1, 2. ¿Imaynatan Eclesiastés 11:6 yanapawanchis Diosmanta allin willakuykunata willashanallanchispaq?

WAKIN nacionpi runakunaqa sumaqtan chaskikunku Diosmanta jamuq allin willakuykunata, chayqa ancha allinpunin. Wakin llaqtakunapin ichaqa pisita Diosmanta uyarikuyta munanku. Imaynaña llaqtanchispi runakuna kaqtinpas, Jehová Diosqa munanmi paymanta willashanallanchista kaykamalla niwananchiskama.

² Jehová Dios kaykamalla niwasqanchis p’unchay chayamuqtinmi “tukukuyqa chayamunqa” (Mat. 24:14, 36). ¿Imatan ruwananchis Jehová Dios kaykamalla niwananchiskama allin willakuykunata willashanallanchispaq? (Leey Eclesiastés 11:6.)

3. ¿Imakunamantan kay yachachikuypi yachasunchis?

³ Ñaupaq yachachikuypin yacharanchis tawa yanapaykunamanta allin ‘runakuna challwaq’ kananchispaq (Mat. 4:19). Kaypin yachasunchis Diosmanta willaypi yuyayninchis kashasqan, pacienciakuq kasqanchis, allin iñiyniyoq kaypas Diosmanta willashanallanchispaq yanapawasqanchista, ima sasachakuykunaña kaqtinpas.

4. ¿Imaraykun yuyayninchis kashanan Diosmanta willaypi?

⁴ Jesusqa willaranñan imakuna tukukuy p’unchaykunapi pasananta, imayna runakuna kanantapas. Chaymantapas willallarantaqmi yaqapas chaykuna pasasqanrayku qatikuqninkunaq yuyaynin mana Diosmanta willaypichu kananta. Chaymi Jesusqa niran: “Makilla kashaychis”,  nispa (Mat. 24:42). Kay tiempopipas imaymanapin runakunaqa afanasqa purishanku Noepa tiemponpi jina (Mat. 24:37-39; 2 Ped. 2:5). Chaymi noqanchispa yuyayninchisqa kashanan Diosmanta willaypi, manan kay pachaq ruwayninkunapichu.

5. Hechos 1:6-8 nisqan jina, ¿maykaman Diosmanta willakunan karan?

⁵ Kay tiempopas tukuy yuyayninchismi kashanan Diosmanta allin willakukuynata willaypi. Jesusqa willaranñan wañusqan qhepamanpas kay llank’ayqa ruwakushanallanta (Juan 14:12). Wañusqan qhepamanmi wakin qatikuqninkunaqa kutipuranku challway llank’ayninkuman. Ichaqa kausarimusqan qhepamanmi, Jesusqa juj milagrota ruwaspa askha challwakunata jap’inankupaq yanaparan wakin qatikuqninkunata. Chay kutipin yachachiran aswan allinqa runakuna challway kasqanta (Juan 21:15-17). Janaq pachaman kutipunanña kashaqtinmi qatikuqninkunaman willaran allin willakuykuna pachantinpi willakunanta (leey Hechos 1:6-8). Ripusqan qhepamanmi apóstol Juanman willallarantaq juj rujuriypi imakuna “Señorpa p’unchayninpi” pasananta. * Chaypin Juanqa rikuran musphasparaq angelkuna “allin willakuykunata [...] llapa nacionkunaman, ayllukunaman, rimaykunaman, llaqtakunamanwan” willasqankuta (Apo. 1:10; 14:6). Jehová Diosmi munan allin willakuykunata tukukuykama willananchista.

6. ¿Imakunapi yuyaymanaymi yanapawasun allin willakuykunata willashanallanchispaq?

