1. ¿Imaynatan 2 Corintios 3:1-3 nisqan yanapawanchis, pitapas bautizakunankama yanapasqanchista ancha allinpaq qhawarinanchispaq? (Tapanpi kaq fotota qhaway.)

¿IMAYNAN sientekunchis iñiq t’aqanchispi juj estudiante bautizakuqtin? Kusikunchismi ¿riki? (Mat. 28:19.) Noqanchis yachachiranchis chayqa astawanraqchá kusikuranchis (1 Tes. 2:19, 20). Chayllaraq bautizakuqkunaqa ‘allin rimaq cartakuna’ jinan kanku. Paykunaq bautizakusqankuqa manan yachachiqnillanmantachu allinta riman astawanqa iñiq t’aqamantan (leey 2 Corintios 3:1-3).

2. a) ¿Imatan tapukunanchis, imarayku? b) ¿Iman Diosmanta yachachiy? (Willakuyta qhaway.)

² Kay tawa watakuna pasaytan 10.000.000 runakunaman pachantinpi Bibliamanta yachachikuran, * chaymi anchata kusichiwanchis. Paykunamantan sapa watan 280.000 runakuna bautizakuranku. Askharaqmi bautizakuyta  atiqkunaqa kashanku. ¿Imaynatan paykunata yanapasunman? Jehová Diosqa pacienciakuq kayninpin runakunata suyashan, bautizakuspa Jesuspa qatikuqnin kanankupaq. Tiempon ichaqa pisillaña kashan, chaymi tukuy atisqanchista ruwananchis usqhaylla runakunata bautizakunankukama yanapananchispaq (1 Cor. 7:29; 1 Ped. 4:7).

3. ¿Imatan kaypi yachasun?

³ Estudiantekunata bautizakunankupaq astawan yanapanapaqmi, umalliq t’aqaqa sucursalkunata tapuran imaynata chayta ruwashasqankuta. Kay yachachikuypin qatimuq yachachikuypipas, qhawarisunchis imatas yachasunman watukuq umalliqkunamanta, misionerokunamanta, allin experienciayoq precursorkunamantapas chayta (Prov. 11:14; 15:22). * Paykunaq willakusqankumantan astawan yachasun imata ruwananku yachachiqkunapas estudiantekunapas chayta. Kay yachachikuypi yachasun estudiantekuna bautizakunankupaq pisqa yanapaykunamanta, imaynatas paykunata yanapasunman chaytapas.

4. ¿Imatan allinta entiendenanchis Diosmanta punkullapi yachachiymanta?

⁴ Askha iñiqmasikunan wasiyoqpa punkullanpi Bibliamanta yachachinku. Chhaynata yachachiy allinña chaypas pisillatan Bibliamanta rimakun, chaymantapas manapaschá sapa semanachu estudiayta atikunman. Estudianteta yanapanankupaqmi wakinqa mañakunku celularninpa numeronta, chhaynapi wajanankupaq otaq mensajeta apachispa imallatapas Bibliamanta yachachinankupaq. Chhaynata yachachiqtinchisqa manapaschá estudianteqa usqhaytachu iñiyninpi wiñanqa. Chaymantapas manapaschá jayk’aqpas bautizakunqachu, pisillata Bibliamanta yachasqanrayku.

5. ¿Imatan Jesús yachachiran Lucas 14:27-33 nisqanpi, jujkunata qatikuqnin kanankupaq allinta yanapananchispaq?

⁵ Juj kutinmi Jesús rijch’anachiykunawan yachachiran imatas payta qatikuy munaqkuna ruwankuman chayta. Chaypin payqa rimaran torreta ruway munaq runamanta, guerraman riq reymantawan. Willaranmi torreta sayarichiy munaq runamanta, paymi “tiyaykuspa ñaupaqtaraq qolqenta tanteakun torreta tukunanpaq  aypanqachus manachus chayta” yachananpaq, chhaynallataqmi reypas tiyaykuspa yuyaychaqninkunata tapukunan, soldadonkuna atipanmanchus chay guerrata icha manachus chayta yachananpaq (leey Lucas 14:27-33). Jesusqa yacharanmi, paypa qatikuqnin kayta munaqkunapas allinta tanteakunankuta. Pipas Jesuspa nisqanman jina ruwananpaqqa, sapa semana Bibliata estudiananpaqmi yanapananchis. ¿Imaynatan chayta ruwasunman?

6. ¿Imatan ruwasunman estudiante iñiyninpi astawan wiñananpaq?

