapusunchis, “miel misk’itapas” mijushasunman jinataq sonqonchis ukhupi thaj kasunchis (Sal. 119:103).

18. ¿Imatan llapa runakunapas sut’ita reparanqaku, imarayku?

¹⁸ Manaña Ezequiel jinachu profeta kanchis chaypas noqanchistaqa Jehová Diosmi ajllakuwarqanchis Diospa siminta jujkunaman willananchispaq. Chaymi noqanchisqa kallpachakushanallanchis Diosmanta willananchispaq, pay kaykamalla niwananchiskama. Jehová Diospa jatun p’unchaynin chayamuqtinqa runakunaqa manan niyta atinqakuchu: “Noqamanqa manan pipas Diosmantaqa willawarqanchu”, nispaqa (Ezeq. 3:19; 18:23). Chay p’unchayqa sut’itan reparanqaku noqanchisqa Diospa kamachikuyninkunata willaqkuna kasqanchista.

19. ¿Iman kallpachawanchis ama manchakuspa Diosmanta willashanallanchispaq?

¹⁹ ¿Iman kallpachawasunchis ama manchakuspa Jehová Diosmanta willashanallanchispaq? Kay qelqapi kinsamanta yachasqanchismi. Noqanchistapas Ezequielta jinan Jehová Diosqa kamachiwarqanchis paymanta willananchispaq, chaymantapas santo espirituntan qowanchis, jinaspapas Diospa simin qelqan kallpachawanchis. Chaykunan kallpachawasun ama manchakuspa Jehová Diosmanta willashanallanchispaq. Chaykunata ruwaspaqa “tukukuykaman” Jehová Diosmanta willashallasun (Mat. 24:13).