⁶ Allin willakuykunata willananchispaqmi yanapawanchis Jehová Diospa yanapayninpi yuyaymanay. ¿Imaynatan yanapawanchis?, tukuy imaymanakunatan qowanchis,  chaykunan kashan: Qelqanchiskuna, uyarinapaq grabacionkuna, videokuna, JW Canal programapas. Chaymantapas internetpi qelqachiskunaqa waranqa más simikunapiñan kashan (Mat. 24:45-47). Kay pachapi runakunaqa t’aqanasqan kashanku politicarayku, religioninkurayku, qolqerayku ima, ichaqa pachantinpi 8 millones más Diospa kamachinkunan juj nisqalla kashanchis. Chaymi 2019 wata viernes 19 abril killapi, Jehová Diospa testigonkunaqa pachantinpi qhawaranchis sapa p’unchay t’aqwinanchis qelqamanta juj videota. Chay tutapin 20.919.041 runakuna juñukuranku Jesuspa wañusqan p’unchayta yuyarinankupaq. Chayta rikuyqa ancha kusikunapaqmi ¿riki? Chaykunapi yuyaykuymi yanapawanchis Diosmanta allin willakuykunata willashanallanchispaq.

7. ¿Imaynatan Jesusta qatikuy yanapawasunman tukuy yuyaywan Diosmanta willashanallanchispaq?

⁷ Jesusta qatikuymi yanapawallasuntaq Diosmanta willaypi tukuy yuyayninchista churananchispaq. Payqa tukuy yuyaywanmi willaran Diosmanta cheqaq kaq willakuykunata (Juan 18:37). Manan engañachikuranchu Satanasña “kay pachapi llapa nacionkunata qhapaq kayninkunatawan” munachiran chaypas, nitaq runakuna kamachikuqta churayta munaqtinkupas (Mat. 4:8, 9; Juan 6:15). Manataqmi qhapaq kaykunatachu munapayaran nitaq runakuna cheqnikusqankuraykuchu pisikallpayaran (Luc. 9:58; Juan 8:59). Pabloq nisqan jina, iñiyninchis probasqa kaqtinqa Jesusta qatikuymi yanapawasun ama sayk’unanchispaq ni pisipananchispaqpas (Heb. 12:3).

8. ¿Iman pacienciakuq kay, imaraykun allinpuni?

⁸ Pacienciaqa tiempollanpi imapas pasananta suyakuymi. Yaqapaschá suyakushanchis ima sasachakuypas tukupunanta otaq, imatapas unayña suyakushanchis, chaypaqmi necesitanchis pacienciakuq kayta. Profeta Habacucpas suyakusharanmi Judá suyupi millay ruwaykuna tukupunanta (Hab. 1:2). Jesuspa qatikuqninkunapas “piensarankun Jerusalenman chayaqtinku jina Diospa gobiernon rijurimunanta”, chhaynapi romanokunamanta kacharichisqa kanankupaq (Luc. 19:11). Noqanchispas suyakushanchismi Diospa gobiernon chayamuspa millay kausayta chinkachinanta kay pachata mosoqyachinantapas (2 Ped. 3:13). Arí, pacienciakuqmi kananchis chay p’unchay chayamunankama. Qhawarisun imaynatas Jehová Dios yachachiwanchis pacienciakuq kananchispaq chayta.

9. ¿Imakunapin reparanchis Jehová Dios pacienciakuq kasqanta?

⁹ Jehová Diosqa ancha pacienciakuqmi. Chaymi Noetaqa pacienciawan suyakuran arcata ruwananpaq ‘chanin kaqmanta willanantapas’ (2 Ped. 2:5; 1 Ped. 3:20). Sodoma, Gomorra llaqtakunata manaraq ch’usaqyachishaspan pacienciawan uyariran Abrahanpa chay llaqtakunamanta tapukusqanta (Gén. 18:20-33). Askha watakunan Jehová Dios pacienciakuran Israel llaqtanwanpas (Neh. 9:30, 31). Kay tiempopipas pacienciawanmi suyakushan runakuna millay ruwaykunata saqepuspa amigonkuna kapunankuta (Juan 6:44; 1 Tim. 2:3, 4; 2 Ped. 3:9). Jehová Dios pacienciakuq kayninmi yanapawanchis runakunaman Diosmanta willashanallanchispaq.  Jehová Diosmi yachachiwanchis pacienciakuq kananchispaq juj rijch’anachiywan, chaymanta yachasunchis.