⁶ Ñaupaqta, punkullanpi yachachispaqa kallpachakunanchismi aswan unaychata Bibliamanta yachachinanchispaq. Sapa estudiananchis kaqtinmi iskay kinsa textokunamanta yachachisunman. Wasiyoq yacharukunña unaychata noqanchiswan estudiayta chayqa, tapusunmanmi maypi tiyaykuspa astawan parlarisunman chayta. Imayna kutichiwasqanchispin yachasunchis Bibliamanta yachaytapunichus munashan icha manachus chayta. Tiempowanqa, tapusunmanmi semanapi iskay kuti Bibliata estudiananchispaq, chaymi yanapanqa astawan iñiyninpi wiñananpaq. Qhawarisun imatawansi estudiante ruwanan chayta.

7. ¿Imaynatan preparakunanchis yachachinanchispaq?

⁷ Ancha importanten manaraq estudiantenchiskunata Bibliamanta yachachishaspa preparakuyqa. ¿Imaynatan chayta ruwasunman? Ñaupaqtan allinta estudiananchis yachachinanchis qelqata, textokunatapas maskhananchis. Chaymantapas reparananchismi importante yachachikuykunata. Chaypaqmi piensananchis: qallariynin titulopi, qatimuq titulokunapi, tapuyninkunapi, leena textokunapi, dibujokunapi, kanman jinaqa videokunapipas. Jinaspapas piensananchismi estudiantenchispi, imaynatas yachachisunman facil-llata entiendenanpaq chayman jina kausananpaqpas (Neh. 8:8; Prov. 15:28).

8. Colosenses 1:9, 10 nisqan jina, ¿imatan ruwananchis estudiantenchisrayku?

⁸ Preparakushaspaqa mañakunanchismi Jehová Diosmanta estudiantenchispaq. Mañakunallanchistaqmi allinta Bibliawan  yachachispa sonqonman chayananchispaq (leey Colosenses 1:9, 10). Piensasun imakunatas mana faciltachu entiendenman chaypipas. Chhaynapin yanapasun bautizakunanpaq.

9. ¿Imaynatan estudiantenchista yanapasunman preparakunanpaq?

⁹ Bibliamanta yachachishaspaqa munanchismi Jehová Diospa, Jesuspa ruwasqantapas estudiantenchiskuna valoranankuta, astawan yachanankutapas (Mat. 5:3, 6). Estudiante astawan yachananpaqqa tukuy yuyaynintan churanan yachashasqanman. Chaypaqmi kallpachananchis ñaupaqmantaña preparakunanpaq, imaynatas chay yachasqan kausayninpi yanapanman chaypi piensananpaqpas. Chaymantapas yachachisunmanmi imayna preparakuyta. * Paywan kuskan yachachikuypa kutichiyninkunata marcasunman, jinaspataq nisunman imaynata kutichinman chayta. Chhaynapin yachasun entiendeshanchus icha manachus chayta. Qhawarillasuntaq estudianteq kinsa kaq ruway yachananmanta.

10. a) ¿Imaraykun estudiante Bibliata sapa p’unchay leenan? b) ¿Imatan ruwanan Bibliata leesqan yanapananpaq?

¹⁰ Chaymantapas estudiantenchisqa payllamantan kallpachakunan sapa p’unchay Diosmanta mañakunanpaq, Diosta uyarinanpaqpas. ¿Imaynatan Diosta uyarinqa? Bibliata sapa p’unchay leespan (Jos. 1:8; Sal. 1:1-3). Chaypaqmi nisunman Bibliata leenapaq programata jw.org nisqapi maskhaspa copiata orqonanpaq. * Ichaqa Bibliata leesqan yanapananpaqqa kallpachananchismi Jehová Diosmanta yachasqanpi yuyaymanananpaq, imaynata yachasqanman jina kausananpi yuyaymanananpaqpas (Hech. 17:11; Sant. 1:25).

11. a) ¿Imaynapin estudiantenchis mañakuyta yachanman? b) ¿Imaraykun allinpuni kanqa sapa kutilla mañakusqan?

¹¹ Kallpachasun estudiantenchista sapa p’unchay mañakuspa Jehová Dioswan rimananpaq. Sonqomanta mañakusun estudiayta qallarinanchispaq tukupushaspapas. Estudiantenchispaqqa sutinmantan mañapunanchis, chhaynapin sonqomantapuni mañakuyta yachanqa Jesuspa sutinpi  (Mat. 6:9; Juan 15:16). Sapa p’unchay Bibliata leespa Diosmanta mañakuspa iman astawan Diosman achhuykunqa (Sant. 4:8). Chaykunata ruwaymi yanapanqa Diosman prometekuspa bautizakunanpaq.

12. ¿Imaynatan estudiantenchista yanapasunman Diospa amigon kananpaq?

