1. ¿Imaynapi tarikuspanchismi Jehová Diosta qonqapusunman?

ALLILLAN imapas kaqtinqa facil-llan Jehová Diosta serviyqa, sasachakuykuna kaqtinmi ichaqa sasa kanman. Chay sasa tiempokunapin Jehová Diospa yanapayninta maskhanchis. Ichaqa, ¿imatan ruwanchis imapas allillan kashaqtin? Yaqapaschá qonqapusunman Jehová Diosta serviy imamantapas aswan importante kasqanta. Chaymi Jehová Diosqa Israel llaqtatapas yuyarichiran tukuy tiempo payta yuyashanallankupaq (Deut. 6:10-12).

2. ¿Imatan yachasunman rey Asamanta?

² Asá reymanta yachaymi yanapawasunchis, payqa tukuy sonqonwanmi Jehová Diospi confiaran, manan sasa tiempokunallapichu Diosta maskharan, maskhallarantaqmi allin tiempokunapipas. Asaqa Jehová “Diospaq junt’aqllapunin karan tukuy kausasqan p’unchaykunapi” (1 Rey. 15:14). Chaytan rikuchiran Judá llaqtapi pantasqa dioskunata chinkachispa. Bibliaq nisqan jina payqa ‘wijch’uranmi waj dioskuna yupaychana altarkunata, moqo patakunapi yupaychana cheqaskunata, jinallataq yupaychana saywa rumikunata p’akiran, Asera diosaq rijch’aynintapas thuniranmi’ (2 Crón. 14:3, 5). Jinaspapas Maacá abuelantan reyna mama kayninmanta wijch’uran ídolo ruwasqanrayku (1 Rey. 15:11-13).

3. ¿Imakunamantan kay yachachikuypi yachasun?

 ³ Asaqa manan pantasqa yupaychayllatachu chinkachiran. Judá llaqtapi tiyaqkunatapas yanaparanmi Jehová Diosta jujmanta yupaychanankupaq. Chaymi Jehová Diosqa Asata samincharan, Judá llaqtamanpas thaj kayta qoran. * Kamachisqan tiempopiqa chunka watan Judapi thaj kay karan (2 Crón. 14:1, 4, 6). Kay yachachikuypin ñaupaqta yachasun imatas Asá ruwaran thaj kay tiempopi chayta. Chaymantataq imatas ñaupa tiempopi cristianokuna ruwaranku chayta yachasunchis, paykunaqa Asá jinan mana usuchirankuchu thaj kay tiempota. ¿Imaynatan mana tiemponchista usuchisunmanchu thaj kay tiempopi? Kay yachachikuypa tukuyninpin chay tapuyta kutichisun.

4. 2 Crónicas 14: 2, 6, 7 nisqan jina, ¿imatan Asá ruwaran thaj kay tiempopi?

⁴ (Leey 2 Crónicas 14:2, 6, 7). Asaqa willaranmi Jehová Dios Judá llaqtaman thaj kay tiempota qosqanta. Ichaqa manan chayraykuchu mana imata ruwaspa karan. Aswanpas sayarichiranmi llaqtakunata, muyuriqninpi alto perqakunata, torrekunata, punkukunatapas. Niranmi Judá llaqtapi tiyaqkunatapas: “Kay suyuqa munayninchispin kashan”, nispa. ¿Imatan chaywan nisharan? Jehová Diospa qosqan allpapi mana manchakuspa imatapas ruway atisqankutan. Chaymi Asaqa kallpacharan Judá llaqtata thaj kay tiempopi tiyashaspa ama tiemponkuta usuchinankupaq.

5. ¿Imaraykun Asá ejercitonta kallpacharan?

⁵ Chaymantapas Asaqa allintan kallpacharan ejercitontapas (2 Crón. 14:8). Chay  ruwasqanwanri, ¿mana Jehová Diospi confiasqantachu rikuchisharan? Manan, aswanpas rey kasqanraykun llaqtanta yanapasharan jamuq tiempopi ima sasachakuypas jamunanpi piensaspa. Yacharantaqmi Judá llaqtapi thaj kay tiempoqa mana wiñaypaqchu kananta, chhaynapunitaqmi karanpas.

6. ¿Imatan ruwaranku ñaupa tiempopi cristianokuna thaj kay tiempopi?

⁶ Ñaupa tiempopi cristianokuna qatikachasqaña karanku chaypas, karanmi paykunapaq thaj kay tiempopas. ¿Imatan ruwaranku chay tiempopi? Diosmanta jamuq allin willakuykunatan tukuy sonqowan willashallaranku. Hechos libron willan ‘Jehová Diosta manchakuspa kausasqankuta’. Chaymantapas mana sayk’uspa Diosmanta willasqankuraykun ‘paykunaqa askhayasharanku’. Chaywanmi yachanchis thaj kay tiempopi Diosmanta willasqankumanta saminchasqa kasqankuta (Hech. 9:26-31).