10. Santiago 5:7, 8 nisqan jina, ¿imatan yachasunman chajra llank’aqmanta?

¹⁰ (Leey Santiago 5:7, 8). Chajra llank’aqmanta yachaymi yanapawasunchis pacienciakuq kananchispaq. Wakin plantakunaqa ratullan wiñamun, ichaqa unaymantan rurumun. Israel llaqtapiqa soqta killa jinan cosechata suyakuqku. Chajra ruwaqqa kuskan octubre killatan tarpuq, kuskan abril killapitaq cosechaq (Mar. 4:28). Chajra ruwaq jinan pacienciayoq kananchis. Chaywanpas manan facilchu pacienciayoq kayqa.

11. ¿Imaynatan pacienciakuq kay yanapawasun Diosmanta willayninchispi?

¹¹ Juchayoq kasqanchisraykun runakunaqa usqhaylla imatapas munanchis. Pipas huertonpi imatapas tarpun chayqa qhawashanallanmi. Tarpusqan qhepamantaq qarpanan, qoreanan ima. Chhaynallataqmi runakunaman yachachiypas. Tiempotan necesitanchis Bibliamanta yachachisqanchis runakunaq sonqonkukumanta mana allin piensaykunata costumbrekunata orqonanchispaq. Runakuna mana uyariyta munawaqtinchisqa pacienciakuq kaymi yanapawasun ama pisipananchispaq. Allintaña uyarikuqtinkupas pacienciakuqmi kananchis. Manan obligasunmanchu usqhaylla iñiyninkupi wiñanankupaq. Mayninpiqa Jesuspa qatikuqninkunapas manan llapantachu entienderanku yachachisqanta (Juan 14:9). Noqanchisña tarpunchis qarpanchis chaypas Diosmi wiñachiqqa (1 Cor. 3:6).

12. ¿Imakunan yanapasunchis familianchiswan pacienciakuq kananchispaq?

¹² Mayninpiqa familianchiskunaman Diosmanta yachachiqtinchismi sasa kanman  pacienciakuq kay. Chaypaqmi Eclesiastés 3:1, 7, nisqan yanapawasunman, chaypin nin: “Kanmi upallakuna tiempo, rimana tiempopas”, nispa. Allinta kausasqanchiswanña familianchista yanapasunman chaypas, kallpachakunchismi paykunawan Bibliamanta rimananchispaq (1 Ped. 3:1, 2). Kusikuywanmi llapamanpas Diosmanta willanchis yachachinchispas, ichaqa pacienciakuqmi kananchis paykunawan familianchiskunawanpas.

13, 14. ¿Pikunatan qatikunanchis pacienciakuq kananchispaq?

¹³ Pacienciakuq kananchispaqmi yanapawanchis ñaupa tiempopi Diospa kamachinkunamanta yachay. Jujninmi Habacuc, paymi munaran millay kausay tukupunanta, chaymi payqa chayta yachaspa niran: “Qhawana patapin makilla qhawashasaq”, nispa (Hab. 2:1). Apóstol Pablopas munaranmi kay pachapi llank’aynin tukupunanta. Chaywanpas kallpachakushallaranmi ‘allin willakuykunata allintapuni willananpaq’ (Hech. 20:24).

¹⁴ Galaad escuelaman riq casarasqa iñiqmasinchiskunamanta yachasun, paykunaq risqanku nacionpiqa pisillan Testigokunaqa karanku, manan chaypiqa cristiano religionpas karanchu. Chaymi paykunapaqqa sasa karan Diosmanta yachay munaq runakunata tariy. Galaad escuelamanta juj nacionkunapi tarikuq compañeronkunan ichaqa, askha runakunata yanapaskumanta willamuqku. Chaywanpas paykunaqa manan pisikallpayarankuchu, pacienciawanmi Diosmanta yachay munaq runakunata maskhashallaranku. Paykunaqa pusaq wata Diosmanta willasqanku qhepamanraqmi rikuranku jujnin yachachisqanku runa bautizakusqanta. Paykunaqa mana sayk’uspa pacienciawan Diosmanta willasqankuraykun Jehová Diospa saminchayninta rikuranku. Chhaynaqa, noqanchispas kallpachakunanchismi ‘iñiywan pacienciawan ima promesata chaskiqkuna jina kananchispaq’ (Heb. 6:10-12).