¹² Yachachisqanchisqa estudiantenchispa sonqonmanmi chayanan, ¿imarayku? Sonqomanta tukuy ima ruwaypas lloqsimusqanrayku. Jesusqa sonqoman chayaqtan yachachiq, chayraykun runakunaqa payta qatikuqku (Luc. 24:15, 27, 32). Chaymi estudiantenchisqa manan yanqallatachu creenan Jehová Diospi, aswanpas taytanta amigonta jina qhawarinan (Sal. 25:4, 5). Bibliamanta yachachishaspa sut’itan rikuchinanchis imayna Jehová Dios kasqanta (Éx. 34:5, 6; 1 Ped. 5:6, 7). Imamantaña yachachishanchis chaypas yuyarichisunpuni imayna Jehová Dios kasqanta, munakuq, khuyapayakuq sumaq sonqo kasqantapas valorananpaq. Jesusqa niranmi: “Jehová Diosniykitan munakunki” chaymi “ñaupaq kaq aswan jatun kamachikuyqa”, nispa (Mat. 22:37, 38). Kallpachakunanchismi estudiantenchis tukuy sonqowan Jehová Diosta munakunanpaq.

13. Imatan willasunman estudiantenchisman Jehová Diosta astawan reqsinanpaq.

¹³ Estudiantenchiswan rimashaspaqa willasunmanmi Jehová Diosta munakusqanchista. Chaypin estudiantenchisqa reparanqa paypas Jehová Diosta munakunan kasqanta (Sal. 73:28). Yaqapaschá estudiantenchiswan t’aqwisqanchis qelqa sonqonchisman chayaran, Jehová Dios munakuq, yachayniyoq, chanin ruwayniyoq otaq atiyniyoq kasqanmanta yachay, chhayna kaqtinqa willasunmanmi estudiantenchisman tukuy chaykunarayku Jehová papanchista munakusqanchista. Kunanqa yachasun juj estudiante bautizakunanpaq pisqa kaq yanapaymanta.

14. Hebreos 10:24, 25 nisqan jina, ¿iman yanapallanmantaq estudiantenchista?

¹⁴ Llapanchispas munanchismi estudiantenchiskuna bautizakunankuta. Chaypaqmi ichaqa kallpachananchis juñunakuykunaman rinankupaq. Allin experienciayoq yachachiqkunan ninku: “Juñukuykunaman  riq estudiantekunan astawanqa iñiyninkupi ñauparinku”, nispa (Sal. 111:1). Wakinqa estudiantenkutan ninku allinta yachanankupaqqa juñukuykunamanpas rinanku kasqanta. Hebreos 10:24, 25 (leey) nisqanta leespa estudiantenchisman reparachisun juñunakuykuna allinninpaq kasqanta. Chaymantapas qhawachisunmanmi ¿Imaynatan huñunakuyniyku aparikun? * nisqa videota, kallpachasuntaq ama juñunakuykunaman faltakunanpaq.

15. ¿Imaynatan kallpachasunman estudiantenchiskunata llapa juñunakuykunaman rinankupaq?

¹⁵ ¿Imatan ruwasunman manaraq estudiante juñunakuyman riqtin otaq maynillanpi riqtin? Willasunmanmi juñunakuypi yachasqanchismanta. Chayta ruwaymi aswan allin invitallaymantaqa. Qosunmantaqmi juñunakuypi estudiakushasqan Qhawaq qelqata otaq Diospaq kausasunchis qelqatapas. Willallasunmantaqmi jamuq juñunakuypi yachananchismanta, chaymantapas tapurisunmanmi mayqenmanta astawan yachayta munanman chayta. Juñunakuyman rispaqa reparanqan juñunakuyninchiskunaqa mana juj religionkunapi jinachu kasqanta (1 Cor. 14:24, 25). Chaypin astawan reqsinqa juj cristianokunata, chaymi yanapanqa bautizakunanpaq.

16. a) ¿Imatan ruwananchis estudiantenchis bautizakunanpaq? b) ¿Imatan yachasunchis qatimuq yachachikuypi?

¹⁶ Chhaynaqa, ¿imaynatan estudiantekunata yanapasunman bautizakunankupaq? Kallpachasun estudiantenchista sapa semana estudiananpaq preparakunanpaqpas. Yachachisun sapa p’unchay Jehová Diosmanta mañakunanpaq, amigon kananpaqpas. Kallpachallasuntaq llapa juñunakuykunaman rinanpaqpas. (Qhaway “ ¿Imakunatan juj estudiante ruwanan?”, nisqata). Qatimuq yachachikuypin yachasunchis pisqa yanapaykunamanta allin yachachiq kananchispaq.