7, 8. ¿Imatan ruwaranku apóstol Pablo juj cristianokunapas thaj kay tiempopi?

⁷ Ñaupa tiempopi cristianokunaqa thaj kay tiempopi kaspan astawan Diosmanta willaranku. Jujninmi karan apóstol Pablo, payqa Éfeso llaqtapin qhepakuran chaypi Diosmanta willanapaq allinpuni kasqanrayku (1 Cor. 16:8, 9).

⁸ 49 Watapin qhari kay qarachata kuchuchikuymanta sasachakuy allichakuran (Hech. 15:23-29). Chayta iñiq t’aqakunaman willaqtinkun, apóstol Pablopas juj cristianokunapas astawanraq ‘Jehová Diospa siminmanta allin willakuykunata willaranku’ (Hech. 15:30-35). Chaymi “iñiq t’aqakunaqa iñiyninkupi aswan-aswanta kallpachakusharanku, sapa p’unchaytaqmi askhayasharankupas” (Hech. 16:4, 5).

9. ¿Imatan sapankanchispas tapukusunman, imarayku?

⁹ Kay tiempopiqa askha nacionkunapin libre kashanchis Diosmanta willananchispaq. Yaqapaschá tiyasqanchis llaqtapipas mana ima sasachakuypas kanchu, chaymi tapukuwaq: “¿Tukuy atisqaytachu ruwashani Diosmanta willanaypaq?”, nispa. Kay tukukuy p’unchaykunapin Diospa llaqtanqa astawanraq Diosmanta allin willakuykunata pachantinman apashan (Mar. 13:10). ¡Ancha allinmi kanqa chay llank’aypi yanapakushallasun chayqa!

10. ¿Imata ruwananchispaqmi kallpachawanchis 2 Timoteo 4:2 nisqan?

¹⁰ ¿Imatan ruwawaq thaj kay tiempopi tarikuspa? (Leey 2 Timoteo 4:2.) Chayta yachanapaqmi kaykunata tapukuwaq. ¿Atiymanchu astawanraq Diosmanta willayta? ¿Atiymanchu pitapas familiaymanta astawan Diosmanta willananpaq yanapayta otaq precursor kananpaqpas?, nispa. Manan kay tiempoqa qhapaq kaykunapi otaq qolqeyoq kaypi piensana tiempochu, tukuy chaykunaqa manchay ñak’ariy tiempopin chinkapunqa (Prov. 11:4; Mat. 6:31-33; 1 Juan 2:15-17).

11. ¿Imatan wakin iñiqmasinchiskuna ruwashanku aswan askha runakunaman Diosmanta willanankupaq?

¹¹ Askha iñiqmasikunan yachashanku juj simita jujkunaman Diosmanta astawan willanankupaq. Chaypaqmi Diospa llaqtan orqomushan askha simikunapi qelqakunata. 2010 watapaqmi qelqanchiskunaqa kasharan  500 simikunapi jina. Kunanmi ichaqa 1.000 más simikunapiña kashan.

12. ¿Imaynan sientekunku runakuna rimasqanku simipi Diosmanta allin willakuykunata uyarispa? Willay juj willakuymanta.

¹² Diosmanta allin willakuykunata rimasqanku simipi uyarispan runakunaqa kusikunku. Chaytan reparanchis juj hermanaq willakusqanpi, paysi risqa Memphis llaqtapi Estados Unidos nacionpi asambleaman, chay asambleas aparikusqa kiniaruanda simipi. Chay simitan rimakun Ruanda, la República Democrática del Congo, Uganda nacionkunapi ima. Rimasqan simipi asambleata uyarispan hermananchisqa niran: “17 wataña Estados Unidos nacionpi tiyashani chaypas, chayraqmi lliu yachachikuykunata entienderani”, nispa. Rimasqan simipi yachachikuykunata uyariymi sonqonman chayaran. Chaymi noqanchispas atispaqa kallpachakusunman juj simita yachananchispaq, chhaynapi astawan Diosmanta runakunaman yachachinanchispaq.

13. ¿Imatan ruwaranku Rusia nacionpi iñiqmasikuna thaj kay tiempopi tarikuspa?

¹³ Manan llapa iñiqmasinchiskunachu llaqtankupi Diosmanta willayta atinku, wakin nacionkunapiqa manan munankuchu gobiernokuna Diosmanta willananchista. Jujninmi Rusia. Iñiqmasinchiskunaqa askha watakuna qatikachasqa karanku, ichaqa 1991 wata marzo killamantapachan jujmanta Diosmanta willayta atiranku. Chay tiempopaqmi 16 000 jina iñiqmasikunan karanku. 20 watakuna pasaytataqmi 160 000 más iñiqmasikunaña karanku. Chaypin reparanchis iñiqmasinchiskunaqa allinta llank’asqankuta. Kay tiempopipas manaña thaj tiempopichu kashanku chaypas, kallpachakushallankun atisqankuman jina tukuy sonqowan Jehová Diosmanta willashanallankupaq.