15. ¿Imaynatan allin iñiyniyoq kay yanapawanchis Diosmanta willashanallanchispaq?

¹⁵ Allin willakuykunapi iñisqanchisraykun llapa runakunaman yachachiyta munanchis. Confianchistaqmi Diospa promesankuna junt’akunanpi (Sal. 119:42; Is. 40:8). Kay tiempopipas wakin profeciakunaqa junt’akushanmi. Chaymantapas reparanchismi Bibliaq yanapayninwan runakunaq kausaynin aswan allin kasqanta. Tukuy chaykunan rikuchiwanchis llapapas Diospa gobiernonmanta allin willakuykunata necesitasqankuta.

16. Salmos 46:1-3 nisqan jina, ¿imaynatan yanapawanchis Jehová Diospi Jesuspipas iñiy Diosmanta willashanallanchispaq?

¹⁶ Chaymantapas Jehová Diosmantataq jamun allin willakuykuna chayqa, astawanmi iñinanchis Jehová Diospi Jesuspipas (Juan 14:1). Imaña kaqtinpas Jehová Diosqa pakaykuwasunmi, kallpachawasun iman (leey Salmos 46:1-3). Chaymantapas Jesusmi janaq pachamanta allin willakuykuna aparikunanpaq umallimushan, chayta yachaymi yanapawanchis Jehová Diosmanta willashanallanchispaq (Mat. 28:18-20).

17. ¿Ima willakuymi kallpachawanchis Diosmanta willashanallanchispaq?

¹⁷ Manan iskayanchischu allin willakuykunata willananchispaq kallpachakusqanchista  Dios bendecinantaqa (Ecl. 11:6). Chaytan reparallanchistaq mesapi otaq carretapi qelqanchiskunawan Diosmanta willaspa. ¿Allinchu chhaynata Diosmanta willay? ¡May allinpunin! Diosmanta willasunchis 2014 wata noviembre killa qelqapin lloqsimuran universidadpi estudiaq sipasmanta, paymi Jehová Diospa testigonkunamanta qelqayta munasqa, ichaqa manan tarisqachu juñunakunanchis wasita, aswanpas tariranmi mesapi qelqanchiskunawan Diosmanta willaq iñiqmasinchiskunata. Jinan payqa necesitasqanta tariran qelqananpaq. Tiempowanmi payqa bautizakuspa tukuy tiemponwan Diosmanta willaq kapuran. Chayta yachaymi kallpachawanchis astawan Diosmanta willashanallanchispaq.

18. ¿Imaynapin yachanchis Diosmanta willasqanchista Jehová Dios tiempollanpi tukuchipunanta?

¹⁸ Jehová Diosqa yachanñan jayk’aqkama gobiernonmanta willananchista. Noepa tiemponpipas Jehová Diosqa yacharanñan jayk’aq millp’uq para apamunanta. Payqa 120 wata ñaupaqtañan chayta yuyaykuran. Askha watakuna pasaytataq Noeta kamachiran arcata ruwananpaq. Chaymi Noeqa 40 otaq 50 watakuna jina llank’aran arcata ruwananpaq. Manaña runakuna uyarikurankuchu chaypas, payqa willashallaranmi Diospa Juicionmanta, Jehová Dios animalkunata arcaman jaykuchinanpaq kamachinankama. Jinan tiempollanpi Jehová Diosqa arcaq “punkunta wisq’aykapuran” (Gén. 6:3; 7:1, 2, 16).

19. ¿Iman kanqa mana sayk’uspa Diosmanta allin willakuykunata willashallaqtinchis?

¹⁹ Pisi tiempollamantan Jehová Diosqa kaykamalla niwasunchis, Saqraq kamachisqan pachata tukuchispan mosoq pachapi chanin kausayta apamunqa. Chaykamaqa Noé jina, Habacuc jina wakin junt’aq sonqo runakuna jina kallpachakushallasun Diosmanta allin willakuykunata willaypi. Chaypaqmi yanapawasun Diosmanta allin willakuykunapi yuyayninchista churay, pacienciankuq kay ima, chaymantapas yanapawasunmi Jehová Diospi, promesankunapi iñiypas.