14, 15. ¿Imaynatan Jehová Dios yanaparan paypi confiasqanmanta Asá reyta?

¹⁴ Jujmanta yachasun Asá reypa tiemponmanta. Judá llaqta thaj kaypi tarikusqanqa tukupuranmi, Etiopiamanta Zérah sutiyoq runan Judá llaqta contra maqanakuq riran juj millón soldadonkunantin, paykunaqa manan iskayarankuchu atipanankumanta. Asá reymi ichaqa Jehová Diospi confiaran. Chaymi Jehová Diosmanta mañakuran: ‘Diosniyku, yanapaykuwayku, qanmanmi jap’ipakuyku, sutiykipitaqmi kay sinchi askha soldadokunawan maqanakusaqku’, nispa (2 Crón. 14:11).

¹⁵ Etiopiamanta ejército aswan askhaña karan chaypas, Asaqa confiaranmi Jehová Dios atiyninwan Judá llaqtata yanapananpi. Yanaparanpunitaqmi kanpas. Etiopiamanta ejercitoqa manan jujnillanpas kausarankuchu (2 Crón. 14:8-13).

16. ¿Imaynapin yachanchis thaj kay tiempo tukukapunanta?

¹⁶ Manan yachanchischu ima sasachakuypi sapankanchispas tarikunanchista, thaj kay tiempopiña tarikusunman chaypas yachanchismi tukukapunanta. Jesusqa willaranñan “lliu llaqtakuna” qatikuqninkunata cheqnikuwananchista (Mat. 24:9). Apóstol Pablopas niranmi: “Cristo Jesuswan jujllachasqa kaspa Diosta serviqqa qatikachasqallataqmi kanqa”, nispa (2 Tim. 3:12). Chaymantapas Satanasqa ‘sinchi phiñasqan’ kashan, chaymi noqanchisqa mana nisunmanchu “noqataqa manan imanawanqapaschu” nispaqa (Apo. 12:12).

17. ¿Imakunawanmi yaqapas iñiyninchis probasqa kanqa?

¹⁷ Pisillamantan ‘manchay ñak’ariy’ tiempopi iñiynichis probasqa kanqa. Biblian nin: “Chay ñak’ariy jinaqa manan karanchu kay pachaq qallariyninmantapacha kunankamapas”, nispa (Mat. 24:21). Chay tiempopiqa yaqapaschá familianchispas noqanchis contra sayarinqa, Diospaq llank’ayninchispas jark’asqa kapunqa (Mat. 10:35, 36). Chaymi tapukunanchis: “¿Asá jinachu Jehová Diospa yanapayninpi confiasaq?”, nispa.

18. Hebreos 10:38, 39 nisqan jina, ¿iman yanapawasun jamuq tiempopaq allin kallpachasqa kananchispaq?

 ¹⁸ Jehová Diosqa munanmi jamuq tiempopaq allin kallpachasqa kananchista. Chaymi iñiyninchista kallpachashan ‘Allin yuyayniyoq junt’aq kamachiwan [..] tiempollanpi mijunata’ qospa (Mat. 24:45). Chaymi noqanchisqa tukuy atisqanchista ruwananchis iñiyninchista kallpachananchispaq (leey Hebreos 10:38, 39).

19, 20. 1 Crónicas 28:9 nisqan jina, ¿imakunatan tapukunanchis, imarayku?

¹⁹ Asá rey jinan Jehová Diosta maskhananchis (2 Crón. 14:4; 15:1, 2). Paytan maskhanchis reqsinanchispaq kallpachakuspa, bautizakuspa ima. Bautizakusqanchis qhepamanpas kallpachakushanallanchismi Jehová Diosta astawan munakunanchispaq. Chaymi tapukunanchis: “¿Kallpachakunichu llapa juñunakuykunaman rinaypaq?”, nispa. Juñunakuykunapin iñiyninchispi kallpata jap’inchis, iñiqmasinchiskunawanpas tupanchis (Mat. 11:28). Jinaspapas tapukullasunmantaqmi: “Sapallay tiyaspa, ¿kallpachakunichu Bibliata t’aqwinaypaq? Familiaywan tiyaspapas, ¿sapa semanachu Diosta yupaychani familiaywan? ¿Tukuy atisqaytachu ruwani jujkunaman Diosmanta willanaypaq, yachachinaypaqpas?, nispa.

²⁰ ¿Imaraykun chay tapuykunata ruwakunanchis? Imayna runa kasqanchista reparakunanchispaqmi. Biblian willan Jehová Dios yuyaykusqanchista, sonqonchistapas t’aqwisqanta, chaymi noqanchispas t’aqwikunanchis (leey 1 Crónicas 28:9). Ima mana allin ruway munasqanchista otaq yuyaykusqanchistapas reparakunchis chayqa, Jehová Diospa yanapaynintan mañakunanchis. Pisillamantan tukuypi probasqa kasunchis, chaymi allinta kallpachakunanchis thaj kay tiempopi kashaspa.